ХЪУЛЧИТИ МАКСИМ
Киндзӕхсӕвӕр
Дууа уарзгӕ ӕвзонг уодӕнТагътдӕр исеу уӕд сӕ цард.
Кӕрӕдзей къохӕй уаргъ есгӕй
Сӕ фӕндаг цӕудзӕй идард.
Уомӕ гасгӕ кадгин адӕм
Зундӕй федар, дзурдӕй раст,
Ӕрвист цудӕнцӕ минӕвар
Цӕмӕй конд ӕрцӕуа гъазт.
Минӕвӕрттӕн сӕ кӕронбаст
Уотемӕй уидӕ хуӕрзконд.
Ку исесионцæ муггагмӕ
Ӕрветӕги ном бӕрзонд.
Еу хатт, кенӕ ба къуар хатти,
Ӕздахтонцӕ минӕвар.
Кӕми ба син ӕнӕфсӕрмӕй
Нӕ байгом кӕнионцӕ дуар.
Фал уаддӕр гъазт уомӕн хуннуй
Фарстабæл ном дзуапп дӕттуй.
Алке дӕр амонд агоруй,
Алке дӕр цӕрун фӕндуй.
Дзæвгара раздӕр шинхбӕстӕн
Раргом кӕнионцӕ гъуддаг.
Киндзӕхсӕварма дардтонцӕ
Къуар анзи хӕрст косӕрттаг.
Ечи рохс бонмӕ ӕнгъӕлдзау
Цудӕй рӕстӕг игъӕлдзӕг.
Зелӕн гӕнӕг нӕ ихуӕрстан
Шинх ӕзмалдӕнцӕ цӕрдӕг.
Хонгутӕ алкӕд цудӕнцӕ
Фестӕгӕй, кенӕ бӕхбӕл.
Цинадзийнадӕ ивулдӕй
Хæдзари номӕй гъӕубӕл.
Минкъий дӕр уӕд ӕртӕ бони
Киндзӕхсӕвæри ӕгъдау
Цудӕй бундорон хӕдзари
Некӕмӕ кастӕй уӕззау.
Нур не 'гъдау ӕхе райивта
Ӕндӕр хузи иссӕй каст.
Исӕфуй цума нӕ фарнӕ,
Ке ӕгъдаубӕл гъазан Гъазт?
Нӕбал игъусуй тургъитӕй
Фӕндури цагъд, рӕсугъд кувд.
Тургъитӕн айдӕгъ байзадӕй
Зиани ӕгъдау, зиани кувд.
Нӕ чийнӕ еуварс рахастан
Фӕрзеу еуварс рарвистан.
Ӕнцондӕр цард агорӕгӕй
Цума нæхе ралгъистан…
Ку нейгъуса даргъ фингӕбӕл
Закъӕгун хестӕрти кувд,
Кӕцӕй райсдзӕнӕй фӕсевӕд
Царди фӕндагмӕ раст зунд?
Чи бауодзӕнцӕ кӕстӕртӕ?
Куд араздзӕнцӕ сӕ цард?
Ку нӕ дзоронцæ хестӕртæ
Кӕми урдуг, кӕми хард.
Дессагӕн цума чи' рцудӕй,
Цӕмӕ рахуӕстан къӕхтӕй?
Кумӕ зелдзӕнцӕ фӕндӕгтӕ
Алчи ку еран цӕттӕй?
Цӕттӕй ку уонцӕ къеретӕ,
Цӕттӕй ку уа косӕрттаг,
Нӕбал гъӕудзӕнцӕ ӕфсинттӕ!
Цæмæн ма гъæудзæй синхаг?
Ӕвдесӕнтӕ ку нӕбал уа,
Арт хуарунбӕл, къох дӕтгӕй,
Куд баагордзиан ӕгъдауттӕ
Фӕлмӕн базуг кӕстӕртӕй?
Кутемӕй гъӕуама уонцӕ
Кӕрӕдзебӕл федар баст,
Кӕд киндзӕхсӕвар нӕбал ес
Æгъдаубӕл нӕбал ес Гъазт.
На заставке рисунок Махарбека Туганова "свадебный обряд у осетин"
