ГАЗЕТ «КОЛХОЗОН»- ӕй ИСТ
ДИГОРГОМИ АЙДÆНÆ
Мӕ хестӕртӕй арӕх фегъосинӕ, раздӕр, ома, тугъди агъоммӕ Ирӕфи ӕма Мӕхчески районтӕ хецӕнтӕ ке адтӕнцӕ, еци хабар. Ецӕгӕйдӕр, Фидибӕсти Устур тугъди агъоммӕ, уӕдта, уой фӕсте Дигоргоми гъӕутӕ, нуртӕккӕ куд исӕдзӕрӕг ӕнцӕ, уотӕ нэ адтӕнцӕ, адӕм си дзӕвгарӕ фулдӕр цардӕй.
Гъулӕггагӕн, сӕ нӕлгоймӕгти астӕугкаг фӕлтӕр ӕма исуйнаг фӕсевӕди фулдӕр хай нӕбал исӕздахтӕнцӕ еци тогкалӕн цӕхӕрӕй.
Адӕм си берӕ ке адтӕй, уомӕн ба ӕвдесӕн ӕнцӕ айдагъ сæ къолхозти нимӕдзӕ дӕр. Зӕгъӕн, Задӕлескӕ, Нарӕ ӕма Хӕнӕзӕ адтӕнцӕ хецӕн къолхоз, Донифарси зилд дӕр уотӕ, Мӕхческӕ ӕ фӕлабулай гъӕути хӕццӕ-хецӕн, Уӕллагкоми гъӕутӕ уотӕ, Дзинагъа ӕма Устур-Дигорӕ дӕр хецӕн хӕдзарӕдтӕ. Уоми ци дӕсгай, сӕдӕгай фӕллойнӕгӕнгутӕ хъиамӕт кодтонцӕ, уони цард ӕнхӕстӕй равдесунӕн ба ӕнӕмӕнгӕ гъудӕй газзет. Уӕдта район хецӕн ку уa, уӕд ин гъӕуама ӕхе гъуддагарӕзтадӕ уа, уӕдта ӕхе сӕрмагонд газзет дӕр.
Уотемӕй Цӕгат-Иристони Коммунистон партий обкоми бюрой 1938 анзи 4-аг ноябри каст ӕрцудӕй цалдӕр нӕуӕг районеми 1939 анзӕй фӕстӕмӕ газзеттӕ уадзун райдайуни фарстамӕ ӕма Мӕхчески райони дӕр цӕун райдӕдта газзет «Колхозон», ӕ тираж 1000 экземпляри, цӕугӕ ба кодта мӕйӕмӕ 10 номери. Раздӕр Дигоргоми фӕндӕгтӕ бустӕги ӕдзӕллаг уавӕри ке адтанцӕ, уомӕ гӕсгӕ сӕмӕ республикон ӕма Центрон газзеттӕ ӕрӕгӕмӕгомау хъӕрттӕнцӕ. Адӕми ба зонун фӕндадтӕй, ӕхсӕнади, науки, ахуради, культури ци цаутӕ цудӕй, уони, уӕдта медком дӕр алли бон кӕрӕдзей хабӕрттӕ кӕцӕй игъустайонцӕ гъӕуама.
Ӕма син нур ба фадуат фӕцӕй сӕ кусти раззагдӕрти ӕнтӕстдзийнӕдтӕбӕл ӕма къулумпидзийнӕдтӕбӕл ӕргомӕй ӕрдзорунӕн ӕма сӕ аййеппитӕмӕ фӕрсӕй бакӕсунӕн. Нӕ республики сӕйраг библиотеки архивти ма дзӕвгарӕ байзадӕй еци газзети номерти худтитӕй.
Уони кӕсгӕй, адӕймаг деси бацӕуй, цӕйбӕрцӕбӕл ӕнӕхийнӕ, раст ӕма ӕргомдӕрдзурд адтӕнцӕ еци доги уацхӕсгутӕ, уобӕл. Хуарз гъуддагӕн зудтонцӕ аггаг аргъ искӕнун, царди размӕцудӕн цӕлхдортӕ ка ӕвардта, уонӕн ба лӕвӕрд цудӕй федар нихкъуӕрд. Кӕци фӕндуй номер дӕр си ку райсай, уӕддӕр, ӕ асӕ минкъий уогӕй (ӕдеугурӕй дууӕ фарси), фал хъӕрттӕй айдагъ медкоми гъӕути цӕрӕг адӕмти царди хабӕрттӕбӕл нӕ, фал ма нӕ егъау Советон Цӕдеси ӕма фӕсарӕнти ци хабӕрттӕ цудӕй, уонӕбӕл дӕр. Фал уӕддӕр фулдӕр ба ӕвдиста цӕргути куст.
