Сабаев Сулейман Базжеевич (1930-2014).
Поэт, прозаик, доктор филологических наук, профессор, заслуженный деятель науки и техники РСО-А, заслуженный деятель науки РФ, действительный член Европейской академии естественных наук, член Союза журналистов Союза писателей РФ.
Цæмæн гъæуй мадтæлон æвзаг?
Евгъуд рæстæгути дæсгай æнзти дæргъи мадтæлон æвзагæн уотид æ кой кæнун дæр нæ уагътонцæ. Есге æ фарс ку радзоридæ, уæй æй уайтагъддæр «буржуазон националисти» номи хæццæ, куд фæззæгъунцæ, куйти хуæруйнаг бакæнионцæ. Нæ хецæуттæ æмæ интеллигенцийæй беретæ уомæ бæлдтæнцæ, цæмæй нæ бæсти еугур адæнтæ дæр еу æвзагбæл исдзурдтайуонцæ æма уой фæрци коммунизм тагъддæр арæзт æрцудайдæ. Нисан, ку зæгъун æй гъæуй, хуарз адтæй, фал еумæйаг æвзаг тухмиуæй ке аразтонцæ, е ба берæ зиантæ æрхаста адæнти культурон райрæзтæн. Уæлдай зиндæр уавæрти бахаудтæнцæ бæрцæй минкъийдæр адæнтæ æма сæ культурæ.
Дууинæймаг æнзти райдайæни еци незихатт рахæлеу æй Иристони дæр. Æцæг ами нисан райдайæни хумæтæгдæр адтæй: ирон æвзаги бундорбæл еумæйаг литературон æвзаг исаразун ирæ, дигорæ æма къударæн. Уой фæдбæл берæ дзубандитæ æрцудæй периодикон мухури æма æхсæнадон æмбурдти дæр. Ирон интеллигенцийæй еуетæ цæхгæрмæ ниввардтонцæ фарста, цæмæй дигорон æвзаг бунтондæр æхгæд æрцудайдæ мухури æма скъолати. Гъулæгкагæн, еци адæнти фарс ниллæудтæнцæ зундгонд литературон критик Тибилти Александр æма финсæг – прозаик Коцойти Арсен дæр.
Арсен 1927 анзи ниммухур кодта «Рæстдзинадæ» æма «Хурзæрин»-и дууæ уацгъуди, кæцити дзурдта, зæгъгæ, газзеттæ, журналтæ æма киунугутæ уадзун гъæуй æрмæстдæр иронау, скъолати дæр дигорон сабийтæ ахур кæнонцæ æрмæст йецирдигонау сауæнгæ фиццаг къласæй («Рæстдзинад», 1927 аз, 30 июль; «Хурзæрин», 1927, 27 номер). Уой æмцъух финста Тибилти-фурт дæр: «…в споре за первородство дигорскому языку придется уступить свое право младшему собрату, иронскому наречию, конечно, не за чечевичную похлебку, а во имя большой идеи единого осетинского литературного языка».
Адтæй ма нигкидæр уотæ дзоргутæ, фал сæ нихмæ карзæй ниллæудтæнцæ, дигорон адæни цард æма æвзаг хуарз ка зудта, уæхæнттæ. Уонæй адтæнцæ-адæмон ахургæнæг – рохситауæг Бердити Дудар, профессор Кокити Геуæрги. Етæ лæмбунæг исбæрæг кодтонцæ ирон æма дигорон æвзæгти хецæндзийнæдтæ æма уомæ гæсгæ нимадтонцæ, дигори адæн æнæкиунугæ, æнæ газет байзайдзæнæнцæ, сувæллæнтти бон ба иронау не ’суодзæнæй ахур кæнун, зæгъгæ. Еци гъуддаг ба нимадтонцæ хæрандзийнадæбæл. Дудар æ еу уацгъудий уотæ финста: «Ирон адæн ка хуннуй, етæ къуар æвзагей æздæхтæбæл дзорунцæ æма еуæй-еуетæмæ гæсгæ уони исеу кæнун æнгъезуй ирон æвзаги фæлхæнбæл.
