МИСТИТӔ ДУЙНЕЙ ЗӔРДӔ КУД АГУРДТОНЦӔ.
Раги адтӕй, ӕви ӕрӕги, цардӕнцӕ ӕма адтӕнцӕ миститӕ. Бустӕги цӕмӕдес адтӕнцӕ, зӕгъгӕ дӕр си нӕ зӕгъдзӕнӕ, уӕлдай зундгин исхонӕн дӕр син нӕййес. Фалӕ сӕ иннӕ цӕрӕгойтӕй цидӕр ӕртаста, ӕнхӕст еугурей хузӕн нӕ адтӕнцӕ. Ӕвӕдзи сӕмӕ дессаги гъудитӕ ке адтӕй, уомӕй ӕндӕр цонау адтӕнцӕ. Мадта бакасти ба - мистӕ ӕма мистӕ, иннетӕ куд, уотӕ.
Еу мизези сӕмӕ адтӕй, кӕций фӕрци син сӕ алӕмӕттагбӕл фӕссек ӕнцӕ еугурӕй дӕр : кумӕ бацӕуиуонцӕ аци микъиткитӕ, уоми раст, цума, хор искӕсидӕ, зӕрдитӕ байгъӕлдзӕг уиуонцӕ, ристтитӕ фӕццидӕр уиуонцӕ, сӕ рохс сӕ разӕй цудӕй, цӕруни хъаурӕ хӕсгӕй ӕма лӕвар кӕнгӕй. Бӕргӕ хъӕбӕр сӕ алли хӕдзари дӕр хизтонцӕ, сӕ хуарзӕнхӕ ӕнгъӕлдзау, уомӕн ӕма сӕ фарнӕй берӕ рӕстӕг цардӕнцӕ, зин не 'взаргӕй.
Еу бони сӕри ба миццӕ-сирдтӕ ӕрӕмбурд ӕнцӕ ӕма нихас исаразтонцӕ : базонӕн, атӕ дӕр мах адӕни муггагӕй ку ӕнцӕ, уӕд сӕмӕ аци дессагон хъаурӕ кӕцӕй йӕй, кӕми син адтӕй, махӕн дӕр ӕй байамонӕнтӕ, е ба нӕ еугуремӕ дӕр уа ӕма анӕмӕ мабал ӕнгъӕлмӕ кӕсӕн. Куд баунаффӕ кодтонцӕ, уотӕ исаразтонцӕ, цинойти исиуазӕг кодтонцӕ, фингитӕ ӕртигай къерети хӕццӕ, алли хузи хинццӕгтӕ, гъӕубӕсти фагӕ кувд!
- Зӕгъайтӕ нин, нӕ тогӕй тог ку айтӕ, еу зӕнхӕбӕл ку цӕрӕн, еумӕ исирӕзтан, кӕрӕдзей фиццаг ӕфсӕрстӕй ардӕмӕ ку зонӕн, уӕд махӕй ци уӕлдай айтӕ, уӕ хъаурӕ кӕцӕй йӕй? Мах дӕр сумах хузӕн ун фӕндуй, ба нин лӕвар кӕнтӕ, уӕ хуарзӕнхӕй, ма баауӕрдетӕ!
Нӕ миццитӕ сӕ фур десӕй кӕсгӕ райзадӕнцӕ!
- Махӕй ба цӕхуӕн хъаурӕ агоретӕ, мах сумахӕй, уӕ еугуремӕй дӕр, цийнитӕ ку уедзӕн, ке къӕсӕрбӕл уи бахезӕн, уоми зӕнхи зӕрдӕ ӕндӕр хузи косун фӕййагайуй, алӕмӕттаг цагъд, цума, фӕккӕнуй, уотӕ! Алке хӕдзари дӕр уи зӕнхи зӕрдӕ ӕндӕр гупп кӕнуй, ӕндӕр цагъдӕй нӕ рӕвдауй! Ӕма уӕмӕ уой туххӕй ку цӕуӕн, уӕ фарнӕй нӕхе хӕссӕн!
Дести бафтудӕнцӕ дзиллитӕ, кӕд нӕбӕл гириз кӕнунцӕ, зӕгъгӕ! Махӕй бабӕй ке хӕдзари циуавӕр зӕнхи зӕрди хабар ес, нӕхуӕдтӕ ба 'й уӕд не 'гъосианӕ, зӕгъгӕ!
Цубур загъдӕй, кӕрӕдзебӕл не 'ууӕнддӕнцӕ, зӕрди худтмӕ цудӕй гъуддаг!.. Фалӕ дин уӕдмӕ ба нӕ миццитӕй еу ку ӕрӕхснирсидӕ ӕма ин уой хӕццӕ ба фӕййервазтӕй ӕ думги хай...Ӕма дин ходӕгӕй ку нихъхъӕнттӕ уиуонцӕ мӕ тингун адӕн, нуртӕккӕ дӕр ма кӕрӕдземӕ лӕкъун цӕстӕй ка кастӕй, етӕ! Уотӕ худтӕнцӕ, кӕрӕдзебӕл ниддӕлгоммитӕ 'нцӕ, хӕкурц кӕнгӕ, сӕ цӕстисугтӕ уайгӕ, цӕй маст ӕма ма зӕрдихудт!..
