ТАХЪАЗТИ ФЕДАР
"СПРИНТ"
Радзурд
Гæбис гомори тургъӕй рахезгӕй, е' мбӕлттӕй фӕццох æй æма ӕ них саразта хуӕрӕндонӕмӕ. Куд хӕстӕгдӕр кодта хуӕрӕндонмӕ, уотӕ 'йбæл 'е стонгдзийнадӕ бедун райдӕдта. Кусти медӕгӕ ин и ӕхцабæл сагъæстæ е' стонг ахӕсни дзӕфхъу сабур кодтонцӕ. Нур е 'хца æхе фæууогæй, е'уӕнгтӕ ӕркалдӕнцӕ фур фӕлладӕй ӕма стонгӕй. Ӕ алли ампъез дӕр уӕззауӕй-уӕззаудӕр кодта.
Хуӕрӕндонмӕ бахезгӕй, тӕрхӕгутæбӕл аллихузи хуӕруйнӕгтӕ ку ӕрӕстӕфтӕй, уӕд ӕ ахсӕнӕй цума ӕндӕмӕ еске рагӕпп кӕнунмæ гъавта, уоййау си цидӕр гӕбар-губур ӕма дзанхъула иссудӕй, фал æ къахдзӕф ба фӕррӕуӕгдӕр ӕй. Цӕстӕ нецӕмӕй бал ӕфсастæй, æма ку райста, етæ дууæ къосхæссæнебæл дæр туххæй бацудæнца.
- Миййаг мӕмӕ ӕхца нæййес, - зæгъгӕ, ӕрбадтӕй фингӕбал æма æрдæгæууилдтитæй зудæ хуæрд кæнун фæййагайдта.
Фур хуӕрдӕй ӕ бон цӕун дар нӕбал адтæй, æма, автобуси æнхъуӕти цӕуни бӕсти сфӕндӕ кодта фестӕгӕй рандӕун ӕмдзӕрӕнмӕ. Еу минкъий ку рауадӕй, уӕдта бабæй æ гъудитæ æ дзиппи ранигъулдӕнца 'ма, цӕйбӕрцӕ бакустон, зæгъгæ, е'хцата расгарста ӕ къохӕй. Нæ сӕмӕ ниггац кодта, систа сӕ, 'ма еу къуар хатти сӕ банимадта. Кӕд ӕй хуарз зудта цуппар соми 'ма ӕртӕ тумани 'ймӕ ке ес, уой, уæддæр имæ цӕмӕдӕр гӕсгӕ уотӕ кастӕй, ӕма еу хатт ма сӕ ку банимайа, уӕд сӕбӕл ести бафтуйдзӕй.
- Къуӕрей фагӕ мин ӕнцӕ, - гъудитӕ кодта Гӕбис, - уӕдта Хуцау хуарз ӕй. Кафей фагӕ дӕр ӕнцæ. Бадзорун гъӕуй Аззӕмӕ. Еу хатт кафей ку бабадӕн, уӕд, миййаг, нæ хъуртӕ нӕ фӕррессӕнцӕ, - зӕгъгӕ бараст ӕй таксафонмӕ. Ӕхе гъӕздуг ӕнкъаргӕй, лекцитӕй ке фӕццох кодта, уобӕл дӕр нӕбал тухстӕй.
Аззи хӕццæ бадзубанди кодта дууӕ сахаттей фӕсте фембӕлун. Уомæ гæсгæ ба, рӕстӕг ма ес, зæгъгæ, уӕзгӕ цудӕй ӕ меднимæр е 'хца бӕнттæбӕл иуаргӕй: бонӕ цӕйбӕрцӕ фӕлхас кӕндзӕй, 'ма ин цал бонемæн рахъӕртдзӕнцӕ. Еци хигъдӕй рахецӕн кодта авд соми, - кафе 'ма кеномӕ ке бахарз кӕна.
Уӕхӕн нимӕдтитӕ кӕнгӕй, базари гъӕунги тегъӕмӕ ку схъӕрттӕй, уæд æ индугки фӕцæнца адӕми къуар. Адӕм ӕркъупхӕ 'нцæ спортлотой будкæбӕл. Будки уæйæ кодтонца "Спринт" лоторетӕ. Лоторе ка райсидæ, е ба ӕхе раеуварс кӕнидæ 'ма, цалинмæ ӕ лотере фӕббæрӕг кӕнидӕ, уæдмæ ба'ймӕ иннетӕ ниссæццæ уиуонцæ, рамолдзæй æви нæ, зæгъгæ.
