Журнал "Ирæф"-и сӕйраг редактор
Малити Васомæ
Айфиццаг журнал "Ирӕф"-и бакастӕн Джусойти Нафий ӕрмӕг Багъӕрати Созури юбилейи фӕдбӕл ӕма хъӕбӕр ӕхцӕуӕн адтӕй, уӕхӕн устур лӕгти ке нæ иронх кӕнетæ, се сфӕлдистадӕн син аккаг аргъ ке кæнетӕ, е. Уӕлдай ӕхцӕуӕндӕр ба мин уомӕн адтӕй æма Созури сфӕлдистадӕн мах бийнонтӕ кӕддӕриддӕр котонцӕ устур аргъ.
«Багъӕрати Созури ӕмдзӕвгити ӕмбурдгонд "Зӕрди дуар" налхъут - налмасау ӕрттевуй ирон советон поэзий", финста Тазе. Уомӕ гӕсгӕ ба мин хъӕбӕр гъулӕг ӕнцӕ: "Тазе ӕхецӕн бабарӕ кодта поэти дугкаг ӕма æртигкаг ӕмдзӕвгити ӕмбурдгӕндтӕ исаразун", - зæгъгӕ, уӕхӕн ӕнӕрагъудигонд рӕнгъитӕ кӕсун. Æви æрмӕги автор, уӕдта журнали сӕйраг редактор нæ зонунцӕ 37-40-аг ӕнзти дигорон ӕвзагбӕл литературæ æнцон уадзӕн адтӕй ӕви зин, уой. Æви си феронх ӕй 1963 анзи 10 июли ирон ӕвзаги туххӕн ци конференци арæзт ӕрцудӕй, уоми дигорон ӕвзагбӕл бунтондӕр къæхтӕй ке рахуӕстӕнцæ, ке 'й ниххорх кодтонцæ, е.
Еци конференций ӕрмӕгутӕ ӕвӕрд ӕнцӕ ССР Цæдеси Наукити Академий архиви. Ф-676 оп.I N925. Дигорон ӕвзаги туххӕн конференций ци унаффӕ хаст цудӕй, уой Тазе растбӕл нӕ нимадта ӕма финстӕг ниффинста газет "Правдӕ"- мӕ, уордигӕй ба ӕрвист цудӕй нӕуӕг алфавити Еугурцӕдесон комитетмæ. Нигки дӕр ма берӕ ӕндӕр ӕрмӕгутӕ ес, дигорон ӕвзаги фарс кӕми дзурдта Бесати Тазе, уӕхӕнттӕ ӕ архиви.
Кенӕ ӕрхӕсдзинан мӕнӕ ауӕхӕн дӕнцӕг. Тазе ниффинста финстӕг Цӕгат Кавкази адӕмихӕттити литературон ӕвзӕгти райрӕзти фарстати фӕдбӕл наукон конференций Президиуммӕ. Ӕма ин дзуапп лæвæрд æрцудæй уӕхӕн хузи: (Хӕссӕн ӕй уруссагау). "В настоящее время создавать художественную и учебно-методическую литературу на дигорском диалекте нецелесообразно". Гъе уӕхӕн уавӕрти, дигорон ӕвзагмæ уӕхӕн цӕстингаси ба Тазе ӕхемӕ райста, устур классикбӕл ке нимадта, е 'сфӕлистадӕн устур аргъ ци Созурӕн кодта, уой ӕмдзӕвгити ӕмбурдгонд мухури рауадзуни ихӕс.
Автор Бесати Тазей фудгин кӕнуй, Созури 2-аг ӕмбурдгондмӕ 13 ӕмдзӕвги ке нӕ бахаста, уой туххӕн. Ома, дан: "Бесаев написал начальству (?) письмо, в котором считает некоторые вещи непригодными к печати, не имеющие особой художественной ценности, а многие из них являются вредными".
Фал уӕхӕн финстӕг ку хӕссай дӕнцӕгӕн, уӕд фиццагидӕр гъӕуама архивон ӕрмӕгутӕбӕл ӕнцойнæ кӕнай. Цума кӕми ӕй еци пъисмо?
