Мамукъати Хъазбек
НӔ ДОГӔ
Кумӕ тузмуй не ‘сон?.. Ӕвӕд уогӕй,
Къахкъуӕрӕнти цӕугӕй ӕ цъах-цъах,
Никкӕссеу ӕй, ӕвӕдзи, нӕ догӕ,
Никъулух ӕй, ӕвӕдзи, ӕ къах.
Ӕ ресӕй ӕдӕуагӕ ресинӕ,
Ниннеуинӕ, цума хъӕрӕу куй, –
Ниууарзта кӕд ӕнайти е ‘зинӕ,
Нурмикконбӕл ӕнойти кӕуй.
Охх, дзама́н... Уа́лӕ а́рви уӕдӕртӕ
Ӕлвесу́нцӕ и бӕнттӕ уӕззау, –
Фӕттузмунцӕ не ‘сонмӕ кӕстӕртӕ,
Хуӕздӕр хай син искӕрдӕ, Хуцау!!!
08.04.2024
ФУДФУН
Мӕ цӕстисуг фицуй цӕх-цӕх артбӕл,
Нӕ ин ес ӕгирид ӕрӕллау, –
Фӕццӕун ӕнӕрцуди къахнадбӕл,
Мӕ фӕд-фӕд хъӕндзӕргӕс – ӕверхъау.
Ниййарауй мӕ гъос: «Мӕ фӕрци́ дӕ
Цӕунгъон!» Мӕ игӕр мин хуӕруй,
Рӕхуайуй мӕ дзӕрних циргъ ӕрцитӕй,
Тухтӕрӕй мӕ билӕмӕ тӕруй.
Куд исзӕгъон мӕ хъонц, мӕ гъӕститӕ,
Ни ммин худта мӕ цъух мӕ фудфун,
Мӕ уоди́ ‘ртау лӕсуй мӕ фӕрскъитӕй, –
Авддӕлзӕнхи, миййаг, инӕфун...
06.04.2024
ДУУÆ БАЗУРИ
Æдæуагæ, базæронд дæн,
Фатáу — раст æма æргом:
Ирон уогæй дигорон дæн,
Дигорон уогæй — ирон.
Дууæ фазони — не ʼвзæгтæ,
Ма къуæрǽн сæбæл нæ къах,
Нæ сайнитæ ʼма не цæгтæ
Ма хæлхъой кæнæнтæ мах.
Хуцаумæ, дан — беурæ хуæрзтæ,
Дууæ гали нин — цæдæн,
Ка бонхестæр, ка бонкæстæр —
Рагъæвзарæ ци кæнæн?
Дууæ гали — дууæ ʼвзаги,
Дууæ базури — итигъд, —
Дууæ зæрин сæргин саги,
Дууæ денгизи — æвдигъд.
Сæ сатæгмæ, сæ уазалмæ,
Зæрди бунмæ ниххезæн,
Арви къǽсæрмæ, Уазамæ
Сæ дууей дæр исесæн!
09.12.2022
ДИГОРИ ГЪÆУТИ КАДÆНГÆ
Тамахса айтæ, нæ гъæутæ:
Москæ, Нарæ, Фæрæскъæттæ,
Дзинагъа, Устур Дигорæ,
Æхсæрисæр, Сурх-Дигорæ,
Хъусхæ-Майхуæ ʼма Дур-Дур,
Хусфæрæк æма Саур.
Ци хуарз айтæ, ци дзæбæх,
Киристонгъæу, Мостиздæх,
Ци рохс айтæ, зæрдеген,
Хæзнидон æма Лескен!
Нивгун уайтæ нивикарстæй,
И Хъæлнæгътæ, и Охъазтæ,
Елхъабантæ ʼма Скъодтатæ,
Хъарабугъатæ, Хъабантæ,
Синдзигъæу, Уорсдон, Къора, —
Уæ цард уæбæл ниххор уа!
Нæ Дигори нивгун уайтæ,
Æскъæттиком ʼма Багъайтæ,
Зæрин уайтæ ʼма зæрдгин,
Кет, Хъазахтæ, Æхсæргин,
Дидинатæ ʼма Тауиттæ, —
Истахæд уин Арв уæ цитæ!
Дзæгъеппарз уа, Чикола, —
Бауарза уæ Никкола,
Æхсæргин, Къуссу, Гулæр,
Бауарзтон сумах æз дæр.
Мæ зæрдæн айтæ æ нор,
Одола, Фæснæл, Лезгор.
Рахатæд уæмæ йе ʼрух
Нæ Хуцау, Секер, Кæлух,
Арфиаг уотæ, нивгун,
И Къаматæ, и Толдзгун.
Мæ уодæй æз дæн уæ хæццæ,
И Æхсæуæ, и Уæхъæцæ,
И Къумбултæ, Донифарс,
Задæлескæ — Нанай уарзт!
Ма уæбæл уæзæд æруæзæ,
Мæстинокæ ʼма Хæнæзæ!
Уæд итигъд алкæд уæ дуар,
Сонгутигъæу ʼма Хонсар,
Дунтæ, Къæмунтæ, Гæлйат, —
Ка уæ фæууодзæй нимад?!.
Уæ уодихуасæ — Ирæф,
Ци кæдзос æй, ци æдзæф,
Ци бæрзонд æй, ци урдуг æй, —
Ци гъæздуг æй цæстисугæй?!.
10.06, 08.12.2022
Дзурдуат:
Æдæуагæ — бесспорно, несомненно.
Сайнæ — обман, ложь.
Рагъæвзарæ кæнун — выбирать, отбирать.
Æвдигъд — бескрайний, безбрежный.
МÆ ЛИМÆНТÆН
Мæ хуарз лимæнтæ, мæ хортæ,
Нидæн зар уин — мæ цæгъддæл...
Ниууæ хъор кодтон, нихъхъортæ? —
Ма фæууотæ фудæнгъæл.
Уацæ и́зæдтæ — хундзаутæ —
Уæ амæндти — фæстедзау,
Исесæнтæ уин уæ саутæ, —
Ба уæ рæвдауæд Хуцау!
Фидбилиз уæмæ ма ʼрхезæд,
Ма бауозгалæд æнсур, —
Ма ниццæгъдæд фæрсæрхъезæй
Уæ дала æма фæндур!..
09.12.2022
НÆ ДЗИЛАГÆ
Фæззæгъунцæ мин: «Ци дзори?»
Мæ фæндæ син зæгъдзæнæн:
«Ка нæ нимайуй Дигори,
Йе æ фурт нæ йæй Ирæн».
Нæ дзилагæ нигъгъæууат æй,
Æ байдауæн æз нæ дæн, —
Ниццæйуагътæ уæ хъаугъатæ,
Ниццæйуагътæ уæ «æздæн».
Еунæг ку йæй нæ уедагæ,
Хуцаууарзон ба — нæ зеу! —
Еу адæм ан, еу дзилагæ,
Маке нæ кæнæд хæлеу.
09.12.2022
