ХЪОДЗАСТИ ГЪУЛЛӔ 'МА ЦӔРАЙИ ЗАР
Уӕлӕ согдзау ниццагъта ӕ согти сӕртӕ,
Гъуллӕ нигъгъӕр кодта:
- Гъйа, Киристонгъӕу, кумӕ ледзетӕ гиаурти тӕссӕй,
Уӕ тӕккӕ хуӕздӕрти уин ку фӕццагътонцӕ сӕ хорхи сӕртӕй.
Ӕрӕдони хумгӕнд доргинтӕ ку адтайдӕ.
Гъйа, мӕ уарзонтӕ! Мӕ унгӕг хӕсти медӕг мӕ дзорӕнтӕ ку адтайдӕ. Фӕндаги кӕрдӕг хезуни туххӕй.
Нур Киристонгъӕуи хъалтӕ хуарз бӕхтӕ балхӕдтой ледзуни туххӕй.
Дӕлӕ мин Ӕргинарӕги Донай ку адтайдӕ.
Мӕ уод йесӕн бони мӕ Хӕллати Бола ку адтайдӕ.
Уӕлӕ гъӕддзау талаи размӕ,
Мӕнӕн мӕ уодуесӕн Акъоти Къалай размӕ.
Аци сауӕри дон цӕугӕйӕ байзадӕй.
Хъодзасти Гъуллӕ ку нигъгъӕр кодта:
- Гъетт, мӕ уарзон ӕнгартӕ! Мӕ рӕсугъд уосӕ мӕн мӕрдӕй
Мӕ уати кӕугӕйӕ байзадӕй.
Салигуӕрдӕни сӕри мин делианкӕ ку адтайдӕ.
Мӕ хӕсти бони ма мӕ уӕддӕр мӕ берданкӕ ку адтайдӕ.
Курдадзи фӕрӕт курдадзи байзадӕй,
Цӕрай нигъгъӕр кӕнуй:
- Мӕ рӕсугъд уосӕ курдуати байзадӕй.
Уалдзигон уӕригкӕ цъетебӕл байзадӕй,
Гъуллӕ нигъгъӕр кӕнуй:
- Мӕнӕн мӕ тогйесӕг дзедзебӕл байзадӕй!
Дӕлӕ зӕрингурд ци рон искодта.
Хъодзасти Гъуллӕ ӕ реуи фӕйнӕгӕй ци ном искодта.
Æрӕдони дон цӕугӕ-зелгӕйӕ байзадӕй.
Хъодзасти Гъуллӕ нигъгъӕр кодта:
- Мӕнӕн мӕ зӕронд мадӕ Киристонгъӕуи ӕхсӕн кӕугӕ-неугӕйӕ байзадӕй!
Ацулухъӕй хӕцӕн искодтой,
Дæлӕ Хъодзасти дууӕ ӕнсувӕри се стур заборӕй хӕцӕн искодтой.
Сӕхе дуармӕ дууӕ сау бӕлони,
Хъодзастӕ, гъӕуи сӕрӕй ӕрласетӕ дууӕ сау уӕрдони.
Сӕ Хетӕги-къох сӕ рохс цари туххӕй,
Махӕн баниуазетӕ, нӕ хуарз ӕнгартӕ, нӕ рохсаги туххӕй.
Аци зарӕг скодтонцæ Тӕкъоти Дзиццил, Бесолти Сергей, Дзалати Кудзи ӕма ӕнд., 1927 анз, Киристонгъæу.
Ниффинста ӕй Толасти Андрей.
ЦИНИИ-йи архив, фольклор № 15, папкӕ 8, ф. 454-455.
