Исати Мæхæмæт
Нæ дзубанди нæма фæцæй
Дууӕ лаги фӕндагбӕл, йе ӕндӕр рауӕн фембӕлунцӕ. Аллихузон фӕндитӕ фӕккӕнунцӕ, кӕрӕдземӕн цæмæйдӕрти зӕрдитӕ февӕрунцӕ. Уӕдта хецӕн раунцӕ ӕма сӕ уӕнаффитӕ минкъийгай иронх кӕнун байдайунцӕ...
Мӕн фенбӕлдтитӕ уӕхӕн надтӕнцӕ. Ӕвзурстити рӕстӕги ӕз архайдтон мӕ ирон ӕма дигорон дзиллити хуӕздӕр базонунбӕл. Уонӕн ести рохс гъудитӕй сӕ уоди уаргъ фӕррӕуӕгдӕр кӕнун мӕ зӕрди адтӕй...
Хӕдӕгай, беретӕ мӕмӕ финсунцӕ ӕвзурстити туххӕй, ӕма уонӕй райдайӕн не дзубанди...
ÆЗУРСТИТИ КОЙ
Уотӕ ку зӕгъон ӕма мӕ нӕ фӕндадтӕй, ку мӕ исӕвзурстайонцӕ депутатӕй, уӕд раст на уинӕ. Цӕмӕннӕ?
Уомӕн ӕма ‘й ӕз лӕдӕргӕ кодтон, Уӕрӕсей парламенти аст лӕгемӕй махонтӕй уӕддӕр еу гъӕуама уа национ фарста зонӕг (специалист). Нуртӕкки, нӕ кӕсетӕ, куд искарз ӕй еци гъуддаг? Мадта изолдӕр ба никкидӕр карздӕр ӕвӕрд цӕудзӕнӕй национ фарста. Е бӕлвурд ӕй алкӕмӕн дӕр. Нӕ гъуди кӕнтӕ Насредин-моллой хабар...
Еу лӕг, дан, бӕласи къалеубӕл бадтӕй. Ӕхуӕдӕг ба и къалеу ӕ рӕбунтӕбӕл хирхӕй лух кодта. Ӕ рӕзти рафецудта молло ӕма имӕ дзоруй:
- Ци кӕнис, ӕрхаудзӕнӕ дӕхуӕдӕг дӕр.
- Дӕ нади гъуддаг кӕнӕ, хуарз лӕг, мӕнмӕ дӕ неци гъуддаг ес!
Уӕхӕн уӕлбекъон дзуапп равардта и лӕг моллойӕн. Цанӕбӕрӕг рацудӕй, уӕдта къалеу лухгонд ӕрцудӕй ӕма и лӕгӕн ӕ тъӕпп зӕнхӕбӕл фӕццудӕй... Басурдта моллой ӕма ймӕ дзоруй:
- Мӕнӕн ме 'рхаун ка балӕдӕрдтӕй, е мин мӕ адзали бон дӕр зондзӕнӕй...
Кадӕртӕ еци моллойау нуртӕккӕ берӕ гъуддӕгутӕ лӕдӕрун байдӕдтонцӕ. Фал, баууӕндетӕ мӕбӕл, национ фарстатӕ æ ацъагъуӕ кӕмӕн ӕнцӕ, етӕ ба сӕ никки хуӕздӕр лӕдӕрунцӕ.
Гъе уомӕн исарази дӕн ӕз ӕвзурститӕмӕ мӕ къӕндидатурӕ радтунмӕ. Ма куд не 'сарази адтайнӕ?..
Нӕ бӕсти депутатти съездӕн унафгӕнӕг (консультант) уогӕй, йеци гъуддӕгтӕн сӕ арфи исӕвзурстӕн. Уоми мин мӕ куст уидтонцӕ на республики устурдӕр хецӕуттӕ ӕма депутаттӕ.