Зӕрдибунтӕй ку фегъӕлдзӕг кодтонцӕ ӕма сӕ хъӕлӕба сабур кӕнун ку байдӕдта, удта дин кӕрӕдземӕ дес кӕсӕ кӕнунцӕ ӕма сӕ листӕг гъостӕ, бӕласи цӕнгтау, исгъӕдӕг ӕнцӕ!
- Сумах дӕр игъосетӕ ӕз ци игъосун, уой?? Зӕрди гупп?! Нур е ци дессаг уа, зӕрдӕ ба цӕгъдун зонуй, зартӕ аразун зонуй? Дестӕ кӕнунцӕ, уӕддӕр си не 'руагӕс кодта, уотитӕ нӕ фӕууй, зӕгъгӕ. Ӕма уобӕл цӕйбӕрцӕ рӕстӕг рацудӕй, хъӕбӕр фӕддестӕ кодтонцӕ, цагъдмӕ фегъустонцӕ, уӕдмӕ бабӕй фӕкъкъурутӕ 'нцӕ, нӕ миццитӕй ӕндӕр зӕнхи зӕрди цагъд неке бабӕй игъуста...Нӕхе зӕрди ӕрӕфтудӕй, уотӕ нӕмӕ фӕккастӕй, уомӕн уӕн нӕййес, зӕгъгӕ разагътонцӕ ӕма уоййадӕбӕл ӕмир дуйней бафтудӕнцӕ бабӕй. Фудӕбӕнттӕ цард кодтонцӕ, ухери ӕвзаргӕй, еу цийни цъита ба кӕмӕ нӕ ракӕсуй! Сӕ устурдӕр ӕнгъӕлцӕ - нӕ миццитӕ сӕмӕ иуазӕггади ку бацӕуиуонцӕ ӕма уони фарнӕй цардӕнцӕ рӕстӕгмӕ.
Мистити бӕстӕ ци бӕласи едӕгти буни адтӕй, уоци бӕласи цӕнгтӕбӕл ба зӕронд тикис фунӕй кӕнун уарзта ӕма ин римӕхстаг нӕ адтӕнцӕ мистити дзилли царди хабӕрттӕ. Ӕхе, цит, бӕласи къадобӕл ку радаргъ кӕнидӕ, уӕд ин бӕласӕ ба мулдзугутӕй дзигитӕ ферветидӕ, мӕ зӕронд ӕмбали мин байгъӕлдзӕг кӕнтӕ, зӕгъгӕ.
Нур дин аци хабар ку 'рцудӕй миццон бӕсти хаййи, уӕд тикис бӕласӕмӕ дзоруй :
- Фӕййидтай, ӕз дин нӕ фӕззӕгъун, атӕ ӕндӕр хузи миститӕ 'нцӕ, ӕвӕдзи миститӕ дӕр нӕ 'нцӕ, цъеутӕ 'нцӕ, кенӕ ба изӕдтӕ, фал аци зӕнхӕмӕ цӕрунмӕ ку цудӕнцӕ, уӕд радзӕгъӕл ӕнцӕ ӕма сӕ уодтӕ мистити бауӕри исӕнтӕстӕнцӕ!
Бӕласӕ ба бахудтӕй :
- Е, мӕ лимӕн, нур дӕр ди нӕма ӕруагӕс кӕнуй : махӕн аци бауӕрти исӕнтӕсуни барӕ ки исаккаг кодта нӕхе фӕндонӕй, уой бон мисти бауӕри бацӕун дӕр ке йӕй, цӕмӕй уотид ӕ тъирттӕй дӕр дуйнемӕ цийнитӕ хӕсса!..Е къумухтӕ ӕма ӕдзӕллаг уодтӕн алли хузи ирисхъитӕ дӕр лӕвар кӕнуй, уотид си ӕруагӕс бауӕд ӕ хуарзӕнхӕ!..Фалӕ етӕ ба уойбӕрцӕбӕл ӕлхъивд ӕнцӕ ӕма ма сӕбӕл рӕстӕгутӕ рацӕудзӕнӕй, кӕдмӕ еститӕ лӕдӕрунгъон исуонцӕ, уӕдмӕ!...
- Гъема сӕ барӕ уӕд, нӕ сӕ тагъд кӕнӕн, бонуоддӕртӕ кӕнӕнтӕ сабургай...гъуди ма 'й кӕнис, мах дӕр кӕддӕр уони хузӕн адтан, бӕзгъос зӕрдитӕ нин адтӕй...
- Иннӕ зилди ӕрцӕудзӕн цӕугӕ дони уодӕй, дортӕй рагъазун мӕ фӕндуй! Нура бал дӕ дзигитӕ ку ферветисӕ, маха раходӕн дзӕбӕх...
Еуӕхӕн хабӕрттӕ цудӕй дӕлбӕласӕ ӕма уӕлбӕласӕ. Миццитӕ ба еуетӕмӕ, удта иннетӕмӕ зӕрди гуппмӕ игъосунмӕ цудӕнцӕ, хӕдзари фусунтӕ ба сӕмӕ хъӕбӕр ӕнгъӕлмӕ кастӕнцӕ.
Зӕнхӕ ба байдзулидӕ, мӕ зӕрдӕ аци микъиткити уиндӕй уӕлдай цийнӕ кӕнуй, зӕгъгӕ, ци хъӕбӕр уарзти ин ӕнцӕ, ӕвӕдзи мӕ игъӕлдзӕг ке кӕнунцӕ, уой туххӕй...
Тахъазти Федари курдиадӕмӕ гӕскӕ финст.
