Малити Геуæрги
***
Маргъ ку фестинæ,
Мæ унгæг къумæй
Фæццæйтæхинæ.
А дуйнетæбæл
Æрцæйзелинæ,
Кæми ци дессаг,
Уой басгаринæ…
Тæходуй, æназау
Æцæмæ дин
Æз ку фестинæ
Дессаг фмндургин:
Хъазбеги цъонгмæ
Исцæйцæуинæ,
Дессагон зартæ
Æрцæйцæгъдинæ…
Уæд еугур дуйне
Æримбурд уидæ,
Мæ цæгъдтæлтæмæ
Æригъосидæ.
Кæми ци седзæр,
Кæми ци мæгур, -
Бауарзионцæ
Мæ дессаг фæндур…
И фарни тунæ
Æрфелауидæ, -
Уарзондзийнадæ
Æрфедар уидæ.
Уæд алли адæм,
Уæд алли бæстæ
Æркалионцæ
Сæ тохæн гæрзтæ.
Фал ку не ‘ууæндун
Æз, мæгур кизгæй,
Ку нæ рохс кæнуй,
Мæ кизгон зæрдæ.
И дуйней сæргъи
И тугъон мегътæ
Æрцæйдарунцæ
Сæ тогин тегътæ.
1934
Мостиздах
Гурджибети Блашка
АБÆРЕГ
Орирйæ, мæ сау бæх,
Мæ царди — мæ дарæг!
Орирйæ, мæ саулох,
Абæрег – дæ бадæг!
Мæ фидæ – медхонх дигорон,
Мæ мадæ — хаст Кæсæгæй;
Цæрун сæ мæрдæй æнæ ном,
Æнæ уарзгæ фудлæгæй...
Ирæзтæн рунгин æвзонгæй,
Цъумур бауæр, гæбæрæй;
Цардтæн хуæрдгъæуагæ, стонгæй
Æз, не ’фсæдгæй къæбæрæй.
Адтæй унгæ мæ дигиза,
Зæронд пæлæз – мæ дарæс.
Мæ номи хай – фуд Елмæрза;
«Ка ’й е, ка?» ба – мæ сагъæс...
Рацудæй мæбæл мæ карæ,
Феронх æй мæ мæ хæстæг...
Цидæр фæцæй мæ хæдзарæ, –
Нæ фæцæй имæ кæсæг.
Фæттæргай дæн нæ адæнæй,
Абæрегæй ралигъдтæн,
‘Ма нивгун исдæн алцæмæй,
Ратгæй барæ мæ нихтæн.
Скодтон æхсæви ме ’рвадæ,
Райстон дунги æнбалæн;
Хонун нæ бæстæ мæ мадæ,
Кæнгæй ибæл цауæн...
Æфсатий фонс – мæ хуæруйнаг,
Мæ кегъæре – мæ цæсгон.
Æппæлуйнаг – мæ хъæрæймаг,
Æппæлуйнаг – мæ кæсгон...
Уотæ’й мæнæн нур мæ цард,
Фал куд уодзæнæй æ фæстаг:
Ка ’вæрдзæнæй мин мæ мард,
Нæбал уогæй æз бæстаг?
Ци уодзæнæй мин нивæрзæн,
Дзæгъæл лæгæй ку сæйон?
Кенæ сугъд бунгард нæ кæрзæн,
Кенæ уотид къудурон.
Ка ’нцъолдзæнæй мæ цæститæ
Мæнæн, хъурмæй ку мæлон?
Кенæ, стонгæй, цъæх æрситæ,
Кенæ надбæл нæ бæлццон.
Ка скæндзæнæй ми кадæнгæ,
Ихалунмæ дор-мæсуг?
Ка никкæндзæнæй гъарæнгæ,
Фæккалунмæ цæстисуг?
Неке... Уад зуст дзиназдзæнæй,
Резунгæнгæй дорин хонх,
‘Ма мæ сæргъи бастдзæнæй
Тæрегъæдтаг мæ саулох...
Орирйæ, мæ сау бæх,
Мæ царди — мæ дарæг!
Орирйæ, мæ саулох,
Абæрег – дæ бадæг!
Багъæрати Созур
МÆСУГИ
(Фиддæлти цардæй)
Думуй, гъизуй нæ сау хонхи.
