Миндзайти Валентинæ
АКРОСТИХ
Е адтæй кæддæри-раги,
Уобæл цæуй æрзæ æнзтæ.
«Дзебæл нæбал, - уæд загътай, -
И уагæ ниццæй зæронд,
Нæбал тавуй æ исконд.
Абони, æви исон,
Дунд-далагъан
Æй кæнон».
Десæ-месæ – дæ фæндæ.
Ес си æййивди адæ.
'Ссерунæн си ес амал
Æнкъарæнтæн сæ адзал.
Е адтæй кæддæри-раги.
Уобæл цæуй æрзæ æнзтæ...
Идарддæр фæндаг дардтай.
Симди бацудтæ, гъай-гъай,
Уæд семун гъæуй, мадта?
Нæбал дзебæл, фæстиат,
Мабал фæсмон
Æма гъавт.
Байтамалæн: «Нæгъ! - загътай. -
Æгæр радаргъ æй дæ над,
Ледзæ ардигæй идард!»
Лазум мабал агорон…
Уадзимисæн – ӕ кæрон…
'Нæбæрæг – мæ сæнтти ном.
Октябрь 2009.
ФÆНДИТÆ, ФÆНДÆГТÆ
Дæ фæндитæ, дæ фæндæгтæн
Куд иссирдæуа, цит, дзуапп.
Фæлварæнтæ-фæлтæрæнтæ –
Уодгоймагæн алли гапп.
Куд иссерон? Æви 'ссирдтон
Де ‘сфæлдистади тæлæн?
Фæлварæнтæ-фæлтæрæнтæ –
Дзуапп дæдтæгтæ 'нцæ мæнæн.
О, гормон, гормон уодгоймаг,
Хъалдзийнадæ дин – хецау!
Æрмæстдæр дæ кæдзос уодæй
Ес зонæн Хуцауи тау.
Кæмидæр 'ма кæддæриддæр
Зонуй фæлдист æ нисан:
Фæлварæнтæ-фæлтæрæнтæ –
Хуцауи фæндæмæ – дуар.
Февраль 2009.
***
Урух фæндаг агурдтон
Цæрæнбонти…
Нарæг къахфæд иссирдтон
'Нæнгъæлæги…
Ка зонуй, кæми 'й
Æцæгдзийнадæ?
Æз зæгъун, –
Мæ медбунати.
***
Ирд борбун бæласæ æ сифтæр æгъзалуй,
Цъæх арти иссугъдæй нæ царди бундор.
Бундорæ нæ уогæй, куд уодзæй райдайæн
Æма а дуйнеййи дзиллæн æ кæрон?
Æстъалути рохсæй мах содзæн пеллонау,
Думгæ фæххæссуй дун-дуйнебæл фунук,
Кæдзос Киристе, дæумæ ковун!
Æрлæууæ,
Кæрон æрбалæудтæй. Бонхуарз, нæуæг бон!
***
Ци 'й мæ цард?
Ци 'нгъæлмæ каст дæн?
Æви дæн фæсарæйнаг?
Кæцæй кумæ 'й мæ фæндаг?
Байзадтæн дзихъирт еунæг,
Æрмæстдæр мæ зард, мæ дуйне,
Æрмæстдæр мæ зар мæ тунти,
Æрмæстдæр мæ зæрди зар.
***
Дун-дуйней фæткдæттæгмӕ – фарста:
«Ци 'й мæ барæ, фæндон? Ци ба æй ахæстдонæ?..»
Гъулæггæгтæ – зиндони нисан…
Рæсог цæстингас – бари бæрæггæнæн…
***
Нæ зонун, нæ лæдæрун, нæ кайун,
Мæ царди уаг’ фæдзæхсун дæубæл.
Афонæ 'рхъæрдтæй. Нæуæг рæстæги
Нæййес бунат, зонун æй, тухстæн.
Æрмæстдæр сæребарæ 'ма барæ,
Æрмæстдæр Хуцауи фæндæ, раст –
Фæндæгти кæрон! ‘Ма гъезæмарæн, -
Бустæги ба уомæн – фæндараст!
Уогæ ба, ци дессаг æй нæ догæ,
Бæлвурдæй бæлвурддæр æй нæ цард.
Ка ци æй, ма кæмæн ци 'й æ мулкæ,
Фалæмбулай иссердзæнæй дзуапп.
Цæмæн фæлдист адтæй дæ райгурцæ?
Æма куд аразтай ду дæ цард?
Цæбæл тухстæ æма цæбæл ристæ?
Ци хузи дин а дуйне фæсмард?
Нæ дуйне – æрдзæт фæндæгти арæзт,
‘Ма си кæций равзурстай, æрдхуард?
Кæмæ кастæ, кæбæл дæхе барстай?
Цæмæ бæлдтæ æновуд, ахсгиаг?
***
Ме 'ригон лæдæрæн
Нур агоруй æхе
Нæуæг рæстæги кеми.
