МАМУКЪАТИ КАЗБЕК
***
Уардта, уардта къибилатӕй,
Иссайтан ӕй тӕдзунӕг,
Тегътӕ-тегътӕ фӕццӕйуадӕй
Бӕгъӕнбадӕй мӕгур лӕг.
Кӕд, мӕгуртӕг, курмӕ адтӕй,
Дунгӕ ‘й размӕ ӕнсундта,
Кӕцӕй уадӕй, кумӕ уадӕй,
Ӕхуӕдӕг дӕр нӕ зудта.
Кӕд ӕ тарсти исковидӕ:
«Ба мӕ ергъӕвӕ, Хуцау!» –
Кӕдимайди рахор уидӕ,
Исесидӕ арв ӕ сау.
26.12.2024
***
РАЕВГЪУДӔНЦӔ АФӔНТТӔ
Не ‘вӕзуй бон, синдзау не ‘здухсуй,Дунгау – ӕ цуд, артау – ӕ догъ,
Ӕ гъӕр дӕлмагурмӕ* не ‘гъусуй,
Хъурдох исуй ин ӕндӕуогъ**.
Истуй уӕларв мӕййи кӕфойнӕ,
Ӕ рохс уӕлтегътӕ рӕдзӕхсуй,
Инсуй гъенцъунтӕ нӕ куройнӕ,
Ӕ зар дӕлпернӕй игъусуй.
Къере уӕлкъӕйӕ ниффесард*** ӕй,
Кӕстӕр е ‘стонги ма кӕуа, –
Цӕку фесхъиудтӕй цӕхӕр-артӕй,
Инсунцӕ фидтӕ къӕлӕуа.
Инста ‘й куройни фидимадӕ,
Дессаг – ӕ фунх, хуӕздӕр – ӕ хом,
Ӕдта ци ‘рвон адтӕй йӕ адӕ,
Ӕдта ӕ хъарӕ – ци зӕнхон!..
Нур раевгъудӕнцӕ афӕнттӕ,
Иссӕй донарӕх кадавар,
На, нӕбал инсунцӕ курӕнттӕ,
На, нӕбал игъусуй сӕ зар...
19.12.2024
* Дӕлмагуртӕ – преисподняя.
** Ӕндӕуогъ – противник, соперник.
*** Фесард – жареный
