ИСАТИ МÆХÆМÆТ
МАДТӔЛОН ӔВЗАГ НАЦИЙӔН Æ УОД, Æ ЗЕРДӔ’Й
Ӕма ӕцӕгӕйдӕр...
«Мадтӕлон ӕвзаг»... Еци дзурдтӕй ӕхцӕуӕндӕр ма ци уа? Кӕд ма мӕнӕ ауӕхӕн дзурдтӕ: «Райгурӕн бӕстӕ», «ниййерӕг мадӕ». Хумӕтӕги не схудтонцӕ алли хузи адӕмтӕ се 'взӕгтӕ «мадтӕлон». Алли адӕймаг дӕр ӕ фиццаг бонти фегъосуй ӕ национ ӕвзаги зӕлтӕ; ӕ мади дзедзе дӕйгӕй ӕхсири ӕртӕхтӕ мадтӕлон дзурдти хӕццӕ хъурмӕ уайунцӕ...
Мадтӕлон ӕхсир федар кӕнуй сувӕллони иуӕнгтӕ, ирӕзун ӕй кӕнуй. Раст гъе уоййау мадтӕлон ӕвзаг дӕр байлӕгъ, кӕнуй адӕймаги уод, ирӕзун ӕй кӕнуй, кӕнуй ӕй цӕттӕ ӕхсӕнадон цардмӕ. Уой хуарз лӕдӕрдтӕнцӕ адӕмти устурдӕр мийнӕвӕрттӕ ӕма устур аргъ кодтонцӕ сӕ мадтӕлон ӕвзӕгутӕн. Дӕнцӕн райсӕн замманай уруссаг финсӕг Тургеневи дзурдтӕ: «Мӕ гурусхи рӕстӕги, ку мӕ ӕрахӕссунцӕ мӕ райгурӕни хъисмӕтбӕл уӕззау сагъӕстӕ, уӕд мӕ зӕрдӕн ӕрмӕстдӕр ду ку фӕууис ӕ цӕгиндзӕ, уо егъау, домбай, ӕнӕсайд ӕма сӕребарӕ уруссаг ӕвзаг! - Ду мин ку нӕ уисӕ, уӕд мӕ катайти куд на бацӕуинӕ, нӕ бӕсти цитӕ цӕуй, уонӕмӕ кӕсгӕй?..» Раст цума аци бӕнтти финст ӕнцӕ и дзурдтӕ, уотӕ куд зӕлланг кӕнунцӕ!
Уӕхӕн сагъӕстӕ беретӕмӕ ӕрцӕунцӕ иннӕ нацити финсгутӕй дӕр. Ма куд нӕ? Финсгутӕй хуӕздӕр ма ка лӕдӕра ӕвзаг, ка ин аргъ кӕна?
Дзурдтӕн сӕ нисани, сӕ гъудий федаргондӕй байзайунцӕ адӕмӕн сӕ истори, сӕ цардиуаги хузтӕ. Никки фулдӕр нисӕнттӕ ес дзурдти бидтити, кенӕ ба ӕмбесӕндти. Уони адӕймаг ӕ царди бӕнтти багъуди кӕнуй ӕма ӕ сӕри, ӕ зӕрди, ӕ уоди уонӕй исуафуй алли хузи фӕлгонцтӕ, гъудий уӕгтӕ. Адӕймагӕн ӕ зӕрдӕ ку реса, ӕ хъаурӕ саст ку уа, уӕд имӕ дзурди хъаурӕ дӕр нӕбал фӕууй.
ӔВЗАГ ХЕДИ ХУЗӔН ӔЙ ФӔЛТÆРТИ 'ХСÆН
Мадтӕлон ӕвзаг хеди хузӕн ӕй - еу фӕлтӕр бӕдтуй инней хӕццӕ. Еци бастдзийнадӕ ихӕлд куддӕр ӕрцӕуй, уотӕ фӕлтӕрти ӕхсӕн бастдзийнадӕ ислӕмӕгъ уй, кӕрӕдзей хуарз нӕбал фӕллӕдӕрунцӕ.
Дӕнцӕгӕн ӕрхӕссӕн нӕхе наци.
Куд ӕй зонӕн, уотемӕй нӕ интеллигенций хестӕр фӕлтӕрӕн сӕ фулдӕр рацудӕнцӕ зӕнхкосӕг бийнонтӕй. Уомӕ гӕсгӕ ӕвзаг лӕгъуз нӕ зонунцӕ. Фал фӕстагдӕр фӕлтӕртӕ сӕ мадтӕлон ӕвзаг дзӕбӕх нӕбал лӕдӕрунцӕ. Беретӕ ба си сӕ мадтӕлон ӕвзагмӕ уӕлбекъонӕй кӕсун дӕр райдӕдтонцӕ. Сæ сæрмæй нæбал хӕссунцӕ.