Ци зудтон – нæ зонун,
Ци ‘йгъосун – нæ тавуй,
Ци фæдтæн – не 'нкъарун…
Фал агорун мæхе
Мæ дуйней…
***
'Синкъустæй мæбæл мæ зæрдæ,
Нирризтæй мæ медæг уадæ –
Райгъал æй мæ хъалдзийнадæ…
Зæрдæ рæдзагъд фестадæй.
Ристæн кæрон нæбал адтæй…
Хумæтæг мадзал 'ссирдтон…
Ка дæн æз? Хуцауи йуазæг.
А царди нæййес кæрон
Фæлварæнти æздухст радæн,
Цалинмæ 'сревæд уон монцтæй,
Цалинмæ 'ссæребар уон.
***
Ка загъта,
Ма нæ бæззуй нæ рæстæг?
Ка искодта
Нæ догæн тæрхон?
Ка 'й зонуй,
Ци æй хуарз 'ма фидбилиз?
Ка иссирдта
Æцæгæн æ ном?
***
Нæ рæстæг, ка 'й зонуй, балæдæрдтæн.
Дæ фæндæ мæбæл æрбамбалдæй.
Æййивди догæ ке ралæудтæй,
дуйней бундорæ ке 'сæскъудæй,
нæуæг цард æ уагæ иссера,
æма лæг æ къæхтæбæл ислæууа.
Æрдзæт фадуати алкæмæн дæр, -
Ду равардтай алкæмæн алци,
Цæмæй уодгоймаг æхе иссера,
Цæмæй алке æхе исфæлвара
Нæуæги, æбæрæги, деси,
Уотæ зæгъис ду, Исфæлдесæг.
Фал хевæндæ кæнуй уæлахез
(Нур, нерæнги бал, уотæ уайуй),
‘Ма монцти, фæсмонти хъурдохæн –
Нæ царди сæргълæууæг, - нæ разæй
Тæхунцæ, къæхкъуæргæ, уæууау.
Кæдмæ нин уодзæнцæ хецау?!
***
Æригъустон кæдæй-уæдæй
Æз мæхемæ лæмбунæг.
Мæ цийнитæ, мæ сагъæстæ
Æридтон, цума нæуæг
Уодгоймаг, ке некæд зудтон,
Æвеппайди фæййидтон.
Некæд адтæн мулкæй гъæздуг,
Некæд адтæн мæгургор, -
Агурдтон æндæр цæмидæр
Цардæн æ нисан, бундор.
Нæ зæгъун нур дæр: «Иссирдтон»,
Фалæ зонун, ахсгиаг,
Нисангонд мæ цард, 'нæмæнгæ,
Мæ гъудитæ – зæгъуйнаг.
***
Дæ уарзондзийнадæ –
æнæкæрон,
Æнæкæрон –
дæ зæрди уагæ.
Дæ зæрди уагæ –
æнæронбаст.
Æнæдехгæнгæ –
де 'сфæлдистадæ,
Де 'сфæлдистадæ –
æнæ арæнтæ.
Дæ царди нисан –
дæ уарзондзийнадæ.
***
Мæ еунæг, мæ бон искæнæг,
Ку бабæй мæ ниууагътай!
Кæд фæууодзæй аци рæстæг,
Кæд фесæфдзæй мæ катай!
«Æрхун кæнун», - дин нæ зæгъдзæн,
Е мин уодзæй мæнгæ загъд.
Уолæфт мин нæййес æнæ дæу,
Æнæ дæу мæ цард æй сайд.
***
Гъуди – еппард,
Зæрдæ – ервазт,
Кæрæдзебæл – баст.
ЕУНӔГИ КАДӔНГӔ
Зæгъуй дин Еунæг:
«Хонун дæ балци,
Æрмæст ниууадзæ
Дæ медбунати
Дæ рист, дæ незтæ,
Æма дæ циййес.
Ниууадзæ алци».
«Нæ, - зæгъис бабæй, -
Мæ цæстисугтæй,
Мæ тар гъенцъунтæй,
Мæ сау гъудитæй
Куд фæццох уодзæн?
Цæмæй ма цæрдзæн?
Æнæ тæрсгæ-резгæй
Куд бафæраздзæн?»
Фæццурд æй иннæ:
«Гъо, дæн арази…
Фал… куд ниууадзон?…
Ка 'й зонуй… мадзал…
Мæ мулк – мæ фæндаг,
Мæ фæндаг – дæумæ…
Куд æй ниууадзон?
Цæмæй ма цæрдзæн?».
Æртиккаг загъта:
«Æнæ фæсмонæй,
Евгъуд нæ уингæй,
Федæн нæ заргæй,
Мæ медбунати,
Куд зæгъай, уотæ,
Цæттæ дæн гъе нур…
Цæттæ дæн гъе нур…
Цæбæл къæндзаг уон?
Цæбæл – æновуд?
Цæй номæн хуæцон
А мæнгæ царди
Дехгонд бундорбæл?
Нур, æнæдзебæл…
Де ‘ймонау балци
Цæун дæ фæдбæл».
Беретæ – хунди
‘Стъæлфæмæ балци.
Алкæмæ – хонæг,
Æма æ фадуати
Алкæмæн – æвзарун
Еунæги тæлæн.
Алкæмæн æ бари –
Æнæ ун æма ун.
