Наци. Æвзаг. Культурӕ.
"Мах æрху кодтан дуар, цæмæй ибӕл
мæнгӕ гъуди ма 'рбахизтайдӕ, фал нур
ба ма кæбӕлти 'рбахеза уацӕг гъуди?"
Рабиндранат Тагор
Царди фӕззелӕнтӕ берӕвӕрсугон ӕнцӕ. Ӕ фӕндӕгтӕ аллирдӕмӕти ивазунцӕ кустӕнсӕст цардбӕллон адӕймаги. Ескӕци ‘рдигӕй имӕ рохси цъита ку'рбазиннуй, уӕд имӕ ниййарӕцӕн уй амондӕнгъӕлӕй. Фал арӕх фурӕнгъӕлцӕ фудӕнгъӕлцӕ разиннуй. Ӕма уӕд исадау уй ӕ нифс.
Нӕбал имӕ фӕууй размӕ тундзуни хъаурӕ. Ӕрмӕст ма, ци уӕлдай ма 'й, зæгъгӕ, ӕнӕсӕрфат ампъезгӕнгӕй цӕуй, кӕд ӕй и над дӕлгенӕгмӕ тӕруй, уӕддӕр.
Зин ӕй. Зин æй ци надбӕл фӕццалх уай, уомӕй рахезун. Зин ӕй дӕ цудæй ӕрлӕуун. Фӕлтау - билӕмӕ: ка 'й зонуй, федӕни над дӕлгенӕг не'рлух кӕнуй. Фал зинӕй ӕруагӕс кӕнуй и федӕнбӕл къох рӕуигъд ке'рцӕуй.
Еци минӕг рохси цъита бауагъта нифс Дигори адӕми рист, фал федар уоди дӕр. Октябри революцибӕл Дигори адӕм исӕмбалдӕнцӕ, историй гургъахъ фӕндӕгтӕбӕл, кадӕ ӕма сӕрустурӕй рацӕугæй. Дигори хуӕздӕртӕ сӕ цард нивондӕн ӕрхастонцӕ революций сӕрап- понд. Фал революций фӕсте ба нӕдӕр гунтӕн, нӕдӕр монголтӕн, нӕдӕр тӕтӕрӕн, нӕдӕр Темур-лсахъӕн ци нӕ бантӕстӕй, еци гъуддаг саразунвӕндӕ искодтонцӕ еумӕйаг наций культурӕбӕл "зӕрдресгутӕ" ӕма "ауодгутӕ", нæ уæди рӕстӕги тухмиуӕ идеологий ӕнхӕстгӕнгутӕ. Уонӕн сӕ раздзӕугутӕй еу адтӕй Тибилти Александр.
Тӕтӕр-монгол, Темур-Алсахъ байархайдтонцӕ дигори адӕм бунӕскъудт искӕнунбӕл, фал син кӕронмӕ нӕ бантӕстӕй сӕ фӕндӕ. Тибили-фурт ӕма е'мрӕнгъӕ лӕугутӕ цума дигорон дзурд фесафунвӕндӕ 'скодтонцӕ, уоййау райеудагъ кодтонцӕ карз тох дигорон ӕвзаги нихмӕ.
Дигорон ӕвзаги нихмӕ тох райдӕдта Тибилти Александр 1924 анзи æ рӕдуд теори "еумӕйаг литературон ӕвзаг осетинти ӕртӕ къабаземӕн"-ӕй. Еци теорибӕл хуӕст ӕнцӕ нур дӕр ма еуетӕ. Фал Цӕгат Иристони устурдӕр ахургӕндтӕ уонӕмӕ нӕ хаунцӕ. 1924 анзи Тибилти Александр ниффинста ирӕнттӕ, туаллӕгтӕ ӕма дигорӕнттӕн еумӕйаг литературон ӕвзаг исаразуни теори. Ка 'й зонуй, Тибили-фурт ӕ рӕдуд теори ӕгас осетинти (дзурд "осетин" уомӕн финсун, ӕма уруссагау е ӕй нӕ еумӕйаг ном. Фал хердигонау ба нин нӕййес еумӕйаг ном. Кӕд ӕй нури рӕстӕги нӕхе 'рдигонау тӕлмац кӕнӕн дзурд "ирон"-ӕй, уӕддӕр ин нӕййес исхонӕн осетинти еумӕйаг хеномхунд.
Еци фарстамӕ ӕркӕсдзинан хецӕнӕй, фал дзурд "осетин", «осетинский» дигоронау зӕгъӕн ке нӕййес, уомӕ гӕсгӕ дигоронау наций еумӕйаг номи нисанеуӕг дзурд идарддӕр бал финсдзӕнӕн куд (алайнаг") культурон ирӕзти фӕдбӕл аразта. Фал рӕстӕг бавдиста, еци теори рӕдуд ке адтӕй ӕма зианӕй уӕлдай пайда ба ке неци ӕрхаста алайнаг культурӕн, ӕма еци гъуддагмӕ абони ку не'ркӕсӕн, уӕд исон ба байрӕги уодзӕнӕй.