Ӕргомӕй ӕвдиста къолхозти бригӕдти ӕхсӕн ериси кусти ӕскъуӕлхтдзийнӕдтӕ, звеноти раззагдӕрти фӕнзуйнаг архайд. Фал ӕнӕхатирӕй ӕма ӕнауӕрдонӕй хормӕ хаста, кустӕй ӕхе ка тилеф кодта, уони магосадзийнадӕ дӕр.
Ӕдасӕй критикӕгонд цудӕнцӕ къолхози сӕрдартӕ, бригадиртӕ, звеноводтӕ, гъӕусоветти сӕрдартӕ ӕма зӕрдихудт некӕбӕл адтӕй. Еузагъдӕй, Дигоргоми цард куд ӕма ци хузи цудӕй, уой ӕвдиста айдӕнау.
Газзет уӕлдай активондӕр фӕцӕй тугъди рӕстӕг ӕма уой фӕсте ӕнзти. Арӕх си мухургонд цудӕнцӕ, ӕфсадӕй нӕ медбӕстонтӕ ци финстӕгутӕ исӕрветионцӕ, етӕ, кенӕ еске хуӕрзеуӕг ку райсидӕ, уӕд куд цийнаг хабар уидӕ еугур коми цӕргутӕн дӕр.
Рӕстӕгӕй-рӕстӕгмӕ газзет «Колхозон»-и фӕрстӕбӕл мухури фӕззиннионцӕ литературон ӕрмӕгутӕ дӕр, радзурдтӕ, ӕмдзӕвгитӕ. Сӕ фиццаг ӕмдзӕвгитӕ аци газзети фӕрстӕбӕл ниммухур кодтонцӕ Сабайти Сулейман, Кертанти Тъӕхир ӕма иннетӕ.
Газзетӕн берӕ ӕнзти разамунд лӕвардта ӕ редактор Темирати Дорофей (Додтий). Цалдӕр анзи си бӕрнон секретарӕй бакуста федӕни ахургонд, профессор, академик Сабайти Сулейман дӕр. Дзӕвгарӕ ӕнзтӕ адӕми зӕрдитӕ рохс кодта ӕ зӕрдӕмӕдзӕугӕ ӕрмӕгутӕй Цъопбойти Кермен, мухури си фӕззиннионцӕ зундгонд адӕмон ахургӕнӕг, Ленини дууӕ орденей кавалер Темирати Тазей уацхъудтӕ дӕр. Газзети фӕрстӕбӕл адӕм устур цӕмӕдесӕй кастӕнцӕ Тауасити Фацбаййи уацхъудтӕ, фельетонтӕ, радзурдтӕ. Фацбайбӕл аци анз ӕнхӕст кӕнуй 100 анзи. Рохсаг уӕд, берӕ сфӕлдистадон бунтӕ ниууагъта адӕмӕн, берӕ лӕггӕдтӕ бакодта нӕ национ культурӕн, фал, уӕлдӕр куд загътон, уотемӕй ӕ сфӕлдистади райдайӕн ба ардигӕй адтӕй. Берӕ адтӕнцӕ ӕхсӕнадон уацхӕсгутӕ, се 'гасей ка фӕннимайдзӕнӕй.
Мӕхчески район Ирӕфи райони хӕццӕ ку баеу кодтонцӕ, уӕд газзет дӕр ӕхгӕд ӕрцудӕй, фал нӕ адӕми историй агкаг бунат ке ахӕста ӕ доги, е ба ни гъӕуама иронхуати ма изайа.
Колити Витали.
Дӕлдӕр мухур кӕнӕн цалдӕр ӕрмӕги, кӕцитӕ ист ӕнцӕ газзет «Колхозон»-и алли ӕнзти ӕрмӕгутӕй.
***
Из постановления Бюро Северо-Осетинского обкома ВКП(б) о мероприятиях по развертыванию агитационно-пропагандистской работы через печать в связи с коллективизацией в нагорной полосе области
20 марта 1935 г.
