Гостити Ларисӕ
Историон наукити кандидат
Цитгин ахургонди ӕмдогон
Кокити Саввӕ (Саукуй) — XIX ӕноси кӕрони ӕма ХХ ӕноси райдайӕни ирон культури зундгонд архайӕг, рохситауӕг, гъомбӕлгӕнӕг, Владикавкази реалон училищей ахургӕнӕг (1869-1891 ӕнзти), этнографион ӕрмӕгути автор. Кокити Василий фурт Саввӕ (Саукуй) райгурдӕй 1850 анзи 15 августи Дигоргоми Мӕхчески гъӕуи. Уордӕмӕ ба сӕ бийнонтӕ ӕрбалигъдӕнцӕ Алагири райони Садони гъæуæй. 1852 анзи ба Кокити бийнонтӕ сӕ цӕрӕнбунат раййивтонцӕ, еци анз ци нӕуӕг гъӕу фӕззиндтӕй - Киристонгъӕу, зӕгъгӕ, уордӕмӕ (нуртӕккӕ г. Дигора). 1856 анзӕй фӕстӕмӕ Саввӕ ахур кодта дини-приходи скъолай. 1811-1866 æнзти Владикавкази духовон училищей, 1866-1869 ӕнзти ба - Тифлиси Александри номбӕл ахургӕнгути скъолай.
Уой фӕсте Кокий-фурт куста Владикавкази реалон училищей цӕттӕгӕнӕн къласи ахургӕнӕгӕй (1974 анзи уӕнгӕ Владикавкази реалон прогимнази).
1881 анзи хуарзӕнхӕгонд ӕрцудӕй Сугъдӕг Станислави III къӕпхӕни орденӕй. 1891 анзи ба ин курдиадӕ ниффинсун кодтонцӕ, цӕмӕй ӕ куст ниууагътайдӕ, Сугъдӕг-синоди обер-прокурор К. П. Победоносцевмӕ финстӕг ке ниффинста, Владикавкази ӕртӕкъласон училище пансиони хӕццӕ ӕхгӕд ке ӕрцудӕй, уой туххӕн.
Политикон ӕгъдауӕй ӕй ӕнӕууӕнкгинбӕл ке банимадтонцӕ, уой фӕдбӕл ӕрвист ӕрцудӕй Ташкентмӕ ӕма косун райдӕдта Оренбург-Ташкентти ӕфсӕнвӕндагон Управлений. 1905 анзи революци саст ку ӕрцудӕй, уӕд Саввæ рафтудӕй Ревели губерний сӕйраг горӕт Ревельмӕ (нуртӕкки Таллин). Ами куста вагӕнттӕ аразӕн заводи, 1916 анзи ба ӕ цардӕй рахецӕн ӕй г. Ревели, фал ин ӕ мард ба г. Владикавказмӕ исластонцӕ ӕма 'й уӕлмӕрдти байвардтонцӕ. Гъулӕггагӕн, кӕми ӕвӕрд ӕрцудӕй, уӕдта æ цирт ци рауӕн ӕй, еци бӕрӕггӕнӕнтӕ абони уӕнгӕ дӕр бӕлвурдгонд не 'рцудӕнцӕ.
Дигорон-ирон культурӕ ӕртасунади къабази ци устур архайд бакодта, е комкоммӕ баст ӕй зундгонд уруссаг ахургонд В. Ф. Миллери хӕццӕ. В. Ф. Миллер Иристон бабӕрӕг кодта 1880-1883-аг ӕнзти. Ци ӕхсӕз экспедиций исаразта зундгонд ахургонд, уонӕй дууеми Кокий-фурт адтӕй комкоммӕ архайӕг.
1880 анзи В. Ф. Миллер, Алагири ӕма Дигори кӕмттӕмӕ ци наукон экспедицитӕ исаразта, уони сӕйраг нисан адтӕй ӕвзагзонунадӕн, этнографион ӕма фольклорон ӕрмӕгутӕ ӕрӕнбурд кӕнун ӕ федӕни киунугӕ «Осетинские этюды», зӕгъгæ, уомӕн.