Тибили-фурти теори ӕ райдайӕнӕй ӕ байдауӕнмӕ дӕр субъективон цӕстӕнгас адтӕй. Тибили-фурт финсуй: "Народ, который не почувствовал потребности в создании литературного языка, не способен творить никаких культурных ценностей и обречен на вымирание" (122 с.). Ке зӕгъун ӕй гъӕуй, Тибили-фурт еуӕрдиги раст зӕгъуй. Фал Александри аци гъуди неци барӕ дардта еци рӕстӕг алайнаг ӕвзагмӕ уомӕн, ӕма еци рӕстӕг литературӕ ӕ тӕмӕни адтӕй куд ирон, уотӕ дигорон ӕвзагбӕл дӕр (Гурджибети Бл. - 1898 анзи, Хетӕгкати Къ. - 1899 анзи).
Кӕд ӕма Тибили-фурт ӕхуӕдӕг уотӕ зӕгъуй, ӕма "аналогия не доказательство", уӕддӕр ӕрмӕст уӕхӕн аналогитӕй арӕзт ӕй ӕ теори. Уӕхӕн аналогитӕбӕл арӕзт ӕнцӕ аци Теорибӕл хуӕцгути хаццӕгтӕ дӕр.
Тибили-фурт дӕнцӕн ӕрхаста гурдзиаг, сомехаг ӕма уруссаг ӕвзӕгтӕ. Кӕд ӕма еци аналоги раст хаст нӕ цӕуй алайнаг диалекттӕ рабарунӕн, уӕддӕр имӕ ӕркӕсун ба гъæуй.
Гурдзиаг ӕвзаги, дан, берӕ диалекттӕ ес. Еуӕй-еу диалекттӕ ба кӕрӕдземӕ неци барӕ дарунцӕ. Фал уӕддӕр ес еумӕйаг литературон ӕвзаг.
Цӕмӕннӕ бӕззуй гурдзиаг аналоги махӕн?
Фиццагидӕр, кӕрӕдземӕ барӕ ци диалекттӕ нӕ дарунцӕ, етӕ сӕхе нимайгӕ дӕр хецӕн адӕмихаттбӕл кӕнунцӕ, фал шовинизм уӕхӕн хелӕдӕрундзийнадӕ нӕ уодӕнсуй. Дуккагӕй ба, еумӕйаг гурдзиаг литературон ӕвзаг уомӕн фӕууӕлахез ӕй, ӕма хецӕн диалекттӕбӕл литературон фӕлхӕнтӕ нӕ адтӕй. Дигорон ӕма ирон диалекттӕбӕл ба еци еу рӕстӕги фӕззиндтӕнцӕ. Аджайраг, абхазаг, хонсар-ирон ӕвзӕгтӕ гурдзиаг ӕвзагмӕ ка 'здахта, еци шовинизм ескӕци диалекти фӕлхӕнтӕ бауагътайдӕ? Гъома, куд фулдӕр адӕм дзора гурдзиагау, уотӕ гурдзиаг ӕвзагӕн фесӕфунӕй тӕссаг нæй, æ хъаурӕ, фӕрӕзнитӕ, равгитӕ фулдӕр ӕма хуӕздӕр уодзӕнӕнцӕ. Фал еци диалекти культури специфика (кӕци гъӕздуг кӕнуй нӕ еумӕйаг культура) ке исӕфуй, е ба уӕхӕн "теоретикти" не 'ндавуй.
Тибили-фурт дӕнцӕн ӕрхаста сомехаг ӕвзаг дӕр. Фал сомехаг литературӕ дууӕ диалектемӕй ке ирӕзуй, еци факт ба Тибили-фурт не 'нкъаруй. Уруссаг ӕма украинаг ӕвзӕгтӕй ба уотӕ зӕгъуй: "Несмотря на значительное расхождение в особенностях великорусского, малорусского и белорусского диалектов, язык Пушкина и Гоголя был единым для всего русского народа. Правда, Украина выдвинула в прошлом Тараса Шевченко, а в настоящее время в ней наблюдается, как в литературе, так и в школьной практике, взрыв самостийных тенденций, но я полагаю, что национальное движение на Украине является моментом преходящим. Как реакция бессмысленному самостийность при терпимом к ней отношении Советского Правительства умрет естественной смертью". (123 с.)
Украинаг ӕвзаг рамардӕй ӕви нӕ, гъудæй сæ се 'взаг ӕви нӕ, уой ба нин растӕг бавдиста.