На основании постановления обкома и облисполкома от 8 марта 1935 г. «О мероприятиях по коллективизации в нагорной полосе области» считать необходимым послать в ущелья гор выездные редакции. Организовать их таким образом:
1. Для печатания газзеты «Растдзинад» в Горно-Алагирском районе использовать «Американку» из Дигорской районной газзеты. Редактором выездной газзеты «Растдзинад» утвердить Шамиля Абаева.
Поручить т. Бадоеву совместно с Горно-Алагирским райкомом определить место печатания выездной газзеты с тем, чтобы обеспечить бесперебойное печатание и распространение газзеты.
3. В Дигорском ущелье организовать выездную редакцию газзеты «Пролетарий Осетии» в сел. Махческ. Для печатания газзеты выделить печатную машину «Бостонку», шрифт, материалы и одного рабочего из Ирафской районной типографии и одного рабочего печатника из Дигорской типографии. Редактором выездной газзеты утвердить М. Кайтукова...
Секретарь Северо-Осетинского обкома ВКП(б)
Г. Гостиев
СООПА, ф. 1, оп. 1, д. 41, л. 83.
Подлинник.
***
Постановление Бюро Северо-Осетинского обкома ВКП(б) об организации районных газзет
4 ноября 1938 г.
Считать необходимым организовать с 1939 г. в новых районах - Гизельдонском, Даргкохском, Махческом и Кадгаронском, районные газзеты с выходом в месяц 10 номеров, а в год 120 номеров.
Газзетам дать следующие названия:
газзету Даргкохского РК ВКП(б) и райисполкома назвать «Большевик», тираж 2000 экз.;
газзету Махческого РК ВКП(б) и райисполкома назвать «Колхозон» («Колхозник»), тираж 1000 экз.;
газзету Гизельдонского РК ВКП(б) и райисполкома назвать «Стахановон» («Стахановец»), тираж 1000 экз.;
газзету Кадгаронского РК ВКП(б) и райисполкома назвать «Ленинон» («Ленинец»), тираж 2000 экземпляров.
Просить ЦК ВКП(б) утвердить настоящее решение и отпустить дотацию на покупку оборудования редакций, типографий и на содержание работников печати во вновь организованных районах 600 тыс. рублей.
Предложить отделу печати обкома партии подготовить вопрос о строительстве во вновь организованных районах зданий для районных газзет и типографий и внести на утверждение Совнаркома СО АССР.
Секретарь Северо-Осетинского обкома ВКП(б)
Н. Иванов
СООПА, ф. 1, оп. 1, д. 160, лл. 138-138 об.
Подлинник.
УРУХДÆР-НАУКОН-АТЕИСТОН ПРОПАГАНДÆ
Нӕ райони берӕ интеллигенци ес. Махмӕ фагӕ тухтӕ ес лекцион пропагандӕ урух рапарахат кӕнунӕн. Фал ӕрӕги райони партион организаций ӕмбурди куд бӕрӕггонд ӕрцудӕй, уотемӕй лекцион пропагандӕ рапарахат кӕнунмӕ фагӕ ӕргом здагъд нӕма ӕрцудӕй. Минкъий каст цӕуй фӕллойнӕгӕнгутӕн наукон-атеистон темитӕбӕл лекцитӕ. Алли колхози дӕр ес лекторон къуар. Фал, зӕгъун ӕнгъезуй, неци косунцӕ, зӕгъгӕ. Лекторон къуӕртти ӕнцӕ ахургӕнгутӕ, медицинон косгутӕ, гъӕууон хӕдзаради специалисттӕ ӕма гъӕуама етӕ хӕссонцӕ дзиллити ӕхсӕнмӕ зонундзийнӕдтӕ. Фал сӕ еци кадгин ихӕс иронх кӕнунцӕ.
Шверники номбӕл колхози лекторон къуари ес 8 адӕймаги. Фал еу лекци дӕр нӕма искодтонцӕ ӕрдзон-наукон темӕбӕл, уӕлдайдӕр дини нихмӕ темӕбӕл. Уогӕ ба ма берӕ ес, рагон зианхӕссӕг ӕгъдӕуттӕбӕл хуӕст ка ӕй, уӕхӕн адӕймӕгутӕ гъӕути медӕгӕ. Ами ӕй, «ӕносон Габони кувддонӕ», кӕцими алли анз дӕр тӕккӕ фӕззигон кустити тумугъи къуӕретӕ фулдӕр фӕббадунцӕ «кувди». Дзинагъай туххӕй фӕццӕуй дзубандитӕ нӕхемӕ арахъуадзуни фӕдбӕл, кӕцимӕй исафунцӕ берӕ адӕймӕгути ӕнӕнездзийнадӕ. Ӕма цӕстӕуингӕй ӕнгъезуй ахургӕнгутӕ, дохтуртӕ ӕма гъӕуи раззагдӕр адӕмтӕн уӕхӕн уавӕрмӕ уотӕ кӕсун?
