ДИГОРИ РАГОН СИМДИ ЗАР
Дигорӕн сӕ коми думӕги адтӕй гъӕу,
Ӕ ном хундтӕй «Кети-гъӕу».
Биаслантӕ тухӕ кӕнунмӕ цудӕнцӕ Дигорӕмӕ,
Биасланти устур Хъайтихъо цудӕй Дигорӕмӕ тухӕ кӕнунмӕ ӕнбалти хӕтдзӕ.
Йеу хатти кӕми адтӕй, уоми ӕрбацудӕй къуари хӕтдзӕ,
Тухӕ кӕнунмӕ Кети гъӕумӕ,
Барӕуадзӕ гъог равгӕрдидӕ,
'Ма минасӕ кодта йеци гъӕуи.
Уӕд сӕхемӕ цӕун унаффӕ искодта,
’Ма гъӕуи барӕуадзӕ дӕр кизгӕ ка адтӕй, уой рахаста ӕхецӕн,
Кизгӕ курд адтӕй гъӕуи барӕуадзӕдӕр лӕхъуӕнӕн,
Сиууойти Мӕсуйӕн;
Мӕсу адтӕй Кӕсӕги балци.
Хъайтихъойӕн йе 'мбалтӕ исниуӕстгун ӕнцӕ, 'ма никъуӕрдтонцӕ разӕй,
Ӕхуӕдӕгка кизги хӕтдзӕ исбадтӕй галуӕрдуни, разӕй ба - галдӕрӕг,
'Ма йбӕл исӕмбалдӕй уотемӕй Мӕсу Сиууойти, кизгӕ курд кӕмӕн адтӕй, йе.
Кизгӕ искудтӕй, 'ма ймӕ дзоруй:
«Ӕз фесафтӕн, фал ду дӕхе мабал фесафӕ,
Нигкидӕр кизгуттӕ - берӕ».
Лӕхъуӕн имӕ дзоруй:
«Тӕрсгӕ ма кӕнӕ, цӕугӕ кӕнӕ, уӕдта ин ци кӕнун
Гъӕуа, уой ӕз базондзӕнӕн»,
'Ма ӕ хӕтдзӕ раздахтӕй фӕстӕмӕ.
Кизгӕ ку 'скудтӕй, уӕдта Мӕсумӕ дзоруй ӕлдар Хъайтихъо:
«Ду ци дзорис аци кизгӕмӕ?»
Йе ба имӕ дзоруй:
«Кизгӕ мӕ хуӕрӕ 'й, 'ма мӕн ку фӕйидта, уӕд искудтӕй уобӕл.
Йе нур ба ӕз дӕр дӕ хӕтдзӕ издӕхун уой туххӕй,
Ӕма а кизгӕ ӕрхунӕй рамӕлдзӕнӕй».
Бацийнӕ кодта кӕсгон ӕлдар,
Æхе ин бамудта:
«Ӕз дӕн Биаслантӕн сӕ тӕгкӕ сӕртӕй, Хъайтихъо-ӕлдар.
Хуарз дин фӕууодзӕнӕн», - зӕгъгæ, ин зӕрдӕ байивардта,
Уӕдта ‘й адтӕй косӕг искӕнуйнаг.
Нур ба Толдзгуни адӕгтӕмӕ ку бахъӕрдтӕнцӕ, уӕд кизгӕмӕ дзоруй лӕхъуӕн: «Нуртӕгкӕй маргӕ кӕндзӕнӕн, 'ма мӕ фӕсабӕрцӕмӕ бадунмӕ гъавӕ-йеу». Фӕсдегкӕй ӕхе фӕууорӕдта, 'ма 'й дууӕ фати йе 'фтигъд топпӕй
Фӕсдегкӕй ниццавта, 'ма дууемӕй дӕр галдӕрӕги хӕтдзӕ, ӕрдти астӕумӕ ниххаудтӕнцӕ.
Кизги ӕ фӕсабӕрцӕ февардта, 'ма ӕрбахъӕрдтӕй сӕ гъӕумӕ,
Ниффӕдес кодта гъӕубӕл:
«Ӕлдари рамардтон, алке ӕхе ӕфснайӕд, кӕсӕг нӕ цӕгъдгӕ кӕндзӕнӕнцӕ». Ӕнӕ бӕрцӕ уайӕг бӕх имӕ адтӕй, 'ма рабадтӕй,
Кӕтлӕревски бадтӕй Терки хъазах, 'ма ӕмбесӕхсӕви уонӕмӕ рахъӕрдтӕй.
Уруссаг ӕвзагӕй дӕр зудта 'ма уордигӕй райста афицер дӕс ӕма дуйинсæй хъазайхагей хӕтдзӕ:
«Кӕсӕг нӕ цӕгъдунцӕ 'ма нӕ уӕхемӕ райсетӕ», - ци бакуста уой син радзурдта.
Рацудӕнцӕ хъазахъ ӕ хӕтдзӕ, 'ма сехуар афони исхъӕрдтӕнцӕ Кети гъӕумӕ.
Кӕсӕги фӕдес дӕр ӕрбахъӕрдтӕнцӕ,
'Ма хъазахи ку 'ридтонцӕ, уӕд нӕбал бандиудтонцӕ,
Æндӕра сӕ адтӕнцӕ ниццӕгъдуйнаг. Афицер дзурд равардта:
«Сумахӕн ами цӕргӕ нӕбал ӕй, алке цурхӕд ӕ дзауматӕ».
'Ма сæ фӕлласта ӕ хӕтдзӕ,
'Ма син равардтонцӕ Мӕздӕги гъӕуи буйуат.
Сӕхебӕл ном исӕвардтонцӕ «Мӕсу-гъӕу».
Радзурдта ӕй Тобойти Цицеу Дзӕрӕхмӕти фурт. Ниффинста ӕй Толасти Андрей, 1927 анз, 5 апрель, Киристонгъæу.
ЦИНИИ-йи архив, фольклор № 15, папкӕ 8,, ф. 313-315.