Мæсуг гъæрзуй æ фарсæй.
Лæгæн æ гæрзтæ æ къохи,
ефтигъд æ фат, æ хуасæй.
Нæ лæг зинтæй æрзæронд æй,
сæрæй цæстæй фæлгæсуй,
æрветуй цард æнамондæй,
кæсуй, цæстæй фæлмæцуй.
Бунæй, хæдзари бинонтæ —
тæрсуй уонæн хæссунæй.
Судæй неунцæ биццеутæ,
сæ еу хуссуй æрхунæй.
Зинæн бухсуй сæ ниййерæг,
кæуй, хъуæцæй лæмаруй.
Зæгъуй: «Цæттæ'й уæ фезонæг», —
фид син бæрцæй иуаруй.
1914 анзи сентябри 12 бон
Къибирти Амурхан
КӔМТИ РОХС
Созурӕн
Дӕ курхон, циргъ зундӕй,
Дӕ цӕхгӕрлух дзурдӕй
Кӕмтти рохс рахастай...
Дӕ фӕсте игъустӕй
Губундзӕл - уӕцъӕфтӕн
Сӕ уайдзӕфти цӕфтӕ:
"Дӕ ахилӕй, сурдау,
Ду, сау гъӕди сирдау,
Ци хуарзӕнхӕ хизтай,
Ке нӕбӕл авинстай?
Ӕнамонд, ӕнӕ фес,
Ке туххӕй райстай нез?
Ци кодтай дӕ финстӕйщ,
Дӕ уод си, кӕд, хинстай?..
Дӕ сабий-авдӕйнон, -
Исафдзӕй ӕй дӕ ном..."
Сӕ дзурд син нм истай, -
Ду финстай ´ма финстай...
02.05.2000
Мамукъати Казбек
Ци кӕнуй, цума, ме ‘лхуйнӕ...
Малити Г. Ӕлхуйнӕ
Ци нигъгъос ӕй мӕ куройнӕ,
Ку нӕбал инсуй дзӕбӕх,
Ку нӕбал кӕлуй кӕфойнӕй
Ӕ фидтӕмӕ хуар-ӕртӕх.
Уацӕ догӕ, ци нин фӕддӕ? –
Дӕ рохс цǽсти – мегъӕстуг...
Фадигъолтӕмӕ – нӕ дӕнттӕ,
Дӕлдонвагӕ – цӕстисуг.
Ӕнӕ кӕнгӕй айтӕ-уйтӕ,
Нӕ куройнӕ, дӕ уӕлхард
Ниффунук уӕд, тӕходуйтӕ,
Тъуми-тъу́мамӕ де ‘нкъард!
Дӕ евгъу́ди кадӕ-цитӕ,
Ӕрцӕуǽд, куройнӕ, нур, –
Ӕрцӕйзелӕнтӕ дӕ фидтӕ,
Ӕридзаг уӕд дӕ фӕлгур!..
09.02.2024
Гибизти Оскар
ÆХСӔВӔ
Дигори хуæнхтæбæл æруагъта, цæргæсау,
Сау фуни базуртæ æхсæви паддзах,
Нимæти æхе батухта тухст бæлццонау
Хори ходæзмол, зæрдиуарзон бакаст.
Æхе баримахста адæми федисæй,
Фæллигъдæй идардмæ мæнгæтти бæстæй.
Уордиги — æхсæви талингæ къæсæрæй
Нур бабæй гъæуай кæнуй амонд бунæй.
Нигъгъос æй фуртæссæй къæсхуртæ сау къæдзæх,
Къанау зæнхи гъоси цидæртæ дзоруй.
Еуварси кæмидæр Терк мæстгун цæхъалтæй
Æрдзæй уарзондзийнадæ туххæй дæр коруй.
Æвæдзи, не ’ссирдта е уарзон æ царди,
Æвæдзи, нæ зонуй амонди бакаст,
Хори тунти цийнæ не ’гъусуй æ зарди,
Кæнуй мин, æвæдзи, е ’нкъард царди гъаст.
Æ сагъæс мæнмæ æвдесуй æ цæхъалти,
Æ цæстисуг калуй пурхæнтæй хонхбæл.
