Мамукъати Хъазбег

  ИСКОВУН...

Ристи циргъбӕл фӕндур ӕррӕсагътон,
Нӕбал заруй хӕтӕл, исхъурмӕ ’й.
Ци цагътон – ӕнхӕст ӕй нӕ рацагътон,
Ци зардтон – къуӕттиау ӕй, курмǽ ‘й.

Ӕрӕллау нӕбал ес мин, ӕрцъундӕ,
Ниууагътон ӕвӕгӕс мӕ къӕсӕр,
Фӕлласуй кӕд дуйнейи гъенцъунтӕ
Мӕ тухст зӕрди уӕрдун кумӕдӕр.

Исковун уӕддӕр-ма Сӕризӕдмӕ,
Мӕ сугӕн тухуорамгӕй ӕ гъӕр:
«Нӕ дзилагӕ цӕуй сӕрисӕфтмӕ –
Фӕ нни сорӕ муггагмӕ ахǽр!..»

21.08.2023

  АРТ-УАДЗЕВЗÆ

Мæхемедæг цæфсун синдзин арти,
Арт-уадзевзӕй мæ уод ницъцъӕх ӕй, –
Кӕд неуй сугъд уӕзгути гъæууати,
Æ фӕсдзӕгат ӕрвнӕрд инæргъгӕй.

Инæргъун кӕд ӕз дӕр, мæ уод гъаргæй,
Исрохс уа, кæдимайди, ме ʻсон, –
Ивæруй мæбæл арв æ игакæ,
Æ тафсийнæ æма æ уездон!

Æ тафсийнæй, миййаг, нæ багъар дæн,
Ниххаугæй рæнгъæ-сæни буркуй, –
Мæ догъон бæх нæ йæй сау сагартæн,
Гъе уӕддӕр мӕ уадау ӕскъӕфуй.

18.08.2023

КÆРКУАСÆНТИ

Ке рохс кæлуй къæрæзгитæй? –
Хæстбойнон æй æмдзæвгитæй?
Уацамон æй, æрдамон æй,
Нæхстæйрон æй, хæдзайрон æй?

Къæрæзгитæн сæ фæрскъитæй
Ке дудзирос æрæскъиттæй?..
Ке фæсмон си æрдудагъ æй,
Ке цæстисуг æр си тагъдæй?

Ке уадзевзи тасгæ-уасгæй
Раидзулдæй и къæразгæй? –
Цæй, байгас кæнæ не ʻрхæнтæ,
Нæ уодагъай, зæрди гъæнтæ...

12.08.2022

Дзурдуат:
Хæстбойнон – беременность
Уацамон – здесь: вестник
Æрдамон – показатель истины, правды, свидетель дачи клятвы
Нæхстæйрон – собирающийся отправиться в путь
Хæдзайрон – домашний, домовитый
Уадзевзи – стихотворение
Æрхæн – рана, ссадина
Уодагъай – мучение, страдание, терзание
Гъæнæ – рана, повреждение, язва

МÆ ФÆНДУРИ ГЪЕС

Ци цъæхснаг æй, цæмæй конд æй
Мæ фæндури итинг гъес, –
Дуккаг уод кæд ес æ уоди,
Æ зæрди ма зæрдæ ес.

Сæумæсарæй изæрсармæ
Куд ин æнтæсуй цæгъдун, –
Æ зæллæнгтæ – Арви дуармæ,
Æ сосæгтæ – мæ рæбун.

Ехх, ку ʻй уайдæ Арви арфæ,
Тæходуйтæ-тæходуй!.. –
Хорæрцъýнди ʻй Балисафæг
Зæрин тунæй фæлгъæндуй.

08.08.2022

Дзурдуат:
Балисафæг – звезда, которая первой появляется на небе после захода солнца
Фæлгъæндун – здесь: окрашивать

 МӔ БАЛЦИ

Ци ерисхӕ, ци ахӕри
Ниццӕйхӕссун хаттӕй-хатт,
Кумӕ рараст ун уагӕри? –
Синдзӕ-рагъбӕл – мӕ къахнад.

Нифс-хизин уӕддӕр – ме ‘фцӕги,
Ауӕ-ǽсхъӕр – мӕ уӕле,
Мӕ уадзевзий рӕнгъӕ-зӕнги
Десӕ-мести цӕхӕр е.

Исасодздзӕнӕн уадсестӕ,
Ниррохс уодзӕй мӕ къахнад, –
Фӕццӕйхӕсдзӕнӕн уӕ незтӕ,
Уӕ хъурмитӕ фуридард!

31.07.2023
 

МАЙДИМА

Къулух-къулух фӕццӕйцудтӕн,
Ма баходӕ – фӕккиудтӕн! –
Майдима дин ӕнӕсдзурд дӕн,
Майдима дин къуӕтти дӕн.

Кӕдимайди хуӕрзигурд дӕн,
Кӕдимайди дӕн хуӕрзконд, –
Фӕццӕйхудтӕн, фӕццӕйкудтӕн,
Фӕццӕйӕскъудӕй мӕ уод.

Ма мӕ уозӕ аргъау-дзурдтӕй,
Ма лигъз кӕнӕ мӕ уӕлнад, –
Никъкъелдзо ‘нцӕ мӕ дзабуртӕ,
Ниффӕлахс ӕй мӕ дӕлфад.

Ци дзорон ибӕл идӕрдти,
Зӕгъдзӕнӕн дин ӕй ӕргом:
Нӕбал ес тӕхун мӕ зӕрди,
Нӕбалдӕр дӕн цӕунгъон...

29.07.2023

 

ИС НӔ РОХС КӔНӔ!..

Нӕ баскъуӕлхтӕн дзухи къӕбӕл,
Сӕуми тунӕ, изӕр-фун,
Фал лимӕнтӕ, зӕрддӕгтӕбӕл
Дестӕ-местӕ изӕрун.

Нӕ фӕразуй мӕ дзурд-ӕрций
Кӕд сӕ незтӕ ӕмпъозун,
Гъе уӕддӕр син ӕз, ӕвӕдзи,
Сӕ зӕрди гъӕнтӕ носун.

Нӕ сӕумитӕ, нӕ изӕртӕ,
Ис нин есетӕ нӕ сау, –
Ис нӕ тахетӕ, изӕдтӕ,
Ис нӕ рохс кӕнӕ, Хуцау!

29.07.2023