Йе хестӕртӕн зин куд нӕ уодзӕнӕй?
Нӕ ми иронх кӕнуй мӕнӕ ауӕхӕн хабар.
Еу цалдӕр анзей размӕ адтӕн ЦИПУ-и филологон факультети паддзахадон фӕлварӕн къамиси сӕрдар. Студенттӕй арӕх ракоринӕ Къостай, кенӕ ӕндӕр ирон-дигорон финсӕги ӕндзӕвгӕ радзорун ӕнӕ киунугӕмӕ кӕсгӕй. Фал си еунӕгей бон дӕр не ссæй. Уотемӕй ба берӕ уруссаг ӕма фӕсарӕйнаг поэтти ӕндзӕвгитӕ зудтонцӕ зӕрдӕй.
Еци гъуддагӕн куд ес балӕдӕрӕн? Национ нигилизм ӕви ӕнӕлӕдӕрддзийнадӕ?
Гъай-гъай кӕмӕдӕртӕмӕ исӕвзурдӕй нигилизмдзийнадӕ дӕр. Се 'взагӕй ӕфсӕрми цума кӕнунцӕ, уотӕ сӕхе дарунцӕ. Фал сӕ фулдӕремӕн ба еци гъуддаг ӕнӕргъудидзийнадӕбӕл нимайун ӕз. Етӕ нӕ рагъуди кӕнунцӕ уобӕл ӕма мадтӕлон ӕвзагӕй ка фӕххецӕн уй, е берӕ цӕмӕйдӕрти хъоргонд ке ӕрцӕуй. Мадтӕлон ӕвзаг адӕми, дзилли гъӕр лӕдӕрун кӕнуй...
Аци рауӕн мах, нӕ дзилли хестӕртӕ дӕр, ӕнӕфуд ма хонӕн нӕхе. Хестӕртӕ нӕ байархайдтонцӕ, цӕмӕй кӕстӕртӕ сӕхе ӕвзаг хуарз балӕдӕронцӕ, уобӕл. Ӕма ӕвзагӕй цох уогӕй ба, ӕгъдауӕй дӕр цохгондӕй байзадӕнцӕ. Уӕхӕн гъуддаги еу фудӕй фуд нӕ фӕууй. Объективон уавӕртӕ дӕр уотӕ амудтонцӕ.
Фал уӕддӕр еугур фӕстезад нӕ фӕцан. Адтӕй ӕма нӕмӕ ес берӕ номдзуд финсгутӕ, драматургтӕ ӕма поэттӕ. Адтӕй нин, уӕдта ес дуйней ахургӕндтӕ кӕмӕ хицӕ кӕнунцӕ, уӕхӕн дессаги: «Нарти кадӕнгитӕ». Мадта адӕмон дзоргӕ ӕвзаги гъӕздугдзийнӕдтӕй дӕр гъӕуагӕ нӕ ан.
Уотемӕй на литературон ӕвзаг исирӕзтӕй. Пайда си кодтонцӕ ӕхсӕнадон кусти, скъолати. Ӕрмӕст горӕти (Орджоникидзей) нӕ, фал ма гъӕути дӕр, скъолати клубти пьесситӕ ӕвардтонцӕ сценитӕбӕл. Ӕвзаг куд ӕмбӕлуй ӕма адӕми куд гъæуй, уотӕ ӕ «куст кодта». Ке зӕгъун ӕй гъӕуй, уой хӕццӕ ма адеми 'хсӕн хӕлеу кодта уруссаг ӕвзаги зонундзийнадӕ дӕр.
Фал уӕдмӕ ралӕудтӕнцӕ волюнтаризм ӕма медцоппайи рӕстӕгутӕ. 60-аг ӕнзти нӕ хецӕуттӕ хъӕбӕр искарз кодтонцӕ «коммунизм 80-аг ӕнзтӕмӕ исаразуни» гъуддаг. Ӕхсӕнади еци лозунги ӕхсӕн алли ’гъдауӕй дӕр цъинкк кодта ӕма 'й фонсау тардтонцӕ «лозунгти скъӕтмæ».
Нӕ бӕхтӕргутӕн сӕ сӕри адтӕй ӕрмӕстдӕр «еудзинади» сагъӕстӕ. Нæдӕр дин адӕмти фӕйнӕхузи гъуддӕгтӕ, нӕдӕр сӕ берӕ алихузон ӕвзӕгути мӕтӕ. Ӕрмӕст: «Размӕ!», «Hoo!!», «Цопп!», «Куд тагъддӕр бахъӕртӕн еудзинади дзенетмӕ, уотӕ хуӕздӕр!..»