- Атӕ гъӕздуг æнцæ, ӕхе сæбӕл раеуварс кодта Гӕбис, - ӕндӕр нур уой нæ лæдӕрунцæ ӕгас лоторетæ дæр æхца сайæн ке‘нцӕ. Кæд си еу фондз адӕймаги ести рамола, уӕддӕр хуарз, иннетӕ ба фудæнгъæл фæууодзæнцæ. Нур си, цума, машинӕ ба ескӕмӕн рамолдзӕй? Тӕходуй, уӕхӕн амонд дæр кæмæ 'рхауй. Нурдантима ӕз дӕр машинӕ рамулдтон. "Жигули" асландæр æй. "Волгæ". Ӕнӕгъӕнæ дӕс мини. Къохи ба ма
'й ку рауæйæ кæнай, уæдта еу дууинсæй мини дӕр ӕнгъезуй райсун. Фал, ӕхца неци лӕууй, ӕма, уой бӕсти ба машинӕ уадздзӕн. Уогӕ, "Волгæ" баййевун ӕнгъезуй "Жигули"- бӕл ӕма ӕхца дар мӕмӕ байзайдзӕй.
Кӕмити уозер кæндзæнца Аззи хӕццӕ "Жигули"-бӕл, уæдта е'мбӕлтти хӕццæ куд уайдзæнцӕ ӕрдзи бабадунмӕ, уонӕбæл сагъæсгæнгæй спортлотой будки рази куд равзурстӕй, уой лӕдæргæ дæр нæ бакодта.
- Цæй, дæлæмӕ дæр - уæлæмæ дæр еу сом ми фӕгъгъæуæд, - æ къох бадаргъ кодта лоторемæ.
Еуварс рацудæй, æма 'й еци хӕлӕфæй фехалдта. Еу усмӕ ци си финст адтæй, уой не 'ртаста. Уотӕ 'ймӕ кастӕй - гъӕуама, ӕнӕмæнгæ, машинæ рамулдтайдӕ. Уоми, ба цæмӕдӕр гӕсгӕ, машини бӕсти «Спринт" финст разиндтӕй. Нæуæгæй си райста билет. Дуккаг хатт дæр ин, ӕнӕнгъӕлти, æртӕ соми рамулдта.
Уӕддӕр сом фӕххуӕрд унбӕл исарази дӕн, - зæгъгæ, æртæ сомемæй дæр "Спринт" райста. Фал ин си нур ба еу дӕр нецибал рамулдта.
- Цæмæннæ, мӕнмӕ ба уӕхӕн амонд ракӕссӕй, - багъенцъун кодта Гæбис, цӕунвӕндæ скӕнгӕй. Фал ӕй цидӕр ӕнгъӕлцӕ бауорӕдта. «Миййаг, ци нӕ фӕууй, кӕд мин нур ба ести рамола", - нӕуӕгӕй бацудæй "Спринт" райсунмӕ.
Машинӕ ин кӕд нӕ мулдта, уӕддӕр ин кӕми "Спринт", кӕми æртæ, фондз соми рамолидæ. Радон билет ку ихалида, уæдта "йбæл адæм æркъупхæ уиуонцæ, ӕма ‘й хинцфарст ракӕниуонцӕ: "Неци?"
Уотемӕй минкъийгай е'хца кунӕггӕнгӕ цудӕнцӕ. Фӕстаг сом ма систа æ дзиппæй, ӕрмӕст уӕд имӕ багъардта дорбӕл ке'сбадтӕй, е.
- Гæр, кæд Хуцау ес, уæд кӕми дӕ? - Ӕ маст ӕ хъурмӕ схъӕртгӕй, мæстгун ӕууӕрст кодта ӕ тумбул къохи ӕ фӕстаг сом. Мæ хедвæллойнӕ ку адтæнцæ, уæд мæбæл цæй спринтти ӕфсӕрмӕ адтæй. Ци зæгъдзӕн исон Аззӕн. Е ба дин мæ кафе... Ӕнӕхайир спринт фæууо. Ӕгас бон губурӕй ци къапеккитӕбӕл фӕгъгъезӕмарӕ кодтон, етæ мин ӕцӕг спринттау хуӕрд ку фӕцӕнцӕ. Нур мӕбӕл ци бӕлах æдтæй. Бон дӕр ма дзӕгъӕли фесавдӕй. Цӕй машини ӕфсӕрмӕ мӕбӕл æдтæй, ци зӕгъдзӕн нур исон деканатти-цӕмӕн фӕццох кодтон.
Сӕр фур мӕстӕй рӕдувта. Цума ӕгас бон вагӕнттӕй ци голлӕгутӕ тъулдта, уони ин æ сæрбæл ӕривæрдæй, уоййау ниууӕззау æй.
- Е ба дин машинæ. Е ба дин гъӕздугдзийнадӕ, - мӕстӕймарӕгаy дзурдта ӕхецӕн. - Хуарз ӕма уӕддӕр хуӕрӕндони мӕхе бафсастон.
Еци гъуди ӕ сӕри февзургӕй ин фенцондӕр ӕй, цума еу къуар инсади голлаги ин æ сæрæй рагӕлстæй, уоййау.