Сомехаг базари В. Ф. Миллер ӕма Кокити Саввӕ балхӕдтонцӕ нимӕт ӕма дувӕтъон къӕсса сӕ уӕзӕгтӕ хӕссунӕн, баслӕхъ, хуӕлцӕ ӕма ранӕхстӕр ӕнцӕ Владикавказæй сӕ идард балций. Салигуӕрдӕни Кокий-фурти курдиадӕмӕ гӕсгӕ цалдӕр бони иуазӕгуати байзадӕнцӕ ӕ хуӕрзхӕстӕг, саугин Гатути Алексеймӕ. Ами ниффинстонцӕ еу цалдӕр фольклорон ӕрмӕги, уӕдта экспедиций архайгутӕ идарддӕр ранӕхстӕр ӕнцӕ Ирон-Тугъдон фӕндагбӕл Алагири коммӕ. Надбӕл устур ахургонд ӕхемӕ финста, бунӕттон цӕргути, сӕ цӕрӕнти ӕма сӕ зӕнхи гӕппӕлтӕй куд пайда кӕнунцӕ, уони туххӕй бӕрӕггӕнӕнтæ.
Дӕллаг Садони В. Ф. Миллер ӕма Кокити Саввӕ ӕхсӕвеуат ӕркодтонцӕ еу хӕдзари. Изӕрӕй ба еу садойнаг кӕрдзуд лӕги дзурдтӕй В. Ф. Миллер ниффинста ӕрмӕгутӕ «Даредзанти тауӕрӕхътӕй». Уой фӕсте, Уӕллаг Садонбӕл рахезгӕй,
Згиди ӕфцӕгбӕл ӕрхизтӕнцӕ Дигоргоммӕ ӕма ӕрфусун кодтонцӕ медком рагондӕр гъӕутӕй еуеми - Къӕмунти.
Сӕ балций Кокий-фурти ихӕс адтӕй, адӕмон сфӕлдистадӕ хуарз ка зудта, уӕхӕн тауӕрӕхъгӕнгутӕ ерун. Сӕ архайд хъӕбӕр берекетгун разиндтӕй. В. Ф. Миллер Дзилихти Григори ӕма Налухъӕй, уӕдта Бозурти Бимболатӕй ниффинста цалдӕр тауӕрӕхъи ӕма аргъауи, уой фӕсте ба сӕ уруссаг ӕвзагмӕ тӕлмацгондӕй ниммухур кодта 1881 анзи ӕ киунугӕ «Осетинские этюды», зӕгъгæ, уоми.
В. Ф. Миллер устур ӕргом здахта археологон циртдзӕвӕнтӕмӕ дӕр. Къӕмунти цори ци зундгонд циртуат ес, уомӕ лӕмбунӕг ӕркӕсгӕй, ахургонд балхӕдта бунӕттон цӕргутӕй цалдӕр дзаумауи, циртуатӕй ист ка ӕрцудӕй, уӕхӕнттӕ. Къӕмунти дууӕ бони фӕууогӕй, бӕлццæнттӕ идарддӕр сӕ над радардтонцӕ Стур-Дигорӕ 'рдӕмӕ. Уордӕмӕ цӕугӕй, ма баздахтӕнцӕ Гӕлиати гъӕумӕ дӕр, уӕдта ӕрхизтӕнцӕ Тъӕпӕн Дигорӕмӕ - Уӕхъӕцӕ ӕма Мӕхческӕмӕ. Уӕхъӕци В. Ф. Миллер ӕма Кокити Саввӕ лӕмбунӕгӕй ӕркӕститӕ кодтонцӕ бунӕттон обӕйттӕмӕ.
