ТАЙМОРАЗ
Таймораз цауӕни цӕунбӕл соми ракодта, куд цауæни нæбал фӕццӕудзӕнӕн, зӕгъгӕ.
Еу ӕхсӕвӕ ба, зӕгъуй, куд рацъундӕ кодта, уотӕ ба ймӕ бадзурдӕй:
- Гъейт, Таймораз, скъелуагъд ку фӕдтӕ, уӕлӕ дӕ Ӕрхи коми дӕ сирди хай ку хезуй, ду ба хусгӕ ку байзадтӕ, - зӕгъгӕ.
Таймораз куд не 'рбайгъал адтайдӕ, ӕма дес кӕнуй:
- Цума ци уа, е ци сайтани хай ӕй. Цауӕни цӕунбӕл сомигонд ку дӕн ӕма мӕ соми куд фехалдзӕнӕн.
Еу сахат рацудӕй, уӕдта бабӕй рацъундӕ кодта, ӕма бабӕй имӕ нӕуӕгӕй бадзурдӕй, ӕма ин саг ӕ бунатӕй дӕр нӕ фестадӕй, уотемӕй ӕй фехста ӕма сагӕн ӕ тӕрнихи фат исӕнбалдӕй.
Баймӕцудӕй.
Ний ӕвгарста.
Ӕ нимӕт ибӕл бамбарзта, уотемӕй ӕй ниууагъта, ӕхуӕдӕг ба фӕстӕмӕ уайун байдӕдта, ӕма, ӕхсӕвӕ адӕн куд ниххустӕнцӕ, уотӕ ба фӕстӕмӕ гъӕумæ ӕрбахӕтдзӕ ‘й ӕма, зӕгъуй, ӕ лимӕнмӕ бадзурдта:
- Лӕг рамардтон, тагъд фестӕ, ӕфснайун ӕй гъӕуй, зӕгъгӕ.
Е ба имӕ, зӕгъуй, радзурдта:
- Ӕз дин лӕг марунмӕ лимӕн нӕ дӕн, - зӕгъгæ.
Ци ма ймӕ исдзурдтайдӕ, уордӕгӕй рацудӕй ӕма, зӕгъуй, е ‘рдхуардмӕ дӕр уотӕ бадзурдта, ӕма ин е дӕр уӕхӕн дзуапп равардта. Уотемӕй ӕ еугур лимӕнтæбӕл дӕр ӕрзилдӕй ӕма ин сӕ хусгӕ уӕттӕй дӕр нӕ фестадӕнцӕ. Уӕдта, зӕгъуй, фӕстаг ба, дууадӕс анзи ци ‘нсувӕри хӕтдзӕ кӕрӕдземӕ не сдзурдтонцӕ, уомӕ бадзурдта:
- Гъейтт, мӕ еунӕг ӕнсувӕр, дӕ сӕр мӕ багъудӕй. Лӕг рамардтон, тагъд, ӕфснайун ӕй гъæуй.
- Хуцау дин ма бакомӕд, уомӕй дин фӕттарстӕн, зӕгъгӕ, ма зӕгъуй, исдзурдта ӕма ӕ дзабуртӕ ӕ къохи раскъафта, уотемӕй Тайморази фӕсте уайун райдӕдта. Сӕумӕ хор куд искастӕй, уотӕ ӕ сӕргъи балӕудтӕнцӕ ӕма ймӕ мӕрдӕгъдау гӕнгӕ бацудӕй. Уӕдта нимӕт исхъел кодта, ӕма дин уоми ба - саги мард.
Гъема ин уӕдта Таймораз, ӕ гъуддӕгтӕ куд адтӕнцӕ, уони ӕрдзурдта. Ӕма, зӕгъуй, уӕдта Тайморази ӕнсувӕр низзардта:
«Гъейт, Иннамӕ мин ка бадзора,
Да лӕхъуӕн сӕрдсиуон саг рамардта.
Мӕнӕй ка уа, е ӕ кӕрдзин-лимӕни искадгингӕнгӕй,
Ӕ лӕгъуз ӕнсувӕри макӕд исӕгадӕ кӕнӕд!..»
Райдзурдта Хъарати Мурзабег. Нийфинста Цъеути Израил. 6 август, 1933 анз.
ЦИГСӔИ-й архив, фольк. №12, 70 п. 23-24 ф.