Еци ӕнæуогӕ «идаугутӕн кувддӕнттӕ» ес алли гъӕуи дӕр. Уонӕн «кувтитӕн» харзгонд ӕрцӕуй берӕ нӕхемӕ уагъд арахъ. Уоми къуӕретӕ ка фӕнниуазуй, уонӕй, ке зӕгъун ӕй гъӕуй ӕхсӕнадон пайда куст байагорӕн нӕбал фӕуй, уомӕн ӕма дуккаг къуӕре ба «сӕйгӕ» фӕккӕнунцӕ.
Берӕ хузти ӕнцӕ рагон зианхӕссӕг байзайӕггӕгтӕ адӕми ӕхсӕн. Кизгӕ киндзи ку фӕццӕуй, уӕд ӕ хӕццӕ ӕрвист ӕрцӕуй 2 лӕхъуӕн ӕмбали, «кенкегъазӕ», зӕгъгӕ, кӕцитӕ «ӕгъдау уотӕ 'й», зæгъгæ, ӕма хӕдзари маргъи муггагӕй ке иссерунцӕ, уони ниццӕгъдунцӕ. Ӕма айдагъ еци хӕдзари мӕргътӕ нӕ, фал ма синхон хӕдзӕртти мӕргътӕ дӕр цагъд ӕрцӕунцӕ. Кенӕ, сиахси ходӕ «ӕскъӕвд», зӕгъгӕ. Ӕма кӕрӕдзей нимморӕ кӕнунцӕ ниуӕзтгун адӕм.
Абони уӕнгӕ ма федар хуӕцунцӕ еуӕй-еу силгоймӕгтӕ æ лæги хӕстӕгутӕмӕ уайсадуни гъуддагбӕл. Берӕ факттӕ ӕрхӕссӕн ес, фӕскомцӕдесон кизгӕ лӕгмӕ ку ӕрцӕуй, уӕд уайсадун дӕр ке райдайуй, фӕскомцӕдесон ӕмбурдтӕмӕ ке нæбал фӕццӕуй, рагон зианхӕссӕг ӕгъдӕутти ӕхсӕн ке ранигъулуй, уомӕн.
Уомӕ гӕсгӕ устур гъомбӕладон куст бакӕнун гъӕуй фӕсевӕди ӕхсӕн.
Динбӕл ӕууӕндундзийнади ӕма ниуӕзти нихмӕ тох ӕй еугур ӕхсӕнадон ихӕс.
Еуӕй-еу рауӕнти, уӕлдайдӕр Донифарси фӕллойнӕгӕнгути дзӕвгарӕ хай алли анз дӕр ӕнхӕст кӕнунцӕ зианхӕссӕг рагон ӕгъдау - ораза. Сӕрдигон кустити тумугъи ӕнӕгъӕнӕ мӕйи дӕргъи ком фӕддарунцӕ, нецибал фӕххуӕрунцӕ сауӕнгӕ сӕумӕй изӕрмӕ. Уой фудӕй еуетӕ исцола унцӕ ӕма фӕссӕйгитӕ унцӕ. Дини хӕццӕ баст ӕнцӕ хиститӕ кӕнуни гъуддаг ӕма берӕ ӕндӕр зианхӕссӕг ӕгъдӕуттӕ. Хиститӕ кӕнгӕй, ӕвгӕрст ӕрцӕуй берӕ фонс. Адӕймаг ку рамӕлуй, уӕд ин фиццаг хистӕй фӕстаг хисти уӕнгӕ ӕвгӕрст ӕрцӕуй 12 сӕри фулдӕр фустӕ, уӕлитӕ, дӕркитӕ. Уой хӕццӕ - «мард, дан, майрӕнбони дӕр ӕнгъӕл кӕсуй», зӕгъгӕ, ӕма ин цирти цормӕ хецӕн «ӕгъдау» кӕнунцӕ. Хӕдзари сабийтӕ ба уой бӕрцӕ ӕгудзӕг бавзарунцӕ.