Нари бунмӕ бабӕрӕг кодтонцӕ еу обау. Уой бунӕттон цӕргутӕ хонунцӕ «Сослани обау». Устур-Дигори ба Цопанти Айдарухъӕй В. Ф. Миллер ниффинста цалдӕр ӕрмӕги Нарти кӕдӕнгитӕй, Гобети Баде ӕма Хӕмицати Биасланӕй ба ма ниффинста рагон тауӕрӕхътӕ. Еци еугур ӕрмӕг уой фӕсте уруссаг ӕвзагмӕ тӕлмацигондӕй хаст ӕрцудæй «Осетинские этюды», зӕгъгӕ, еци киунуги фиццаг хаймӕ. Тауӕрӕхъгӕнгути хӕццӕ косгӕй, Кокий-фурт В. Ф. Миллерӕн ӕнхус кодта еци кадӕнгитӕ ӕма тауӕрæхътӕ дигоронау финсунӕн. Зундгонд ахургонд финста: «Благодаря К. (господину Кокиеву. — Л. Г.) мне все-таки удалось записать отчетливо довольно много текстов, по которым можно судить о характере дигорского наречия».
Иннӕ бон В. Ф. Миллер ӕма Кокити Саввӕ фӕстӕмӕ ранӕхстӕр ӕнцæ сӕ зӕронд надбӕл Алагири коммӕ. Мӕхчески къанцӕлари ӕрӕхсӕвеуат гӕнгӕй, сӕ над идарддӕр радардтонцӕ Гӕлиатмӕ. Ами марди ӕгъдау равардтонцӕ, раздӕр си ци зӕронд лӕги хӕццӕ базонгӕ ӕнцæ, уомӕн. Еци лӕгӕн ахургӕндти ниццудмӕ ӕ кӕстӕр фурт рамардӕй хъурти незӕй. Садони ӕрӕхсӕвеуат гӕнгæй, дуккаг бон бабӕрӕг кодтонцӕ Нузали ковӕндонӕ, уӕдта ранхӕстӕр ӕнцӕ Рекоми ковӕндонӕмӕ. Еци бон уоми адтӕй, алли анз дӕр ке фӕккӕнунцӕ, уӕхӕн кувд. В. Ф. Миллерӕн ма сауӕнгӕ ковӕндони хурфӕмӕ бацӕун дӕр бантӕстӕй. Фӕстӕдӕр ахургонд лӕмбунӕг ӕрфинста Рекомӕн ӕхе, уӕдта ӕ бӕрæгбони ӕгъдӕуттӕ.
Куддӕр фӕстӕмӕ Владикавказмӕ исӕздахтӕй, уотӕ В. Ф. Миллер бацӕттӕ кодта уацгъуди «Иристони хуӕнхти» ӕма имӕ бахаста, ӕ балций рӕстӕг ци бонуг финста, уой гъудитӕ. 1881 анзи еци ӕрмӕг мухургонд ӕрцудӕй Мӕскуйаг журнал «Русская мысль»-и.
Кокити Савви ӕнхусӕй В. Ф. Миллерӕн бантӕстӕй гъӕздуг фольклорон ӕрмӕг ӕрӕнбурд кӕнун ӕма сӕ киунугӕ «Осетинские этюды»-й фиццаг хаймӕ бахӕссун. Фиццаг хай - «Нарти кадӕнгитӕ» цӕттӕгӕнгӕй, ин В. Ф. Миллер байхӕс кодта, ӕрмӕгути цавд ци муртæбӕл хаудтӕй, уони исбӕлвурд кӕнуни куст. В. Ф. Миллер финста: «...его содействию мы обязаны отчетливым воспроизведением в транскрипции дигорских текстов, которые в нашем собрании впервые являются в печати».
Киунуги дуккаг хаймӕ (аргъӕуттӕ, бунӕттон тауӕрӕхътӕ ӕма зартӕ) ахургонд бахӕста, Кокити Саввӕ дигоронау ци «Бӕхфӕлдесуни дзурдтӕ ниффинста, уой. В. Ф. Миллер ма пайда кодта Кокий-фурти ӕрмӕгутӕй ӕ куст «Дигорон-ирон адӕни динбӕл ӕууӕндундзийнадӕ», зæгъгæ, уоми дӕр. Еци ӕрмӕг ба хаст ӕрцудӕй авторӕн ӕ киунугӕ «Осетинские этюды», уой дуккаг хаймӕ (1882 анзи рауагъд).
