Хъулчити Максим

Раст лӕг

Хуцау уарзон, дингун лæг 
Идардмæ дæр æй бæрæг
Æ минеугута бæлвурд 
Кæнунцæ'йбæл уæхæн дзурд:

Нæ ши фегъоссæна гъаст,
Нæ кæнуй некæмæн маст.
Некæд фæккануй сау хицæ:
Соцъа, фудкой, хурфæй фицæ

Некæмæ инуй гунах…
Алкæд дæр дæмуй æ къах.
Лæмбунæг кæсуй ахемæ,
Бæнттæ æрветуй уотемæй.

Куы багъæуй æ анхос
Уайтагъ фестдзæй дæ фалдзос
Некӕд имӕ ес рæуонæ: 
«Багæдзæ кæнæ исонмæ»

Нæ нимæхсуй æ рæдут,
Нæ ‘йбæл кæнуй уæлдай дзурд
Уайтахт хатир ракордзæй
А зæрди уаг радзордзæй

Уæхæн адæймаг дæ рази,
Кæд ес - Хуцауæй арази!
Е дин ӕй устур лӕвар,
Дарӕ ин игонӕй дуар…

Ӕнӕмӕтӕ

Чи хъалӕй уӕззау фарстабӕл ке сӕр нӕ ресуй ӕноси,
Ка нӕ сӕюй еске рунтӕй, неке куд цӕуй ӕ гъоси.

Ка цӕруй зӕрди дзӕбӕхӕн ӕнӕ мастӕй игъӕлдзӕг,
Кӕмӕн некӕд ӕрхъӕрддзӕнӕй гъар сӕрди фӕсте фӕззӕг.

Ке бон ӕй зӕгъун мӕгурӕн дӕхе фуд ӕй дӕ уавӕр,
Нечи ‘вгъау кӕнуй ӕ уодӕн муди даруй ӕ бауӕр.

Кӕбӕл некӕд уӕзӕ кӕнуй сосӕккай конд сау гунах,
Фӕдес уогӕй мулки фӕдбӕл некӕд бадӕмтта ӕ къах.

Чи хъалӕй уой ка нӕ зонуй фарст ке цӕудзӕй адӕймаг,
Ӕноси дуарбӕл ӕрлӕугӕй кӕмӕ нӕйес дӕмуйнаг…

Никкола

Зӕронд лӕг бӕл исӕмбалттӕн фӕззигон уазал гъӕди
Рӕуӕг дзӕкъолӕ ӕ рагъи фӕллад хузӕй ӕ цуди

Дӕ бон хуарз уӕд нӕ фиди хай, кӕчирдӕмӕй дӕ бӕлдад?
Мӕнӕ сор нимӕтбӕл сбадӕ, исбал уадзӕ дӕ фӕллад.

Рӕсог сауæдон ниуазӕ, хуæруйнаг дин хегӕ дзол,
Нуртӕккӕ арт ракӕндзӕнӕн мӕнӕн дӕр цӕугӕй изол…

Дӕ бакастмӕ гӕсгӕ зонис царди медӕг сосӕгккаг,
Арти гъармӕ мин радзора, рохсмӕ райхала де 'взаг

Чи дин зӕгъон мӕ фурти хай, нечи зонун нимахстаг,
Ӕрдӕг надбӕл макӕд лӕууӕ, размӕ хӕссӕ дӕ фӕндаг…

Корӕгӕн дӕ бони бӕрцӕ бакӕнисӕ дӕ анхос,
Уарзондзинадӕ итауӕ æнӕвгъауай дӕ фалдзос.

Ма ауӕрдӕ дӕ хъаурӕбӕл тухсӕги сӕрбӕл дзоргӕй,
Цӕсти сугӕй ма фӕттӕрсæ Хуцауӕй хатир коргӕй.

Уӕд раргъувта лӕг дзӕкъолӕ уарзон цӕстӕй ездон каст,
Рахатта фӕллад фӕсонтӕ захта мин дӕ фӕндаг раст.

Бӕргӕ май фӕрсуйнаг аттӕн æмбурд коттон ма гъуди
Фал уайтагъ дæр æрбайсавдӕй кæдзос ирдгæй сау гъӕди..

На фото "Никкола"
графика Фидара Фидарова