УОРСÆЙ «САУ» ЗÆГЪГУТÆН
Мухури ка рацудӕй, еци «Проект Закона об языках народов СОССР» - хъӕбӕр ахсгиаг фарстабӕл нимад ӕрцудӕй нӕ адӕммӕ.
Тухгин карз дзубанди рауадӕй, аци рӕнгъитӕ ка финсуй, е Закъони проектмӕ ци альтернативон вариант бахаста, уой фӕдбӕл. Еци вариантмӕ гӕсгӕ уруссаг ӕма ирон ӕвзӕгти ӕмсӕр гъӕуама паддзахадон ӕвзагбӕл нӕ республики нимад ӕрцӕуа дигорон ӕвзаг дӕр.
Нӕ адæми дууӕ æвзаги ӕмбарӕ уонцӕ, уотӕ ка зӕгъуй, етӕ берӕ'нцӕ; берӕ'нцӕ, уой нихмӕ ка лӕууй, етӕ дӕр.
Цӕгат Иристони мухури оргӕнти ци карз тох рауадӕй фӕйнӕхузи гъудитӕбӕл хуӕст адæми 'хсæн, уоми зӕрдерисӕй архайуй Гурдзий Наукити Академий иуонг-уацхӕссӕг, поэт Джусойти Нафи.
Аци фарстай туххӕн е дууӕ устур уаци рауагъта газеттӕ «Северная Осетия» (1992 анзи, июли мӕйи 14 бони) ӕма «Фыдыбӕстӕ»-и 9-аг номери. Еци уацти бӕрӕг ӕй автори дæсни къохи цӕф, ӕхе ӕвдесуй арӕхстгун полемистӕй. Ӕ нихмӕлӕугути къуарӕн дӕдтуй ӕгъатир дзуӕппитӕ, никки ба ма сæ еу минкъий фӕккеугӕ ку райахӕссуй, уӕд. Фал фулдӕр хатт ба (рагацау æй зæгъун) ӕхуæдæг æндæр ӕрдӕмӕ рахезуй ӕма арӕх æ гъуди федарӕй равдесуни туххӕн пайда кӕнуй, зӕрдӕцъӕх кæмæй фӕцан 70 анзи дӕргъи, еци ехсуд доктринитӕй.
Ци уацти кой кӕнӕн - «Если не лукавить!» ӕма «Нужная ясность позиции…» - зæгъгæ, уони ку ниллæмарæн, уæд си æрæртӕсдзӕнӕй мӕнӕ ауӕхӕн гъудитӕ: 1) дуйнебӕл нӕййес дуæӕвзагон адӕм: 2) кӕд нӕ адӕм еу ӕй, уӕд дигорон ӕвзагӕн литературон уӕн нӕййес; 3) литературон ӕвзаг ӕма литератури ӕвзаг еухузи лӕдӕрун нӕ гъӕуй; 4) ӕвзаг ӕй Хуцауи исконд нӕ, фал адӕми исконд.
Цæмæй имӕ фӕстӕмӕ мабал ӕздӕхӕн, уой туххæн бал дзуапп радиæн 4-аг гъудийæн. Куд атеист, уотæ, гъай-гъайдӕр, Джусойти Нафий барӕ ес равдесунӕй ӕ материалистон цӕстингас дуйнемӕ. Фал ма ес адӕймаги фӕззинди туххӕн ӕндӕрхузи гъуди, Библийи гъуди дӕр: «Фиццаг адтӕй Дзурд, ӕма Дзурд адтӕй Хуцау» (Иоанн, 1,1).
Мӕнмæ гæсгæ, Нафи куд кӕрзлух хатдзӕгтӕ кӕнуй аци æносон фарстай, е бунати нӕ'й. Нафий статьябӕл дзоргӕй мӕн фӕндуй равдесун, сӕ eумӕйаг апологетикӕ ӕма агрессивон рахастмӕ ци цӕстӕнгас дарун, уой дӕр, уомӕн ӕма полемики дӕсниадӕ берӕ уӕхӕн дӕнцӕгтӕ зонуй, ӕма буцӕуи медӕгӕ ци гъудитӕ ӕма хатдзӕгтӕ загъд ӕрцӕуй, уомӕй арӕх иссӕйрагдӕр уй, ци хузи, ци ӕгъдаубӕл загъд фӕуунцӕ, е.
