Дигори заргӕ уод.

Дигори уод заргӕ кӕнуй,
Ӕ рохс - ӕнӕкъӕнӕ!
Кӕдиккон ӕй, ци уӕларвӕй
Цӕуй е 'нӕгъӕнӕ?..

Кӕци догити - ӕмцахъхъӕн,
Налмазау игурд,
Хуцауӕн ӕхе рохсӕй йӕй,
Уомӕй йӕй фӕлгурд?..

Хестӕр мадау ӕ гъӕрмости
Кети исхаста,
Табу кӕнгӕй сагигурдтӕ
Кӕмӕй аразта?..

Сиау уодӕг кӕмӕн адтӕй,
Ӕрдзӕт бавзаргӕй,
Зӕнхи уодӕн ӕй ӕмбийнӕ,
Сӕ ӕнхӕ - ӕмтгӕй?..

Дигори уод заргӕ кӕнуй,
Дуйне истӕрнуй,
Еси мӕлгъау ӕ зӕллангӕй
Фарнитӕ хӕссуй!..

Дзурдуат :

ӕнӕкъӕнӕ - без пятнышка; совершенный, идеальный, незапятнанный, безупречный, ӕнӕгъӕнӕ - весь, все, вся; целый, неповрежденный, цельный, нетронутый, уцелевший, ӕмцахъхъӕн - одного возраста, ровесник,
налмаз - алмаз,
фӕлгурд - перерожденный,
сиау - ценный, дорогой;- сияющий,
ӕрдзӕт - бесконечное множество, очень много,
ӕмбийнӕ - ровня, равный,
ӕнхӕ - бытие,существование,
ӕмтгӕй - всего,в общем, вообще, скопом, я
истӕрнун - украшать,разукрашивать,
еси мӕлгъӕ - птица счастья.

Мӕ тог, ме 'стӕг.

Мӕ реуи арв ӕнӕ 'скъунгӕй
Куд фӕразтон нурмӕ ба?
Дигоргомбӕл, Иристонбӕл
Зардтайнӕ, цит, гъӕуама!..

Мӕ зӕрдӕн ӕ дзӕгӕргути
Нӕ дзиллитӕ нӕ тухтон?
Къӕхтӕ къуӕргӕй ке уи зинмӕ
Мӕхе размӕ нӕ гӕлстон?

Ке бӕдолӕ уи мӕ арми
Зурнавдӕнау нӕ узтон?
Ке уи 'знагмӕ, мӕ арт цӕфсгӕй,
Мӕ фур мӕстӕй нӕ туддон?

Мӕ тог, ме 'стӕг, ӕммононтӕ,
Мӕ нӕртон зӕнхи лӕвар,
Маке уод уи зин ӕвзарӕд,
Маке фӕууӕд кадавар!

Хортӕ - мӕйтӕ ӕййевӕнтӕ,
Фанс лӕуарӕнтӕ дзумард,
Уӕ изӕдон, рӕсог аппӕ
Цардӕн фӕууӕд цӕстивард!

Дзурдуат :

ӕммонон - единый по духу
кадавар - скудный, бедный
фанс - благо, добро, богатство
дзумард - щедро, щедрый
аппӕ - содержание; ядро, косточка, сердцевина

Цард

Абони бал ӕмбойни
Евгъуйуй нӕ цард.
Идард ӕмгъуд нӕ комуй,
Нӕ цӕфсуй ӕ й' арт.

Дзибирцъеуау фӕразуй
Нифситӕй цӕрун,
Фал, е 'нгъӕлци халӕ
Нӕ комуй 'лвесун...

Бӕргӕ гебох равзаруй
Хӕрдти истӕхун,
Къӕдзелӕгун стъалуйау
Ӕ фӕд бедаун...

Гъулӕггагӕн, ӕ уайтӕ
Цӕунцӕ ӕфхуӕрд,
Гӕлӕххатӕ, адӕнтӕ,
Ма 'й кӕнтӕ ӕвӕд!

Дзурдуат :

ӕмбойни - за один день, в тот же день, однодневный,
дзибирцъеу - певчая птичка,
гебох - гордый,довольный; дротик,штык,
къӕдзелӕгун стъалу - комета,
уайтӕ - желания, мысли.

