4, 6, 8, 10-аг КЪЛÆСТИ ДИГОРОН ÆВЗАГИ КИУНУГУТИ МЕДЕСБÆЛ РАФÆЛГÆСТ
2013 анзи мин ЮНЕСКО-и кафедри байхæс кодтонцæ дигорон æвзаги ахургæнæн киунугæбæл бакосун 4-аг къласæн. Цалдæр мæйей фæсте киунугæ рацудæй фæлварæни хузи. Ахур си кодтонцæ Хæзнидони æма Дигорай 1-аг астæуккаг скъолати. Киунугæн аргъгонд æрцудæй, æма 2014 анзи мухури рацудæй, æ тираж 1000 экземпляри, уотемæй.
Киунугæ арæзт æй программæмæ гæсгæ. Ес си цалдæр хайи:
1. 3-аг къласи рацуд æрмæг зæрдæбæл æрлæуун кæнун.
2. Вазуггин дзурдтæ.
3. Морфологи. Аци хайи гъæуама исахур кæнонцæ дзурди хæйттæ:
1) номдар;
2) минеуæгон;
3) номæййевæг;
4) миуæвдесæг;
5) фæрсдзурд.
4. Синтаксис. Аци хайи лæвæрд цæуй æрмæг гъудиади туххæй(хумæтæг, вазуггин, гъудиади æмхузон иуæнгтæ, седæн æма комкоммæ дзурдæй);
5. Анзи кæрони рацуд темитæ рафæлхат кæнунæн æрмæг;
6. Ес киунуги кæрони дзурдуат дæр.
Киунугæ аразгæй циуавæр æрмæгæй пайдагонд æрцудæй?
Фæстаг рæстæги мæ кусти куд баффеппайдтон, уомæ гæсгæ мæ бон зæгъун æй: сувæллæнтти зæрдæмæ хъæбæрдæр цæунцæ бæстæзонæн (историон), нæ фиддæлти туххæй, хе даруни туххæй, æрдзи туххæй æрмæгутæ.
Æз мæ кусти архайдтон испайда кæнун, ома, бахæссун киунугæмæ фулдæр æрмæг аци темитæй. Пайдагонд æрцудæй поэтикон, прозаикон уадзимистæй: Тамати Хъазбеги, Скъодтати Эльбруси, Гурдзибети Бариси, Гетьоти Виктори, Гадати Лазæри, Темирати Мурати, Сабайти Сулеймани, Багъæрати Созури, Къибирти Амурхани, Бекмæрзти Афони, Секъинати Солтани, Темирати Тæтæрхъани, Рæмонти Александри исфæлдистадæй, журнал «Ирæф» æма газет «Дигорæ»-й ист æрмæгутæй, Нарти кадæнгитæй, уæдта ахургæнæн киунугæ «География Северной Осетии»- йæй.
Мæнмæ гæсгæ, фæлтæрæнти тексттæ æнцæ аййев: ес си берæ эпитеттæ, рабарститæ, метафоритæ, ома, аййевгæнæн мадзæлттæ.
Цæмæй скъоладзаутæ зононцæ, дигорон æвзаги фарсмæ ма ирон æвзаг дæр ес, цæмæй лæдæронцæ ирон дзурд дæр, уой туххæй киунуги алли уроки дæр лæвæрд цæуй 1 фæлтæрæн иронау. Испайда кодтон Къостай, Басити Мисости, Цæгæрати Гигой сувæлæнттæн финст уадзимистæй, газет «Рæстдзинад»-æй.
Аци кари скъоладзаутæ берæ уарзунцæ аргъæуттæ, бацеу-бацеутæ. Уомæ гæсгæ ес киунуги уæхæн æрмæг дæр дзæвгарæ.
Кусти хузтæ дæр æнцæ аллихузон: аййев кæсун, хебæраги косун, ахургæнæги æнхусæй архайун. Киунуги ма ес ирон æма дигорон дзурдтæ, муртæ кæрæдзей хæццæ рабарунæн æрмæг, уæдта æрдзи туххæй зонуйнæгтæ «Æрдзæ амонуй», зæгъгæ, Тауасити Фацбайи арæзт киунугæй.
Киунугæбæл косгæй, æз архайдтон, цæмæй æрмæги фæрци сувæллæнтти зундрахаст урухдæр кæна, цæмæй сæ деси æфтауа æма сæхуæдтæ дæр архайонцæ хебæраги ести базонунбæл.
Алли уроккæн дæр ес 2 теми: грамматикон æма дзурди.
Киунугæ æй аййев фæлгонцгонд.
Уоци куст зæрдиуагæй бакодта хузтæгæнæг Къубалти Аслан.
Фал киунугæн æ хъисмæт бунтон хуарз нæ рауадæй, мæнмæ гæсгæ. Кæд ин эксперттæ, рецензенттæ хуарз аргъ искодтонцæ, уæддæр си пайда ба кæнунцæ æрмæст цалдæр скъолай. Куд базудтан, уотемæй скъолати директорти, берæ ниййергути нæ фæндуй аци предмет ахур кæнун.