«Если не лукавить» ӕма «Нужна ясность позиции...» кӕсгæй, зин балӕдӕрӕн нӕ 'й, сӕ автор ӕ маст куд архайуй туххӕйти уорамунбæл. Ӕма римӕхсунбӕл. Фал ин ӕнхӕст ба не ‘нтæсуй. Малити Батраз газет «Рӕстдзинади» уотӕ ке загъта, ӕма дигорӕнтти фиддӕлтӕмӕ рагон дзамани сӕхе финсунадӕ адтæй, зæгъгæ, уой туххӕн ӕй Нафи, куд фӕззӕгъунцӕ, куйти хуæруйнаг бакодта - къумух, уӕдта 'й (дӕлгоммӕ дзурдӕй) гъӕддаг дӕр рахудта. Гӕр, Нафи фиццаг хатт фегъуста еци гъудитæ, æви зундгонд профессор Г. Ф. Турчанинови киунугӕ «Древние и средневековые памятники осетинского письма и языка» (рауагъдадæ «Ир», 1990 анз) дӕр некӕд бакастӕй? Дзурд дӕр ибӕл нæййес - зундгонд ахургонди еугур куститӕн ӕмхузӕн аргъ кӕнун нӕ гъæуй, 'ма уой туххӕн академик Исати Мӕхӕмæт, аци киунугӕн ци раздзурд ниффинста, уоми ин еуӕрдигæй ӕ бундорон наукон рӕвзӕрститӕн устур аргъ кӕнуй, иннердигӕй ба ӕ гурусхӕ дӕр нæ нимӕхсуй: «В. И. Абаев проявит настороженное отношение ко многим идеям Г. Ф. Турчанинова, работающего обычно на скудном языковом материале и старающегося в то же время выдвигать чрезвычайно идущие гипотезы». 'Ма кӕд Нафи арази нæ 'й, рагон æности дигорон ӕвзагбӕл сӕрмагонд финсунадӕ ке адтӕй, еци гъуддагбæл, уæд æй лæборун гъæуй Батразмæ нæ, фал еци гъудитæ ка дзоруй, еци наукон косгутæмæ, цубурдзурдæй, æ тухæ бавзарæд «ӕхе уӕзи» (спортивон ӕвзагӕй дзоргӕй).
Рацудӕнцӕ газет «СО»-й фӕрстӕбӕл 1992 анзи августи мæйи 21-аг бони: «Обсуждение проекта Закона о языках народов СОССР на страницах газет «CO» и «Растдзинад» отражает уровень как наших знаний истории своего народа, так и компетентности авторов в лингвистике. Но это еще не все. Оно является еще и показателем наличия более высоких материй, чем сумма неких научных знаний: человечности, порядочности, терпимости, мудрости и... мужества».
Зин балӕдӕрӕн ӕй, Джусой-фуртӕн ӕ уацти райдайӕнӕй кӕронмӕ уотӕ арӕх цӕмӕн испӕрт кӕнунцӕ ӕ масти арти æвзӕгутӕ. Уой ӕнгъӕл ка 'дтӕй ӕма Джиккайти Т. хумӕтӕг гъудитӕ ку загъта «CO»-йи фӕрстӕбӕл, уӕд ибӕл ахургонд лӕг æ пурх искалдзӕй: «Бездумно-агрессивной риторикой отмечено выступление Т. Джикаевой. Она прямо бросает клич к бою..». Нафий загъдтитӕмӕ гӕсгӕ, нӕ царди бундор ӕма сабурдзийнадӕмӕ ка ӕвзедуй, уӕхӕн силгоймаг республики фӕззиндтæй. Фал си зинаргъ журналкӕсгутӕ, тӕрсгӕ ма фӕккӕнетӕ. Нафимӕ «клич к бою» ка кӕсуй, е æй, е'взагбӕл ка ресуй, еци адӕймаги тухст, дигорон дзурд ӕма ирон дзурдӕн фесӕфунӕй тас ку æй, уӕд ӕхецӕн губунӕфсӕстӕй адгин фунӕй ка кӕнуй, уонӕмӕ багъӕр кӕнунмӕ гъавуй Джиккайти Т. Мӕнӕ уин еци «клич к бою»: «Прошу всех, кому дорог родной дигорский язык, защитить его!»
Раздӕри Советон Цӕдеси устур ӕма минкъий адӕмихӕттитæй фӕдеси гъӕр ка нӕ кодта сӕ мадтӕлон ӕвзаг фӕййервӕзун кӕнуни фӕдбӕл?! Фӕдеси гъӕр игъусуй сауӕнгӕ егъау уруссаг ӕвзаги туххӕн. Е ба нимад æй дуйнеон æвзæгтæй еуебӕл, берӕ фӕсарӕйнаг бӕстити ӕй паддзахадон, цӕйбӕрцӕ киунугутӕ, журналтӕ, газеттӕ ӕма ӕндӕр мухури продукци ибӕл уагъд цӕуй?! Сӕ еумӕйаг тиражи нимӕдзӕ ӕй миллиардтӕ. Еци ӕвзагбӕл ӕхсӕвӕй-бонӕй косунцӕ дуйней тӕккӕ устурдӕр теле- ӕма радиокампанитӕ, арӕзт цӕунцӕ кинотӕ.