Гъе, еци зианхӕссӕг ӕгъдӕуттӕ не 'хсӕн цӕмӕй нӕбал уонцӕ, уой туххӕй ӕнӕмӕнгӕ истухгин кӕнун гъӕуй гъӕути наукон-атеистон пропагандӕ.
ЦИ БАВДИСТОНЦÆ ФÆЗЗИГОН ЭКЗАМЕНТÆ
1952-1953 ахури анзи хӕццӕ ку рабарӕн, уӕд 1953-1954 ахури анзи райони скъолати хуӕздӕр ӕвӕрд адтӕй ахурадон-гъомбӕладон куст. Ке зӕгъун ӕй гъӕуй, е хуӕздӕр ӕрдӕмӕ фӕззиндтӕй скъоладзаути ӕййафундзийнадӕбӕл. Берӕ фӕмминкъийдӕр ӕй, дуккаг анз ӕ бунати ка байзадӕй ӕма фӕззӕгмӕ экзаментӕ лӕвӕрд ци скъоладзаутӕн ӕрцудӕй, уони нимӕдзӕ.
Фал уӕддӕр еци гъуддаг кӕронмӕ фесафун нӕма бантӕстӕй райони адӕмон ахуради хайадӕ ӕма скъолати дирекцитӕн. 1953-1954 ахури анзи дуккаг анз сӕ бунӕтти байзадӕй 95 скъоладзауи, фӕззӕгмӕ экзаментӕ лӕвӕрд ӕрцудӕй 217 скъоладзауемӕн.
Ӕма бӕрӕггӕнӕнтӕ куд ӕвдесунцӕ, уотемӕй еуӕй-еу скъолати хуарз куст ӕрцудӕй, фӕззӕгмӕ экзаментӕ кӕмӕн лӕвӕрд ӕрцудӕй, уони хӕццӕ. Уомӕ гӕсгӕ ба ӕнтӕстгунӕй равардтонцӕ экзаментӕ.
Донифарси ӕвданзон скъолай - 13 скъоладзауемӕй – 11 рӕвдзӕ равардтонцӕ экзаментӕ, Къӕмунти æвданзон скъолай - 7 скъоладзауемӕй - 5, Задӕлески ӕвданзон скъолай 11 скъоладзауемӕй - 8 ӕма уотӕ идарддӕр.
Фал еугур скъолати уотӕ куст не 'рцудӕй, фӕззӕгмӕ экзаментӕ лӕвӕрд ци скъоладзаутӕн адтӕй, уони хӕццӕ. Зӕгъӕн, Фӕснӕли астӕуккаг скъолай фӕззӕгмӕ фӕдзӕхст адтӕй - 79 скъоладзауемӕн. Сӕ хӕццӕ куст куд ӕмбӕлуй, уотӕ ке не 'рцудӕй, уой фудӕй си экзаментӕ радтун нӕ бафӕразта - 28 скъоладзауи. Устур-Дигори астӕуккаг скъолай - 53 ахурдзауемӕй нӕ бафӕразта - 21.
Еугур скъолати еумӕ райсгӕй, уӕд экзаментӕ ка нӕ равардта, уони нимӕдзӕ исхъӕрттӕй 87. Уотемӕй дуккаг анз сӕ бунӕтти байзадӕй - 182 адӕймаги.
Е уобӕл дзорӕг ӕй, ӕма райони ахуради оргӕнтӕ парти ӕма Советон хецауади домӕнтӕмӕ гӕсгӕ ке нӕма райаразтонцӕ ахурадон-гъомбӕладон куст. Идарддӕр, уой зӕрдӕбӕл даргӕй, ахуради оргӕнти ихӕс ӕй, цӕмӕй аци анз еу скъоладзау дӕр дуккаг анз ӕ бунати нӕбал байзайа, уобӕл тох кӕнун.
Гадати Михал
КУСТИТÆ ЦӔУНЦÆ РÆВДЗÆ
Молотови номбӕл колхози 1-аг бригади колхозонти ӕновуд кусти фӕрци гъӕууон хӕдзаради еугур куститӕ дӕр цӕунцӕ рӕвдзӕ. Бригадӕ хонхи хуасӕ карст фӕцӕй ӕма ци 142 ласӕги искодта, етӕ ласт ӕма ӕфснайд ӕрцудӕнцӕ искъӕти размӕ. Рӕвдзӕ федаргонд ӕй ӕ кегъог ӕма сӕ гъӕуай кӕнуй зӕронд колхозон Бясти Бихи.
