САУКУЙТИ СОФЙА
Саукуйти Ханбийи кизгӕ Софиа æй æвзонг райдайӕг финсгути фӕлтӕрӕй. Райгурдӕй Цӕгат Иристони 1916 анзи, Ирӕфи райони, Лескени гъæуи астӕуккаг цæрæг хæдзари бийнонти æхсæн.
Софиабӕл 7 анзи ку рацудӕй, уæд æ фидӕ рамардӕй. Хæдзари байзадӕй берӕ хӕссуйнаг сувӕллæнттӕ ӕма Софиабӕл цалдангӕ 11 анзи рацудӕй, уæдмӕ ӕ бон нӕ бацӕй скъоламӕ ахур кӕнунмӕ бацӕун, хӕдзари куститӕ куд кодта, омæ гæсгæ.
Лескени скъолатӕ н'адтæй. Тухгинӕй кустонцӕ пусулмон дингӕнгутӕ, фал коммунистон партий раст разамунди фӕрци, 1926 анзи арӕзт ӕрцудæй скъола Лескени дӕр. Йеци анз фиццаг дӕр хатт фӕуидта Софиа Советон рохсади дуар – скьола. Софиа ахур кодта хуарз – лӕмбунӕг ӕма зӕрдаргъӕв.
Оми бацудæй Софйа уайсахат дæр нæуӕгдзаутӕмӕ, уӕдта фӕскомцӕдесмӕ дӕр ӕма фӕскомцæдес, æхуæдæг куд зæгъуй, отæ исцæй Софйайӕн:
«Мӕ сабий мӕгур бон
Седзæр ном уида
Ӕрмӕст мин на фæском
Загъта уӕд фидӕ, - зæгъгæ.
(1936 анз)
Саукуйти Софйа фондзанзон скъола каст фӕцæй 1930 анзи ӕма бацудӕй Цӕгат Иристони педагогон техникуммӕ. Софиа литература ций, ой лӕдӕрун байдӕдта техникуми. Софиа фиццагдӕр уарзун байдӕдта цубур радзурдтӕ. Бунтон берӕ бауарзта Софйа Хетӕгкати Къостай «Ирон фӕндур».
Техникуми бацудӕй Софиа литературон къуармæ æма оми райдӕдта ӕмдзӕвгитӕ финсун ӕвзарун, фал ӕмдзӕвгитӕ финсуни ӕгъдӕуттӕ нæма зудта Софйа, уæддæр къоли газети, уӕдта газет "Аригон Большевики" дæр цæун байдӕдтонцæ йеʻмдзæвгитӕ.
Дуккат ахури анз ку райдӕдта техникуми, - уӕд Софйа фӕссӕйгӕй ӕма ин ӕ ахур уадзгӕ ӕрцудæй. Лескени огæй æмдзӕвгитӕ финста райони газет «Сурх Дигорӕмӕ», оми мухургонд цудæнцӕ.
Софиа нæуæгæй райдӕдта ахур кӕнун. Мӕнӕ куд финсуй ой туххæй æхуӕдӕг:
«1933 анзи бацудтӕн Цӕг. Ир. Пед. Рабфаки 1-аг курсмæ. Оми райдӕдтонцӕ мӕ царди дессагдæр бонтæ: зӕрди фӕндон ахур кӕнун, ӕхсæнади куститӕ активонай кӕнун ӕма игъӕлдзӕг цард.
Фиццаг дууӕ анзи кустон профкоми сӕрдарæй, ой фæсте – фӕскомцӕдеси комитети секретарæй.
1935-36 ахури анзи Софйа каст фӕцӕй рабфак хуарз ӕма бацудӕй Цӕг. Ир. Пед. Институтмæ литературон факультетмӕ. Софйаи æмдзӕвгитӕ фæстаг рӕстӕги мухургонд цудæнцæ республики газеттæ «Рӕстдзинад», «Æригон Большевик» уæдта цӕг. Ир. Финсгути журнал «Мах Доги» дæр. Нуртæккæ хецӕн киунугӕй мухургонд цæунцæ йе 'мдзæвгитӕ «Колхозон фӕндур», зæгъгæ.