Фал ӕ мадтӕлон ӕвзагбӕл ка мӕтӕ кӕнуй, уони «ардаугутæбӕл», кенӕ «тугъдмӕ седгутӕбӕл» некема некӕд банимадта. Джиккайти Т-ӕн тӕрхон рахӕсгӕй, Джусой фурт идарддӕр фӕрсуй: «Хотелось бы знать, кто эти враги дигорского языка и народа (къӕлетти феппайун: Джиккайти Т-и уаци «знӕгти» кой ӕгириддер некӕми ес, уӕдта адӕмбӕл дӕр нӕ дзоруй. Уони Нафи ӕримиста ӕхуӕдӕг, ӕвӕццӕгӕн, «хуарӕнтӕ исӕмӕнтъери» кӕнуни туххӕй. – М. В.) от которых следует защищаться?» Ами цума Джусойти Н. ӕхецæн скъӕппӕг не 'вӕруй ӕ фарстайӕй æма нӕ адӕмон ӕмбесонди куд ӕй, уотӕ, «арсæн ӕхе ка уидта, фал ма ин ӕ фӕд ка агурдта», еци хомух цауæйнони бунати ӕхе не 'вӕруй?! Ӕ фарста хъӕбӕр ӕнӕбунати æй, уомӕн ӕма хуарз зундгонд ӕй еугуремӕн дӕр дӕсгай ӕнзти дӕргъци куд ӕлхъивд ӕма инодгонд цудӕй дигорон æвзаг. Фал фарста кӕд лӕвӕрд ӕрцудӕй, уӕд ин дзуапп гъæуй, 'ма уой туххӕн ба идард цӕун нӕ гъӕуй: дессаг дæр æй, фал ибӕл дзуапп дӕттуй ӕхуӕдӕг Нафи - нӕ республики ӕгириддæр ка
некӕд адтӕй, ӕ цардӕн ин ка неци лӕдӕруй, е дӕр, уой уацтæ бакæсгæй, æнцонтæй балæдæрдзæнæй, дигорон æвзаг кӕмӕй гъӕуайгӕнгӕ’й, уой. Ескетӕ бангъӕл уодзӕнӕнца, гъома мах Нафимӕ амонæн æнгулдзтæй, фал е уӕлдзӕн гъуди уодзӕнæй. Гъуддаг ӕй дзӕвгарӕ зиндӕр ӕма вазуггиндæр. Нуртӕккӕ дууӕ уацей ниффинсӕгбӕл уой бæрцæбæл дзубанди на цӕуй, фал нӕ интеллигенций еу хай абони дӕр ма арази ке 'й, большевикти хецауеуӕг кӕнуни рӕстӕги дигорон ӕвзаг ци ӕдзӕллаг уавӕрмӕ ӕрхаудтай, уобӕл. Джусой-фурт дигорӕнтти дигорон ӕвзаги ӕлхъивд бартӕбӕл арази кӕнун кӕнуй. Фал цума ӕхебӕл комдзӕуӕг цӕуй, уоййау ӕ зианхæcсӕг гъудий нихмӕ ӕрхаста «БСЭ»-ӕй цитатӕ: «Диалекты до сих пор успешно конкурируют с литературным языком во многих странах мира, например, в Италии, в Индонезии...». Гъе, уотемӕйти, дигорон ӕвзаги диалекти бунати ку ивӕрай,- уӕддӕр ӕнӕбундорон ӕй ӕ бартӕ искунӕг кӕнуни унаффӕ. Никки ба ма «Основы законодательства Российской Федерации о культуре»-мӕ гӕсгӕ диалекттӕ ӕвӕрд цӕунцӕ æвзæгти ӕмрӕнгъӕ, ӕмбарӕ, ӕмсӕрӕй. Нафи ба уотӕ зӕгъуй, гъома, дан, дигорӕнттӕ исарази уӕнтӕ, сӕ диалекти бартӕ ирон ӕвзаги бартӕй цубурдӕр ке уодзӕнӕнцӕ, уобӕл. Цӕй кой кӕнуй Джусойти Нафи? Кӕд тоталитарон уагӕвӕрд ци ӕфсӕйнаг дӕндӕгутӕй хуӕстӕй дигорон ӕвзаги хорхбӕл, уони кой кӕнуй, уӕд адӕм уобӕл некӕд исарази уодзӕнцӕ, уӕдта арази дӕр некӕд адтӕнцӕ. Кӕд дзурд цӕуй дигорон ӕвзаги нӕуӕг царди уавӕртӕбӕл, кӕцитими, нӕ оппонентти гъудимӕ гӕсгӕ, дигорон ӕвзаги архайд ӕгӕр идӕрдтӕмӕ рахездзӕнӕй, уӕдта сӕ мӕ бон ӕрӕллау кӕнун ӕй: мацӕбӕл тухсетӕ, цард ӕхуӕдӕг алцидӕр ӕ бунати ниввӕрдзӕнӕй, «цубур»-бӕл дзорун бунтон дзӕгъӕли ӕй. Уогӕ ба, исӕвди къахбӕл ниллӕууæг æвзаги нихмӕ дзорун кади гъуддаг нӕ'й.
Аци рӕнгъитӕ кӕсгӕй, Нафи, ӕвӕццӕгӕн, деси бафтуйдзӕй: «Гӕр, мӕ уац «Нужна ясность позиции...»-й дигорон дзурд къудайраг дзурди хузӕн хеуонбӕл ку нимайун!» Мах дæр ибæл дузæрдуг нæ кæнæн, фал дин уæд кадæр æгæр ке раппӕлдтӕй дӕ хеуон дзурд, уой туххӕн хилӕ 'ма федистӕ
лӕдӕруй, ӕгӕр арф ке рандӕй ӕ нихмӕлӕуди. Ӕ аргументта, кӕнун кӕми кæнун кæми багъудӕй? Нафи ӕй, ӕвӕццӕгӕн, ӕхуӕдӕг дӕр лæдæруй, агæр арф ке 'рандæй нихмæлæуди. Æ аргументтæ, наукон хатдзæгтæ, концепцитӕ, фӕйнӕхузти ӕрмӕгутӕй исфинст цитатитæ, рагон историбӕл, нури реформити догӕбӕл ци гъудитӕ кӕнуй, етӕ имӕ фагӕ нӕ фӕккастӕнцӕ дигорон литеатурон ӕвзаги нихмӕ тохи, - æ хӕццӕ арази ка нӕ'й, уонӕмæ
лӕборуй, ӕфхуӕруй сӕ, федис син кӕнуй.Æ кæрзахсæн дзубандити туххӕн ин ӕхемӕ байгъосӕн: «Возможно я был излишне резок, но я стихотворец, а не философ». Уӕхӕн рӕуонӕ бунати æй еунӕг хузи уавӕри: бӕгӕниниуазӕн барти бадӕг зундгонд ӕмдзӕвгӕфинсгути ӕзмӕнститӕ ӕма цаутӕбӕл ци ифтӕ имистонцӕ хумӕтӕг адӕм, уонӕбӕл ку ӕууӕндай, уӕд! Ма уонӕн сӕ тог ирайгӕ кодта, фал Нафий ба мах хебӕлхуӕцгæ ӕма гъудигӕнӕг адӕймагӕй зонӕн. Гъулӕг ӕй, наукон ӕма политикон ӕгъдауӕй уӕхӕн ахсгиаг, вазуггин фарстабӕл дзордзæй, Нафи ӕхе философ ке нӕ хонуй. Еци фарстамӕ философи даруй ӕргом барӕ, ӕма си ӕнӕ уомӕй гӕнӕн нӕййес.