Æнгъезгæ, гъай-гъай кæнуй, æнгъезæнæн дæр кæрон ес, ирон фæлхæнмæ рахæтунмæ æгириддæр зин нæй Ирæ, Къудар æма Туалтæн, фал Дигорæ ци ’хатдзæнæй, дæ ирон æвзаги фæлхæн дин æгириддæр ку нæ зона, уæд? Ке бон æй къæрандаси еу ханхæй æгас адæми æвзаг æривгæрдун?»
Дудар æма Геуæрги хуарз гъуддагбæл нимадтонцæ оссаг адæмæн, ома Ирæ, Дигорæ æма Къударæн еу литературон æвзаг исаразун, фал æй тухæй ке аразтонцæ, уой нихмæ адтæй сæ дзубандий сæр. Геуæрги финста: «Рагæй дæр мах дигорон адæмæй уотæ неке загъта æма нæ ирон адæми хæццæ еумæйаг литературон æвзаг нæ фæндуй, зæгъгæ. Мах уотæ зæгъæн, æма еумæйаг литературон æвзагæн, æвзаги хатæнтæ еумæ исæмæнтъери кæнæ, уотемæй искæнæн нæййес, фал æвзаги диалектти цард æхуæдæг гъуддаг бамондзæнæй».
Аци гъуди раст æй политикон æма наукон æгъдауæй дæр. Æвзæгтæ, диалекттæ ирæзунцæ сæхе медзакъонтæмæ гæсгæ, мæнæ æрдзи фæззиндтити хузæн. Уонæн базонæн ес, æма си фæппайда кæнун æнгъезуй, фал сæ декретти фæрци раййевæн нæййес, зумæг сæрдæй куд нæййес раййевæн, уотæ. Æрмæст æвзæгтæ уæд æрхæстæг уодзæнæнцæ кæрæдземæ, уæд си исуодзæй еу литературон æвзаг исаразæн, æма æмсæр, æмбарæй ку ирæзонцæ еумæ.
Уæхæн унаффæмæ æрцудæнцæ уæди рæстæги æгас дуйнетæбæл игъустгонд æвзагзонунади устурдæр ахургæдтæ, профессортæ Яковлев, Башкиров, Жиров, Миллер, Гортлевский æма æндæртæ сæ еумæйаг æмбурди Мæскуй, уæхæн унаффæ рахастонцæ нæхе ахургондтæ дæр, Цхинвали син ци еумæйаг æмбурд адтæй, уоми.
Ахургæндти фæндон æма дигорон интеллигенций курдиадæмæ гæсгæ советон хецауадæ, номхундæй ба М. И. Калинин, рауагъта уæхæн бардзурд, цæмæй республикон газет «Рæстдзинад», уæдта журнал «Мах дуг»-и мухургонд цудайдæ æрмæг ирон æма дигорон æвзæгтæбæл еумæ, уæдта скъолати дæр сувæллæнттæ ахур кæнонцæ райдайæн кълæсти сæхе мадтæлон æвзæгтæбæл. Уæхæн унаффæ рахаста 1934 анзи партий обкоми бюро дæр. Еци унаффи амунд цудæй, зæгъгæ, цалдæнгæ дигорон адæмæн сæ дзæвгарæ фулдæр хай базона еумæйаг литературон æвзаг, уæдмæ газет «Рæстдзинад»-и æма рауагъдади мухургонд цæуæд æрмæг дигорон æма ирон æвзæгтæбæл, дигорон гъæути скъолати дæр сабийтæ райдайæн кълæсти ахур кæнонцæ дигорон æвзагбæл. Уой уæлæмхасæн ба ма ирон скъолати дæр амунд цæуонцæ, ирон æвзаги ка нæййес, уæхæн дигорон терминтæ. Гъуддаги гæгъæдитæ дæр Дигори районе арæзт цæуонцæ дигоронау æма æндæртæ. Аци унаффæ мухургонд æрцудæй газет «Пролетарий Осетии» 1934 анзи 24 июли 163-306 номери.
