Агънаты Æхсар
ДЗЫРД «ФАРН»-Ы ИСТОРИ
Ирон ӕмӕ дыгурон адӕммӕ дзырд фарн тынг кадджын у. Цыдӕриддӕр ирон ӕмӕ дыгурон дзырдуӕттӕ мыхуырӕй рацыди, уыдоны сеппӕты дӕр ис дзырд фарн. Раст зӕгъын хъӕуы, дзырдуӕттӕ аразджытæ дзырды семантикон мидис ӕмбарын кодтой алыхуызон. Зӕгъӕм, Ирон-уырыссаг дзырдуат (Мӕскуыйы рауагъд 1952 азы) мӕнӕ афтӕ амоны фарн-ы мидис: 1) мир, спокойствие; фарн, ацы хӕдзары! мир этому дому! (приветствие); 2) обилие; 3) счастье.
Абайты Васо 1949 азы фыста? «Для религиозного состояния ранних общественных форм характерно, что между культовым и бытовым нет непроходимой пропасти, одно незаметно переходит в другое. В языке на этой стадии бывают слова, относительно которых трудно решить, следует ли относить их к культовой или бытовой лексике. В осетинском есть целый ряд таких слов понятий: фарн, ӕхсар (хсарт), ард арфӕ, уац. В силу своеобразной семантической структуры, слова этого типа с трудом поддаются точному переводу.
Фарн - это высшее благо мирного времени.
Æхсар - это высшая доблесть во время войны.
Мир, тишина, благополучие, преуспевание, благопристойность и многое другое - все это покрывается понятием фарн.
Сила, мощь, отвага, победа, подвиг - все это входит в понятие ӕхсар (ОЯФ).
Абайты Васо дзырд фарн иртасгӕйӕ ӕрцыд ахӕм хъуыдымӕ, зæгъгæ, на рагон фыдӕлтӕ фарн-ы мидис бастой арв ӕмӕ хуры хæрзиуджытимӕ, ома фарн адӕмӕн хаста уӕларвы ‘мӕ хуры aхорзæхтæ.
Астӕуккаг ӕнусты ирон адæмы хӕрз фыдӕлтӕ алантӕ тӕтӕр-манголы къухтӕй ӕбуалгъ цагъд куы ‘рцыдысты, уæд ма сӕ чи аззад, уыдон сӕ сӕртӕ бафснæйдтой хӕхты. Зын уавӕрты цӕргӕйӕ ӕвгъау нӕ кодтой сӕ мӕгуыр къӕбæртæ Хуыцӕуттӕн, Уастырджийӕн, зӕдтӕн, дауджытӕн, куывтой сæм иудадзыг.
Уæлдай арæхдæр сæм уыди фарны кой. Уæд фарн-ы рагон миниуджытӕм бахастой, цӕмӕ бӕллыдысты, ахæмтæ, афтæмæй ирон ӕмӕ дыгурон ӕвзӕгты фӕзындысты фарн-имæ баст ног лексемӕтӕ ӕмӕ дзырдбӕстытӕ. Зӕгъӕм, фæрныг. Афтӕ ирон адӕм хуыдтой æмæ ныр дӕр хонынц цæрын чи фæразы, ахæм бинонты, ома фарнæй цух чи нæу, уыдон. Адæймаджы кӕнӕ бинонты хуыдтой фӕрнджын. Уӕдӕ фӕрнӕйдзаг цы амоны, уый алчидӕр ӕмбары. Ирон адӕмы уарзон хъæбул Къоста бӕллыди: «Адӕмы фарнæй куы скӕнин мӕхицӕн кад æмæ сæр!»
