ГАДАТИ ЛАЗАР
Ме стъалутæ
Ма хауетæ æхсæви тари сау зæнхæмæ, мæ минкъий æрттевагæ стъалутæ. Арви æнæкæрон тарæй ма тагъд кæнтæ æхсæйвон зæнхæмæ, ку фæрресайтæ зæнхи хъæбæрбæл. Кæми æрхаудзинайтæ? Кæми уæ агордзæнæн æхсави тари? Уæ агорæг æрзелдзæнæн зæнхи къоребæл 'ма æрæздæхдзæнæн фæстæмæ мæ фæндаги райдайæнмæ. Нæ уин ес иссерæн зæнхæбæл, мæ минкъий æрттевагæ зингитæ. Æсталутæ тæхгæ-тæхун басодзунцæ!
Фото астрофотографа Валерия Сабанова
Раздæхæ
Дæ донхуз сæрбæттæн денгизи уолæнау ферттивта ‘ма фесавдæй нади фæззелæни.
Ци æнæрцæф дзурд загътон? Цæмæн фмттæргай дæ?
Мæ зæрдæ реуи фæрстæбæл æхе ниххуайуй, Ирæфи цъæх дон æндон къæдзæхтæбæл æхе куд хуайуй, уотæ.
Раздæхæ! Ма мæ уадзæ тузмæг дони билгæрон мæ катайи хæццæ еунæгæй. Мæ зæрдæ уарзондзийнади ристæй гъæрзуй Ирæфи донау. Æви нæ уинис, ци къахнадбæл цæуис, уоми дæ алли къахдзæфæн дæр мæ уод фæлмæндæрæн æвæрд ке æй?
Æви нæ уинис, мæ уарзти катай дæ сæрти изæди базурау ке тæхуй, уой?
Раздæхæ! Цæстисуг æнгъæлдзауæй байзадæй мæ цæстихаутæбæл. Нæ мæ гъæуй усми дæрхци дæр æндæр уарзондзийнадæ. Дæу хецмæрез, æрвхуз цæститæ æхсæви тарæй дæр мæ фæсте кæсунцæ, бони рохси дæр уони уинун. Дæу фæлгонц хæссун мæ реуи. Хийнæ мин никкиндæй мæ сонт уарзти сæрæн дæу ном исæвзарунмæ. Раздæхæ, æви не 'гъосис мæ зæрди уæззау рист? Кумæдæр цæуай, дæ фæндаги билгæрон æвзонг дзæгæрæг æфтуд бæласау мæ уарзондзийнадæ лæудзæй дæ рази. Хонхи цæуай, будури цæуай, дæ фæсте игъосдзæнæ уæлдæфи мæ уарзондзийнади мондаг унæр. Фæлмæн ирдги хæццæ дæ рæсугъд бауæрбæл æмбæлдзæнæй мæ уоди катай.
Раздæхæ...
Æви нæ лæдæрис, æнæ дæу мин цард зиндонæ ке æй, уой?
Раздæхæ!
Деденæг
Къæдзæхи фахсбæл æносон гъунæй æхсæнæй исирæзтæй минкъий деденæг æрвхуз сифти хæццæ. Цæмæдес каст кæнуй арви цъæхмæ, Ирæфи уолæнти зуст æзмæлдмæ ‘ма рæстæгæй- рæстæгмæ æ сæр бателуй ирдгæмæ естæбæл фæсмонгæнæгау. Цазæ рæстæг æрбансæндуй мегъæ, къæдзæх æ хъури ракæнуй ‘ма ниффардæг уй коми идарддæр. Минкъий деденæги листæг сифтæбæл цæстисугау ниууадзуй дони æртæхтæ. Сæ уæзæй æртасуй деденæг, дони æртæхтæ ниххаунцæ гъунæй фæлмæнмæ ‘ма уоми фесæфунцæ.
Деденæг æ астæу исраст кæнуй ‘ма бабæй æ сæр бателуй.
Зин æй цæрун æносон гъунæй æхсæн дæу хузæн сугъдæг рæсугъддзийнадæн. Фæндуй дæ будури деденгути æхсæнмæ, ‘ма дæ цæстисуг дæр уомæн хауй тар гъунай арфмæ. Ма фæсмон кæнæ дæ райгурцæбæл, дæ бунатбæл, минкъий рæсугъд деденæг. Ку зонисæ, адæймагæн куд æхцæуæн æй дæ фæууиндæ! Гъунæй æмхузон тар реубæл дæ сугъдæг рæсугъддзийнадæ лæварау æй. Æрцæудзæнæй фæззæг ‘ма дин райсдзæнæй да ‘рахуз сифти фæлуст. Дæ дзæгæрæг ниххаудзæнæй гъунай арфмæ.
Нæуæг уалдзæг де ’мхузон рæсугъд деденгутæ фæззиндзæннæй дæ алливарс, ‘ма кæрæдзебæл уозæлдзийнайтæ. Нийвулдзæнæй уæ бæркæд æнзти цуди. Уæ сугъдæг рæсугъддзийнадæ нимбæрздзæнæй къæдзæхи тар реу. Уæ уиндæй ирайдзæнæй фæддæд фæндаггони зæрдæ.
Фæсмони æнкъуст ма кæнæ дæ сæр, æрвхуз деденæг.