Никки ма Хонсар Иристони ци тогкалд цаутӕ цудӕй, уони ӕрсабур кӕнуни туххӕй ӕртӕ хатти адтӕн ӕз уоми куд «адӕмон дипломат» (дууӕ хатти на кадгин иналар Цӕголти Кими хӕццӕ). Уой хӕццӕ архайдтан, цӕмӕй гурдзиаг террористтӕ ирон хумӕтӕг адӕми тог мабал калонцӕ, уобӕл. Цидӕртӕ нин бантӕстæй. Фал бабӕй и тугъди пеллон фӕстӕмӕ схуӕцуйнаг ке 'й, уой ӕз куд нӕ лӕдӕрдтайнӕ?
Ба-уи-ирагӕс уӕд. Мӕнӕ дохтуртӕн сӕ еуетӕ цӕститӕмӕ бакӕсгӕй куд базонунцӕ нези хатт, уотӕ, ацъагъуӕ кӕмӕ уа, уой бон дӕр фӕууй национ фӕрстати гъуддаг исбӕлвурд кӕнун...
Уонити зонгӕй, ӕз куд нӕ равардтайнӕ арази 'й дзуапп нӕ устурдӕр хецӕуттӕн? Сӕхе ба мӕмӕ сӕрмагондӕй етӕ ӕрбахаттонцӕ, цӕй, Уӕрӕсей парламентмӕ дӕ къӕндидатӕй байамонӕн, зæгъгӕ.
Исарази дӕн, мадта ци кодтайнӕ. Мӕ уарзон адӕмӕн мӕ куд нӕ бафӕндаттайдӕ фӕййанхус кӕнун...
Никки ма депутати гъуддӕгтӕ ӕз газеттӕ ӕма киунугутӕй нӕ, зудтон. Дууӕ хатти мӕ исӕвзурстонцӕ Мӕскуй районти Советмӕ депутатӕй.
Еу гъуддагӕй ба ма 'й уотӕ лӕдӕрун кӕнун. Гъай-гъай, ӕ райгурӕн бӕстӕ, ӕ мадау алкедӕр уарзуй. Фал ибӕл рагъуди кӕнтӕ, еу дзӕвгарӕ рӕстӕг ку нӕбал фӕууинай дӕ райгурӕн бӕстӕ, кенӕ дӕ мади, уӕд дӕ уарзондзийнади ӕнкъарӕнтӕ карздар куд нӕ уодзӕнцӕ? Никки ма дӕ кусти сӕр ку уа национ фарста, мадтӕлон адӕмихатт ӕма мадтӕлон ӕвзаг...
Еу загъдӕй, нӕ республики хецӕутти уӕлдӕртӕ исарази кодтонцӕ мӕн, фал... син сор йеблагъӕ рауадӕй.
Сӕхе гъуддӕгти фӕцӕнцӕ. Кӕрцӕй, дан, хӕдонӕ хӕстӕгдӕр... Мӕнбӕл нӕбал адтӕнцӕ (ӕз ӕрӕги фӕззиндтӕн). Уой размӕ сӕ зӕрдӕ хъӕбӕрдӕр кӕми загъта, уонӕн ӕнӕ альтернативон бунӕттӕ дӕр ма ку иссердтонцӕ. Мах ба еу бунатмӕ дӕс къӕндидатури адтан...
Мӕ гъуддаг ке нӕ рауадайдӕ, уой балӕдӕрдтӕн фиццаг бонти. Ӕма 'й куд нӕ балӕдӕрдтайнӕ?
Мӕгур мӕ бон, мӕнмӕ машинӕ дӕр ма надтӕй. Берӕ хӕттити уӕзласӕн машинити фӕццӕуинӕ ме 'взаргутӕмӕ (етӕ ба адтӕнцӕ пурх фондз районеми: (Ирӕфи, Дигори, Ӕридони, Алагири ӕма Рахесфарси районтӕ).
