ИСТОРИОН ÆМА ЦАРДИУАГОН ТАУÆРÆХЪТÆ
Хъанухъти Есен
Уæдати Губади дзурдтæй Дзагурти Губадий финст
Хъайтухъи фурт фæдгитæ ку кодта, уæд минæвæрттæ æрбарвиста Донифарсмæ Бийи-фурт Муртазали æма- Хъарадзаути Сафаралий. Текъой – фурт сæ кегъæре. Донифарси æрфестæг æнцæ æма мæтъæл адтæнцæ и минæвæрттæ.ю
-Ци мæтъæл æйтæ, не’уазгутæ? Ци хабар ес? Ести нин зæгъетæ!
- Зæгъдзинан уин уæ хабар, нæ мæтъæлдзинадæ дæр уин. Биаслантæ фæдгитæ корунцæ, дзиллитæбæл фæдгитæ æвæрунцæ, æма уонæн минæвар ан сумахмæ.
- Берæ уин не ‘ссердзинан, мах дæр фæдги нон рауадздзинан, мæтъæлæй уæ нæ рауадздзинан, - зæрдæ син байвардтонцæ.
Сæумæ ку нæхстæр кодтонцæ, уæдта сæ бафарстонцæ:
- Гъи, ци зæгъетæ, ци æй уæ дзуапп?
- Зæгъдзинан уин, зæрдæ уин цæмæй байвардтан, уомæй уæ нæ фæссайдзинан: сæумæ нæ биццеутæ гъæдæмæ ку фæццæунцæ æма сауæдонмæ ку рацæунцæ, уæд сæхе нихснунцæ. Фæстæмæ ку раздæхунцæ, уæдта нæ хæргутæн сæ фæллад раййафуй, æма ‘й етæ фæммезунцæ. Мæхæн е фæдгæ фæууæд дæуæн, Хъарадзауи – фурт!
Рандæнцæ мæтъæлæй; дзуапп син нæ равардтонцæ æндæр.
Уæдта Хъайтухътæ æфсæдтæ кæнун байдæдтонцæ, тухæ æвдесун райдæдтонцæ.
Æхсинтти коми æрбацудæй æртæ бæхгини. Хъанухъти Есе кæсæнцæстæй фæккастæй:
-Æртæ бæхгини æрбацудæй, æма астæуккаг бадуй уорсбарцæ, уорсдумæг цъæх саулохбæл, е уодзæнæй Хъайтухъи- фурт Сар – Асланбег. Галеу фæрсæй ка цæуй, е бадуй бæгæнихуз тæранбæл; е ба уодзæнæй Бийи – фурт Муртазали. Рахес фæрсæй ка цæуй, е ба бадуй мистрагъ цагъдебæл; е ба уодзæнæй Хъарадзаути- фурт Сафарали; е ‘хси дудагъ телуй, хъабхай уоси хузæн æвзагхæссæг ка хæтуй Хъайтухътæн. Етæ уодзæнæнцæ, не ‘фсийнæ, мæхæн не ‘уазгутæ, ‘ма нæмæ ести хъаурæ уодзæнæй?
- Уодзæнæй, Хуцау ку зæгъа, уæд ме’ лæтон бæгæни, мæ хулудздзаг кæрдзин æма хъæбæр цигъд – уонæй сæ байуадзæг кæндзинан.
Æрбацудæнцæ æма Мисигони ‘фцæги донбæл æрбадтæнцæ.
Мисигони донбæл ниббадтæй уорс цæргæс;
Æ дууæ фарсемæ – дууæ хойн.
«Цицци» син зæгъæн, æма нæмæ ку нæ цæунцæ.
«Усси» син зæгъæн, æма нин тæхгæ ку некумæ кæнунцæ.
Уæдта син рарвиста æлæтон бæгæни, хулудздзаг кæрдзин æма цигъд:
- Етæ дин нæ хуæнхаг мæгур цард. И бæгæн дæр баниуазæ, цигъд æма и кæрдзинбæл дæ тухæ æвзарæ; кæд нæ никкæрда, уæдта нæ ма мæстæймарæ.
Æвзурста уонæбæл æ кард æма и цигъд, и кæрдзин нæ никкардта.
- Циддæр æй! Уонæн, сæ ниуазæн тухгин кæмæн æй, сæ цигъд, сæ кæрдзин мæ кард кæмæн нæ кæрдуй, уонæн æз неци кæндзæнæн.
-Исон ба дин бахуæрун кæндзинан зæтхин кæрдзин муди хæццæ. Нæ уорс дзол ба дин бахуæрун кæндзинан фиди хæццæ.
Уæд ма нæ ку мæстæймарай,
Уæдта дæ исон æхсавæ бакмндзæнæй
Тæрион Тулабег Хъозити искъæти хути хæццæ.