1883 анзи сӕрди бабӕй Саввӕ нӕуӕгӕй архайдта В. Ф. Миллери балций Иристонмӕ. Аци хатт ма сӕ хӕццӕ архайдта зундгонд уруссаг ахургонд М. М. Ковалевский.
Сӕ балций фиццаг хай цудӕй Кӕсӕг-Балхъари, дуккаг ба - Цӕгат ӕма Хонсар Иристони бӕстихӕйттӕбӕл.
Сӕ балций нисан дууӕ Иристонемӕ адтӕй ӕвзагзонунадон ӕрмӕг ӕрӕнбурд кӕнун, ци ирон-уруссаг-немуцаг дзурдуат аразта, уомӕн. Ковалевский ба ӕнбурд кодта нæ адӕни барадон ӕгъдӕутти туххӕн.
Цӕгат-Иристони бабӕй син сӕ балций рӕстӕг ӕнхус кодта Кокий-фурт. Миллери фӕндонмӕ гӕсгӕ Саввӕ ӕнхус кодта М. М. Ковалевскийӕн дӕр. Кокий-фурт ин устур ӕнхус фӕцӕй уæхӕн ӕрмӕгутӕ ӕрӕнбурд кӕнунӕн, куд, зӕгъӕн: дигорон-ирон адӕни ӕхсӕнадон ӕма бийнонти царди уагӕ, бийнонти иуӕнгти ихӕстӕ ӕма бартӕ, сӕ мулк иуаруни, хестӕр-кӕстӕри бартӕ ӕма ихӕстӕ, киндзӕхонуни ӕгъдӕуттӕ, ниййергутӕ ӕма зӕнӕги ӕхсӕн рахастдзийнӕдтӕ, хӕстӕгути ӕхсӕн рахастдзийнӕдтӕ, ӕма ӕндӕр
уӕхӕнттӕ.
Радзурдта ин, Хӕреси хезнитӕбӕл ка нӕ федудта, уонӕн тархони лӕгӕй куд ниллӕудтӕй, кенӕ 1875 анзи Иристони будури гъӕутӕй еуеми тоггинтӕ куд бафедаун кодта, уой туххӕн.
Ци берӕ ӕрмӕгутӕ ин равардта Кокий-фурт, уонӕй М. М. Ковалевский уой фӕсте испайда кодта ӕ бундорон куст: «Нуриккон ӕгъдӕуттӕ ӕма рагон закъон». Сӕ балций рӕстӕг активонӕй ӕмбурдгонд цудӕй дзурдуатӕн ӕрмӕг ӕнбурд кӕнуни куст дӕр.
Кокий-фуртӕн еци гъудтаг ихӕсгонд ӕрцудӕй 1880 анзи. Уӕд ин В. Ф. Миллер байхӕс кодта дигорон-ирон дзурдтӕ ӕнбурд ӕма сӕ урусӕг ӕвзагмӕ тӕлмац кӕнун. Аци гъудтаги имӕ В. Миллер равдиста устур ӕууӕнкӕ.
1880 анзи декабри ӕ куст исӕнхӕст кодта ӕма ӕ ӕрмӕг рарвиста В. Ф. Миллермӕ.
Ци коллектив ӕрӕнбурд кодта ӕ фӕлабулай, уоми айдагъ зонӕнгин адӕн н' адтӕй, фал ма духовон косгутӕ дӕр.
Кокити Саввӕй уӕлдай ма си адтӕнцӕ Толпарти И. А., Дигурти Н. М., Санати И. Б. ӕма И. Н., Туати Б. И., Туккати С. А., Саугин Цӕликкати Александр ӕма Дзампати И. И. Гъулӕггагæн, еци дзурдуат исаразуни гъудтаг хъӕбӕр ниддӕргъвӕтийнӕ ӕй ӕма фӕззиндтӕй ӕрмӕстдӕр В. Ф. Миллерӕн ӕ рамӕлӕти фӕсте.