Мӕ алфамбулай ба заманай лимузинти фӕззинниуонцӕ ма коллегӕ-къӕндидӕттӕ. Ка си ӕ мулки фӕрци ирдта «хӕлӕрттӕ» ма машинттӕ, ка ӕ хецаудзинади фӕрци. Ка 'й зонуй, еунӕг ӕз надтӕн уӕхӕн унгӕг уавӕрти. Фал ӕз мӕхе кой кӕнун нур.
Мӕнӕн еуӕй-еу хатт зин иссерӕн уидӕ, ӕууӕнкӕ лӕген ке райсон, уӕхӕн лӕг дӕр. Иннердигӕй ба, рагъуди кæнтæ - ӕнӕгъӕнӕ институт, кенӕ обком, район ке къохи адтӕнцӕ...
Депутат исунбӕл архайдтон, мӕ равгитӕй, гъай-гъай. Фал ӕрмӕст мӕхе туххӕй нӕ. Мӕ бунат, мӕ куст, мӕ номӕн е неци давуй. Ӕрмӕстдӕр уомӕн ӕма абони хъӕбӕр зӕллангӕй игъустайдӕ мӕн дзурд дӕр Уӕрӕсей Сӕйраг Совети бунтондӕр ба национ фарстатӕбӕл дзоргӕй. Не 'нкӕтдӕр сӕ уинӕн нӕ депутатти. Сӕ фулдӕр гобийӕй бадунцӕ. Кадӕртӕ ба цъифкалӕн кӕнунцӕ еци ӕмбурди нӕ Иристон, нӕ парти, нӕ Цӕдесбӕл. Ӕз сабур бадгутӕй надтайнӕ. Ӕз мӕ бунатӕн нӕ тӕрсун. Мӕнӕн мӕ темперамент, мӕ зунди рахаст уӕхӕн нӕй.
Иннердӕгӕй ба мин, раст зӕгъгӕй, уотӕ хъӕбӕр лӕгъуз дӕр надтӕй ке не сдӕн депутат, е. Еуемӕй, ӕвзурстити рӕстӕги 'й балӕдӕрдтӕн, кедӕрти миутӕ кӕнун мӕ бон ке нӕй. Иннемӕй ба мин ӕнӕуой дӕр берӕ куст ес. Нӕ национ фарстатӕ, куд теоретикон, уотӕ практикон ӕгъдауӕй дӕр берӕ наукон куст домунцӕ. Нӕ ирайнаг ӕвзагзонуйнади дӕр берӕ актуалон проблемитӕ ес. Никки ма мин ӕрӕги мӕ бӕгъдауонд бакодтонцӕ журнал «Русский язык в национальной школе». Куд ӕ бӕрнон редактор, уотӕ ‘й нӕуӕг анзӕй фӕстӕмӕ исхонуйнаг дӕн «Русский язык в СССР». Уруссаг ӕвзаг дӕр, Абайты Васой загъдау махӕн нӕ хъисмӕт æй. Нӕ дууæ æвзагей (нӕхе ӕма уруссаги) ӕз фӕххонун нӕ дууӕ къохи...
Фал уруссаг уӕддӕр нӕ дуккаг ӕвзаг ӕй. Фиццаг ба нӕхе ӕвзаг. Уой туххӕй берӕ дзубандитӕ ӕрцудӕй мӕнмӕ ӕвзурстити рӕстӕги. Ӕма мӕ фӕндуй еци темӕбӕл мӕ гъудитӕ идарддӕр рахӕссун...
НЕ 'ВЗАГ - НЕ ‘ГЪДАУ,
НЕ 'ВЗАГ - НÆ ЗÆРДÆ
Фӕсмон ибӕл нӕ кӕнун, депутаттӕмӕ къӕндидати ном ке фӕххастон дууӕ мӕйи, уобӕл.