Бригадӕн хонхи хуар конд адтӕй 15 гектари. Етӕ карст ӕма дӕститӕ амад ӕрцудӕнцӕ хумти. Ӕрмӕст 0,6 гектари ма изайуй ӕнӕфснайд колхозон силгоймӕгтӕ Цъобпойти Донкӕ ӕма Цӕллати Натазай анхосӕй. Етӕ кустмӕ нӕ цӕунцӕ, будури, дан, мӕнӕуӕ кӕрдуни адтан ӕма нӕ хай кустгонд ӕй.
Бригадӕ рӕвдзӕ кӕнуй инайӕ кӕнунмӕ.
Рӕвдзӕгонд ӕй мос. Мосмӕ хуартӕ ласун райдӕдта ӕма дууӕ бонемӕ фӕууодзӕнӕнцӕ.
ФÆСЕВÆД ЕРИСИ УОЛÆНТИ
...Райони колхозти ес 8 фӕскомцӕдесон фӕсевӕдон бригади, кӕцитӕ сӕ куст ниввардтонцӕ тугъдон домӕнтӕмӕ гӕсгӕ.
Лӕгъуз нӕ косуй Задӕлески колхози фӕскомцӕдесон-фӕсевӕдон бригадӕ дӕр (бригадир Хосироти Елена). Ами дӕр стахановон методтӕй косгӕй, Хосироти Хӕмисат, Цакъоти Оля, Гӕмаонти Феня, Цъопбойти Бадели ӕма ӕндӕртӕ кӕрдунцӕ 0,6-0,7 гектари ӕнӕбонцохӕй...
Зингӕ арӕхсгӕ организатор ӕй Устур-Дигори колхозон фӕсевӕдон бригади бригадир Гобети Гуарӕ дӕр. Ами фӕллойнадон ӕгъдау федар ӕвӕрд ӕй. Бригади ес 58 адӕймаги. Етӕ еу бон дӕр нӕ хъор кӕнунцӕ кустӕй. Хуӕздӕр кустадон нормитӕ ӕвдесунцӕ Чегати Мӕдинӕ, Чихтисти Замеркӕ, Хъодзасти Аниссӕ, Малити Клавдӕ, Салӕгати Дофга ӕма ӕндӕртӕ.
«Колхозон», 1943 анз. 19 август.
Газзет «Колхозон» е 'ргом здахта, аййевадон литератури ӕ хъауритӕ ка ӕвзурста, уони сфӕлдистадӕмӕ дӕр. Газзети фӕрстӕбӕл рӕстӕгӕй-рӕстӕгмӕ мухургонд цудӕнцӕ авторти ӕмдзӕвгитӕ. Кӕд аййевадон ӕгъдауӕй бустӕги фӕлгонц н' адтӕнцӕ, кӕд си сӕрӕй-бунмӕ рӕстӕги риторикон дӕрӕгъдзӕгай зӕлланг кӕнуй, уӕддӕр, ци доги финст адтӕнцӕ, уомӕн ба дӕттунцӕ ӕнхӕст дзуапп.
Дӕлдӕр си мухур кӕнӕн еу цалдӕр ӕмдзӕвги:
Сабайти Сулейман
(1946 анзи газзет «Колхозон»-и бӕрнон секретарь)
ÆФСÆДДОН
Ӕрбайста ӕ къохмӕ
Ӕ тохӕн дзаумау.
Исхезгӕй саулохмӕ,
Ратахтӕй маргъау.
И топп ӕма кардӕй
Хуӕрзарӕзт, ефтонг.
Игъӕлдзӕг радзоргӕй,
Ку телуй ӕ цонг.
- Цӕун ӕз и тохмӕ,
Хуӕрзбон, цæй, ӕна.
Не 'сонбӕл ӕдзохмӕ
Фудбонтӕ кӕна.
Тундзуй нур Кавказмӕ
Фашистон ӕзнаг.
Фудголтӕн сӕ размӕ
Ma ya развӕндаг.
Ирайгӕ гъӕубӕстӕ,
Ирайгӕ нӕ хонх.
Нӕ уодзæй мӕ бӕстӕ
Уӕ рӕвдуд иронх.