Нафи, фӕууӕлахез уни туххӕй, арӕх пайда кӕнуй, «гъазуй» зундгонд гъуддӕгти рӕстдзийнадӕй. Дӕнцӕ. Ирон литературон ӕвзаги ӕмвӕрстӕ дигорон литературон ӕвзаг ке цӕуй, еци ӕнӕгурусхаг гъуддаг цӕмӕй аууони райзайа, уой туххӕн Нафи æ кӕсгути ӕргом здахуй, науки ӕцӕг ци 'й, уомӕ, - гъома литературон ӕвзаг ӕма литератури ӕвзаг еу нæ 'нцæ. Уæхæн мадзалӕй ӕ мӕнгӕ гъуди ӕ раст гъудий базури буни рацавта. Фал е’цӕг гъуди абстрактон ӕй, нӕ нури дзубандий сӕрмӕ неци барӕ даруй. Нафи куд зӕгъуй, уомӕ гӕсгӕ аййевадон уадзимистӕ ци дигорон диалектбӕл финст ӕрцудӕнцӕ, е литературон ӕвзаг на 'й, фал аййевадон литератури ӕвзаг. Ма уæд скъолай киунугутӕ, кенӕ ӕхсӕнадон-политикон ӕма ӕндӕр литературӕ кӕбӕл цӕуй, еци ӕвзаг ба куд хуннуй?!
Зундгонд ӕй, аййевадон литератури ӕвзаг (поэзий æвзаг дæр ма ‘й хундӕуй) æй уӕхӕн ӕвзаг, - национ æвзаги сфæлдистадон гӕнӕнтӕ тӕккӕ тухгиндӕр ӕма ӕнхӕстдӕрæй кӕми разиннунцӕ. Фал уомӕн дӕр ӕ бундор ӕвӕрд ӕй литературон ӕвзагбӕл, ӕнӕмӕнгӕ баст ӕй грамматикӕ 'ма фонетики хӕцӕ.
Нур ба Нфий бафӕрсӕн: литературӕ ци дигорон ӕвзагбӕл исӕнтæстæй, е ирон ӕви дигорон грамматикӕ ӕма фонетики сӕйраг нормити хӕццӕ баст ӕй? Мӕнгӕ гъудитӕ гъеууотӕ ӕркӕнунцӕ адӕймаги къурццӕвӕнмӕ. Цӕмӕй алцидӕр ӕ бунати сбадтайдӕ, уой туххӕн ба ӕцӕгӕй куд ӕй, уой зӕгъун гъудæй: дигорон литературон ӕвзаг ес, цӕруй, ӕма дигорон литератури ӕвзаг бӕттун гъӕуй ӕрмӕстдӕр уобӕл.
