ДУЙНЕ
Устур Хуцау ӕгас дуйне ӕ нӕгӕй сфӕлдиста: ӕ зунд, ӕ фӕндӕ ӕма ӕ дзурдӕй.
Ӕцӕг дуйнейӕн хецауӕн ӕривардта Барастур, дӕлуймонтӕн - Фидбилиз, а мӕнгӕ дуйней - Адӕймаг, уонӕн се ‘нккӕтей сӕргъи ба лӕууй Ӕхуӕдӕг, сӕ миутӕмӕ син кӕсуй ӕма син тӕрхон кӕнуй.
Хуцау фиццагдӕр-фиццагдӕр исфӕлдиста арв ӕхецӕн цӕрӕндонӕн, изӕдтӕ ӕма идаугутӕ, ӕма син загъта: «Цӕретӕ уӕларв мӕ цӕрӕндони, мӕ аллифарс лӕууетӕ».
Ӕма иссӕй уӕларвон сугъдӕг дуйне. Сӕ хецау ба Хуцау ӕхуӕдӕг.
Уой фӕсте ба Хуцау исфӕлдиста зӕнхӕ ӕ алли гъӕздугдзийнӕдти хӕцца: донӕй, халсарӕй, фонсӕй; уонӕн се 'нккӕтей хецау ба искодта адӕймаги.
Адӕймаги Хуцау искодта сикъитӕй, равардта ин зунд хуарз ӕма лӕгъуз ӕвзарунмӕ, бартӕ ӕма фӕндон ести минеугутӕ кӕнунмӕ ӕма 'й ӕривардта зӕнхӕбӕл ӕлдарӕн, ӕма ин загъта: цӕрӕ аци мӕнгӕ дуйнебӕл, бон хӕссӕ дӕ фӕллойнӕй ӕма устур дуйнемӕ дӕхе исцӕттӕ кӕнӕ, Хуцауи ма феронх уо.
Адӕймаг ӕрцардӕй зӕнхӕбӕл, ӕ цардиуаг исаразта ӕма ӕхе устур дуйнемӕ, Хуцауи размӕ цӕттӕ кӕнун райдӕдта.
Адӕймаги бакъахунмӕ ӕма уомӕн ӕ хъаурӕ исбӕрӕг кӕнуни туххӕй Хуцау исфӕлдиста сайӕгой дӕлуймон.
Сайӕгойтӕ цӕрунцӕ дӕлзӕнхӕ ӕма алли бон дӕр алли гъуддагӕй дӕр къахунцӕ адӕймаги. Хуцауæй æй идард кӕнунцӕ, ӕма ‘й сӕхе дуйнемӕ ласунцӕ.
Хуцау ӕ изӕдти арӕзтӕй адӕймаги рӕстмӕ аразуй, Фидбилиз ба ‘й фесинмӕ хӕссуй, гъема уой туххӕй кӕддӕриддӕр изӕдтӕ адӕймаги сӕрбӕл дзорунцӕ Хуцауи размӕ.
Хуцау исмӕстгун ӕй Фидбилизмӕ ӕма ‘й дӕлзӕнхӕ бакодта.
Фидбилиз уоми дӕр ӕ кӕнон нӕ уадзуй ӕма адӕймаги исӕфтбӕл зелуй. Гъема, уомӕ гӕсгӕ ба, Хуцауи изӕдтӕ ӕма Фидбилиз кӕддӕриддӕр тохунцӕ.
Фидбилиз алли фонс, алли рӕзӕ, алли гъуддаги дӕр алцӕй хузи дӕр бацӕуй ӕма адӕймаги басайуй.
Адӕймаг фӕррӕдуйуй ӕма Фидбилизи хай исуй.
Ӕгас дуйнети фӕндӕ Хуцаумӕ ‘й: ӕнӕ Хуцау цӕрӕн дӕр ӕма мӕлӕн дӕр нӕййес.
ХУЦАУИ ÆЗНӔГТӔ
Ӕгас дуйнебӕл ӕнамонддзийнадӕ кӕмӕй цӕуй, адӕми кӕрӕдзебӕл ка ардауй, ка цӕгъдун кӕнуй, алли цъумурдзийнадӕ ӕма ӕнӕ зӕрдӕесгӕ гъуддӕгтӕ кӕмӕй цӕуй, фурхуӕрдӕ, фурниуӕзтӕ, зийнадӕдзийнадӕ, хахур, гъолонцъух, ардаун, ӕлгъетун, давун, марун ке фӕндӕй цӕуй аци мӕнгӕ дуйнебӕл, етӕ ӕнцӕ Фидбилизи къохи ӕма хуннунцӕ Хуцауи ӕзнӕгтӕ.
Хуцауи ӕзнаг кӕддӕриддӕр Фидбилизи фӕдбӕл цӕуй ӕма ӕ фӕсте дӕр Фидбилиз итауй.