Дессаги гъудитæ игъусуй æ зарди,
Дессаги цийнитæ кæнуй нур мæнбæл.
1976
Скъодтати Эльбрус
ДÆ ГЪАР ЗÆНХÆ
Ихæс ди дарун, Дигорæ,
Куддæр уа, уæддæр.
Дæ гъар зæнхæ, дæ сах хорæй
Кæми ес хуæздæр!
Мæ ихæс феддзæн, Дигорæ,
Кæддæр уа, уæддæр.
Изолæй дæр мæ агорæ,
Ку гъæуа мæ сæр.
Аккаг унæн ци мæ бон æй?!
Цидæр уа, уæддæр,
Ку цæрон, уæд - дигоронæй,
Ку мæлон, уæд дæр...
Нæ Кæнæг æй хуæздæр зонуй,
Кæ ни ка уа, уой.
Ка нæ уарзуй а зæнхонæй
Æхе тог, æной?!
А - дуйнебæл мин, Дигорæ,
Куддæр уа, уæддæр,
Дæу гъар зæнхæ, дæ сах хорæй
Неци ес хуæздæр...
Бабочити Руслан
ФÆНДОН
Некæд адтæй ’ма нæййес,
Бухсун гъæуй кæрæдземæн,
Гæдзи буни сойнæ ес.
Ку неке ни ’й æнæ азум,
Алли алцæмæй æнхæст, –
Кæрæдземæн бафæразæн,
Еу инней кæнæд æнхæст!
Ан не ’гас дæр фæйнæ хузти,
Еу мадæй игурд нæ й’ ан, –
Ес дзæбæхтæ ’ма лæгъузтæ,
Макæмæ си уæн хæран!
Ци адæм цæруй нæ хæццæ
Анхосгинæй, фудгинæй,
Æнæ уонæй æнæбæрцæ
Æнхæст цард кæнун зин æй…
Неци уайуй дзурди карзæй,
Фуди хуасæ ’й æрмæстдæр.
Æнæбари хъæбæр хуарз æй,
Еугур хуарз ци нæ ’й, е дæр…
Дзагурти Дигорхан
ГЪÆДÆ ÆМÆ ÆЗ
Уафуй гъæдæ нæгъæй сасуг,
Цилле уæлдæфау рæуæг,
Нæ дууемæй кæций зæрдæ
Зæронд уа, кенæ нæуæг?..
Нæ дууемæй кæций фæззæг
Даргъвæтинæй евгъуйуй,
Кæций рагуалдзæги хортæ
Ǣ цъæх тала имисуй?..
Ескæд нуст æнгъæлдзау æрвтæ
Игон дарунцæ сæ реу:
Нæ дууемæй еуей зæрдæ
Уарзтæй исуадздзæнæй беу!
Нæ дууемæй еуей номбæл
Ниццæйивулдзæй алай,
Гъæдæн уа, æви мæн нивæн, -
Уокилæн нин исбæззай…
Гегкити Сослан
УАРУНИ ӔНКЪАРД
Ӕййафуй ӕртӕхи 'ртӕх.
Изӕлуй ӕнкъард зарӕнгӕ,
Игъусуй къӕвдай сӕх-сӕх.
Арв нихгӕнунцӕ ӕ тегътӕй,
Банигӕнунцӕ хорбон.
Думги ахӕсти сау мегътӕ
Цӕрдинод 'ма ӕнӕбон.
Бунти ба уӕхӕн бӕрзӕндтӕ -
Цӕстӕ сӕмӕ нӕ бухсуй.
Хаунбӕл фӕуунцӕ дӕнттӕ:
Тӕхун сӕмӕ фӕккӕсуй.
Ӕнтъуснӕгӕй ӕртӕсунцӕ,
Зинтӕй цох сӕхе ӕнгъӕл.
Сайд тъинккитӕ исӕфунцӕ
Пурхӕй уомӕл зӕнхӕбӕл.
Уотӕ хаунцӕ къӕрцгӕнгӕ,
Ӕййафуй ӕртӕхи 'ртӕх.
Ниццӕй хъӕртуй зӕрди уӕнгӕ
И ӕнкъард къӕвдай сӕх-сӕх.
2015 анз