Ирон адæми ӕхсӕн силгоймаг финсгути кой гӕнгæй зæрдӕбӕл ӕрбалæууй, Октябри революций агъонмæ силоймаги цагъар цард. Ӕрбалӕууй зæрдæбæл силоймагӕн аргъ куд на 'дтæй, æ над баст куд адтӕй ӕма се 'хсӕн ци финсӕги устур таланттæ адтӕй, йетӕ гъист доги мети буни ке бацӕуионца, йе.
Æнӕ мӕнгӕ, силгоймӕгти ӕхсӕн уӕхӕн таланттӕ ке адтӕй, йе ба ӕй бӕлвурд. Ӕнӕ мӕнгæ, йе отӕ кей, ой фӕууинетӕ революций агъонмӕ ирон гъарӕнгити медӕгӕ; ирон гъарӕнгити иссердзинайтӕ аййевадӕй ӕнхӕст ӕма бӕрзонд кай, уæхӕндтӕ. Гъарӕнгитӕ омӕн йесӕн, ӕма Октябри цитгин сӕребари революций агъонмӕ силгоймагӕн бартӕ куд на'дтӕй, омӕ, гæсгæ æ поэтикон талант ӕрмӕст дӕр бӕрӕг кодта гъарӕнгити медӕгӕ.
Гъарӕнгити поэтикон хъаури коймӕ зӕрдӕбӕл ӕрбалæууй бӕлццон Березанови фӕндаггон финститӕ. Березанов цудӕй Салигуӕрдӕни коми 1853-4 ӕнзти ӕма оми фӕууидта йеци коми цӕрæг хуӕнхаг мӕгур лæг Саукуйи мӕлӕт, фегъуста, обæл æ сay рӕсугъд ӕвзонг кизги гъарӕнгитæ.
Березанов ниффинста еци сау рӕсугъд кизги гъарæнгæ. Зæгъун гъӕуй, еци гъарӕнги медӕгӕ кей ес берӕ поэтикон хъаурӕ (уӕдта сау рӕсугъдæн æхе цард дӕр ой хузон хузти ке цудӕй), ой.
Мӕнӕ еци гъарӕнгӕ (уруссаr æвзагӕй тӕлмацигонд Хъ. Хъ.)
"Байгъосетӕ, хуарз адӕмтӕ,
Байгьосетӕ, базонетӕ
И сау кизган ӕ сау хабар, ой, ци кæнон!
Ой, ци фæцæй нӕ арф кӕмттӕ
Нæ сау хуӕнхтӕн сӕ федауцӕ,
Сæ уалдзигон хӕмпос мет, ой ци кӕнон!
О, ци'рцудай ой фӕдбӕл,
Ӕрвхуз бæлæу тӕхгӕ-тӕхгӕй
Ӕ базури рохс кæрæндтæй
Дони суги кеʻрфинста, ой, ци кæнон?
Они сумах хуарз зонетӕ,
Хуарз зонетӕ, зӕгъдзинайтӕ, ой, ци кӕнон!
И орс меттӕ фицгӕ донӕй
Рацудӕних Ӕрӕдонбӕл.
Бæлӕуи фӕд ӕрбайсавдӕй
Абæреги топпи хъуӕцау, ой, ци канон!
Саукуйбæл мин, ой, ци'рцудӕй,
Цæм'æй æмир, нӕ дзоргӕ
Аци берæ иуазгутӕмӕ, ой, ци кæнон!
Цæмæннæ цæуй сӕ цормӕ...
Куд син нæ зӕгъуй медӕмӕ, ой, ци кӕнон,
Æвий бафедар кодта хуссӕнмӕ
Хуæццо ӕзнаги фуд нӕмуг, ой, ци кӕнон?!
Нæ хуарз адæм, мӕнӕ рӕхги
Фегъосдзæнæй нæ хъурми дзурд
Æма иуæндæг фесдзæнæй, ой, ци кæнон!
Фалӕ цæмӕн берӕ хуссуй?..
Хорӕй раздӕр ку фестидӕ,
Ӕ цауæйнон хуӕцӕнгӕрзтӕ
Хуӕрз кӕдзосæй ку даридæ, ой, ци кӕнон!
