Хæмицати Морис
На бæрæгбæнттæ, нæ ковæн бунæттæ
Kуд ӕгас Иристони адӕм, уотӕ Толдзгуни цӕргутӕ дӕр устур разӕнгардӕй исӕмбӕлиуонцӕ анзи дӕргъи аллихузон бӕрӕгбӕнттӕбӕл. Ке зӕгъун ӕй гъӕуй, фиццагидӕр Нӕуӕг анзбӕл. Раздӕр нури рӕстӕги хузӕн равгитӕ на ’дтӕй алли хӕдзари дӕр нӕзи бӕлӕстӕ (елкитӕ) исаразунӕн. Еyeмӕй арӕх на 'дтӕнца нӕ гъӕуи рӕбунти, иннемӕй ба сӕ цӕмӕй исфӕлгонц, исрӕсугъд кодтайуонцӕ, уӕхӕн гъазӕнтӕ дӕр тукӕнтти (гъӕути уӕлдайдӕр) не 'ссирдтайсӕ. Уомӕ гӕсгӕ алли хатт дӕр устур нӕзи бӕласӕ Нӕуӕг анзи хуӕдразмӕ раласиуонцӕ хонхӕй ӕма'й исфӕлгонцӕ кӕниуонцӕ гъӕуи скъолай. Ӕ алфамбулай ба сӕхе ерхӕфсиуонцӕ, фӕгъгъазиуонцӕ айдагъ скъоладзаутӕ нӕ, фал уонӕн сӕ минкъий хуӕртӕ ӕма ӕнсувӕртӕ дӕр. Устур бӕрӕгбон син уидӕ, берӕ рӕстӕг ӕй фӕддариуонцӕ сӕ зӕрдӕбӕл. Ӕнӕуой ба Нӕуӕг анз ралӕууни агъоммӕ изӕри алли бийнонтӕ дӕр исковиуонцӕ ӕртӕ къерей, ӕ равгӕ кӕмӕн уидӕ, етӕ ести косарт дӕр ракӕниуонцӕ, фулдӕр
гогуз, карк, кӕми ба далис дӕр. Хестӕртӕ сæ бийнонтæ, сӕ кӕстӕрти бафӕдзӕхсиуонцӕ Хуцаубӕл, Уасгергибӕл, изӕдтӕ ӕма идаугутӕбӕл, ракориуонцӕ нӕуӕг анзӕй хуарздзийнӕдтӕ, сӕйрагдӕр ӕнӕнез, енӕмаст, ӕнӕфидбилиз куд уонцӕ анзи медӕгӕ, сӕрӕгас...
Уӕдта ма гъуди кӕнун бӕрӕгӕхсӕви агъоммӕ бийнонтӕ сӕ колдуӕртти сӕрмӕ ниссадзиуонцӕ толдзи минкъий къалеутӕ (уоци фӕтки нисанеуӕг абони уӕнгӕ дӕр нӕ зонун). Нӕуӕг анзи фиццаг сӕумӕ ку ралӕууидӕ, уӕдта хӕдзарӕмӕ фиццагдӕр ка рбахизтайдӕ - иуазӕг, синхаг, кенӕ ӕндӕр еске, уӕд гъӕуама ревӕдӕй ма 'рбацудайдӕ. Ӕма фулдӕр согти гъӕбес кенӕ ба листитӕ ӕрбахӕссиуонцӕ, кӕми ба хуари нӕмгутӕ дӕр.
Бӕрӕг кодтонцӕ нӕ гъӕуи Цӕппорсе дӕр (Рождество). Куд уидӕ, ци уидӕ, уой дзӕбӕх нӕбал гъуди кӕнун, минкъий ма адтӕн, фал нӕхемӕ еци бон устур цигони дзаг дзӕрна фунх уидӕ. Ӕма й мах, сувӕллӕнттӕ, ӕхсицгонӕй хуӕрианӕ.
Уӕдмӕ ба ӕрхъӕртидӕ зӕронд Нæуæг анз, уой хӕццӕ ба фӕсевӕди уарзондӕр бӕрæгбӕнттæй сæ еу Басилтӕ. Уой ма гъуди кӕнун ӕрмӕстдӕр, ӕма аллихатт дӕр еци бӕнтти ӕндегӕй уидӕ хъӕбӕр арф мет ӕма уазал рӕстӕг.
Устур разӕнгардӕй ӕмбӕлианӕ советон бӕрӕгбӕнттӕбӕл дӕр 23 Феврали, 8 Мартъий, 1 Майи, уӕлдайдӕр ба Уӕлахези бон - 9 Майбӕл, фӕззӕг ба - Цитгин Октябри революций бон - 7 Ноябрбӕл. Нур етӕ минкъийгай иронхгӕнгӕ цӕунцӕ адӕмӕй, ӕндӕр цӕмӕйдӕрти сӕ байивтонцӕ Уӕрӕсей нӕуӕг цардаразгутӕ, фал ма сӕ хестӕр ӕма астӕуккаг кари адӕм ба не 'ронх кӕнунцӕ, ӕхсицгонӕй сӕ имисунцӕ.