Иннемӕй ба киунугӕаразӕг ӕ размӕ ести сӕрмагонд ихӕс ӕрӕвӕруй, цидӕр уагӕбӕл фенцойнӕ кӕнуй. Уӕдта еугур ӕмдзӕвгитӕмӕ алке ӕмхузон цӕстингас нӕ фӕддаруй. Нафий ӕрмӕги дӕнцӕгтӕн хаст цӕунцæ Созури пъисмотӕ Къосирати Сӕрмӕтмӕ: "Æз ке уарзтон, уæхӕн финститӕй байзадӕй берӕ ӕма кӕд нæ цӕунцæ, уæд мин сӕ фӕстӕмӕ радтетӕ. Уотæ сæ ку уорамайтӕ, уӕд мӕ уӕгӕ мӕлуй". Ӕма нур ба уой туххӕн Кьосирати Сӕрмӕтмӕ ӕнӕмӕнгӕ гъӕуама уайдзӕфтӕ хӕссæн, уома Созури еугур финститӕ мухури ке нæ рауагъта.
Фал Бесати Тазе ба Созури цалдӕр ӕмдзӕвги ке нæ бахаста ӕмбурдгондмӕ, уой туххӕн автор зæгъуй: "Тазе Бесати поэти ӕппундӕр нӕ лӕдӕрдтӕй". (Гъӕуйдӕр-ма дӕ, уæхӕн уайдзӕф лӕги рази ӕрӕвӕрӕ). Ай-айдӕр Тазе сраст кодта Созури мӕнӕ аци рæнгъæ: "Зарæ, ирон, абони бон"... уомӕн ӕма ӕхе срастгонд рӕсугъддӕр ӕма тухгиндæрбӕл нимадта, фал ин ӕй еци рæстæги цензурæ ци хузи рауагътайдæ.
Цума автор еци рӕстӕги уавӕр нӕ зонуй? Махмӕ гæсгӕ ӕгӕрдӕр лӕдӕруй. Фал ин еухатт дӕр ма фадуат фæцӕй Тазебӕл цъифкалӕн бакӕнунӕн.
Уогӕ зин балӕдӕрӕн ӕй, еци ӕрмӕги Созури сфӕлдистадӕ раертасуни туххӕн фулдӕр финст ес, ӕви Бесай-фурти нихмӕ хатдзӕгтӕ скӕнуни фӕдбӕл, е.
Ke зӕгъун ӕй гъӕуй, абони аллихузи хатдзӕгтӕ кæнун дӕр ӕмбӕлуй, уомӕн ӕма алци финсун дӕр æнгъезуй. Фал уӕдта дигорон ӕвзагбӕл финститӕ мухури рауадзуни гъуддаги ба кӕмидӕрти цидӕр ӕндӕр фӕззелӕнтӕ агорунтӕ гъудӕй ӕма уой Созури бийнонтӕ сӕхуӕдтӕ дӕр хуарз лӕдӕрдтӕнцӕ. Æз мæхуӕдӕг ӕвдесӕн дӕн, Тазе Созурӕн ци ӕмбурдгонд бацӕттӕ кодта, уобӕл ӕ бийнойнаг, ӕ кизгӕ ӕма ӕ сиахс куд цийнӕ кодтонцӕ, уомӕн. Етӕ хуарз лӕдӕрдтӕнцӕ, уæлдӕр ранимад анхосӕгтӕмӕ гӕсгӕ куд зин рауадзæн ӕй дигорон ӕвзагбӕл киунугӕ, уой ӕма хъæбæр лигъстӕ кодтонцӕ, цӕмӕй уӕддӕр ести хузи рохс фæууидтайдӕ. Еугур еци гъуддӕгутӕ нецӕмӕ даргӕй уæддӕр Нафи ба цъифтӕ калуй Тазебӕл. Ӕвӕдзи ин уотӕ ӕнцондæр æй, уомӕн ӕма мӕрдти бон дзуапп радтун нӕбал фӕууй.
Бесати Заретӕ,
Тазей бийнойнаг
