РАГОН НАРТИ ӔМА УОНӔН СÆ ФӔСТАГОНТИ - ЗӔРОНД ДИГОРИ ДИН
ХУЦАУ
Сӕумӕраги арви къабӕзтӕй сурх сӕуӕхседтӕ ка ӕрбадаруй, уой фӕсте ба дуйнемӕ хор-зӕрин ходгӕ-ходгӕй ка рарветуй.
Раги изӕр арвбӕл талингитӕ ка ӕрбауадзуй ӕма арвӕн ӕ алли къабазӕй мӕйтӕ, ӕстъалутӕ ка ходун кӕнуй.
Ӕмбес бони содзгӕ хори сау мегъи буни ка бакӕнуй, ирд бон ӕваст ка ӕрӕнкъард кӕнуй, сах хор бурдӕн, уарунӕй ка раййевуй.
Тæвдæ сӕрдӕ сатӕг фӕззӕгæй, уазал, гъизт зумӕг рӕсугъд ӕма гъар уалдзæгæй ка ӕййевуй.
Ӕдзӕрӕг бӕститӕ адӕмӕй ка идзаг кӕнуй.
Устур аултӕ, муггӕгтӕ, адӕмихӕттитӕ ка берӕ кӕнуй.
Ӕзнӕгти кӕрӕдземӕ ка хӕстӕг кӕнуй ӕма дзиллити федауци надбӕл ка аразуй.
Адӕймаги, ӕнӕ уогӕй, ӕ мади губуни ка равзурун кӕнуй, цард ин ка раттуй, ӕма ӕй ӕндӕр цардмӕ ка 'ййевуй.
Адӕймаги цард ка гъӕуай кӕнуй, ӕма ин ӕй рӕстӕрдӕмӕ ка аразуй. Ӕгас дуйней цард рӕсугъд, цитгин, кадгин, радгин ка кӕнуй.
Дуйней ӕнӕ гъӕуагӕй, ӕнӕ аййеппæй, æнæ 'фсӕрмӕй, ӕнӕ тухстӕй ӕнхузӕн дарун ка зонуй...
Еци ӕнхӕст, еци ӕнӕ аййепп тухӕ ӕй сугъдӕг Хуцау, - табу ин фӕууӕд! Аци ӕгас дуйнетӕ ӕнӕ нецӕмӕй ка сфӕлдиста, уобӕл ӕндарӕни кади ходӕн адӕймаг ка ӕривардта, дуйней сӕр, алцӕмӕй ӕма ӕнккӕтемӕй хестӕр, зундгиндӕр, игъосагӕдӕр, равзарунмӕ дӕснидӕр, банхус кӕнунмӕ тухгиндӕр, разӕгъунмӕ ӕма бакӕнунмӕ растдӕр ӕма ӕнхӕстдӕр ка ‘й, адӕймаги ка искодта, е ӕй Хуцау, табу ин фӕууӕд!
Адӕймагӕн раст ӕма хӕран ка зонун кӕнуй, хуарз ӕма лӕгъуз ка лӕдӕрун
кӕнуй.
Арв хортӕ, ӕстъалутӕ, мӕйтӕй ка сфӕлуста, зӕнхӕ ба кӕрдӕг ӕма аллихузи дидинӕгӕй, рӕзӕй ка стахуй.
Денгизтӕ, дӕнттӕ дони фонсӕй ка байдзаг кодта, алли гъӕздугдзийнадӕ, алли рӕсугъддзийнадӕ ке къохӕй цӕуй, е дӕ ду, Хуцау, табу дин фӕууӕд! Хуцау ӕй дуйней сӕр. Дуйнейӕн ӕ райдайӕн ӕма ӕ кӕрон.
ХУЦАУИ БУНÆТТӔ
Хуцау ӕхецӕн цӕрӕн бунат исаккаг кодта ӕгас дуйней рохс.
Дуйней рохси къабӕзтӕ тухтӕ ӕнцӕ: арв, дунгӕ, зӕнхӕ, дон ӕма зинг. Арв Хуцауи хӕдзарӕ ӕй, зӕнхӕ е рӕнцайӕн, ӕ тургъӕ, е ‘взурӕн, дунгӕ - ӕ уод, ӕ рафецауӕнтӕ, ӕ хӕтӕндӕнттӕ, дон, зинг - ӕ сугъдӕггӕнӕг, ӕ цард аразӕг.