Кӕд мин фӕцайдӕ уӕхӕн равгӕ ӕма къуӕрегӕйттӕй мӕ адӕми хӕццӕ фӕдздзубандитӕ кӕнӕ? Мӕ адӕми рохс цӕсгоммӕ кӕсгæй уой гъудитӕ, уой рӕсугъд зӕгъдӕуттӕ, уой цъухидзурд, уой ӕнкъарӕнтӕ, уой зинтӕ лӕдӕрунбӕл архайӕ?..
Мӕ рӕсугъдуод адӕмӕн фӕууидтон ӕрмӕст ӕ цийнитӕ нӕ, фал ӕ мӕти гъуддӕгтӕ дӕр. Ӕргон зӕгъгӕй, сау пӕлӕзи хузӕн мӕ зӕрдӕбӕл сӕхе ӕруагътонцӕ ӕнкъард сагъӕстӕ дӕр. Етӕ баст ӕнцӕ фӕйнӕ хузи гъуддӕгтӕбӕл.
Уонӕн сӕ еу - не 'гъдауи уавӕр.
Уой хӕццӕ баст сӕ иннӕ - не ‘взаги уавӕр.
Не гъдауи рӕсугъдӕн ӕз берӕ нӕма фӕууидтон. Мадта киунугутӕ дӕр кӕсун иннети хузӕн. Дуйнейӕн дӕр уӕддӕр йе ‘ртиккаг хайбӕл ӕвӕдзи ӕрзилдтӕн...
Раст ма раздӕри ӕности дӕр аллибӕстон бӕлццонтӕ дес фӕккӕниуонцӕ мах адӕнбӕл. 18-аг ӕноси еу европаг ахургонд алӕмӕттӕ кодта.
- Циуавӕр дессаг ӕнцӕ, аци ассӕгтӕ? Сӕребарӕ ма хецмӕрез, къниазти хузӕн йездон. Ӕ мизд ин ку федай, уӕддӕр ӕхе уотӕ даруй, цума дин ӕхуӕдӕг дӕдтуй ӕхца…
Лиагъӕ нӕ фиддӕлтӕ сӕ сӕрмӕ некӕд хастонцӕ. Раст ма бонгинтӕн дӕр сӕхе дӕлӕмӕ кӕнун нæ уагътонцӕ. Малити Геуӕргий загъдау,
Ӕнцӕ дигорӕ хецмӕрез,
Кӕсуй ӕлдар сӕмӕ стур нез...
Ахургӕндтӕ агорун байдӕдтонцӕ нӕ адӕмӕн сӕ уедӕгтӕ, сӕ бундор. Мӕнӕ сауӕдонӕн ӕ фейгурӕн бунат куд агорай, уотӕ ӕсгардтонцӕ историй къумтӕ. Ӕма ‘й ку иссердтонцӕ, уӕд нӕуӕг цийни десӕй бацудӕнцӕ...
Куд рабӕрӕг ӕй, уотемӕй мах фидтӕлтӕ адтӕнцӕ дуйнебӕл игъуст адӕмихатт - алантӕ.
Куд нӕ цийнӕ кодтайонцӕ ахургӕндтӕн сӕ йездондӕртӕ. Ӕгайтима еци заманай адӕм ӕнӕ фӕд нӕ байзадӕнцӕ. Ӕгайтима сӕ дзилагӕ не 'сӕскъудӕй!..
Никки фулдӕг деси бацудӕнцӕ ахургӕндтӕ фӕстӕдӕр. Нӕ дигорон ӕма ирон дзилли фӕрци бӕрӕггонд ӕрцудӕй еума ахсгиаг историон гъуддаг дӕр. Куд ӕвдесуй не 'взаги ӕрмӕг, уомӕ гӕсгӕ алантӕн ба сӕ фидтӕлтӕ адтӕнцӕ никки игъустдӕр скифтӕ ӕма сарматтӕ (Мӕнмӕ етӕ кӕсунцӕ ирӕ дигори хузӕн - еу дӕр ӕнцӕ, фӕйнӕ хузи дӕр ӕнцӕ).
Уотемӕй - нӕ фидтӕлтӕ алантӕ!