Джусойты е'гон финстӕги Хачирти Анзори азумгин кӕнуй, хинӕйдзагӕй, дан, дæрӕн кӕнис ӕндӕрхузигъудигӕнгути. Фал лæг ӕ гъудитӕ (уадзӕ ма рӕдуд дӕр уӕнтӕ) ку зӕгъа, уӕд е мӕнгардӕй, хинӕйдзагæй дæрæн кӕнун хуннуй? Нафи ӕхуӕдӕг карздӕрӕй ӕфхуӕруй ӕндӕрхузигъудигӕнгути, уомæй хъӕбӕрдӕр си ӕхердӕмӕ неке лӕдӕруй ӕма ӕхе растдзийнадӕбӕл неке ’ууӕндуй. Гъулӕггагæн, æ ниннет исӕнхӕст кӕнуни туххӕн жонглер дӕр ма фестуй, «Получается по твоей номенклатуре, - финсуй Хачири-фуртмӕ, — три языка и три народа: иронский и дигорский языки, да еще третий — осетинский». Национ культури фарстатӕбӕл косӕг, профессор, хумӕтӕг фӕззелӕнтӕ нӕ зонуй, уобӕл ка баууӕнддзӕнӕй? Нафи цӕмӕн ӕтхалуй Анзормӕ? Е зӕгъуй, еугуремӕн дӕр зундгонд ка’й, еци ӕцӕгдзийнадӕ: не 'взаги ес дууӕ диалекти, ӕма уонӕбӕл ирӕзунцӕ литературон ӕвзӕгтӕ. Лӕдӕрд нӕ 'й, Нафи ӕртӕ ӕвзаги, никки ба ма ӕртӕ адӕми кӕцӕй ӕрхаста. Уацтӕ «Если не лукавить...» ӕма «Нужна ясность позиции...» кӕсгӕй, бӕрӕг ӕй, Нафи е 'тхалд растзӕрдӕ бӕгъатӕр лӕги масти хузи бавдесунмӕ ке гъавуй. Еци хийнӕ не 'гасемӕн дӕр хуарз зундгонд ӕй: ӕ зӕрди ӕцӕг фӕндӕнттӕ ӕма ӕ миутӕ æмбæрзуй патриотон лозунгтӕй. Ӕз, дан, исмӕстгун дӕн, кадӕртӕ мин ке ӕфхуӕрунцӕ, цъифӕ ке калунцӕ, гириз ке кӕнунцӕ мӕ мадтӕлон ӕвзагбӕл. Автори еци устур дзубандитӕй уацтӕкӕсӕг ӕхе кеми нӕбал фӕууй: кӕд бабӕй нӕмӕ тӕтӕр-мангол ӕрбалӕбурдтонцӕ? Мадта Нафий мадтӕлон дзурдбæл ка кæнуй сирди зйан, ка 'йбӕл гириз кӕнуй уотӕ æгъатирæй? Нури рӕстӕги уомӕн уӕн ес? Ес, ес! Уой туххӕн берӕ нӕ гъӕуй. Ӕрмӕстдӕр исфӕразӕ, - дигорон ӕвзаги ес ирон ӕвзагӕй берӕ фулдӕр дзурдтӕ, зӕгъгӕ. Дзубанди дӕр ибӕл нӕййес, Нафи ци хузи ӕма куд тох кӕна, уомӕн уагӕ ӕма мадзӕлттӕ гъӕуама ӕхуӕдӕг равзара. Фал кӕд ӕ уац наукон хонуй, уæд нин кедӕрти фудкой цӕмӕн кӕнуй? Гӕрр, Къостай ӕвзаг уæхæн примитивон хузи гъӕуай кӕнун гъӕуй? Еци фарстатæбæл сагъӕсгӕнгӕй, лӕг ӕнӕбари ӕрцӕуй уӕхӕн гъудимӕ: Джусой-фурт барӕй здахуй адӕми ӕргом, закъони проектбӕл ка дзоруй, уонæй еуей дузӕрдуггаг гъудимӕ ӕма уой фӕрци ӕ дӕлгоммӕ дзурдтӕй фудгин кӕнуй, дууӕ диалектей ӕмбарӕбӕл ка дзоруй, уони се 'гасей дӕр. Уотемӕй Иристони иннӕ кӕмтти цӕргути патриотон ӕнкъарӕнтӕ аразуй, ӕхе кӕцирдӕмӕ фӕндуй, уоцирдӕмӕ.
Адӕмихӕттитӕн еу наци исуни уавӕртӕ ку рантӕсуй, уӕд фӕззиннуй еумӕйаг литераторон ӕвзаг исаразуни проблемӕ дӕр, - зӕгъуй Джусой-фурт. Ӕма, дан, уӕд адӕмихӕттити размӕ ислæууй фарста – еумæйаг литературон ӕвзаг райсонцæ, цæмæй си наци рауайа, æви хецæн нæдтæ равзаронцæ æма си алкедæр хецæнæй ирӕза. Е дӕр раст ӕй, фал ма «нацимæ еу кӕнуни уавӕртӕмӕ» ӕвзагӕй уӕлдай хауй берӕ цидæртæ, кӕцитӕн ес ӕмхузон уӕзӕ ӕма ӕмбарӕ ӕнцæ са ахедундзийнади. Наукæ уордæмæ хæссуй историон, лингвистикон, антропологион, психологон ӕууӕлтӕ. Зундгонд ӕй, наций бундор экономикон, социалон-политикон, идейон ӕма географион еудзийнадӕ ку æй, е дӕр. Фал нин ци амонунцӕ Нафи ӕма ӕ идейон ӕрдхуæрдтæ? Наций берæ бæрæггæнæнтæй æхсаргарди хузæн фелвастонцæ еунæг æууӕл - литературон ӕвзаг. Ниввардтонцӕ 'й
уæхæн сӕрмагонд бунати, цума наци ӕрмӕст уомӕй бӕрӕг кӕнуй . Ӕвзаг ӕнӕмӕнгӕ адӕни тумугъ кӕнуй, фал ма си ес æндӕр цидӕртӕ дӕр. Дӕнцӕн, Австрий 97% - австриаг адӕнихатт цӕруй, фал си литературон ӕвзаг ба ӕй немуцаг. Германæн ӕхеми ба хонсар ӕма цӕгати цӕргути диалекттӕ уойбæрцӕбӕл фӕйнӕхузи ӕнцӕ, 'ма зӕгъӕн ес, кӕрӕдзей нӕ лӕдæрунцӕ. Фиццаг цауи дӕр, дуккаги дӕр адӕни ӕвзаг нӕ баеу кодта, фал историон, социалон-политикон ӕма ӕнд. уавӕртӕ. Еуӕй-еу бӕстити этнос равзуруни сӕйраг куст кӕнуй религи. Зæгъӕн, Югославий, дзурд «пусулмон» иссӕй дини нӕ, фал хецæн наций синоним. «Пусулмӕнттӕ» дӕр, гъе, еци сербтӕ, ӕнцӕ, сæ ‘взаг дæр æй сербаг, уотемӕй ба етӕ сӕхе нимайунцӕ хецæн адӕмбӕл.