Хуцау е знӕгти ралгъиста, гъема етӕ алли бон зианӕй-зиани къохмӕ, рӕдудӕй-рӕдудмӕ хезунцӕ ӕма ӕнӕ еу бон цох, ӕнӕ еу игъӕлдзӕгдзийнадӕй гъезӕмарӕ кӕнунцӕ.
Хуцауи ӕзнӕгтӕн ӕгас дуйнебӕл идзулд бон, цийнӕ ӕма бӕрӕг фӕстаг нӕййес. Уой туххӕй, ӕма етӕ еске дзӕбӕхдзийнадӕй, федауцӕй содзунцӕ ӕма мӕлунцӕ, адӕмуарзондзийнадӕ си райдард ӕй.
Хуцауи ӕзнаг еске зианбӕл цийнӕ кӕнуй: е фидбилизи арф бацӕуй, ниффедар ӕй лӕгъуздзийнади медӕгӕ ӕма ин лӕгъузеуӕгӕй фӕппирнӕн нӕбал ес. Рӕстӕбӕл цӕуӕг, хуарзгӕнӕг уонӕн (Хуцауи ӕзнӕгтӕн) се ‘знаг æй, сайтӕнттӕ ӕма дӕлуймонтӕн, адӕмӕн алли бон фидбилизбӕл ка уодуй, етӕ ба сӕ лимӕнтӕ ӕнцӕ.
САЙТАН
Хуцауӕн, адӕмӕн ӕма ӕгас дуйнейӕн ӕзнаг кай, фидбилизбӕл ка уодуй. Дуйней дзиллитӕ, муггӕгтӕ, аултӕ, бийнонтӕ ӕскъуддзӕггаг ка скӕнуй.
Адӕмтӕ, хӕлӕрттӕ, лимӕнтӕ кӕрӕдземӕ ка кӕнуй ӕма сӕ ӕзморӕй ка цӕрун кӕнуй.
Ниуазагӕ, хуӕрагӕ, хӕтагӕ, хахур, фудӕвзаг, ардауӕг, цъуххӕссӕг, лӕг марунгӕнӕг, давунгӕнӕг ӕма зиангӕнӕг ка ‘й, еци уод ӕй Сайтан, хузӕй сау, къӕдзӕнгулдзитӕ, фӕстӕмӕкъах, сиугин.
Сайтӕнттӕ цӕрунцӕ дӕлзӕнхӕ ӕма хуннунцӕ дӕлуймонтӕ, ес сӕмӕ силтӕ дӕр ӕма нӕлтӕ дӕр. Сайтан ӕй дуйней ихӕлцӕ ӕма фидбилиз, фал уӕддӕр силӕ сайтан налатдӕр ӕй.
Фидбилиз кӕми уа, сайтан уоми бадуй. Сайтанӕй алли адӕймагӕн дӕр хай ес.
Адӕймагӕн ӕ хуарзмӕ игъосӕг рӕстмӕ ку зела, уӕд ӕнӕ фидбилиз ӕй. Хӕдзари бийнонтӕн се 'нккӕтемӕн дӕр ес сайтани хай.
Бийнонти сайтӕнттӕн сӕ сӕр ба ӕй Бундор.
Ӕ Бундор рӕстмӕ кӕмӕн цӕуа, уой гъуддаг адӕми ӕхсӕн ӕнцойнӕдӕр, кадгин-радгин ӕй, ӕ хӕдзари бийнонтӕ федаунцӕ, ӕнӕхилӕ ӕма гъӕздуг
ӕнцæ.
Дӕ фудголбӕл ӕ Бундор исӕрра уа: уӕд хӕдзарӕ ӕ бунтӕй рахъан уй. Хӕдзари бийнонтӕ кӕрӕдзей фид бахуӕрунцӕ ӕма кӕрӕдзей гъезӕмарӕй марунцӕ, сӕ дзилли ‘хсæн ба синдзӕ-биндзӕй цӕрунцӕ.
Хӕдзари цард Бундормӕ гӕсгæ ‘й.
Сайтӕнттӕ зелунцӕ раст адӕми фӕсте, сайунцӕ сӕ сӕхердӕмӕ, адӕм сайд кӕнунцӕ.
Алли адӕймагӕн дӕр ес сайтани хай, еци сайтани хай хӕтуй адӕймагӕн æ фӕсте, ардауй ӕй алли налатеуӕгбӕл, ӕ лӕгъуздзийнӕдтӕ ин финсуй ӕма сӕ игъосун кӕнуй Хуцауӕн.
Сайтани ахӕсти ка фӕууа, уомӕн ӕ сӕр ӕ барӕ нӕбал фӕууй, алли нез ибӕл ӕфтуйун райдайуй, сӕр нӕбал фӕййахӕссуй ӕ мӕнгӕ дуйнебӕл ӕма уотемӕй батар уй, ӕ сайтани хай ӕй бахуӕруй.