Ахургæнæн киунугæмæ ма арæзт æрцудæй уæлæмхасæн «Косæн тетрад» дæр. Уоми дæр лæвæрд цæуй цæмæдессаг æрмæг хебæраги куститæн: ерисæй косунæн, исфæлдистадон куститæ, ратæлмац кæнун уруссаг æвзагæй дигоронмæ, ездон дзурдтæ рахецæн кæнун гурумухъ дзурдтæй.
6-аг къласи киунугæ мухури рацудæй эксперименталон кълæстæн.
Киунуги поликультурон æрмæг ес 4-аг къласæй фулдæр. Мæнмæ гæсгæ, æй цæмæдесаг æрмæг. Программæмæ гæсгæ си ахур кæнунцæ морфологи (дзурди хæйттæ).
Ес си берæ аллихузон кусти хузтæ: дзурди ирæзтбæл куст, дзурдуатон куст, хебæраги куст, хузæмæ гæсгæ куст æма æнд. Пайдагонд си æрцудæй куд дигорон, уотæ ирон финсгути уадзимистæй дæр.
8-аг къласи киунугæ дæр мухури рацудæй æрмæст фæлварæни хузи. Программæ куд амонуй, уомæ гæсгæ аци киунугæмæ хаст æрцудæй æрмæг синтаксисæй: дзурдбасти хузтæ, гъудиадæ ’ма æ хузтæ, гъудиади иуæнгтæ, седæн, байвæргæ дзурдтæ, комкоммæ æма фæрсаг дзурдтæ, диалог, цитатæ. Æдеугур 51 сахати (урокки).
Киунуги ес æрмæг не`взаги туххæй, нæ фиддæлти царди туххæй, æрдзи фæззиндтити туххæй, адæймаги уоди рæсугъддзийнади туххæй. Пайдагонд æрцудæй адæмон исфæлдистадæй дæр: тауæрæхътæ, æмбесæндтæ, адæмон бæрæгбæнтти туххæй æрмæг.
Поликультурон ахурадæ куд амонуй, уомæ гæсгæ киунугæмæ хаст æрцудæй æрмæг Уæрæсей æма дуйнейи туххæй.
Берæ æрмæг си ес, Иристони æййевадæ куд ирæзтæй æма ирæзуй, уой туххæй. Зæгъæн, зундгонд фæндурдзæгъдæг Мерденти Хъайсæн, гурдзиаг композитор Виктор Долидзе, хузтæгæнгутæ Виктор Васнецов æма Иван Билибин, Туйгъанти Махарбег, Исаак Левитани туххæй ес æрмæг киунуги. Зундгонд дагестайнаг æма уруссаг поэттæ Р. Гамзатов æма Александр Пушкини уадзимистæ лæвæрд цæунцæ тæлмацгондæй.
Киунуги иссерæн ес Гобати Геуæргий, Бесати Тазей, Даурати Дамири, Черчести Хъасболати, Хъайтухъти Азæмæти, Гулути Андрейи, Цæгæрати Максими уадзимистæй æрмæг.
Киунуги ма дзæвгарæ ес æрмæг сувæллæнтти патриотон гъомбæладæн дæр.
Фарæстæймаг къласи киунуги автортæ æнцæ дууæ: Пухати Ларисæ æма Хадати Фузæ. Киунуги æвзурст цæунцæ синтаксиси фарстатæ программæмæ гæсгæ. Дзурди темитæ ами дæр æнцæ аллихузон: Райгурæн бæстæ –Уæрæсе, Иристон, анзи афæнттæ, хуарз æма лæгъуз кæрæдземæй æвзарун, æрдзæ нæ алливарс, нæ историбæл рафæлгæст, нæ адæми æгъдæуттæ æма бæрæгбæнттæ, хестæрæн аргъ кæнун, аййевади алли хузтæ Иристони, Уæрæсей æма дуйнейи.
Ес си æрмæг адæмон исфæлдистадæй, уруссаг æма ирон-дигорон финсгути уадзимистæй. Дзæвгарæ æрмæг си ес зундгонд адæми туххæй: Хъантемирати Алибеги, Темирати Тазей, Уазити Махар, Адирхати Светлани, Сохити Туйгъани, Гæздæнти Аврори, Тæбæхсæути Балой, Уильям Шекспири, Сергей Есенини туххæй.
Дæсæймаг къласи киунугæ дæр дзуапп дæттуй программи домæнтæн. Ами дæр ес берæ æрмæг скъоладзаути зундрахаст урухдæр кæнунæн.
Дигорон æвзаги ахургæнæн киунугутæ рацудæнцæ наукон экспертизæ. Уоми загъд цæуй: «Ахургæнæн киунугути медес дзуапп дæттуй Федералон ахурадон стандартти домæнтæн… Бæстон си лæвæрд цæуй нуриккон дигорон æвзаги æрфинст (описание) æма функционалон стильтæ». Экспертизи автортæ лæмбунæг равзурстонцæ еугур киунугутæ дæр, исбæрæг кодтонцæ гъæндзийнæдтæ дæр.
Автор арази æй еци гъæндзийнæдтæ исраст кæнунбæл, кæд киунугутæ багъæуонцæ скъолати, уæд.
ХАДАТИ Фузæ.
г. Дзæуæгигъæуи 50-аг скъолай ахургæнæг,
РЦИ-Аланий скъуæлхт ахургæнæг