Куд ӕй уинӕн, уотемӕй Югославий еу литературон æвзаг наци баеу кӕнунмӕ нӕ, фал ӕнсувӕрти 'хсӕн тугъд цӕмӕй ма райдайа, уомӕн дӕр неци фенхус ӕй. Е еу! Иннемӕй ба ес уӕхæн адамтӕ, дууӕ литературон ӕвзаги, кенӕ еу литературон æвзаги дууӕ фӕлхӕни, дууӕ вариантти кӕмӕ ес. Джусойти Нафи еци ӕцӕгдзийнади хаццӕ къахӕй-сӕрмӕ нӕ 'й арази. Гæрр, профессор, уӕхӕн адӕмтӕ ке ес, уой нӕ зонуй? Ӕви син наций статус ке ес, уой хӕццӕ арази нӕ 'й?! Барӕй мӕнгӕттитӕ дзоруй, зæгъгæ, уобӕл дӕр зин баууӕндӕн ӕй. Мадта уӕд ӕцӕгдзийнади дуар ӕндӕр дзӕгъӕл дӕгъӕлӕй игон кӕнунбӕл цӕбæл уотӕ искарз ӕй? Уоци фарстабӕл дзуапп дӕтгӕй, мах гъӕуама нӕ зӕрдӕбӕл дарӕн, большевикти лозунгти хъаурӕбӕл нур дӕр ма куд хъӕбӕр ӕууӕндӕн, уой. Фал цард ӕхуӕдæг хъæбæр зин лӕдӕрӕн ӕй, ӕма ӕцӕг наукӕ уой тухтъунст нæ бакæндзæй идеологон, политикон ӕма æндæр тухарӕзт æгъдӕуттӕ 'ма уагӕвӕрдтӕн конд ка 'рцӕуй, еци рамкитӕ 'ма стереотипти.
Нӕ национ литературон ӕвзаги фарста ӕнцонтӕй ниллух кӕнунмӕ гъавгӕй, къурццӕвӕнмӕ бацудан. «Дигорский вопрос - финсуй Нафи, - возник исторически в связи с формированием осетинской нации...». Нафимӕ гӕсгӕ уотӕ уайуй, еумӕйаг наци нин нӕма ес, - уомæн æма ма абони дӕр литературон æвзаги фарста, ӕноси райдайӕни куд, уотӕ лухгонд нӕма
'рцудӕй. Уотемӕй ба гурусхаг нӕ 'й, Дигорӕ 'ма Ирӕ еу наци ке æй, е. Ӕрмӕст литературон ӕвзаги гъуддаг уотӕ рауадӕй ӕма историй цудмӕ гӕсгӕ исирӕзтӕй дууӕ диалектебӕл. Нуртæккæ уоци гъуддагбӕл арази ке нӕ'й нӕ хонсайраг ахургӕндти еу хай, е ба нӕ этноси ӕнгонӕй ӕнкъарунӕн устур фидбилиз хӕссуй. Нурмӕ ци политикон-административон мадзӕлттай гъавтонцӕ цӕрдгъон, рагон дигорон ӕвзаги тоги цуд бауорамунмӕ, етӕ ба нӕ наций еудзийнадӕн, нӕ культури ирæзтæн ӕрхастонцӕ устур зӕран ӕма «еумӕйаг литературон ӕвзаг ирон диалекти бундорбӕл» исаразунӕн дӕр неци пайда адтæнцæ. «Положить один из диалектов в основу литературного языка - это еще не значит создать в действительности национальный литературный язык, - финсуй Абайти Васо. На такую роль может претендовать только язык, который преодолевает ограниченность одного, хотя бы и крупного диалекта, который из всего многообразий диалектальных норм языка вбирает в себя все самое прогрессивное, самое жизнеспособное, самое современное и нужное, который строится с учетом истории языка в прошлом и тенденций его развития в настояще». Уӕхӕн еумӕйаг литературон ӕвзаг ес нӕ абони царди? Нӕййес, зӕгъгæ, дзуапп раддзӕй раст лӕг. Ирон диалектбӕл арӕзт ӕрцудӕй аййев ӕма ӕндӕрхузи литературӕ, фал си дигорон диалекти гъӕздугдзийнӕдтӕ пайдагонд ӕрцудӕнцӕ, зӕгъгӕ, е ба некӕмӕй байруагӕс уодзӕнӕй. Ӕнӕ уомӕй ба, Абайти Васой гъудимӕ гӕсгӕ, еумӕйаг литературон ӕвзагӕн ӕ кой кӕнгӕ дæр нæ 'й. Еу дзурдӕй, нӕййес еумӕйаг литературон ӕвзаг дууӕ диалектемӕй еуей бундорбӕл, фал ес ирон литературон ӕвзаг ӕма дигорон литературон ӕвзаг. Еци бӕлвурд ӕцӕгдзийнадӕ, ӕрмӕстдӕр ке нӕ фӕндуй, етæ æй нæ уинунцӕ. Балӕдӕрун афонӕ 'й, цард ахуӕдӕг еумӕйаг литературон ӕвзаги фарста раги ке ниллух кодта: е цӕруй, ирӕзуй ӕма архайуй дууӕ диалектей бундорбӕл. 'Ма æнæгъæнӕ дуйней уотӕ ку некӕми 'й! — не сарази уодзӕнӕнца мӕ хӕццӕ кадӕртӕ. Рахатӕн «Советон энциклопедион дзурдуат: «Марийский язык относится к финно-угорским языкам... Имеет две разновидности литературного языка: луго-восточный марийский язык и горно-марийский язык». Гъӕуй ма дӕнцӕ? Табуафси, кӕсӕн идарддӕр еци дзурдуати: «Мордва (Мордовцы) - нация, живут в Морд. АССР. Языки мордовские (мокшанский и эрзянский)».