Кӕд устур хецӕуттӕ уотӕ дзурдтонцӕ, уӕд минкъий хецӕутти ба ӕндӕр ци гъудӕй?! Адӕмтӕн се «взӕгутӕ лух кӕнун» райдӕдтонцӕ и минкъийтӕ: скъолатӕ уруссагмӕ ӕййевунбӕл устур догъи цудӕнцӕ, ерис кодтонцӕ.
Кӕд хецӕуттӕ ӕцӕгӕйдӕр «Устуртӕ» ‘ма «Минкъийтӕ» фӕуунцӕ, уӕд ӕвзӕгутӕн ба уотӕ иуарӕн нӕййес. Алли адӕмихаттӕн дӕр е' взаг ӕ уод, ӕ зӕрди хузӕн устур ӕй! Нӕййес «хуарз» ӕвзӕгутӕ 'ма «лӕгъуз» ӕвзӕгутӕ дӕр. Алли адӕмихаттӕн дæр æхе ӕвзагӕй хуӕздӕр нӕййес! Нӕййес мадта «рӕсугъд» ӕвзӕгутӕ ма «фудконд» ӕвзӕгутӕ дӕр. Алли адӕмихаттӕн дӕр ӕхе ӕвзаг тӕккӕ рӕсугъддӕр ӕй!!
Уӕхӕн ездон гъуддӕгтӕбӕл, Устуртӕ дӕр ма Минкъийтӕ дӕр нӕ сагъӕс кодтонцӕ 'ма берӕ ӕвзӕгути уӕлдӕр ирӕзтӕн цалхдор аразтонцӕ. Ахургӕндтӕн дӕр сӕ карьериститӕ ецирдӕмӕ ниххуӕстӕнцӕ. Иннетӕн ба сӕ куститӕ нӕ мухур кодтонцӕ, кенӕ ба сӕ «фӕррӕститӕ» кӕниуонцӕ мухуркӕнуни рӕстӕги.
Уӕхӕн гъист дзаман финсгути хъаурӕ фулдӕр разиннуй. Естӕмæй сæ фӕххонунцӕ «адӕми ӕфсарм» Беретӕ си ӕргонӕй ниллӕудтӕнцӕ сӕ мадтӕлон ӕвзӕгути фарс. Зӕгъӕн, Расул Гамзатов ниффинста:
Если завтра мой язык исчезнет,
То я готов сегодня умереть -
Еци дзурдтӕ нӕ гъости фӕдеси гӕрахи хузӕн ниййазӕлдӕнцӕ. Сæ зæгъӕндор ба сӕ рахӕлеу кодта берӕ ӕндӕр хузти, берӕ ӕндӕр адӕмтӕмӕ дӕр...
Абони еци гъуддаги хуӕздӕр догӕ искодта. Фӕззиндтӕй фадуат нӕ культурӕ ӕма не 'взаги исирӕзтбӕл нӕуӕгӕй дзӕбӕх бакосунӕн. Ӕма ӕцӕгӕйдӕр еци куст итингӕй-итингдӕр-кӕнгӕ цæуй.
Нӕ финсгутӕмӕ фӕззиндтӕй берӕ нӕуӕг искурдиадгин уадзимистӕ. Нӕ Иристони радио ӕма телевидени фулдӕр архайунцӕ се 'взаги гъӕдӕ фӕххуӕздӕр кӕнунбӕл. Ӕрмӕст син берӕ растӕг нӕййес эфири, ма мӕнӕ бӕх ӕд фӕсахсӕн куд цӕуа, уотӕ син берӕ не 'нтӕсуй.
Газет «Рӕстдзинадӕн» дӕр ӕ ирон ӕрмӕг фӕххуӕздӕр кӕнуй. Скъолати ситингдӕр ӕнцӕ мадтӕлон ӕвзаги уроктӕ фӕффулдӕр ӕма фӕххуӕздӕр кӕнунбӕл. Ӕрмӕст ами дӕр берӕ гъӕуагӕдзийнӕдта ес. Зӕгъӕн, нӕ фагӕ кӕнуй ахургӕнгути бӕрцæ, сӕ компетенций гъӕдӕ...
Нӕ Иристони культурон куст ӕма ӕвзагаразунади никкидӕр ма берӕ цохдзийнӕдтӕ ес. Уонӕй сӕ еу мӕнмӕ кӕсуй ӕнӕуага устур, уомӕн ӕма нӕ еу наций дууӕ билгоней кӕрӕдзебӕл бастдзинадӕ лӕгъуз хедау фӕлмаст кӕнуй...
См.: Ирæф №1, 1991 анз.
