ДИГОРОН ÆВЗАГМÆ СÆРМАГОНД БАЦУД.
Ци ’й æвзаг? Адæймагæн тæккæ уæлдæр æскъуæлхтдзийнæдтæй æ къохи цидæриддæр бафтудæй, уони сæйрагдæртæй еу. Цæйбæрцæбæл цæмæдессагдзийнæдтæ аразт æрцудæй адæймаги зунд æма къохтæй. Фал се ’гасемæй цæмæдессагдæр ба æй æвзаг. Нæ сабийдогæй райдайæ æма æ рамæлæти уæнгæ нæ еугур архайд дæр баст æй æвзаги хæццæ. Мадтæлон æвзаг æй æностæ кæрæдзебæл бæттæг фæрæзнæ. Уой фæрци лæг лæдæруй æ адæми æхедундзийнадæ евгъуди æма нæ абони царди, æхе бæттуй нæ культури хуарзæй ци байзадæй, уобæл.
Зундгонд уруссаг финсæг Константин Паустовский уотæ финста мадтæлон æвзаги туххæн: «Адæймаг æ мадтæлон æвзагмæ ци рахаст даруй, уомæ гæсгæ ин ес исаргъгæнæн æ культурон æмвæзадæн æма æхсæнади ци бунат ахæссуй, уомæн. Нæййес райгурæн бæстæ уарзæн æнæ е ’взаг ин уарзгæй. Æ мадтæлон æвзагмæ куд фæнди ’й цæстæй ка кæсуй – е гъæддаг æй. Уомæн æ адæми евгъуд æма федæн æмхузон нецæййаг æнцæ».
Цума ци æй сувæллонæн æ мадтæлон æвзаг? Е æй æ царди æй æхсицгондæр ци гъæуй, еци фæрæзнæ, Сабий дзорун дæр нæма фæззонуй, уотемæй ба æ гъостæй ахæссуй, æ нана ин ци аргъæуттæ фæдзоруй, уони муртæ, авдæни сæргъи æ ниййерæг мади зартæ. Уотемæй ирæзуй, скъоламæ цæун райдайуй. Уоми ба æнæгъæнæ дзурдти денгиз, ахургæнæги амонæн дзубандитæ æма уотемæй балæдæруй, æ цæститæй уингæ дæр ке нæма фæккодта, уæхæн дессæгтæ. Дзурди фæрци имæ исæвзуруй æ райгурæн бæстæмæ уарзондзийнадæ. Æма ку раустур уа, кæми фæндуй дæр ку цæра æцæгæлон рауæн, уæддæр ин æ маддæлон æвзаг æ зæрдæбæл лæуун кæндзæнæй æй фиди хæдзарæ, фадуат ин дæтдзæнæй æхе æвзагбæл аййевадон литературæ, истори, адæмон æгъдæуттæ ахур кæнун æма зонунæн.
Мадтæлон æвзаг æй еугур гъæздугдзийнæдтæй хъазардæр, адæймаг сæрустур кæмæй гъæуама уа, уæхæн фæззинд.
Æвæдзи, уомæ гæсгæ 1999 анзи ЮНЕСКО-й Генералон конференций сфедар кодтонцæ еугурдуйнеон Мадтæлон æвзаги Бон. Бæрæггонд ба цæуй 2000 анзи 21 февралæй фæстæмæ.
Нуриккон уавæрти уæлдай фулдæр æргомздæхт цæун райдæдта дигорон æвзаг ахур кæнуни хуæрзгъæдæдзийнадæ бæрзонддæр кæнуни гъуддагмæ.
Лескени астæуккаг скъолай ахур кæнунцæ дигорон æвзагбæл Тахъазти Федари «Дигорон æвзаги кæсуни киунугæ» æма Химилонти Азæ æма Хъарданти Лариси «Кæсуни киунугæ». Етæ ма æнцæ 1-аг къласæн «Абети» киунугути автортæ дæр.
Дигорон æвзаг ахур кæнуни гъуддаг айдагъ «Цæбæл сæ ахур кæнæн», уæдта «Куд сæ ахур кæнæн», зæгъгæ, еци фарстатæбæл дзуапп нæ дæттуй, фал ма «Ке ахур кæнæн», – еци фарстабæл дæр.
Цæмæй еци фарстатæбæл дзуапп лæвæрд æрцæуа, уой туххæй ба нæ фиццагидæр дзуапп раттун гъæуй мæнæ уæхæн фарстатæбæл:
1. Ахурдзаутæн дигорон æвзаг сæ мадтæлон æй, æви æй æрмæстдæр скъолай ахур кæнун райдайунцæ?