Аци энциклопедион дӕнцитӕ мӕн размӕ дӕр ӕрхӕссиуонцӕ, фал дигорон ӕвзаги знӕгтӕ, сæ къӕхтӕ ехбӕл ниссагътонцæ, сӕ нихтæ ба - нæ хъурти, нæ сæттунцӕ. Еу кадӕр ба «Рӕстдзинади» фӕрстӕй уӕлбекъонӕй, хебӕлӕнвӕрсонӕй радзурдта, - мах, ирӕнттӕ, дан, гъӕуама мордовӕгтӕ ӕма рийӕгтӕмӕ ма кӕсӕн, фал не 'ргон раздахӕн Европӕмӕ. Гъӕйдӕ, уота дӕр бакӕнӕн, ӕрмӕст бал уой агъонмӕ ey гъуди дзæгъон: еуӕрдигӕй - дзубанди дӕнцитӕбӕл нӕ цӕуй, - алли адæм дӕр хӕссуй ӕхе дзиуарӕ, иннердигӕй – цифæнди адæмихатт уæд, кæмифæнди цæрæд, уæддæр уой аггаг æй, цæмæй ин ахур кæнонцæ æма ‘ймæ цауддæри хузи кӕсун нӕ гъӕуй.
Европи ес паддзахадӕ Люксембург. Ӕ цӕргутӕ сӕхе хонунцӕ еу адæм ӕма дзорунцӕ сӕхе люксембургаг ӕвзаг - летцембургешбӕл, фал ӕмбарӕ паддзахадон ӕвзагтӕбӕл ба конституцимӕ гӕсгӕ нимад цӕунцӕ немуцаг ӕма французаг. Французаг ӕвзаг федаргонд ӕрцудӕй парламенти, уомӕй пайда кæнунцæ фӕсарӕйнаг бӕстити хæццæ рахастдзийнæдти сӕудегер кӕнуни, тӕрхони, паддзахадон ӕма ӕндӕр гъуддӕгти. Немуцаг ӕвзагбӕл цӕуй, журналтӕ 'ма газетти тӕккæ фулдӕр хай. Райдайӕн кълӕсти скъоладзаутӕ ахур кӕнунцæ немуцаг ӕвзагбӕл, хестӕр кълӕсти - французагау, фал сӕ хæдзæртии ба дзорунцæ летцембургешбӕл. Телеравдиститӕ ӕнцӕ немуцаг ӕма французаг ӕвзӕгтӕбӕл, радиобакаститӕ ба ӕртӕ ӕвзагебӕл. (Кӕсӕ «Страны и народы. Западная Европа»). Гъе, уотӕ, Джусойти Нафи ӕма е 'мварслӕугути нецӕмӕ ӕрдаргӕй, Устур Герцогон Люксембурги цӕргутӕ иссæнцæ еу наци ӕртӕ адӕмон ӕвзагей хӕццӕ. Уонӕй ба дууӕ паддзахадон ӕнца. Ӕма син неци 'й, цума махӕй лӕгъуздӕр нӕ цӕрунцӕ, уотӕ уӕмӕ нӕ кӕсуй?
Сомехаг ӕвзагӕн дӕр ес дууӕ фӕлхӕни: искæсæнсомехаг æма нигулæнсомехаг. Уоми сӕйрагдӕр бунати ӕвӕрд ӕй фиццаг, фал нигулӕнсомехагӕн литературон æвзаги бартæ нӕййес, зӕгъгæ, уотӕ ба неке дзоруй. Сӕ дууӕ дӕр ӕнцӕ ӕмбарӕ. Азий тӕккӕ рагондӕр ӕма устурдӕр паддзахӕдтӕй еу - Индий уодфарни фӕлтӕрддзийнадӕ дӕр нин ӕвдесӕн ӕй, дуйней арӕзти цуд цӕттӕ нӕдтӕбӕл ке нӕ 'й, уой. Ами тогхӕстӕг дравидиаг, нӕуӕгиндоариаг ӕма ӕндӕр ӕвзӕгти хӕццӕ (хинди, урду, панджаби, гуджарати, бенгали, ория, маратхи, ассами, тамиль, телугу, каннада, малаялам, англисаг) паддзахадон ӕвзагбӕл конституцимӕ гӕсгӕ нимад ӕрцудӕй рагон индиаг культури æвзаг - санскрит, кӕд нуртӕккӕ мард ӕвзӕгтӕмӕ хауй, уæддæр!
Куд уинӕн, уотемӕй устур ӕма федар бундор ес, дигорон ӕвзаг ирон ӕвзаги ӕмрӕнгъӕ паддзахадон исхонунӕн.