Уотемӕй нӕ фидтӕлти фидтӕлтӕ скифтӕ ма сарматтӕ!..
Не ‘взаг ба скифаг ӕма сарматаг (ирон ӕма дигорон еумӕ райсгӕй).
- Куд нӕ уӕн мах сӕрустур? Куд нӕ уа не 'хӕс бӕрион, уӕхӕн истори нин уогӕй?!
- Фал, нӕхе Къостай загъдау,
Дӕ фыдӕлтӕ - рухсаг,
Дӕхӕдӕг мын бӕзз...
Ма мӕмӕ исмӕстгун уотӕ, мӕ уарзон дзиллитӕ. Фӕттарстӕн, цума нӕ фидтӕлтӕн фурттӕн нӕбал фӕббӕззӕн арӕх нӕ миутӕй, уотӕ мӕмӕ кӕсуй...
Нӕ дессаги ӕгъдӕуттӕ ма федар ӕнцӕ ӕрмӕст зиани рӕстӕг. Уӕдта цийни бонти дӕр еу минкъий. Ами дӕр, раст зӕгъгӕй, берӕ ӕнӕгъӕугӕ миутӕ фӕззиндтӕй... Мадта хаугӕ дӕр си ракодта цидӕр аййевдзийнӕдтӕ.
Зӕгъӕн, еци бӕллахи ниуӕзт ӕгӕр устур бунат ахӕссуй нӕ нури ӕгъдӕутти...
Фал нин ка нӕбал фагӕ кӕнуй, еци гъуддӕгтӕй дӕр байамондзӕнӕн.
Зӕгъӕн, гъастизӕри раздӕр заргӕ берӕ кӕнионцӕ. Кафгӕ дӕр уотӕ. Иннӕ гъуддӕгтӕбӕл дӕр ес дзорӕн. Фал мӕн фӕндуй ӕмтгай зӕгъун.
Гъӕуама, мах фӕлтӕр ма бауадзӕн не 'гъдӕутти хуӕздӕрти фесӕфун. Лӕг алкӕддӕр ӕгъдауӕй лӕг адтӕй. Ӕрмӕст мулкæй нæ...
Не гъдӕутти хӕццӕ хъӕбӕр баст ӕй не 'взаги хъисмӕт дӕр.
Уотӕ дессаг ӕууӕлтӕ ес не 'взаги, ӕма ибӕл косунцӕ берӕ бӕстити дӕр. Мах ӕвзаг раертасунбӕл косунцӕ Америки, Англий, Франций, Германи, Чехтӕ ма Словакти бӕсти, Венгрий, Норвегий, Швеций, Ирани ӕма ӕндӕр берӕ бӕстити. Берӕ рагон гъуддӕгтӕ байзадӕй мах ӕвзаги (бунтондӕр ба дигорон - мадтӕлон ӕвзаги).
Мадта нӕ эпос ба зундгонд ӕй ӕнӕгъӕнӕ дуйней дӕр, куд е 'взаги гъӕдӕ, уотӕ е 'ннӕ аййевдзийнӕдти туххӕй дӕр.
Нӕ аййев литературӕ дӕр берӕ искурдиатгун финсгути исфӕлдистади ӕ пеллон искалдта. Уонӕн, гъай-гъай, сӕ фиццагдӕр Хетӕгкати Къоста.
Ци дессаги лӕг ӕма финсӕг разиндтӕй е!
Фиццаг бал уруссагау ӕ финсӕги пъеро исциргъ кодта. Ниффинста берӕ ӕндзӕвгитӕ, поэмитӕ, драмӕ. Ӕрмӕст искурдиатгун адӕймаг нӕ адтӕй е, фал ӕнӕуагӕ кустуарзон (Exx, на рӕстӕги ци берӕ искурдиадгун адӕймӕгтӕн нӕ фагӕ кӕнуй еци менеуӕг!).
