Узун

Аци синдзгун минкъий къубулойнæ дæ рæзбуни кенæ дзæхæрай æрцардæй, уæд уотæ нимайæ, æма дæ гъуддаг рацудæй. Бæлæстæ æма хумтæ дæ марггин хуастæй пурх кæнун нæбал гъæуй, хъæбузатæ æма син æндæр саскъитæй тæссаг нæбал æй – зианхæсгути узун скунæг кæндзæнæй.

Уой рæуаги рæзбуни ’ма дзæхæрай тиллæг æрмæст гъæуайгонд нæ цæуй, фалæ ма ’ймæ хуасти марг дæр нæ бахъæртдзæнæй ’ма рæзæ, халсартæ кæдзосæй байзайдзæнæнцæ. Цæргæ ба кæнуй æрмæст Европи нæ, фал Ази æма сауæнгæ Африки дæр. Фæсвæд рауæн къотæрти, пихси сифтæ æма фæлмæн сор кæрдæгæй листæн искæнуй, бонигон уоми фæббадуй, æхсæвæ ба цауæни рацæуй.

Æ хуаллаг æнцæ саскъитæ, золкъитæ, гъонцъиртæ, миститæ, хелгутæ æма аллихузæн рæзæ. Гъæддаг тогцъух сирдтæ имæ не ’ндеунцæ, уомæн æма æ бауæр æхгæд æй синдзгун уартæй. Тогцъух берæгъ ибæл ку рамбæлуй, уæд узун æхе æрбатумбул кæнуй, сæрæй, къахæй, къæдзелæй, еугурæй дæр синдзити медæгæ фæууй ма ’ймæ бавналæн нæбал фæууй.