Уӕхӕн уогъурсуз ӕ мӕлӕти бони бафтуйуй ӕвдеутӕ ӕма дӕлуймонти къохи ӕма ‘й ниффардӕг кӕнунцӕ дӕлзӕнхӕмӕ.
ХУЦАУИ УАРЗОНТӔ
Хуцауи рази уӕларв ес, Хуцауӕн кадгин кай, уӕхӕн Хуцауи уарзонтӕ. Ӕгас дуйне еци рӕститӕбӕл ӕнцайуй ӕма уони кувдӕй ервӕзуй.
Етӕ лӕуунцӕ изӕдтӕ ӕма идаугути хӕццӕ ӕма корунцӕ уомӕй адӕмӕн хуарздзийнӕдтӕ, ковунцӕ Хуцауи рази, цӕмӕй зӕнхӕбӕл адӕм сӕривулд ӕнӕнез, идзаг хумӕ ӕма зад игуӕрдӕн уонцӕ.
Ковунцӕ, корунцӕ етӕ, ӕма син Хуцау сӕ кувд ку райсуй, уӕдта табугӕнгӕй сӕ зонгутӕбӕл ӕрбадунцӕ ӕма Хуцауӕн адӕми туххӕй арфӕ кӕнунцӕ. Етӕ Хуцауӕн цитгин ӕнцӕ, гъема син Хуцау сӕ кувд, сӕ курдӕн кӕддӕриддӕр устур аргъ кӕнуй.
Аци зӕнхӕбӕл адӕм ервӕзунцӕ ӕма цӕрунцӕ Хуцауи уарзонти фӕрци. Хуцауи уарзонтӕ: Ӕфсатий, Фонси Фӕлвӕра, Хуарелдар, Курдалӕгон, Гъӕдӕрӕхснӕг, Донбеттир, Елиа, Уасгерги, Никкола, Мадӕ-Майрӕн, Уӕларвон Басил, Уас-Тотур, Барастур.
Хуцауи лимӕн ӕма уарзон еци адӕмтӕ уомӕн ӕнцӕ, ӕма сӕ уӕлӕбӕл царди мӕгуртӕн агъазгӕнӕг адтӕнцӕ, сӕ къохи ци гъуддаг адтӕй, уой рӕстмӕ хастонцæ, ӕма сӕ уой туххӕй Хуцау ӕхемӕ исиста: рӕстити Хуцау ӕхемӕ есуй ӕгас уодӕй.
ИЗӔДТӔ
Ехсӕвӕй-бонӕй Хуцауи размӕ ка бадуй, уомӕй адӕммӕ хуарз хабӕрттӕ ка хӕссуй.
Адӕми дзӕбӕхдзийнадӕбӕл, федауцӕбӕл ка аразуй, уони хуарз хабӕрттӕ уӕларвон Хуцаумӕ ка хӕссуй.
Сӕумæ ӕма изӕрӕй арвбӕл, адӕми гъӕуайгӕнӕгӕй, ӕртӕ зелӕни ка кӕнуй, амменӕ гӕнгӕй, еци сугъдӕг уодтӕ ӕнцӕ изӕдтӕ, идаугутӕ.
Зӕнхӕбӕл цидӕриддӕр адӕймаг ес, уомӕн уӕларв ес изӕди хай, гъæуайгӕнӕг Изӕд.
Алли адӕймаги дӕр е ‘зӕди хай гъӕуай кӕнуй фидбилизӕй, ӕ хуарздзийнӕдтӕ ин финсуй ӕма дзоруй Хуцауӕн.
Изӕди хай ес ӕгас бийнонтӕн дӕр - Сӕризӕд, ӕма ӕгас гъӕуӕн дӕр - Гъӕуизӕд.
Сӕризӕд ӕма Гъӕуизӕд адӕми федауцӕбӕл зелунцӕ, адӕми кӕрӕдзебӕл ӕнгон кӕнунцӕ.
Гъӕуайгӕнӕг Изӕд бӕрзӕндти бадуй ӕма адӕймаги будуйрон куст алли лӕгъуз дунгӕ ӕма къӕвдайӕй хезуй.
Еци изӕд - Будури Изӕд, табу ин фӕууӕд! Нӕ хумтӕ, нӕ игуӕрдӕнтӕ уой иуазӕг ӕнцӕ.
Изӕдтӕн ӕма идаугутӕн табуйӕй ковун гъӕуй алли сӕумӕ дӕр ӕма алли изӕр дӕр.
Сӕумӕраги ӕма изӕрдалингити етӕ зелунцӕ дуйнебӕл амменӕ гӕнгӕй, уони аммени сахати адӕймаги цъухӕй цидӕр исхауа, уомӕн ӕнӕ ӕрцӕуӕн нæййес.