Цитгин адтӕнцӕ нӕ гъӕуи адӕмӕн рагон бӕрӕгбӕнттӕ дӕр. Зӕгъӕн, Дигоргоми еуӕй-еу гъӕутӕй раледзӕг муггӕгутӕмӕ устур цитгин адтӕнцӕ ӕма ӕнцӕ абони дӕр Фацбадӕнтӕ. Фӕббӕрӕг сӕ кӕнунцӕ январи фӕстаг Хуцауӕхсӕви. Тагъати синх ба алли анз дӕр исаразиуонцӕ Габони кувд. Донуордӕг синхӕн ба - фулдӕр Будайтӕ ӕма Бязӕртӕн - сӕ ковӕн бунат уидӕ, Толдзгуни нигулӕнӕрдигӕй хонсари бӕрзонд тегъӕбӕл рагон толдзӕ бӕласи бун (хузи). Мӕхе кӕдӕй гъуди кодтон, уӕдӕй зудтон, еци бӕласӕ, уидтон ӕй алли бон дӕр. Фал рӕстӕг æ куст кӕнуй, базӕрондӕй ӕма ракалдӕй ӕхе гъӕдӕй. Уӕддӕр еци бунат абони ревӕд нӕй, синхи фӕсевӕд уоми ниййаразтонцӕ ӕндӕр бӕласӕ, сӕ цӕрӕнбон берӕ, ӕма ниххуӕстӕй, ниффедарӕй, фӕлгӕсуй гъӕумӕ бӕрзондӕй.
Толдзгунмӕ ку бахъӕртай, уӕд уоми ба паддзахи надӕн ӕ галеуӕрдиги, е дӕр хонсари, ес устур гъӕддаг кӕрдту бӕласӕ. Уобӕл дӕр цӕуй дзӕвгарӕ рӕстӕг тӕккӕ минкъийдӕр, ӕвӕдзи, еу сӕдӕ анзи. Алаурдий бӕласӕ й худтонцӕ синхи уоститӕ, хӕссианӕ имӕ ковуйнӕгтӕ - къеретӕ, къумӕл, бӕгӕни, уидӕ ибӕл ауигъд ракосартгонд фонси хъалхъостӕ дӕр, хузгин лентитӕ. Бӕласи буни исковиуонцӕ сабийти, ирӕзгӕ фӕсевӕди ӕнӕнездзйинади туххӕй. Бӕласӕн ӕ рӕзӕ, гъӕддаг кӕрдтутӕ ба рӕгъӕдӕй хъӕбӕр хуӕрзадӕ уиуонцӕ. Уӕдта еуӕй-еу ӕнзти тухуаст зад уидӕ.
Июни мӕйи уидӕ Елиай бӕрӕгбон. Фиццӕгти ӕй кӕниуонцӕ Толдзгуни скӕсӕнӕрдигӕй раст Хӕмицати Мӕхӕмӕти хӕдзари такка никкомкоммӕ мӕскъи билӕбӕл цъӕх зӕлдӕбӕл. Хуарз ӕй гъуди кӕнун, уиуонцӕ си цӕмӕндӕр ӕрмӕстдӕр силгоймӕгтӕ ӕма мах, сувӕллӕнттӕ. Кӕд ма уӕди доги минкъий биццеу адтӕн, уӕддӕр ӕзини хузӕн мӕ цӕститӕбӕл уайуй, нӕ синхи хестӕр уоститæй сæ еу Хӕмицати Сослани цардимбал - Будтон Далий си куд дессаг, куд рӕсугъд ӕма зӕрдӕмӕдзӕугӕ кувд кӕнидӕ, куд лӕмбунӕг имӕ игъосианӕ, е. Гъӕуккӕгти хӕццӕ ескӕми дзубанди рацӕугӕй, цал ӕма цал хатти багузавӕ кӕнӕн нӕ медастӕу - эхх, уӕди доги Далийи кувдтитӕ ниффинсунӕн абони хузӕн фӕрӕзнитӕ ку адтайдӕ, уӕд ма не 'взаги гъӕздуг медӕггони ци берæ дессаги хӕзнатӕ байзадайдӕ! Фал...
Макӕд маке зӕгъӕд, неци ес, зӕгъгӕ. Дуйне ӕнӕгӕс нӕй. Еу фондз ӕма инсӕй анзей размӕ, ӕвӕдзи, Толдзгуни алли анз дӕр ӕрцӕуидӕ ех. Адӕн истухстӕнцӕ, сӕрдӕ ку ралӕууидӕ, уӕд тӕрсун райдайуонцӕ, ци уодзӕй, куд уодзӕй, нӕ рӕзӕ, на цӕрӕнтӕ бабӕй нин ех ку ниддӕрӕн кӕна, зӕгъгӕ. Ӕма еу уӕхӕни рохсаггаг Тагъати Хадзирӕт - ахургонд, нимад лӕг адтӕй гъӕубӕсти, берӕ ӕнзти фӕккуста гъӕуи скъолай директорӕй - уотӕ бакодта: «Фӕстаг хатт ма кӕд искодтан Елиай кувд?» Ӕцӕгӕйдӕр, уой размӕ цалдӕр анзи уӕхӕн кувд арӕзт не 'рцудӕй. Цӕргутӕ сӕ рӕдуд исраст кӕнуни туххӕй нӕ байаурстонцӕ сæ хъауритӕ, сӕ цийесбӕл, дзӕбӕхӕй, рӕсугъдӕй исаразтонцӕ Елиай кувд, хатир си ракурдтонцӕ, сӕхейбӕл бафӕдзахстонцӕ, фудӕртӕхӕй нӕ бахезӕ, зӕгъгӕ. Уой фӕсте ӕнзти сахуарунтӕ, раст зӕгъгæй, ӕрцӕуидӕ гъӕуи, фал сӕ ех ба ӕстӕн хатт тухсун кодта. Елиай кувд нур дӕр кӕнунцӕ алли анз.