Загъдæн, царди дӕр ӕма адӕми дӕр практикон ӕгъдауӕй дигорон ӕвзаг ку некӕми гъӕуидӕ, уæддæр нæ фидтӕлти ӕвзаги рагондæр хузӕ цæмæй бунтон исӕфт ма фӕууа, уой туххæн дæр ин паддзахадон ӕвзаг ӕнӕсхонгӕ нæ уидæ.
Кӕронбӕттӕн искӕнун ма мӕ фӕндуй. Джусой-фурт тӕрхонгӕнӕги хузӕн дигорӕнтти размӕ урдугӕй ниввардта фарста: кенӕ исарази уӕнтӕ райсунбӕл еумӕйаг адӕмон литературон ӕвзаг ирон диалекти
бундорбӕл (еу хатт дӕр ма ‘й зӕгъун, - уӕхӕн ӕвзаг нӕййес, ес ирон литературон ӕвзаг), кенӕ ба, дан, рахецӕн уӕнтӕ, сӕхе банимайӕнтӕ хецӕн нацибӕл ӕма син уӕд уодзæй сæхе литературон ӕвзаг ӕма иннӕ
гъуддӕгтӕ. Еуӕрдигӕй аци фарстай ӕвӕрдӕй ӕфхуӕруй ӕнæгъӕнӕ адӕми, уӕхӕн бартӕ ба кӕцифӕнди лӕги фуртмӕ дӕр нӕййес. Иннердигӕй фарстайӕн наукон хузи бундор ке нӕййес уой балӕдӕрдзӕнӕй, нацити равзурди истори еу минкъий ка зона, е дӕр. Нафи ӕма е'мхуӕцгути уӕхӕн хатдзӕгмӕ ӕцӕгдзийнадӕ не 'ртардта, фал сӕхе рӕдуд гъудитӕ, еци гъудитӕн ба сӕ бундори ес къаппилгонд рӕстдзийнадӕ, хатгай ба ӕргом мӕнгӕттӕ.
Циуавӕр хецӕни кой кӕнуй, уӕдта кӕмӕй, кӕд ӕма дигорон муггӕгти ӕмбес равзурстӕнцӕ ирӕнттӕй?! Кенӕ, куд исхӕлӕ-мулӕ ан (дигорӕнттӕй ка ирон ӕрхудта, ка ба си иронмæ æрцудӕй). Уобӕл ма бафтауӕ хуӕрифуртти нимӕдзӕ! Гӕрр, нӕ адӕм дехтӕ гъӕуама ниууа ӕрмӕстдӕр уой бӕллахӕй, ӕма кедӕр нӕ фӕндуй, дууӕ фазон литературон ӕвзаги, дууӕ устур хӕзнай ин ке ес, е?! Мах рагӕй ӕнкъарӕн нӕхе еу адӕмӕй тог ӕма ӕстӕгӕй, уод ӕма бауӕрӕй, недзаманӕй абони уӕнгӕ гъӕуай кӕнӕн нӕ еци еудзийнадӕ, уой нимайӕн нӕ устур хӕзнабӕл ӕма ервӕзунгӕнӕгбӕл, нӕ абони ӕма федӕни нифсбӕл. Уомӕн хуарз ӕвдесӕн ӕй, евгъуд ӕноси 80-аг ӕнзти ци дигорон кувд финст ӕрцудӕй, е. Дигорон адæм уоми ковунцæ нæ Иристони еугур кӕмтти Изӕдтӕ 'ма Идаугутӕмӕ, етӕ син ӕнцӕ ӕмхузӕн хъазар. Ӕма, куд загъдӕуй, уотӕ: еске Хуцаумӕ адӕм нæ ковуй
Ес цӕмӕдессаг рагон дигорон зар «Къудари зӕронд лӕги зар». Нӕ идардмӕуинӕг фидтӕлтӕ рӕсугъд хуарантӕ нӕ бавгъау кодтонцӕ еци циргъзунд, арӕхстгин къудайраги нивесинӕ исаразунмӕ. Зари медӕгӕ 'й дигорӕнттӕ сӕхе нихмӕ ӕривардтонцӕ ӕма зӕрдӕхӕларӕй ӕвдесунцӕ, зундгиндӕр, си ке разиндтӕй, уой. Еци зар, фӕлтӕрӕй-фӕлтӕрмӕ цӕугӕй, адӕймаги меддуйне рӕвдаугӕй, адӕми зӕрдити ӕфтудта къудари, æма сӕмӕ ӕвзурун кодта ӕнсувӕрдзийнади ӕнкъарӕнтӕ. Гъе, уӕхӕн адтӕй Дигоргоми «национ политикӕ» Октябри революциӕй берӕ раздӕр. 'Ма, ӕвӕццӕгӕн, нӕ фидтӕлти курухондзийнадӕ ӕма хеуонмӕ уарзондзийнади рохс кӕмӕ кӕлуй, еци хуарз гъуддӕгтӕ нӕуӕгӕй исӕцӕг кӕнун гъӕуй, энциклопедитӕ ӕма справочникти зианхӕссӕг ӕрмӕг агоруни бӕсти.
Малити Васо.
Аци уац финст ӕрцудӕй уруссагау дигорон литературон ӕвзаги
нихмӕдзоргутӕн дзуапп радтуни туххӕй.
Дигорон ӕвзагмӕ'й ратӕлмац кодта Скъодтати Эльбрус.