Хуцау ӕ цӕрӕнбонти исаразта хор, мӕйӕ ӕма ӕстъалутӕ ӕхсӕвӕ ӕма бони бӕрӕггӕнӕнтӕн, хонсар - фонсӕн хуӕрунмӕ, фонс ба адӕймаги царди дзӕбӕхдзийнадӕн.
Зумӕг, сӕрдӕ, уалдзӕг ӕма фӕззӕг зонун кӕнунцӕ адӕймагӕн, Хуцау тухгин кей, уой.
Адӕймаг аци дуйнебӕл ӕй Хуцауӕн ковун ӕма Хуцауи кадгин кӕнуни туххӕй лӕвӕрд, хъӕбӕрдӕр ба Хуцауи минеугутӕ фӕнзуни туххӕй.
Дуйне дӕр ӕма адӕймаг дӕр фӕстехуарзгӕнгӕ, бонхуӕздӕрӕй, цӕуӕнтӕ.
ХУЦАУИ ХӔДЗАРӔ
Дуйней сӕр, зӕронд уорсалистӕ, ӕнзтӕй, догтӕй, фӕлтӕртӕ ма рӕстӕгутӕй рагондӕр ӕма хестӕр Хуцау, уӕлӕрвти медӕгӕ ӕхецӕн исаразта æ сугъзӕрийнӕ хӕдзарӕ.
Хуцау ӕгас дуйнебӕл ӕ къабӕзтӕ ӕруагъта ӕма ‘й ӕ сугъзӕрийнӕ базури буни бакодта.
Устур Хуцау уӕлӕрвтӕ ӕ сугъзӕрийнӕ къелабӕл бадуй, сугъзӕрийнӕ фингӕбӕл сугъзӕрийнӕ киунугӕ ӕ рази, ӕ сугъзӕрийнӕ лӕдзӕг ӕ къохи, уотемӕй дуйнейӕн фӕндӕ-тӕрхон кӕнуй, ӕ фӕндитӕ ӕма тӕрхӕнттӕ ба еци киунуги ӕ сугъзӕрийнӕ финсӕнӕй финсуй.
Ӕ аллифарс, ӕ фалӕнбулай, Хуцауӕн изӕдтӕ, идаугутӕ ӕма Хуцауи уарзон лимӕнтӕ ӕхсӕвӕй-бонӕй зилдӕгӕй сӕ зонгутӕбӕл бадунцӕ ӕма лӕуунцӕ, табуйӕй ковунцӕ Хуцауӕн, ӕма корунцӕ адӕмӕн, ӕгас дуйнейӕн дзӕбӕхдзийнӕдтӕ, сӕ рӕдудтитӕбӕл ба хатир.
Етӕ сугурӕй дӕр Хуцауӕн ӕ алли дзурдбӕл дӕр амменӕ зӕгъунцӕ. Хуцау есуй ӕ уарзонти кувд ӕма беретӕн уони кувдмӕ гӕсгӕ хатир дӕр кӕнуй.
Хуцау ести фӕндӕ ку фӕккӕнуй, уӕд ӕй изӕдтӕ, идаугутӕ ӕма Хуцауи лимӕнтӕ базонунцӕ Хуцауӕн ӕхе дзурдтӕй, фӕндонӕй, Хуцауæй ракорунцӕ ӕма ӕнамонди фидбилизӕй фӕййервӕзун кӕнунцӕ, бахезунцӕ.
Етӕ ӕмвӕндӕй амменӕ кӕбӕл зӕгъонцæ, уой ба Хуцау ӕ сугъзӕрийнӕ киунуги ниффинсуй ӕма ин раййевӕн нӕбал ес.
Хуцау еци тӕрхӕнттӕ ӕ сугъзӕрийнӕ киунуги ӕ рахес къохӕй ку ниффинсуй, изӕдтӕ, идаугути, уодесӕги ӕма ӕ иннӕ уӕхӕн лимӕнти, еци тӕрхӕнттӕ ӕнхӕст кӕнунмӕ уӕд рарветуй.
Хуцау ци на зонуй, ке нӕ зонуй, дуйнебӕл уӕхӕн нӕййес: сӕумон изӕдтӕ ӕма изӕйрон идаугутӕ ӕ къохи ӕнцӕ, аллирдӕмӕ сӕ ӕрветуй ӕма ин етӕ аллирдигӕй аллихузон уадзгъудтӕ хӕссунцӕ. Дуйнебӕл зелунцӕ ӕма, зӕнхӕбӕл ка ци уадзгъуд фегъуста, кенӕ ба фӕууидта, уони ба Хуцауӕн дзорунцӕ.