Ирон адæммæ баззад ахæм базырджын ныхæстæ: «Фарн уæ ныхасы!» «Дӕ фарн, дӕ зӕды стӕн», «Бон цӕуы æмæ фарн хӕссы». «Фарн фӕцӕуы!» Афтӕ фӕхъӕр кӕны къухылхӕцӕг, чындзы хӕдзармӕ куы фӕкӕны, уӕд. Ныр ӕркӕсӕм фарн-ы историмӕ. Зынгӕ иранист Б. А. Литвинский 1968 азы Душанбейы ныммыхуыр кодта фарн-ы тыххай сӕрмагонд монографи. Б. А. Литвинский куыд зӕгъы, афтӕмай рагон ирайнаг фарн хъуысти гъварнагъ ӕмӕ фыццагдӕр фыстыты фӕзынд нӕ эрӕйы агъоммӕ VIII ӕнусы ассириаг цуркæнгæс фысты. Авестӕйы та фыст ӕрцыди дыууæ фонетикон хуызы: хварэно ӕмӕ хварэнаргъ. Рагон персайнаг ахеменидаг ӕмӕ эдамаг фыстыты ӕмбӕлы мӕнӕ ахӕм хуызы: фарнагъ. Фарн-ы рагон мидис раиртасыныл архайдтой бирӕ стыр ахуыргӕндтӕ. Зӕгъӕм: Х. Бартоломэ, К. Гельднер, Х. Рейхельт, Г. Ломмель, Х. Нюберг, Е. Бенвенист, К. Тревер ӕмӕ бирæ ӕндӕртӕ. Фӕлӕ Литвинскийы ныхасмӕ гӕсгӕ фарн-ы мидис академик Абайты Васойӕ хуыздар раргом кæнын никæй къухы бафтыди. Васо зӕгъы, рагон ирайнаг адӕмтӕ дам иууылдæр куывтой фарнмӕ. Согдаг адæм дæр æй ирон адæмы хуызæн дзырдтой фарн (ф р н, п р н), амыдта уӕлахиз, адӕмы хорзæх. Дыгуронау дӕр хъуысы согдтӕ йӕ куыд дзырдтой, афтӕ – д и н и ф а р н.
Иуæй-иу ахуыргӕндтӕ рагон тохараг ӕвзаг иу кæнынц дыгурон ӕвзагимæ, уымæй дæр йӕ ныхасыздӕхт А Г Н И. Уыцы диалекты фарн хъуысти парн кӕнӕ пгъарра, стæй дам фарн цыди мæйы Хуыцаумӕ.
Рагон ирайнаг гъварнагъ, мидиаг ӕвзаджы хъуыст фарнагъ, стæй милийæгтæм уыди лæджы ном Артафарна. Фарна баззад нырыккон персайнаг (фарси) ӕмӕ таджикаг ӕвзӕгты, хъуысы фарр, амоны блеск, великолепие, пышность? (Таджикско-русский словарь).
Скифтӕ ’мӕ сӕрмӕттæ арæх ӕвæрдтой, фарн кӕм уыд, ахӕм нæмттӕ фылдӕр, нӕлгоймӕгтыл. Зӕгъӕм: Фарнаг, Фарнаккшатра, Хуфарн (ныртӕккӕ йæ зæгъиккам Хорзфарн), Сайтафарна, ахæм нӕмттӕ 15 фылдæр ссардæуыд фыстӕй Сау денджызы цæгат былгӕрӕтты. Алантӕй баззад ирон Нарты кадджыты лæджы ном Бурӕ-фӕрныг, дыгуронау хъуысы Борӕ-фӕрнуг.
Ирон рагондӕр мыггӕгтӕй иу у Фӕрниатӕ. Планетӕ Венерӕйы нæ рагон фыдӕлтӕ схуыдтой Бонвӕрнон, арӕзт у ахӕм дзырдтæй: бон - фарн-он, ома боны фарн хӕссӕг.
Дыгурмӕ цуанӕтты ӕвзаджы фарн-ы мидис амоны хур, дыгур ӕй дзурынц фарнӕ.
Казахтӕ, хъыргъызтӕ, узбектӕ, туркментӕ ирайнаг адӕмтӕй не сты, уыдон тюркаг адӕмтӕ сты. Раджы заманты уыцы бæстӕты цардысты хурыскӕсӕйнаг ирайнаг адӕмтӕ массагеттӕ, сактӕ, согдæтæ 'мӕ хорезмӕгтӕ. Уыдонæй баззад бирӕ алыхуызон материалон ӕрмӕг, стæй топонимикӕ.
