Дзагурти Дигорхан.
Гъӕдӕ 'ма ӕз.
Уафуй гъӕдӕ нӕгъӕй сасуг,
Цилле уӕлдӕфау рӕуӕг,
Нӕ дууемӕй кӕций зӕрдӕ
Зӕронд уа, кенӕ нӕуӕг?..
Нӕ дууемӕй кӕций фӕззӕг
Дӕргъвӕтинӕй евгъуйуй,
Кӕций рагуалдзӕги хортӕ
Ӕ цъӕх тала имисуй?..
Ескӕд нуст ӕнгъӕлдзау ӕрвтӕ
Игон дарунцӕ сӕ реу:
Нӕ дууемӕй еуей зӕрдӕ
Уарзтӕй исуадздзӕнӕй беу!..
Нӕ дууемӕй еуей номбӕл
Ниццӕйивулдзӕй алай,
Гъӕдӕн уа, ӕви мӕн нивӕн, -
Уокилӕн нин исбӕззай...
Дзурдуат :
нӕгъӕ - густой молочный туман,нуст - поцелуй,
беу - роза,
алай - торжественный обряд брачного пира, проводы невесты под покрывалом,
уокил - свидетель.
