ДЖАБАГЪИ ТАУӔРӔХЪ
Еу хатт Джабагъӕ, мӕнкъӕй биццеу уогӕй, еу биццеути къуари размӕ бафтудӕй. Биццеутӕ фӕххилӕнца 'ма сӕ еуемӕн расуд кодтонцӕ. Джабагъӕ ба сӕма дзоруй: «Олий суди хузӕн ку ракодтайтӕ.» - Еци рӕстӕги ба Оли ӕрбацудӕй сӕ рӕзти ‘ма, ке биццеу ӕй, зӕгъгæ, бафарста. Еци мӕгури биццеу, зæгъгæ, ин ӕй байамудтонцӕ. Оли сӕхемӕ ку рандӕй, уӕдта ймӕ фӕдздзурдта 'ма ‘й бафарста: «Хуарз биццеу, ци мин зони, ӕз хуарз суд не скодтон, уомӕн?» - Мудгӕстӕн хуарз суд не скодтай.
Уони гъуддаг ба уотӕ адтӕй, ма мудгӕстӕ хуаллаги хӕтдзӕ косӕрттӕгтӕ хастонцӕ, ка уӕр ӕрхӕссидӕ, ка ба дӕркъӕ ӕрхӕссидӕ. Сӕ мӕгурдӕр ка ’дтӕй, е ба дӕркъӕ ӕрхаста. Дӕркъӕн ӕ цуппар къахи дӕр фӕйнӕ хузи адтӕнцӕ, ‘ма сӕ и цуппар лӕги байурстонцӕ, е дӕу къахи хай, е ба дӕу къахи хай, зӕгъгӕ. Дӕркъӕ куд хилӕ ‘й, уомӕ гӕсгӕ кауи ӕ къах рахастӕй ма басастӕй, сӕ еуей хай ка ‘й, е. Мудгӕстӕн рӕфтӕмӕ сӕ бӕдбӕнттӕ хъӕбӕр цудӕнцӕ ма хъӕбӕр бакустонцӕ. Рӕфтӕй фӕстӕмӕ ба хуӕргӕ ‘ма хусгӕ кодтонцӕ. Ку бахуардтонцӕ, уӕдта ниххустӕнцӕ. Дӕркъӕ ба арти фарсмӕ исбадтӕй ‘ма ӕ цӕф къахбӕл бафтудæй зинг. Зинг ӕ къахбӕл ку бафтудӕй, уӕдта ралигъдӕй ‘ма мудти астӕу рауайӕ-бауайӕ кӕнуй, 'ма сӕбӕл зинг бафтудӕй гъӕмпинсӕр бӕдбӕнттӕбӕл ‘ма кӕрӕй-кӕронмӕ басугъдӕнцӕ. Уӕдта судмӕ балӕвардтонцӕ, уой къахи хай, уой зинг нӕ басугъта, зӕгъгæ, Олимӕ. Ӕссин суд кодта: ӕртӕ мудгӕсемӕн бафедӕ сӕ зиан, дӕу къахи хай адтӕй саст, ‘ма сӕбӕл е бафтудта зинг.
Гъе, уомӕ гӕсгӕ загъта Джабагъӕ, Олий суди хузӕн суд ку скодтайтӕ, зӕгъгæ, биццеутӕн. - «Мадта, биццеу, ду ба куд ӕссуд кодтайсӕ?»
- Ӕз ба куд ӕссуд кодтайнӕ, ци къӕхтӕ ‘й давтонцӕ, етӕ ‘й бафедӕнтӕ. Ӕ цуппар къахи саст ку адтайуонцӕ, уӕд ӕ бунати басугъдайдӕ.
И судгонд ӕ зӕрдӕмӕ бацудӕй Олийӕн ‘ма бафӕндӕ кодта: «Аци биццеу ку ӕслӕг уа, уӕд мӕн унаффӕ кӕнун нӕбал бауадздзӕнӕй, уой бӕсти мӕхе райсон ардӕги. Ке уарзта, уонӕн балӕдӕрун кодта, ‘ма уордӕги рандӕй.
Райдзурдта Хъӕбӕлоти Афил Сламӕрзай фурт, 9-аг сентябрь, Озрек, 1956 анз. Нийфинста Цагъати Анастасия.
ЦИГСӔИ-й архив, фольк. № 175, 44 п., 3-4 ф.