Киндзӕн салан

Арсау - хъӕболгун!
Каркау - бӕдолгун!
Мистау - рӕбунгун!
Бинонтӕн - адгин!
Дзиллитӕн - кадгин!
Синхӕн - ӕфсийнӕ!
Мойнӕн - зӕрийнӕ!
Аулӕн - дзӕфсӕ!
Бӕркадӕн - кесӕ!
Донау - абузӕ!
Фарнитӕ - хӕссӕ!
Киндзӕ - къӕсӕрмӕ!
Амонд - ӕ сӕрмӕ!
Авд фуртей - мадӕ!
Еу кизгӕй - радӕ!
Хортӕ - дӕ цуди!
Мӕйтӕ - идзулди!
Ма зонӕ - бостӕ!
Ӕгассо, ностӕ!

Дзурдуат :

салан, салам - привет, приветствие,
аул - родня, ближайшие родственники,
дзӕфсӕ - помощь, подмога, содействие, поддержка, подспорье, опека, забота,
кеса, кесса, кесӕ - большая деревянная чаша с двумя ручками,
радӕ - мӕ бони радӕ - радость моя; радость, голубчик; очередь, череда;
ностӕ - невестка.

Фун

Ӕдосизӕр фун фӕййидтон,
Дессаг - дессаг фун!
Зӕнхи тӕгӕл, мондидзагӕй,
Базудта цӕрун!

Ӕ зинтӕ ин еу ӕстӕрдӕй
Дунгӕ фӕххаста,
Е 'рӕллауий, ахскиагау,
Цард ӕрбатухта...
Цъӕх дарийау тӕмӕн калуй,
Ӕ дӕнттӕ хӕссуй,
Хори тунтӕй киндзи хизӕ
Ӕ сӕрмӕ цӕфсуй!
Ци рӕсугъд ӕй, ци нивгун ӕй,
Ӕ уарзт - парахат,
Тӕходуйтӕ, бацӕйнайӕ
Ӕ рохси еу хатт!
Рагуалдзӕги дзӕгӕрӕгау
Бӕлӕстӕй тӕхӕ,
Сувӕллонау дӕ ӕууӕнкӕй
Аразӕ ӕнхӕ...
Некӕд адтӕй а зӕнхӕбӕл
Уарзти замана :
Кӕрӕдземӕ, тӕлӕн хӕсгӕй,
Ӕнос фӕййинай!
Ӕдосизӕр фун фӕййидтон, -
Асӕг уӕхӕн нӕй!..
Хъадамати, инод кӕнгӕй,
Нӕ зӕнхӕ мӕлуй...

Дзурдуат :

зӕнхи тӕгӕл - земной шар,
мондидзагӕй - блаженствуя,
ӕллау - первоначальное состояние, сатори,
ӕнхӕ - бытие, существование,
асӕг,уасӕг - явь, явный,
хъадаматӕ - путы, кандалы

Ӕгуӕдӕг

Аци рӕсугъд кизгӕ, дан,
Ке хузӕн ӕй,цума?
Е ба ма дин уӕрӕдӕс,
Ке хузӕн, гъӕуама!

Мӕ дзиккотӕ - мӕ мадӕй,
Сайнӕг ӕрттевунцӕ,
Мӕ цӕститӕ - мӕ фидӕй,
Ӕдзинӕг кӕсунцӕ!

Сӕ дестӕгӕнгӕ ӕнгас -
Бабайӕй байзадӕй,
Мӕ нанайӕй - дацци ном
Нихӕст ӕризадӕй...

Нӕ тикис дӕр ми,
Ӕвваст, хатгай
фӕббӕрӕг уй:
Алкумӕ дӕр, ӕнӕсайд,
Бакӕнун ӕрӕги!..

Гъомус.

Цидӕр уа, куддӕр уа, -
Ду дӕ къохтӕ ма 'руадзӕ!
Фӕсмонтӕн, гъенцъунтӕн
Циргъ дӕндӕгтӕ ма садзӕ!

Ӕгънӕгау дӕ дӕлхъур
Цийни цъита бафтауӕ, -
Тӕмӕн калгӕ хорау
Исабуззӕй дӕ ауӕ!

Ӕнӕ рӕсӕн нӕййес, -
Еу удзестӕ 'й бӕл уайуй,
Ӕ хъурмитӕй ӕстӕн
Ка ба ни нӕ бакайуй...

Хекъуйӕн ӕнӕсайд,
Бӕлвурд хуасӕ дӕ мони -
Нӕртон урру артау! -
Дӕ царди алли бони!


Дзурдуат:

гъомус - сила, мощь, могущество; влияние,
ауӕ - сила,энергия,
рӕсӕн - остановка,привал,стоянка,
хекъу - депрессия,
мон - дух,
урру, урр - ура!