Устур наукон цӕмӕдессаг ӕнцӕ, Кокий-фурт В. Ф. Миллермӕ ци финстӕгутӕ финста, етӕ сӕхуӕдтӕ дӕр. Етӕ сӕйрагдӕр хаунцӕ грамматикӕ ӕма ономастикӕмӕ. Еци финстӕгутӕй рабӕрӕг унцӕ, дууӕ ахургонд адӕймагей æхсæн ци хӕлар рахастдзийнӕдтӕ адтӕй, етӕ дӕр. Æ фиццаг финстӕг имӕ рарвиста 1880 анзи 30 сентябри, уой фӕсте еци анз 21 октябри, 1984 анзи 15 ноябри ӕма 1891 анзи 28 августи.
Кокити Саввӕн ӕ тӕккӕ зундгонддӕр ниммухургонд ӕрмӕг дӕр баст ӕй В. Ф. Миллери номи хӕццӕ. 1885 анзи Саввӕ ниммухур кодта этнографион ӕрмӕг «Иристони цӕрӕг адӕни цардиуаги туххӕн», Дашкови музейи ци ӕнбурдгонд уагъд цудӕй: «Этнографий туххӕй ӕрмӕгутӕ». Еци ӕнбурдгондӕн редактор адтӕй В. Ф. Миллер ӕхуӕдӕг, 1885 анзи ба Миллер иссӕй Дашкови музейи гъӕуайгӕнӕг.
Кокий-фурт еци ӕрмӕгбӕл ку куста, уӕд ин хъӕбӕр ӕнхус кодта В. Ф. Миллер. Кӕронмӕ ин финст ку фӕцӕй, уӕдта ӕ къохфинст рарвиста В. В. Миллермӕ. Ахургонд ин скодта устур аргъ, фал ин скодта цалдӕр феппайуйнаги, цæмæй æй мухури агкаг скодтайдӕ, уой туххӕн.
Ӕрмӕги дзубанди цудӕй нӕ рагон адӕни материалон ӕма духовон культури туххӕн. Ӕ райдайӕни бӕлвурдгонд ӕрцудӕнцӕ темитӕ, цӕй фӕдбӕл финст ӕрцудӕй, уой туххӕн: «Сӕ цӕрӕн хӕдзӕрттӕ, хӕдзари дзаумӕуттӕ, мигӕнӕнтӕ, музыкӕ цӕгъдӕнтӕ, сӕ уӕледарӕс, тохӕндзаумау, хуӕруйнаг, зӕнхикусткӕнунадӕ, фонсдарунадӕ, дзӕбӕхгӕнӕн хуастӕ».
Кокити Саввӕ ма ӕй цалдӕр ӕндӕр ӕрмӕгей автор дӕр. Етӕ мухургонд ӕрцудӕнцӕ газет «Терские ведомости»-й («Киристонгъӕу. Бӕлццони финститӕй», 1881 анз, «Ирон-дигорон адӕнмӕ ӕруӕд федуни гъудтаг, 1881 анз, «Зиани ӕгъдӕуттӕ», 1901 анз).
Кокити Г. А. финста Кокити Савви туххӕн журнал «Советон этнографий» 1946 анзи: «Кокиев является одним из выдающихся просветителей осетинского народа второй половины XIX века, лучшим знатоком его этнографии».
Гъулӕггагӕн, абони уӕнгӕ дӕр нӕ къохи нӕма бафтудæй дигорон-ирон интеллигенций раззагдӕр рохситаугутӕй ey, В. Ф. Миллери ӕмдзогӕнӕг Кокити Савви хузист. Ка 'й зонуй, еске хæдзари ма разинна, уӕд нӕбӕл ӕй исӕнбæлун кæнтӕ.
Ирӕф 2024 (№4)
