АДÆМОН ГЪӔЗТИТÆ
Адӕмон гъӕзтитӕ цӕмӕдессаг ӕнцӕ. Уомӕн ӕма ӕвдесунце адӕмихатти хецӕн минеугутӕ. Гъӕзтити фӕрци фӕсевӕд исахур унцӕ цурддзийнадӕбӕл, тухгиндӕр ӕма циргъзунддӕр кæнунцӕ. Базонунцӕ тохӕн дзаумайæй пайда кӕнун, бӕхбӕл бадун ӕма иннӕ уӕхӕн арӕхстдзийнӕдтӕ, кæцитӕ хъæбæр гъӕунцӕ царди медӕгӕ. Дигорӕмӕ адӕмон гъӕзтитӕ фӕззиндтӕнца хъӕбӕр раги,- адӕмӕн ӕхе хӕццӕ ӕма ма абони уӕнгӕ дӕр ахсгиаг бунат ахӕссунцӕ нӕ царди. Этногрӕфтӕ ку фӕффинсунцæ бæрæгбӕнтти туххӕй, уӕд зартӕ, кӕфтитӕ, фингитӕ æма æндӕр гъуддӕгти хӕццӕ ма фӕккӕнунцӕ еристи кой дӕр.
Зæгъæн, зйани ӕгъдӕуттӕ кӕнгӕй, догъ уагътонцӕ рамӕлӕги кадæн. Догъ уидӕ фӕйнӕхузти. Иридогъ худтонцӕ «хъозонтӕ». Марди дзаумӕттӕбӕл исаразиуонцӕ раст ӕхсунбӕл еристӕ - «хъабагъ».
Адӕмон гъӕзтитӕ ӕвдесунцӕ фӕдӕй-фӕдмӕ куд ӕййевгæ цудӕнцӕ дзими царди *ахастдзийнӕдтӕ, сæ куст ӕма сæ уавӕртӕ. Ци хузи гъӕзтитӕ ӕма еристӕ адтӕй нӕ адӕммӕ, уой туххӕн ба нин хъӕбӕр гъӕздуг ӕрмӕг дӕдтунцӕ Нарти кадæнгитӕ: саздахъӕй ӕхсун; бунити хуӕцун; догъи уайун; гӕпп кæнун; хонхи цъопмӕ хезун; дор ӕхсун; бӕндӕн ивазун; зӕнхи къуӕрд цӕгиндзӕбӕл бурун; уӕззӕуттӕ хӕрдмӕ есун ӕма хӕссун; бӕхбӕл бадун; бӕхбӕл догъи уайгӕй, дӕсниадӕ ӕма цурддзийнадӕ ӕвдесун ӕма ӕнд.
Пфафф финсуй: «Праздники имели большое значение. На них происходило что-то вроде Олимпийских игр, бывали состязания в верховой езде, кулачном бою, стрельбе, танцах, песнях и т. д.»
Гъæзтити хузӕ ӕма гъуди ӕййивта, дзилли царди уавæртæ куд æййевгæ цудæнцæ, уотæ. Нæ адæмон гъӕзтитæ ахургæнгæй, мах æрцудан уæхæн хатдзæгмæ:: дех кæнунцæ зуймон, сæрддон æма уалдзигон гъӕзтитӕбæл. Алли анзи афонæн дæр адтæй бæлвурд гъӕзтитӕ. Иристони кӕмтти адтæй берæ ӕмхузӕн гьæзтитӕ, фал си хецӕнхузи гъӕзтитæн дæр æнæун на 'дтæй. Сӕрмагондӕй мæ зæгъун фӕндуй Дигори туххӕй. Уоми адтæй берӕ гъӕзтитæ, кӕцити кодтонцӕ айдӕгъдӕр дигорон сувӕллӕнттæ.
Дигорон суыæллæнтти гъӕзтити туххӕй радзоруни размӕ бал бафеппайун гъæуй еу гъуддаг: Иристони адтӕй «гъӕууон» æма «еумӕйаг гъӕууон» гъазӕн фӕзтӕ. Сӕ нисанмӕ гӕсгæ сæ исхонун ӕнгъезуй стадионтӕ. Етӕ фӕззиндтӕнцӕ недзаманти. Уæллагири коми фӕзӕ ивӕрд адтӕй Нари фалдзос. Хунгӕ бакодта «Поты фӕз». Ӕ итигъдадӕ адтӕй гектари цуппӕрӕнхаййи бӕрцӕ. Бади гъӕуи рӕбун ба - ӕндӕр фӕзӕ «Зилахар». Дигоргоми ба еу гъазӕн фӕзӕ адтӕй «Мадзасгӕ», иннӕ ба - Мӕцути фӕзи. Иристони еумӕйаг стадион адтæй Дайрани коми Къобий гъæуи рӕбун. Ӕмбесонд дæр ма ку ес: «Къоби фӕзи бæрæг уодзæнæй».
Дигори фулдӕр ӕргон ӕздахтонцӕ тугъдон гъӕзтитӕмӕ. Етæ цæттæ кодтонцӕ ӕвзонг лӕхъуӕнти ӕцӕг тугъдон исунмӕ: бӕхбӕл хуарз бадун, уайгӕ-уайгӕй раст ӕхсун ӕма бӕхӕй рагӕпп ласун, лӕуирдӕй догъгӕнгӕй ести дзаума зӕнхӕй фелвасун, ӕхсаргард ӕма хъӕмайӕй арӕхсун, ӕнӕ ‘рӕстӕфтӕй нихлӕууӕгмӕ багъузун, къӕдзӕхтӕбӕл цурдӕй уайун, бунæттæ хуарз зонун, нӕмунмӕ дæсни ун, нихмӕлӕууӕгбӕл ӕд тохӕндзаума ӕма ӕнӕтохӕндзаумайæй фæууӕлахез ун.
Гарданти Михал мин куд дзурдта 1950-аг анзи, уотемӕй фӕстаг рӕстӕгути дигорӕнтти гъазӕн фӕзӕ адтӕй Дзӕгъеппарзи.
Нæ фиддӕлтæмӕ, тӕрсагӕ, мӕлдзой, ӕ рист римӕхсун ке бон нӕ уидӕ, уони нимадтонцӕ ӕгадӕбӕл. Гъӕзтитӕ устур пайда лӕвардтонцӕ дуйне, уӕдта адӕми ӕгъдӕуттӕ ӕма традицитæ зонунӕн. Еугур листӕг фарстатӕбӕл ами нӕ дзорун, уомӕн æма «Ир»-и рауагъдади 1956-аг ӕма 1980-аг анзти уагъд ӕрцудӕй киунугӕ - «Осетинские национальные игры». Уомӕ гӕсгӕ ӕркӕсӕн еу къуар гъазтемӕ, кӕцити кодтонцӕ ӕрмӕстдӕр дигорон биццеутӕ ма кизгуттӕ.
Кӕронбӕттӕни ма мӕ зӕгъун фӕндуй: Дигоргом æма Дигори сувӕллӕнтти гъӕзтитӕ ӕнцӕ берӕ ӕма фӕйнæхузти. Ӕрмæст сӕ фулдӕр ахургонд ӕма финст не 'рцудæнцæ, гъӕугӕ ба ӕхсицгӕ кӕнунцӕ ирӕзгӕ сувӕллӕнтти, уӕдта адæми ӕгъдӕуттӕ, истори, этнографи ӕма культурӕ базонунмæ.
Гагити Сергей,
доцент.
