Гъæргæнæг
Сау дарæси, сау бæхбæл, лæдзæг дæ галеу къохи, дæ галеу къохи, æнкъард, сагъæсхузæй цæуис гъæунгти. Дæ фæсте тарстхузæй кæсунцæ алли хæдзæрæй дæр. Ка дæбæл фембæлуй, е дæ бафæрсун не ‘ндеуй; хуарз хабæрæй неци зæгъдзæнæ, уой зонунцæ. Хæдзæри рази æрфестæг уис, лæдзæгæй бахуаис колдуар. Дæ рæзмæ рацæуй хæдзæри хецау ‘ма дæмæ сæццæ фæккæсуй тæрхонмæ æнгъæлкæсæгау. Зинæй исзæгъис дæ зæгъуйнаг.
Гъенцунхузæй «рохсаг уæд, æнæхъиамæт уо» дин фæззæгъунцæ, ‘ма идарддæр ракæнис дæ фæндаг.
Адæм æмхузæн нæ есунцæ зæрдæмæ зини хабар: кæмæн уолæфт дæр нæбал фæффæгæ кæнуй ‘ма уомæл цæстæй сæццæ фæккæсуй зæнхæмæ. Ка дин уæзданæй дзуапп раттуй; нæ бавдесуй æ зæрди рист, ка бæрзонд исесуй æ къохтæ ‘ма си æрцæвуй æ уæргутæ. Еуæй-еутæ дин дæ дзурд игъосгæ дæр нæ фæккæнунцæ, са сæр бателунцæ ‘ма баевгъуйунцæ хæдзæрæмæ. Фæууй уæхæнттæ дæр, ‘ма дин дæ фæсте кæсгæ æхе меднимæр фæззæгъуй: « Раги ин мæлгæ адтæй».
Де ‘хæс зин ихæс æй, гъæргæнæг. Тагъд кæнис гъæуæй гъæумæ, хæдзæрæй хæдзæрæмæ. Гъари уа, уазали, хори, уаруни. Æнхæст кæнис дæ зин ихæс.
Цийни фæндæгæй баййевæ дæ фæндаг.
Аргъау хуарз æй
Кæмæ гъæр кæнис, ке агори, тухст фиййау, цæбæл æй дæ катай? Дæ гъæрмæ фустæ сæ сæртæ æнæбари разелунцæ дердæмæ.
Сосæнимæйи, æнхъуæт рæстæг гъæр идардмæ не ‘гъусуй, уæлдайдæр ба урух бæласи аууонæй. Уоми сатæги нимæтбæл дæхе æруадзæ, дæ фустæ некумæ фæлледздзæнцæ; бæласи сифти сир-сирмæ рафунæй уодхæнæ.
Фуни дæ размæ нимæтбæл баддзæнæй сахи рæсугъд кизгæ уорс дарæси ‘ма дин æ фæлмæн къохæй рæвдаудзæнæй дæ сæригъун. Уæ рæзти æ сæр бæрзæндти хæсгæ ледздзæнæй æвзестæсæфтæг æма сугъзæрийнæсикъагин саг. Дæ фур дессæгæй дæ медфун нигъгъæр кæндзæнæ: «Уæртæ аргъауи саг!» ‘Ма фегъал уодзæнæ. Дæ рази нæдæр сахи рæсугъд, нæдæр саг, фал изæри уæнгæ æхсицгон гъудитæ кæндзæнæ дæ фунбæл.
Аргъау хуарз æй: тухст уодбæл базуртæ садзуй.
Хъазахти гоппæгъ
Уалдзигон гъар бон сабийтæ бадтан Ирæфгæрон дорти цæндæбæл ‘ма нæ минкъий къохтæй пурусай æуурцъæг кодтан не стонг ниссæттунмæ тухст анзи. Надбæл фæззиндтæй бæрзонд, рехгун зæронд лæг. Æ уæле цохъа ‘ма буйнаг ходæ. Устур лæдзæгбæл ранцаидæ, уотемæй рæуæг æфсардæй. Нæ рази æрлæудтæй, ‘ма нæмæ усми дæрхци лæмбунæг кастæй. Æ устур, хъоппæгъ цæститæй цæстисугтæ фæууæгъдæнцæ ‘ма æртулдæнцæ рехæмæ.
Куствæллад армæй нин рæвдаугæ æрсæрфтæ нæ сæртæ.
Дзорун не сфæразтæ, уæдта æхе фæззилдта ‘ма тагъд-тагъдæй фæрраст æй æ надбæл. Æ сæр хаста æнахур бæрзонд, ‘ма æ устур цæстити арви цъæх æма мегътæ зиндтæнцæ.
Мах æ фæсте кастан, ‘ма нæ еу баффарста: «Ка ‘й?» - «Хъазахти Гоппæгъ!» - загъта иннæ.
Берæ æнзтæ раевгъудæй уæдæй нурмæ. Гоппæгъ зиннæг нæбал ес. Фал нæ федауй æнæ уомæй хуæнхаг фæндаг. Сабийтæ æнгъæл кæсунцæ æ гъар арми рæвдудмæ Ирмфгæрон.