2. Ахурдзаутæ сæ мадтæлон æвзагбæл дзорун зонунцæ æви нæ. Лескен æй, берæхузон адæмихæттитæ кæми цæруй, уæхæн гъæу.Фæрсæй-фарсмæ си цæрунцæ туркæгтæ, курдтæ, уруссæгтæ кæсгæнттæ азербаджайнæгтæ æма æндæр адæмихæттитæ. Уонæн се ’гасемæн дæр дигорон æвзаг, куд фæстæмæ, иссæй сæ дуккаг мадтæлон æвзаг, уомæ гæсгæ ба æ ахур кæнуни рæстæги исæвзуруй сæрмагонд фарстатæ. Фиццагидæр сæмæ цæмæй дигорон æвзаг ахур кæнунмæ цæмæдесдзийнадæ исæвзурун кæнай, уой туххæн бал сæ гъæуй айдагъ æвзагмæ нæ, фал адæми культурæмæ исцæмæдес кæнун.
Скъолай дигорон æвзаг ахур кæнунæн ес гъомбæладон æма ахурадон нисанеуæг. Æвзаг ахур кæнунæн ес, устур æхедундзийнадæ, цæмæй æй æнхæстæй базононцæ, цæмæй ибæл кæсун æма раст финсун зононцæ.
Скъолай дигорон æвзаг дæтгæй, ахургæнæги ихæс æй ахурдзаути культурон æма зонадон ирæзт бæрзонддæр кæнун. Фиццагидæр скъолай рæстæги федар кæнуй скъоладзауи дуйнелæдæрундзийнадæ, уомæ гæсгæ ба архайун гъæуй, цæмæй имæ дзурдмæ уарзондзийнадæ æвзура, æрдзи фæззиндтитæ лæдæра, æ фæлабулай цидæриддæр цæуй, уонæн аргъ кæнунгъон уа. Еци гъуддаги спайдагæнæн ес уæхæн æрмæгутæй: «Æвзаги устур тухæ ес», «Зæнхæ – æрдзи мадæ», «Нæ алливарпс дуйне», «Хестæрти нимайæ» æма æнд.
Спайда кæнун æмбæлуй, дигорон æвзагбæл ци аæрмæгутæ ес, уæдта æвзагæн æхецæн ци стур нисанеуæг ес нæ царди, еци мадзæлттæй. Скъоладзаути дзурдуат гъæуама еудадзугдæр кæна гъæздугдæр, зона си пайда кæнун дзоргæ-дзоргæй, куд растдæр зæгъгæ æма финсгæ ’й дзурд.
Уой туххæн ба пайда кæнун æмбæлуй предметтæ æвдесунæй, схемитæй, таблицитæй, хузтæй, хузиститæй æма æндæр уæхæн æрмæгæй.
Нуртæккæ скъолатæ ефтонггонд цæунцæ аллихузон техникон фæрæзнитæй, уомæ гæсгæ ба етæ устур æнхус æнцæ зæлтæ игъосунæн æма цæстуингæ æрмæгутæ хуæздæр балæдæрунæн.
Еугур еци мадзæлттæ æнхус æнцæ дигорон æвзаг хуæздæр балæдæрунæн, уæдта цæмæдес кæнунцæ ахурдзаути æ балæдæрунмæ.
Цæстуингæ æрмæгутæй пайда кæнун гъæуй, куд евгъуд æрмæг фæлхатт кæнуни, уотæ нæуæг рацуд æрмæг ниффедар кæнуни кусти дæр. Цæстуингæ æрмæг хуарз æнхус æй, сувæллæнтти дзурди гъæдæ бæрзонддæр кæнунæн дæр. Дзурдтæ багъуди кæнуни куст æнгом баст æй, предметæн æхе ци хузи уинуй ахурдзау, уой исбæрæг кæнуни хæццæ дæр.
Дигорон æвзаги урокти рæстæг сувæллæнттæ зонгæ кæнунцæ адæмон сфæлдистади, æмбесæндти, бацеу-бацеути, зартæ, гъæзттитæ, салам дæттуни, æфсæрмий дзурдтæ, уруссаг цитгин финсгути сфæлдистадæ сæ мадтæлон æвзагбæл ахур кæнуни æма æндæр хабæртти хæццæ. Етæ фулдæрхатт фæуунцæ бæрцæй минкъийгомау радзурдтæ, æмдзæвгитæ, уæдта сæхуæдтæ ке æргъуди кæнунцæ, уæхæн уадзимистæ. Еци мадзæлттæй, дигорон æвзаги пайдагæнгæй, ахургæнгути къохти æфтуйуй еухузон уроктæ дзæвгарæ цæмæдессагдæр, сæ ахурадон зонундзийнæдтæ ба син гъæздугдæр кæнун.
Уæхæн æрмæгути медес фиццагидæр гъæуама арæзт уа сувæллæнтти дзурди культурæ, райгурæн бæстæбæл еузæрдион, сабурдзийнадæбæл тохмæ, национ хелæдæрундзийнадæмæ арæзт. Уонæбæлти сувæллони ахур кæнун гъæуй сауæнгæ æ авдæнæй.