Фал фæстæдæр уой нецæмæ æрдардтонцæ еуæй-еу хецауеуæггæнгутæ æма æдзæстуарзон интеллигенттæ. Адтæй ма æндæр æмбурдтæ æма финститæ, арæзт æрцудæй мæнгæ экспедицитæ дигори районтæмæ. Уотæ, 1936 анзи 10-11 июли Иристони арæзт æрцудæй конференци литературон æвзаги фæдбæл. Ами син бантæстæй уæхæн унаффæ рахæссун, цæмæй гъуддаги гæгъæдитæ арæзт цæуонцæ еумæйаг литературон æвзагбæл, дигорон терминтæбæл куст æхгæд æрцæуа, дигорон æвзагбæл ахургæнæн киунугутæ уагъд мабал цæуа, дигорон скъолати ба фиццаг къласæй фæстæмæ ахур кæнонцæ ирон æвзагбæл… Еци унаффæ дæр мухургонд æрцудæй газет «Пролетарий Осетии» 1936 анзи 14 июли, 158 номери. Ке зæгъун æй гъæуй, дигори интеллигенци уобæл не ’сарази æнцæ æма сæ номæй Бесати Тазе пъисмо ниффинста газет «Правда»-мæ. Уордæгæй ба пъисмо æрвист æрцудæй нæуæг алфавитти Еугурцæдесон сæйраг Комитетмæ. Ами 1937 анзи 25-аг январи сæрмагонд къамисий æмбурди æййивд æрцудæнцæ Иристони конференций унаффитæ.
Æнгъæлæн адтæй, уобæл гъуддаг ниллух уодзæнæй, зæгъгæ. Фал тухæмондаг æма дигорон æвзаги исæвдмæ бæлгутæ нæ банцадæнцæ. Æцæг, сæ тактикæ фендæрхузон кодтонцæ. Тæккæ фиццагдæр багъавтонцæ дигорон финсгутæй сæ ахсгиагдæртæ Малити Геуæрги æма Къосирати Сæрмæтмæ. Етæ æнæбундор цъифкалæнти фæрци ахæст æрцудæнцæ. Геуæргий мæнгæ даутæй фудгин кодтонцæ, колхози арæзтади нихмæ дзоруй, зæгъгæ, Сæрмæт ба, дан, советон цардарæзти нихмæ тохгæнгути хæццæ баст æй. Æцæгæй ба Геуæрги айдагъ устур финсæг нæ, фал ма адтæй Октябри революций æма уой фæсте рæстæгути устур æхсæнадон косæг, зундгонд «Кермени» партий агъаззагдæр разамонгутæй еу. Иристони культури ирæзтбæл зæрддагондæр архайгутæй адтæй Сæрмæт дæр. Уой фæсте иннæ финсгути ба тухмиуæй æздахтонцæ, цæмæй райдæдтайуонцæ иронау финсун. Æнæбари ирон æвзагбæл финсун райдæдтонцæ Гулути Андрей æма Бесати Тазе. Тазе уруссаг æма дигорон æвзæгтæбæл хуарз финста, уомæн æма сæ базудта æ мади æхсири хæццæ. Тæзе дæр дигоронау ци æмдзæвгитæ æма радзурдтæ ниффинста, етæ аййевадон æгъдауæй тухгин адтæнцæ. Абони уæнгæ дæр сæ иронх нæма ’нцæ уæди рæстæги фæсевæд. Æрмæст иронау ци уадзимистæ ниффинстонцæ, етæ ба рауадæнцæ дзæвгарæ лæмæгъдæр. Нæ син бантæстæй се ’скурдиадæ æндæр æвзагбæл æнхæстæй раргон кæнун.