Ам ӕркӕсдзыстӕм ӕрмӕстдӕр иу рагон ирайнаг уырнындзинадмӕ: нӕл фыс (фыр) уыди баст фарнимӕ. Фарнӕн нывонд кодтой хӕрзхаст фыр. Рагон китайаг историон хроникӕтӕ куыд хъусын кæнынц, афтæмæй Астӕуккаг Азийы хицӕутты къӕлӕтджын бандӕттӕ арӕзт уыдысты сыгъзӕрин фыры сыкъатау. Рагон Пенджикенты агъуыстыты къултыл баззадысты нывӕфтыдтӕ: паддзахы бадӕн дыууӕрдыгӕйдӕр ӕнцой кодта хъæдæй конд дыууӕ стыр сыкъаджын фырыл.
Согдаг адæм æмæ сæ байзæддæгтæ йагнойта ныр дæр ма фарнӕн аразынц куывдтӕ, кусӕрттаг дзы вӕййы хӕрзхаст фыр. Уыцы 'гъдау мӕхи цӕстӕй федтон дыууæ хатты йвгнобтӕм. Таджикистаны, уӕлдайдӕр хӕхты, арӕх сты рагон кувӕндӕттӕ, ныр сӕ хонынц мазартӕ. Уыцы мазарты таджиктæ, йагнобтӕ 'мӕ Памиры иннӕ цӕрджытæ алы аз дæр сӕрды (августы кӕрон) фӕаразынц стыр куывдтӕ. Адӕм уырдæм ӕрбаласынц ӕгасӕй хӕрзхаст нывонд фырытӕ. Мазары цур акӕнынц кусарт, стæй фыры сыкъатӕ сауындзынц къултыл. Фыр барст вæййы фарнӕн, æмæ уырдыгæй рахæссæн ницы вæййы. Кусарты стджытæ дæр самайынц къулырӕбын. Цымӕ уыцы 'гъдау ирон адӕмӕн дӕр хицон нæу?! Ахъуыдыйаг у нæ этнографтæн.
Мӕнмӕ гӕсгæ, ирон фольклорон ныхас «бурӕ нæл фыс» баззади скифты сæрмæтты-аланты 'взагæй. Æвæццæгæн, амонды, фарнæн кувынæн цы тохъыл хастой, ахæм фыр. Куыд федтам, афтæмæй уыцы 'гъдау бæрзонд æвæрд уыд Астæуккаг Азийы ‘мӕ Казахстаны рагон цӕрджытӕ - сактӕм, согдаг ӕма хорезмаг адæмтæм. Ирон адӕммӕ та уыцы ‘гъдау баззад скифтæ, сæрмæттæ 'мӕ алантӕй. Дзырдбаст бурӕ нӕл фыс ирайнаг ӕвзӕгтæй ахицӕнгӕнӕн нӕй, амоны ирон рагон фырн-ы кувинаг (нӕл фыс). Гуыриаты Тамерлан ацы дзырдбаст тыххаст Афтӕмӕй нӕл фыс, хӕрзхаст кӕй уыди, уымæ гæсгæ йæ фæсномыгӕй хуыдтой борӕ (дыгур), бурӕ (ирӕттӕ).
Цыбырæй афтӕ у ирон фарн-ы истори ӕмӕ йӕ барст кусӕрттаг бурæ нӕл фыс.
Литературӕ
1. В. И. Абаев. Осетинский язык и фольклор, І, М.-Л., 1949.
2. Б. А. Литвинский. Кангюско-сарматский фарн (к историко-культурным связям племен южной России и Средней Азии. Издательство «Дониш», Душанбе, 1968.
3. З. Р. Хубецова. Осетинские клятвенные формулы. - Сб. Вопросы осетинского языкознания, том ХХХІІ, Орджоникидзе, 1977, 82 ф.
4. В. И. Абаев. Историко-этимологический словарь осетинского языка том I, М.-Л., 1958, 421-422 ф.
5. Таджикско-русский словарь. Под редакцией М. В. Рахими и Л. В. Успенской, М. 1954, 406-407 ф.
6. Вс. Миллер. Осетинские этюды. Ученые записки императорского московского университета, часть 2, м,, 1882, 252, 264, 269-270 ф.
7. А. М. Беленицкий. Зооморфные троны в изобразительном искусстве Средней Азии. - Известия Отделения общественных наук АН Таджикской ССР, вып. I (28), Душанбе, 1962, 17 ф.
8. Н. Я. Бичурин. Собрание сведений о народах, обитавших в Средней Азии в древние времена, том II, М.-Л., 1950, 274-275, 285, 287.