Гъе нур исбайлӕгъ дӕн куд поэт, зӕгъгӕ, уӕдта бавналдта æ мадтӕлон ирон ӕвзагбӕл финсунмӕ. Дессаг куд нӕй гъуддаг: ӕ фиццагдӕр финститӕй ирон литературӕн бундор ниввардта. Сӕ аййевон ӕууӕлтӕй, сӕ поэтикон техникӕй уони нури уӕнгӕ - ӕнӕгъӕнӕ ӕнос рацӕугӕй - некема раййафта! Къостайӕй рахезгӕй нӕ прозӕн бундор ниввардта Гӕдиати Секъа. Ӕ хуӕздӕр минеуӕг аци финсӕгӕн ба — адӕмондзийнада.
Хумӕтӕг адӕми цардбӕл финста хумӕтӕг адӕмон ӕвзагӕй. Адӕми ӕнкъарӕнтӕ, адӕмӕн сӕ царди ӕууӕлтӕ ӕвӕдзи Ceкъай хузӕн нӕ прози некема равдиста.
Мадта нӕ драматургийӕн дӕр ӕвӕрд ӕрцудæй федар бундор. Уомӕн е 'вӕрӕг ба - Бритъиати Елбиздухъо. Аци дессаги финсӕги размӕ мах устур тӕрегъӕдгун ан. Берӕ рӕстӕги й ци нӕ худтан, уӕхӕн лӕгъуз дзурдтӕ нӕбал байзадӕй: «националист», «уруси нӕуарзӕг», «политикон хъӕрӕу» ӕма ӕндӕр хъилматӕ...
Еуӕй-еу хатт уотӕ расагъӕс кӕнун: «Уотӕ карз цӕстӕй цӕмӕн фӕккӕсӕн кӕрӕдземӕ? Хехуартӕ цӕмӕн ан? Нӕ хуарз хуарзбӕл цӕмӕннӕ нимайӕн? Еци 'нӕуарзондзийнадӕ ӕма соцъа мах куд исафуй, уой цӕмӕннӕ балӕдӕрӕн?»
Секъа ӕма Елбиздухъой хузӕнттӕ урусмӕ, сомехмӕ, гурдзимӕ, иннетӕмӕ ку адтайдӕ, уӕд сӕ, ӕвӕдзи, пахампарӕн дардтайонцӕ!.. Ма уӕд ӕвзонг фӕлтӕрти зӕрдитӕ дӕр национ хӕзнатӕй гъӕздугдӕр фӕуунцӕ!
Мадта нӕ ирон литератури ӕрмӕст еци ӕртӕ устур хонхи нӕййес. Уони кӕстӕртӕй мӕн зӕрдӕмӕ фулдӕр фӕццудӕнцæ, Нигер ӕма Ӕрнигон, Барон ӕма Кудзӕг, Фӕрнион ӕма Харитъон, Цӕппо ӕма Яков. Нуртӕкки финсгути ӕхсӕн дӕр берӕ ирд нӕмттӕ ес, гъай-гъай. Уогӕ дӕр минкъий ку нӕ 'нцӕ нимæдзӕй.
Куд фӕззӕгъунцӕ, бӕрцӕй фидбилизи фагӕ ан. Раст зӕгъгӕй, еуетӕ си сӕхебӕл фулдӕр ку косионцӕ, уӕд нӕмӕ аййев уацхъудти бӕрцӕ фулдӕр уидӕ. Сӕ гъӕдӕ дӕр уидӕ хуӕздӕр... Никки ба ма бӕллах уой медӕгӕ й ӕма нӕ ирон литературон ӕвзаги будур хъӕбӕр унгӕгӕй. Гъӕуама нӕ царди, культури не 'взагӕн устурдӕр бунат искӕнӕн.
Ӕвзаги хӕццӕ хъӕбӕр баст ӕй ӕгъдӕутти фадуат дӕр. Ӕма син се 'рӕзтбӕл еумӕ исхуӕцун гъӕуй.
См.: Журнал «Ирæф», 1991 анз, №2.