Хуæздæр равгити нæ бахаудтæнцæ уони фæсте фæлтæртæй дигоронау ка финста, етæ дæр. Уомæн æвдесæнеуæг кæнуй, дæсгай æнзти дæргъи финсгути цæдеси рæнгъитæмæ ке некебал бауагътонцæ, Тетцойти Таймуразæй уæлдай, е дæр. Уой дæр дзæвгарæ рæстæг нæ истонцæ, фал мæскуйаг финсгутæй кадæртæ æ фарс ку сдзурдтонцæ, уæдта син гæнæн нæбал адтæй. Уæддæр æй æхсæнадон-литературон кустмæ ба хæстæгдæр некæд æруагътонцæ æма рахау-бахау фæккодта, цалинмæ пенсимæ рацудæй, уæдмæ.
Цума ци рамбулдтонцæ еумæйаг литературон æвзаг тухмиуæй ка аразта, етæ? Сæ зианæй, сæ пайдайæй кæци фæффулдæр æй?
Дзурд дæр ибæл нæййес, ирон æма дигорон адæн кæрæдземæй райзолдæр æнцæ зæрдæй дæр æма æвзагæй дæр. Рагъуди кæнайтæ, цанæбæрæг æхцæуæн адтайдæ дигорæн, сæ финсæг фæсевæд, сæ мадтæлон æвзаги фæндæгтæ комкоммæ хайладæй æхгæд ке цудæнцæ, е?.. Дзæвгарæ фæббæрæгдæр æнцæ æвзæгтит хецæндзийнæдтæ дæр. Нуртæккæ ирон æвзаги ка нæййес, уæхæн дзурдти бæрцæ дигорон æвзаги исхъæрдтæй фондз миней уæнгæ (раздæр сæ ахургæндтæ нимадтонцæ сæдæгæйттæй). Уой уæлæнхасæн ба ма нæ еумæйаг оссаг литературæ дæр дзæвгарæ фæммæгурдæр æй, дигорон фæлхæнæй ибæл, гæнæн куд адтæй, уотæ ке нæбал бафтудæй, уомæ гæсгæ.
Рагацау æй æнкъарун, уотæ дзоргутæ ке фæууодзæй, нурма рагон хабæрттæ цæмæн кæнуй, дигорон литературон æрмæг мухургонд ку цæуй «Рæстдзинад»-и æма «Мах дуг»-и дæр зæгъгæ. Фал гъуддаг уой медæгæ ’й, æма нур дæр ма еци фарстамæ раздæри хузæн цæстæнгас даргутæ ке ес. Уæдта мухур дæр кæнунцæ хъæбæр æстæн, æстонг лæгæн мамæлай къæбæр дæдтæгау. Уавæр берæ хуæздæр нæй рауагъдадæ «Ир»-и дæр.
Мухур кæнунæн бартæ ес, фал фадуæттæ исаразунбæл ба нурма некема байархайдта. Еунæг радекций дæр нæма ес, дигоронау хуарз ка зонуй æма ка финсуй, уæхæн косæг.
Берæ хъаугъатæ æма дзубандитæ æрцудæй дигорон гъæути сабийти сæ мадтæлон æвзагбæл ахур кæнуни фæдбæл дæр. Се ’гасей ка банимайдзæнæй, удта гъæугæ дæр кæми кæнунцæ, фал цалдæр цæуемæн ба æнæ зæгъгæ нæййес, цæмæй лæдæрд уа, куд гурумухъ тухмиуæй лухгонд цудæй еци фарста дæр, уой туххæй.
Фæндзайæймаг æнзти дуккаг æмбеси дигорон æвзагбæл ка финста, уонæй цалдæремæй курдиадæ ниффинстан СЦКП-йи Централон Комитетмæ, цæмæй нин фадуат лæвæрд æрцудайдæ мухур кæнунмæ дæр æма скъолати сувæллæнти ахур кæнунæн дæр мадтæлон æвзагбæл. Финстæг æрвист æрцудæй фæстæмæ нæхе обкоммæ. Раст еци рæстæгути ба цудæнцæ районти партион конференцитæ. Районти хецæуттæн байхæс кодтонцæ, цæмæй унаффæ рахастайуонцæ аци фарстай фæдбæл дæр, комкоммæ загътайуонцæ фæндон дигорон æвзаги нихмæ. Уæлдæр хецауадæ ци зæгъа, æма сæ дæлбареуæггæнгутæ ци нæ бакæндзæнцæ?.. Лухгонд æрцудæй, дигорон æвзаг некæми гъæуй, зæгъгæ. Курдиади æ къох кадæр байвардта, етæ ба дæрæнгонд æрцудæнцæ.
