ТАМАТИ ХЪАЗБЕГ
НИВОНД КÆНУН
Хор хуссæги нæ фæххезуй,
Курухонтæй игъустон
Хор е’ркасти цитæ ‘лвесуй
Уони мæхе куд хонон?
Æнæ адæм хори тунтæй
Нæ мæ гъæуй уæлдай тавд.
Ци мæ фæууй æрдзи хунтæй,
Е нин еумæ æмæвналд.
Нæ мæ гъæуй æнæ адæм
Сугъзæрийни кæртæ дæр.
Мулкитæй ба рæстдзийнадæн
Нивонд кæнун зæрдæ дæр.
ХОНХИ
Сурх сæрди медхонхи
Уæлцагъди цæрун.
Къæдзæхсæр лæгæти
Дор дуармæ лæуун.
Мæ бунмæ уорс мегъæ
Зиннуй бæмпæгау,
Къæдзæхи циргъ тегъæ
Лæууй фур уæлиау,
Æ сæрбæл сиутæздухт
Гъазуй дзæбедур.
Æ фарсмæ е’мбалмæ.
Æркæнуй губур.
Уорс хонхи фæхстæбæл
Цъетети рæбун
Уæлиндзсæр хæдзæрттæ
Лæуунцæ байбун.
Цума ‘нцæ астъæнттæ
Хуæнхтæбæл нихæст –
Кæнуй тохонатæй
Хъуæцæ æ нивæнст.
Цъете дæр бæрзондæй
Ирд цæстæй кæсуй,
Æ сатæг уæлдæфæй
Рæугути нæрсуй.
Цъæх фæзи кæрдæги
Хезунцæ нард фонс.
Фиййау æ хæтæлæй
Низзаруй æ боз.
Æ рæзти хæл-хæлæй.
Уайуй сауæдон.
Еу дорæй иннемæ
Æсхъеуй æ дон.
Рæсугъд – нæ хуæнхбæстæ.
Аргъауи хузæн.
Алкæмæн цæрунмæ –
Цъæхсæр æмхузæн!
КАТАЙ
Радзæгъæл ан нæ надæй,
Цума гъæди бабæй фонс.
Лæг цудæй æма уадæй –
Куддæр адтæй æ сæрбонс.
Исирæзтæй Нигулæн,
Арæзтадæй боз æй, боз.
Æ сау фæндти нихъулæн
Цума цади дзæгъæл фонс.
Нæ нихау – лæгун тукан,
«Сау» базармæ ба цæуæн.
Ревæд къохæй хъадаман
Хъазар аргъæй æлхæнæн.
Сæудегерн давæггаг
Ес базарим а уæййаг.
Суйни сæрбæл æрхуæцуй,
Давунмæ дæр архæсуй.
И архæсгæ хафуна
Нæ тог цъируй махæн ба,
Гæбуй хузæн æ дес-мес:
Алли бон дæр тогæфсес.
Мах ба барæн нивæндæн,
Нивтæй закъæнттæ кæрдæн.
Мулк иуарæн, æвгæрдæн –
Хуарз мвдесæн ивæндæн.
Кæд ма кæндзиан хуæргæ ба?
Кæд ма кандзиан цæргæ ба?
Нæ рагбонтæ имисгæй
Над хуæздæрæн фæккæнæн!