Гъема, адӕймаг ӕхе фудӕлгъистӕй гъæуай кӕнӕд, ӕ ковӕн рæстӕг фулдӕр дарӕд.
Сӕумон изӕдтӕ ӕма изӕйрон идаугутӕн табу фӕууӕд! Уонӕн ковун гъæуй сӕумӕраги, кенӕ ба рагизӕр.
Гъей, Хуцауи размӕ лӕугутӕ, Хуцауӕй адӕммӕ ӕма адӕмӕй Хуцаумӕ хабархӕсгутӕ, табу уин фӕууӕд!
АСТӔУККӔГТÆ
Хуцауи рази, Хуцауӕн ӕ тӕрхон ка ӕнхӕст кӕнуй, ӕнӕ фӕстӕмӕ исдзоргӕй, уӕхӕн косгутӕ лӕууй, уонӕй сӕ еу ӕй Уодесӕг, иннетӕ ба Алаурди ӕма Руни Барӕ.
Карз Уодесӕг ӕнӕхатирӕй адӕймаги уод исесуй, адӕймагӕн Хуцау зӕнхӕбӕл цӕрун аккаг ку нӕбал фӕккӕнуй, уӕд.
Алаурди ӕма Руни Барӕ ба Хуцауи фӕндонӕй адӕмбӕл нез рауадзунцӕ, адӕм Хуцауи ку феронх кӕнунцӕ ӕма ести тӕрегъӕдтӕ ку ракӕнунцӕ, уӕд. Еци устур незихӕттитӕй адӕм раервӕзунцӕ, сӕ рӕдудтитӕ ку базонунцӕ ӕма уонӕбӕл зӕрдӕй ку фӕффӕсмон кӕнунцӕ, уӕд.
Алаурди ӕма Руни Барӕ адӕмӕн сӕ нез фӕррӕуӕгдӕр кӕнунцӕ, адӕм уони ести дзӕбӕхӕй ку ӕримисунцӕ, уӕд.
Хуцауи дзурдӕй Руни Барӕ алли нези хатт адӕмбӕл рауадзуй, Алаурди ба - сувӕллӕнттӕбӕл, Уодесӕг ба сӕйгитӕбӕл зелуй ӕма сӕмӕ ӕхе аллихузи ӕвдесуй.
Адӕм ку фӕффӕсмон кӕнунцӕ сӕ лӕгъуз гъуддӕгтӕбӕл, нивондтӕ ку исуадзунца, уӕд Руни Барӕ ӕма Алаурди Хуцауӕй ракорунцӕ ӕма карз Уодесӕг ӕхе сӕйгитӕй райдард кӕнуй.
Сайгитӕ уой ку нӕбал уинонцӕ, уӕд исуолӕфунцӕ.
Хуцауи дзурд ӕнхӕстгӕнгутӕ - Уодесӕг, Алаурди, Руни Барӕ адӕмти зӕрдиуаг Хуцауи хӕдзари радзорунцӕ, изӕдтӕ-идаугутӕ, Хуцауи уарзонтӕ ба Хуцауӕй ракорунцӕ хатир ӕма етӕ фӕййервӕзунцӕ.
НИВОНД
Адӕймаг Хуцауи зӕрдихудт ку райсуй, адӕм Хуцауи ку феронх унцӕ ӕма Хуцау адӕймагмӕ исаразунмӕ ку фӕккӕсуй, уӕд е бафтауй адӕймаги ести зинӕвзарӕнти: хъиамӕт, нез, ӕнӕуой зиндзийнӕдтӕ.
Руни-Барӕ уӕд адӕмбӕл рауадзуй еу ести рун - нези хатт, Алаурди дзиуарӕ, ӕма адӕм никкӕлунцӕ нези буни.
Карз Уодесӕг хӕтуй сӕйгитӕбӕл, кӕсуй адӕммӕ ӕма адӕм сӕ миутӕбӕл ку на фӕффӕсмон кӕнунцӕ, уӕд син сӕ нези хатт тухгинӕй хӕссуй, сӕ уодтӕ син исесуй, ӕма сӕ райсуй се носон бунатмӕ.
Адӕм сӕ рӕдуд ку базонунцӕ, сӕ тӕрегъӕдбӕл ку фӕффӕсмон кӕнунцӕ ӕма сӕхе сӕраппонди, сӕ сӕри бӕсти, сӕ фонсӕй Хуцауи ном, кенӕ ба Хуцауи изӕдтӕ, идаугути ӕма Хуцауи размӕ лӕууӕг, Хуцауи уарзонти ном ку иссерунцӕ, ку никковунцӕ, уӕд Хуцау игъосуй еци кувд ӕма ӕ адӕмӕн ниххатир кӕнуй.