Хуӕрзбонтӕ, о кизгай,
Ирайгӕ, ду дӕр.
Ку феддзӕн карз тохӕй
Ме 'хӕстӕ ӕз дӕр.
Ма бадӕ ӕнкъардӕй
Мӕ еунӕг ӕнкъай.
Мӕ балци идард ӕй,
Мӕ хорӕн ӕ хай.
Ӕруайӕ, ду мӕнмӕ,
Ӕрбадтӕ дӕ къох.
Ӕрхӕсдзӕй кӕронмӕ
Уӕлахез нӕ тох.
Ку 'рхӕссон уӕлахез
Мӕ тохи бонӕй.
Ӕрветдзиан ӕдзӕсхез
Нӕ цард уӕд фӕрнӕй.
Байдзулдӕй тугъдонмӕ
И кизгӕ хоpay.
Рараст ӕй уӕд тохмӕ
Æфсӕдтон уадау.
Фӕндараст, фӕндараст,
Ку дзоруй ӕна.
Дӕ уиндæ, дӕ бакаст
Æзнаг пурх кӕна.
Цӕуис нин ду тохмӕ,
Ниф ес нӕ дӕуӕй.
Ӕрхӕссӕ ӕносмӕ
Уӕлахез фӕрнӕй.
Фӕндараст ин зӕгъуй
Уӕд Кавкази хонх.
Æ бӕстӕй ку домуй
Бӕгъатӕри тох.
2.9.46 анз
Темирати Дорофей
ÆНДОН ЦÆРГÆС
Тохи гъӕртӕ бӕсти къумтӕй
Арви нӕрдау игъусуй.
Карз сау руймон дзурд фӕссайгӕй
Нӕ бӕстӕмӕ ӕмпурсуй.
Фӕтӕги дзурд даргъ телтӕбӕл
Ӕндон хъурӕй игъусуй.
Нӕ адӕми тохи надбæл
Уӕлахезмӕ аразуй.
Адӕмти маст сау ӕзнагмӕ
Цӕфсгӕ артау ку содзуй.
Алкедӕр си уӕззау тохмӕ
Бӕсти сӕрбӕл ку тундзуй.
Ӕндон цӕргӕс федар реуӕй
Бӕзгин уӕлдӕф игӕрдуй.
Сау руймонӕн е 'ндон къохӕй
Фӕстаг мӕлӕт ку хӕссуй.
Федарзӕрдӕ дӕсни тӕхӕг
Идӕрдтӕбӕл ӕрзелуй
Ӕндон куд нӕй ӕ хуӕдтӕхӕг
Æзнаги фат нӕ есуй.
Уайтагъддӕр е сау ӕзнагӕн
Ӕ сау хъуӕцӕ искалуй.
Фудголтӕбӕл хуӕздӕрагӕн
И бомбитӕ нигъзалуй.
Цъамар ӕзнаг ӕ фур сонтӕй
Ӕрра сирдау ниннеуй.
Сурх цӕргӕси цӕфсгӕ фатӕй
Арти пеллон исуадзуй.
Æндон цӕргӕс бон-изӕрмӕ
Тохи сӕрмӕ фӕззелуй.
Тухгин цӕфтӕй и зӕнхӕмӕ
Фӕшистонти ӕгъзалуй.
1946 анзи, 11 сентябрь
Цъопбойти Кермен
ТЕМИРАТИ Т-мӕ
Ӕнзтӕй берӕ Дигорӕбӕл
Ӕ кади ном игъусуй.
Æвӕллайгӕй и рохс надбӕл
Ахурдзаути аразуй.
Æнтӕсти кой нӕ хуӕнхбӕсти
Берӕ хӕтти ӕрцӕуй.
Сувӕллӕнтти кадгин кусти
Мадӕ - фидау рӕвдауй.
Зӕрди бунæй хъӕбӕр раги
Ахургӕнӕг бауарзта.
Нур берети ӕ рӕстӕги
Ахургӕндтӕ искодта.
Ӕ сахъ реуи ӕ зинг зӕрдӕй
Бафӕлмӕцун нӕ зонуй.
И сабийтӕн æ хъауритӕй
Сӕ зонунбӕл архайуй.
Цӕрӕд Тазе берӕ бӕнтти.
Дзӕбӕх ӕма идзулдӕй.
Ка аразуй сувӕллӕнтти
И рохс надбӕл ӕ зундӕй.
10.9.46 анз