Уæдта дæ рарастдзинаан дæ баивæд[i] æстур фуди хæццæ.
- Анæй мин пайда нæййес, - зæгъгæ, æма сæумæ фестæдæй æма рандæй.
Уæдтæ бабæй фæстаги цуд æфсади хæццæ æрбакодта æма изолдæр æрбадтæй æфсади хæццæ.
И сæумæ ку фестадæй, уæд хъувгъани хæццæ изолдæр рацудæй. Изол адтæй, фал æй мæсуги сæрæй Хъанухъти устур Есен фехста ‘ма ин æ хъунгъан, хæццæ изолдæр рацудæй. Изол адтæй, фал æй мæсуги сæрæй Хъанухъти устур Есен фехста ‘ма ин æ хъувгъан æ размæ басаста.
Уæдта сæмæ Есен исцудæй, æ топп æ лæдзæгбæл ниййауигъта идарддæр, æма имæ бацудæй æма ин фиццаг «дæ рагисон хуарз» раарфæ кодта, уæдта ин «æгас цæуай» дæр раарфæ кодта.
Исбадун æй кодта æма ‘й фæрсуй:
- Мæхе æхстай æви мæ хъувгъани?
-Хуцау байсæд, цæмæ дæ æхсон? Дæхе не ‘хстон, фал кæд хъувгъан раргъавтон.
И дуккаг æхсæвæ хæстæг æрцудæнцæ æма тохун байдæдтонцæ. Есен цирагъд къудурбæл цирагътæ (цуппар цирагъи цуппар серабæл) исасугъта, ма кафтонцæ æ мæсуги сæри, кæсæг ба æхстонцæ. Кæсгон топп сæмæ нæ хъæрдтæй, æма си нæ тарстæнцæ.
- Дзиуйисхан[ii], корун, æма мæ минæвардзинадæ рауадзæ аци хатт.
- Æхсæ, дæттун бин барæ!
- Мадта дин никкидæр корун, цалдæнги мæ топпи гъæр раевгъуйа, уалдæнмæ топп æхсун маке бауадзæ.
- Маке фехсæд, загъгæ, дзурд равардта, æма йе’мбалтæй, кæсæгæй, некебæл фехста.
Цирагъи къудуртæй еу фехста, æма цирагъи къудуртæй еу рахаудтæй.
Донифарс кæун байдæдтонцæ:
-Оххай, æ топпи æхст нæмæ хъæртун байдæдта, загъгæ.
Есен ба син загъта:
- Цæмæй тæрсетæ? Е кæсгон топпи гъæр нæй, загъгæ.
Е Текъой-фурти топпи гъæр æй, æма ма тæрсетæ! Текъой-фурт! Дон цæуй, æзмесæ ба изайуй, ами уодзæнæ, æма дæу хæццæ кæрæдзей уиндзинан.
Уæдта Сари- Асланбегæн загътонцæ:
- Дæхе нæбæл ци ‘взарис? Кæд Астантæй фæдгæ рахæссай, уæд махæй дæр ести уодзæнæй.
Æ бон син неци иссæй æма уæдта рандæй ревæдæй.
***
Хъайтухъи-фурт Сари-Асланбег йе’ фсийнæн дууæ имонау гъолон гали дардта, сæ сиутæбæл æвзестæ æвард, æма сæ Хъарадзаути Сафарали, Тмторси дин сæ иснард кæнон, зæгъгæ, Тæторсмæ æрбадардта. Донифарс сæ, æма сæ кæми ирдта, æвгарст ка фæцæй, уони! Хъозитæй еу лæгъуз Мæлки, е сгутæ кæцæй радавта, ка’й зонуй, ‘ма ин сæ е фæххаста. Кондзæуæккаг ин худзаридзаг равардта хуар. Бæргæ си агурдта феддæн, фал ма уой феддæн адтæнцæ!
***
Хъарадзаути- фурт! Уæ цæрунæй фидæй фуртмæ кæбæл дзоретæ, е Тæторс æй, фал нæ бæсти кæронмæ Зæнгфæрдгуни[iii] нæ фиййау-биццеутæ уоми хезунцæ; Тæторсæн дæ бон неци’й, фал уонæн бахатир кæнæ дæ уосæй.
***
Æлдаррезæн Къумбулти цори æй.
Сар-Асланбеги бафæрсиуонцæ:
- Хабар, Асланбег?
-Неци хабар. Ку баталингæ уй, уæд æстъалутæ нимайун; ку ‘рбон уй, уæдта Къумбултæмæ кæсун æма уони согдзаутæ нимайун.
Уæдати Хъубади, Дзæуæгигъæу, "ИР", 2012
[i] Фæстæмæ дæ фæдбæл, кæбæл æрбацудæй, уобæл.
[ii] Дзиуйисхан – æлдар; кæсгонау æлдарæн йе’монау ном.
[iii] Æрдози ном.