Фалæ ци'рцудæй, хуарз адæм,
Уæлæ хуæцæнгӕрзтӕ фарсбӕл
Седзæр æнгас ку кæнунцӕ, ой, ци кӕнон?!
Нæ, нæбал, нӕбал, нӕ хуарз адæм,
Нæ бал баходдзæнæй
Нæ рохс хори цӕстæ, нӕ, ой, ци кæнон!!"
(1853 анз).
Аци гъарӕнги скъуддзаг бæрæг кӕнуй, Октябри агъонмæ нæмæ силгоймӕгти æхсæн финсӕги талант ке адтӕй, ой, фал ӕлхъивд ке адтӕнцӕ силоймӕгтӕ, омӕ гӕсгӕ ке бахуссионцӕ, йе.
Аци рауӕн зӕрдӕбӕл ӕрбалӕууй грекъаг литературӕ Сапфо, силгоймаг финсӕг, цардӕй VI сӕданзӕй мах агъоммæ. Йеци силгоймаг финсӕги финстити хӕтдзӕ ку рабарӕн, уæлдæр ци гъарӕнгӕ ӕрхастан, ой, уӕд зӕгъун ӕнгъезуй аййевадон ӕгъдауӕй Сапфой финститӕй берӕ ниллæгдæр ке нӕ'й, ой. Зæгъун гъæуй ирон адӕми ӕхсӕн (уӕдта æгас хуӕнхаг адӕмти ӕхсæн дæр) ке адтæй Сапфотӕ, фалӕ цагъайрагдзинади уӕзи буни ке тар кодтонцӕ, ой.
Октябри циткин революций агъонмӕ ӕрмӕст дæр бацæй, æ поэтикон финсӕги хъаурӕ равдесун Кочисати Розӕн устур зиндзинӕдти хӕтдзæ.
Нур Октябри революций равардта урух над ӕгас адӕмти хæттитӕн дæр æма ирӕзуй устур ампъӕзтæй, сӕ цардиуаг, сӕ культурӕ, ӕ формӕ национ, ӕ аппӕ ба интернационалон огӕй.
Нур æгас хуӕнхаг адӕмти ӕхсӕн дӕр фӕзиндтæй нæуæг фӕлтӕри силгоймаг финсгутӕ, онæй æй Саукуйти Софйа дӕр. Нуртӕккӕ Цӕгат Иристони ци силгоймаг финсгути ӕвзонг фӕлтӕр гъомбæл кӕнуй, онӕй зингӕдӕр ӕй Саукуйти Софйа.
Софйай, советон хецауадӕ, фӕскомцӕдес куд исгъонбӕл кодта ӕма гъонбӕл кӕнуй, омæ гæсгæ йе'гас исфӕлдистадӕ дӕр баст ӕй нӕ доги социалистон арӕзтадӕбӕл федар, тох кӕнуй социализми ирӕзт - ӕнтӕстдзинӕдти сӕрбӕл.
Саукуйти Софйай ӕмдзӕвгити ӕхсӕн ес аййевадæй æнхӕст кай, уӕхӕн финститӕ («Ӕцӕг уалдзӕг», «Орденгинтӕ», «Сæрдтон изӕр», «Нæуæг анз» ӕма ӕнд.), фал Софйай финстити лӕмӕгъдзинæдтæ дæр ес. Еци ламӕгъдзинӕдтæ Coфйай бон баодзӕнӕй фесафун, ӕхебӕл зӕрдтагонæй ку бакоса, уæд.
Софйайӕн ӕ тематикӕ ӕй нӕ доги цард нæ доги ӕнтӕстдзинӕдтӕ, нӕ доги идзулд цардиуагӕй гъӕст. Уарзуй Советон Цӕдес æнæ бæрцæ, уарзуй æ бæстӕ дӕр ӕма йе'гас хъаурӕ, цард дӕр баст ӕй йе'сфӕлдесӕгбӕл Советон Цӕдесбæл.
«Мæ цийнæ, мæ хъаурӕ,
Мӕ лирӕ, мӕ зар!-
Советон курдадзӕ,
Канун дин лӕвар!»
зæгъгæ бабаста ӕ гъудити кӕрон Саукуйти Софйа - не доги Сапфо.
Хъазбегти Хъазбег
Г. Орджоникидзе
1937-1-X.