Дуккаг цау дæр уомæ хæстæг æрцудæй. Еци фарстай фæдбæл цæмæндæр гæсгæ хецауадæ нæхе наукон-æртасæн институти райаразта æмбурд тагъд – хæлæфæй. Дигоронау ка финста, уæдта дигорон скъолати ка куста, уонæй си еунæг дæр неке æрбахудтонцæ. Æз дæр æмбурдмæ бахаудтæн æнæнгъæлти, еци рæстæг уоми ке фæдтæн, уомæ гæсгæ. Æмбурд хаста уæди рæстæги обкоми мухури хайади сæргълæууæг Дзасохти Таймураз. Дигорон æвзаги нихмæ хъæбæр карзæй ниллæудтæнцæ Козурти Тамарæ æма Цагъати Настя – æвзæгтæбæл наукон æгъдауæй косгутæ. Мæнæ сæ сæйрагдæр гъуди: «Мах дигорон диалект гъæуй æрмæстдæр, цæмæй зонæн нæ еумæйаг ирон æвзаги истори. Еци куст кæнунæн ба нури уæнгæ фагæ мухургонд æрцудæй дигоронау æма нæ фулдæр нæбал гъæуй. Гъæутæмæ дæр экспедицитæ исаразтан æма исбæлвурд кодтан, дигорон æвзаг ке некæми гъæуй, уой». Кæд мин дзурди барæ зинтæй лæвардтонцæ, уæддæр цалдæр хатти радзурдтон, фал, куд фæззæгъунцæ, «мæ дзубандитæ дон æ бунмæ фæлласта».
Аци цаути архайгутæй нурдæр ма беретæ цардæгас æнцæ, æма æвдесæн ку багъæуа, миййаг, уæд тæбуафси. Хъæбæр зин, æвдуст уавæрти бахаудтæнцæ дигорон æвзаг, финсгутæ æма ахурдзау сувæллæнттæ 60-70-аг æнзти дæр. Дæсгай æнзти дæргъи, сауæнгæ æрæги уæнгæ дæр ма, поэтикон уадзимистæй цидæртæ фæззиннидæ мухури, прозæ æма драматургийæн ба сæ кой искæнун дæр нæбал бауагътонцæ. Æхсæйæймаг æнзти рæстæгмæ æхгæд æрцудæнцæ райони газеттæ «Социалистон Дигорæ» æма «Сурх Дигорæ». Скъолатæй дæр бунтондæр сурд æрцудæй дигорон дзурд…
Уæддæр нæ бакумдта мæлун дигорон æвзаг. Гъæддзагъди бунати нæуæг талати райрæзтау фæззиндтæй нæуæг финсæг фæсевæд. Æвдайæймаг æнзти дуккаг æмбеси етæ сæхецæн исаразтонцæ литературон еугонд «Ирæф» æма се ’вæрæни хай хæссунцæ не ’взаг, нæ литературæ æма культурæ фæгъгъæздугдæр кæнунмæ, архайунцæ, цæмæй скъолати дæр сувæллæнттæ райдайæн кълæсти ахур кæнун райдæдтонцæ сæ мадтæлон æвзагбæл.
Махæн кæд хецæн æвзаги фæлхæнтæ ес, уæддæр еу тог, еу æстæг, еу бундорæй равзургæ адæн ан, æма уой иронх кæнун нæ гъæуй. Алантæй равзургæ оссаг адæн æдеугурæй, куд фæззæгъунцæ, «арми ’дзаг æнцæ», æма нæ хъаурæ æй нæ еудзийнади. Нæ культурæ дæр еумæйаг æй, уомæ гæсгæ ба, кæрæдземæн цæстуарзон уогæй, алке дæр ни е ’вæрæн хæсса уомæ æхе мадтæлон æвзаги фæрци.
