Йа дуйней радтæг, дуйней дарæг, не скæнæг, æма не сфæлдесæг,
устур кадгин еу нæ Хуцау, табу дæхецæн. Ковæн æма ди корæн, нæ кувд
дæмæ хуарзæй фегъусæд. Устур Хуцау, берæ хурздзийнæдтæ дæмæ ес, ма
нин æнæнез, æнæмаст æмæ æнæфидбилиз цард исагкаг кæнæ. Нæ царди
доги лæгæн хурз фарнæй ке равардтай, гъе уомæй аци ковæг адæм, уонæн
сæ бийнонтæ, сæ уарзон адæм, не гас Иристон дæр устур хайгин æма
хаиргин куд уонцæ, гъеци фарнæ ма нин амонд балæвар кæнæ.
Хуцауи устур лæвар дон бæрзондæй райдайуй, ниллæги уалдæнги
цæуй, ма си ка ци хупп искæна, е æ бауæрæн адгин куд уа, æнæнези хуаллаг
ин куд уа, уæхæн амонд нин Хуцау исаккаг кæнæд.
Дуйне скæнæг Цитгин еунæг Хуцау! Хестæрæй, кæстæрæй,
силгоймагæй, нæлгомймагæй Дæбæл нæхе фæдзæхсæн, æма нæ Дæ
хуарзæнхæ уæд! Де сконд изæдтæ ма идаугутæ нин агъазгæнæг уæнтæ!
Йа бæрзонди бадæг, тæхгæ-нæргæ сугъзæрийнæ Уасгерги,
байрагæгæй бæх кæнæг ка й, биццеуæй ба лæг, нæхе дæбæл фæдзæхсæн. Нæ
рахес фæрсти цæуæг уо. Нæ царди фæндæгтæбæл нин багъæуаги сахатти
алкæддæр æнхусгæнæг куд уай, еци хурздзийнадæ нин исаккаг кæнæ!
Хуцауæй Иристони адæммæ, адæмæй ба хуцаумæ – дууердæмæ минæвар
дæ, уæлæрвтæмæ дин фæндаг уæгъдæй, ма нæ Хуцауи ауодундзийнадæй
хайгин кæнæ!
Лезгори Никкола! Мах дæ ковæг адæм! Нæ бæлццæнттæ де уазæг!
Арв æма зæнхæ кæрæдзей куд бауарзонцæ, еци хурздзийнадæ нæбæл дæ
фæрци æрцæуæд.
Фонси Фæлвæра! Дæ ковæг адæмæн сæ фонс куд ивулонцæ, ивулд
фонсмæ ба Тотури сирдти ком баст куд уа, еци хуарздзийнадæ нин
балæвар кæнæ!
Мадæ Майрæн æма Задæлески Нана! Нæ сувæллæнтти уæбæл
фæдзæхсæн! Хуцау æма сумах фæрци зинтæй гъæуайгонд уæнтæ!
Сæрæгас, æвидбилиз æмæ игъæлдзæгæй сæ хестæрти фæндон ирæзæнтæ!
Рохс Алаурди! Табу дæхецæн. Нæ сувæллæнтти де зæлу дусæй
радауæ, дæ фæлмæн зæрдæ сæмæ бадарæ, цæрдæг æмæ сæ иуæндæгæй
бацарæ! Хонсари мæнæуæй дин къеретæ кæндзинан, æвзаргæ хуарæй дин
бæгæни фиццинан, боргъос уæриккитæ дин нивондæн хæсдзинан. Хæстæг
нæмæ ма рбацо, де ргом нæмæ ма рбаздахæ , дæ къилдунæн дин ковдзинан,
уотемæй дин табу, Рохс Алаурди!!
Нæ фидбилизтæ сорæг, еминæ исафæг Идауæг! Нæ гъæутæн
тухгæнæг куд нæ уа, нæ адæм ба сæрæгас, æнæнез æма æвидбилиз цард куд
кæнонцæ, уæхæн амонд син радтæ!
Тъаранджелоз, Мукалгабуртæ, Реком, Тæтæртуппи дзиуарæ,
Мæстиноки Елиа! Фæрæскъæтти Зæппази дзиуæрттæ! Сонгути изæдтæ,
Хæнæзи Уацелла! Донифарси рæхис!
Багъайти Дзиуарæ, Дигори Изæд, Гæлиати Фæрон! Авд дзиуари!
Мæхчески Къубуси дзиуарттæ, Уæхъæци Фарни фурт Узунæг! Стулий
дзиуарæ, Гулæри Габонæ, Дзинагъай Реком, Билæги Уорс Елиа! Фæснæли
Нæлизæд! Хъалнæхти Туххуæстæг!
Нæхе уæбæл фæдзæхсæн. Зинтæй нæ багъæуай кæнтæ, соназарæй нæ бахезетæ!
Нæ гъæубæстæ нæлгомаг гъæуагæ куд некæд исуа, хуарздзийнæдтæй хайгин куд уа, фидбилизтæй ба
хизт, уотемæй нин исони рæсугъд æма гъæздугдæр цард исаккаг кæнтæ!
Нæ дуйней сабур куд уа, нæ рæстæг ба хуарз куд рахæсса, фуд
æртæх æма фуддумгæй гъæуайгонд куд уæн, нæ гъæубæстæ æрдзон
фидбилиз æма бæллæхтæй хизт куд уа, фæскъæвда нин Нари нæртон
Сослани ндурæ нæ цæститæ рæвдауæг куд уа, нæ фæззигон куститæ ба
дзæбæхæй куд бакæнæн, уотемæй нин бæркадгун æма гъæздуг фæззæг
исаккаг кæнтæ!
Уæла Сафа. Ду Хуцаумæ цæуæг дæ. Нæ кувд нин дæ хæццæ
фæххæссæ. Хуарздзийнадæй си махæй ка феронх æй, гъеууой ба дæхуæдæг
бафтауæ, ма й барст æма хцæуæнæй райсун кæнæ.
Ковæг адæм, еугурæй дæр Хуцауи арфи фарнæй хайгин æма хаиргин
уотæ!
"Сурх-Дигора", стр 3-4, Из-во - Полиграфическое предприятие им.В.А. Гассиева, Владикавказ 2021
