Сабанти Барис
Цæмæн цæрун æз дуйнебæл?
Ци агорун ме’мзæнхонтæй?
Мæ фæлтæрæй æз ци хезун?
Алли доги уотæ адтæй,
Алли доги уотæ уодзæй:
Ка губунæн, ка æ мулкæн,
Ка Хуцауæн, ка хецауæн –
Алке ковуй!
Кæми райсдзæн уæхæн хъарæ,
Кæми уодзæн уæхæн зундгин,
Цæмæй адæми мæ фæдбæл
Хуæздæр цардмæ исаразон,
Цæмæй адæмæн сæ зинтæ
Сæ зæрдæбæл мæ лæууонцæ?
Мæ зин бонтæ, мæ рист зæрдæ
Ке гъудæнцæ?
Нур мин уайдæ æртæ фурти,
Кувдтитæбæл æз хæтинæ,
Алли изæр расуг зартæ
Мæ хæдзарæй игъусидæ –
Æз мæхецæн ку цæринæ!
«Æз мæхецæн ку цæринæ?»
Цæмæн цæрун æз дуйнебæл?
Ци пайда хæссун мæ цардæй
Мæ адæмæн, мæ бинонтæн,
Мæ хеонтæн, ме´мзæнхонтæн?
Æз мæхецæн ци пайда дæн?
Цæмæй тас дæн æз ме знæгтæн?
Ци нифс дæттун æз ме´мбæлттæн?
Кæци надбæл мин цаугæ ‘й?
Еуæй-еу хатт æй мæ барæ
Мæ зæрди хæццæ дзубанди.
Æй мæ барæ мæ идонæ
Исуæгъдæ кæнун сахатмæ
Æй мæ барæ?