Устур агъаз ма æнцæ, фæсурокти уæлæмхасæн мадзæлттæ дæр: «Зонундзийнæдти бæрæгбон», «Ахургæнæги Бон», «Фидибæстæ гъæуайгæнæги Бон» æма уотæ ид.
Сувæллæнттæ арæх бабæрæг кæнунцæ сæ балцити рæстæг тугъдон фæндæгти хæццæ баст бунæттæ. Августи фиццаг сабати ба алкæддæр бабæрæг кæнунцæ Задæлески Нанай ковæндонæ. Нанай цардвæндаг – ервæзунгæнæг мадæн кадæхæссæг гимн. Хумæтæги ’й изæдбæл нæ банимадтонцæ адæм. Дигоргоми финги уæлгъос бадгæй ин хестæр алкæддæр дзæгъæли хумæтæги æ ном не ’римисуй. Мадта ибæл зартæ дæр искодтонцæ, аййевадон уадзимисти дæр арæх фæууй æ кой.
Дигорон адæм фæлтæрæй-фæлтæрмæ ци æгъдæуттæ æма культурæ аразтонцæ, уой скъолай ахурдзаутæн амонун гъæуй дигорон æнцонлæдæрæн æвзагбæл.
Зæгъæн: Æгъдау. Ци ’й æгъдау? Е æй адæмон хæзна, адæймаги иннæ цæрæгойтæй ци фæткитæ хецæн кæнуй, уæхæн фæззинд. Е амонуй адæймаги уарзун æма нимайун, рæстзæрдæ, æнæхæрæн ун, фæлмæн уод, райгурæн бæстæбæл еузæрдион ун. Еци еугур хабæрттæ бакæсæн ес Нарти кадæнгити.
Нæ цæнхæ æма къæбæрдæттондзийнадæ ба? Е нин нæ рагфиддæлтæй æризайгæ фарнæ æй. Гъæуагæ адæймаги хæццæ дæ къæбæр дууæ дехи бакæнæ, еци æгъдау нæмæ мингай æности разæй æрцудæй æма иссæй дигорон-ирон адæмæн сæ царди фæткæ. Устур ходдуйнагбæл нимад адтæй иуазæги дæ колдуарæй раздахун. Еци æгъдау æй нæ уодти монон бæрзонддæр минеуæг.
Нуртæкки дæр нæмæ еци æгъдау исæвд нæй. Иристони берæ ес ледзæг адæмтæ Донбассæй, Луганскæй æма сæ хæццæ дууæ дехи кæнæн нæ коми комидзаг, æрветæн син уордæмæ гуманитарон æнхус, нæ фæсевæдæй беретæ ба син гъæуай кæнуй сæ фидибæстæ аллихузон знæгтæй.
Уæлдай цæмæдесдæрдзийнадæ ба сæмæ сæвзуруй, нæ дигорон фæткитæбæл æма æгъдæуттæбæл син ку дзорай уроки, уæд е:
* Хæдзарæмæ иуазæг, синхон кенæ сувæллон ку æрбахеза къасæрæй, уæд ин еугурæй дæр исистунцæ.
* Хестæр ку дзора, уæд æй хъор дарун нæ гъæуй.
* Финги уæлгъос хе дарун гъæуй ездонæй æма у. ид.
«Симд-и кафти туххæн син ку дзорай, уæд син гъæуй балæдæрун кæнун, еци кафтæй еугур ирон-дигорон адæм дæр сæрустур ке æнцæ, уой. Ами ма ахурдзаути гъос æрдарун фæгъгъæуй кафгути уæледарæсмæ дæр.
Музыкалон цæгъдæнтæй пайдагæнгæй (фæндур, дала фæндур), син радзорун æмбæлуй, Нарти адæммæ фæндур кутемæй фæззиндтæй, ци драмон цаутæ баст æнцæ æ хæццæ, уонити туххæн.
«Сирдон агæй исиста æ хестæр фурти цонг æма уомæй саразта фæндури къæлæт, иннæ фуртти зæрдауиндзæнтæй ба ибæл тæгтæ бабаста æма си рауадæй дууадæстæнон фæндур. Уой фæсте ин æ тæнтæ арæхстгай райвазта æма райгъустæй фиди зар – гъарæнгæ тегътæбæл, фæзтæбæл, хуæнхтæ æма цъететæбæл.
Еци кари сувæллæнттæй беретæ цæгъдун фæззонунцæ фæндурæй, дала фæндурæй.
Еугур еци гъуддæгутæ лæдæргæй, сувæллон никки хуæздæр лæдæрун райдайуй æгъдау æма æ хæццæ баст фæткитæ, исæвзуруй имæ сæрустурдзийнадæ – Аланти, нæ рагфиддæлти фæдон ке æй, уомæй. Е ба æй фиццагидæр мадтæлон æвзаги фæрци.
Ходи Азæ
Лескени астæуккаг скъолай ахургæнæг