Еумӕйаг литературон ӕвзаги бундорӕн ирон диалект ке гъæуй райсун, еци гъудтаги фӕдбӕл Тибили-фурт ци хаццӕгтӕ кӕнуй, уони фесинмӕ надбӕл цӕунӕй ӕндӕр схонӕн неци ес.
"Очень часто в основу единого книжного языка для данного народа кладется не язык самой многочисленной его ветви, а то наречие, носителем которого является наиболее даровитая часть этого народа, или язык того центра, вокруг которого зарождается государственная жизнь" финсуй Тибили-фурт. "Даровитая часть этого народа", - е, мӕнмæ гæсгæ, æй гурмухъ загъд. Раст зӕгъун ӕй гъӕуй, дигорон ӕвзаги фадуат зиндӕр уавӕри адтӕй, фал уӕддӕр еци рӕстӕгмӕ куд ирон ӕвзагбӕл, уотӕ дигорон ӕвзагбӕл дӕр ӕвӕрд ӕрцудӕй федар ӕма разагъд литератури бундор.
Фал Тибили-фурт ӕ теорий уомӕй тъайлагдӕр хаццӕг кӕнуй: "Красивые, но тяжеловесные архаические формы дигорского языка, не соответствуют нервному темпу современной культуры, которая требует от человека и быстрых движений и сжатой речи. Иронский диалект молод и исполнен энергии, и в этом его главное преимущество перед архаическими женственно-мягкими формами дигорского языка". (125 с.) Аци теоримӕ гӕсгӕ уотӕ уайуй, ӕма нури царди ӕрмӕст "цурд ӕвзагӕн" ес цӕруни барӕ, уӕзданӕн ба си бунат нӕбал ec.
Ӕвдай анземӕ хӕстӕг рацудӕй уӕдӕй нурмӕ, фал дигори сӕ "женственно-мягкий" ӕвзаг некӕми бакъулумпи кодта Тибили фурти "нервный темп современной жизни"-йи. Мадта, революций агъоммӕ дууӕ мин анзей дӕргъи еу ӕма дууӕ хатти нӕ бавзурста дигорон ӕвзаг "нервный темп" рӕстӕгутӕ. Фал уӕддӕр ӕ рӕсугъд архаикон "женственно-мягкий" зӕлтӕ нӕ баминӕг ӕнцӕ. Уӕхӕн хаццӕгтӕ Тибили-фурти, ӕвӕдзи, ӕхе дӕр бунтон ӕруагӕс нӕ бакодтонцӕ ӕма ӕ гъуди федар кӕнуй уӕлиауон лозунгӕй:"...в споре за первородство дигорскому языку придется уступить свое право младшему собрату, иронскому наречию, конечно, не за чечевичную похлебку, а во имя большой идеи единого осетинского литературного языка". (124 с.)
Циуавӕр Устур Идейӕ гъӕуама уа е, ӕма историй, литератури ци фӕлхӕнтæ фӕррӕвдудтонцӕ ӕности имонау, уонӕбӕл дӕ къох рарӕуегъӕ ӕма инней уӕлмондӕн нивондӕн дӕхе ӕрхӕссӕ?!
Тибили-фурти теори турусайау раскъафта Коцойти Арсен ӕма ин фӕрсаг кӕнунмӕ фӕцӕй. 1927 анзи газзет "Рӕстдзинад" - и Коцойти Арсен финста: "Йӕ дзых зноны бон кӕмӕн байгом ис, уыцы чысыл адӕмтæй хъуамӕ макӕцы бауӕнда иннӕмӕн афтӕ зӕгъын:
- Ныууадз дӕ мадӕлон ӕвзаг, ды мӕнӕй къаддӕр дӕ ӕмӕ мӕнӕ мӕ ӕвзагыл дзур.
...Галиу ӕмӕ ӕлгъыст куыннӕ уыдзӕн, афтӕ зӕгъынмӕ йе'взаг кӕмӕн фӕтаса". ("Рӕстдзинад", 1927, 30 июль.)
Ӕма уæд Коцой-фуртӕн ӕхецӕн еци рӕнгъити фӕсте дигорон ӕвзаги нихмӕ дзоргӕй е'взаг куд батастӕй уӕхӕн загъдтӕлтӕ кӕнунмӕ:
1. Дыгурон скъолаты сывӕллӕттӕ сӕ бацыды бонӕй фӕстӕмӕ, хъуамӕ ахуыр кӕной сыгъдӕг иронау, сыгъдӕг ирон чингуытыл;
2. Хъуамӕ на газеттӕ ӕмӕ журналтӕ фыссой ӕрмӕст ирон ӕвзагыл;
3. Хъуамӕ чингуытӕ иууылдӕр мыхуыргонд цӕуой ирон ӕвзагыл; ..."("Рӕст". 27. 30).
Фал, цума, Тибили-фуртӕн дӕр, Коцой-фуртӕн дӕр ӕма иннетӕн дӕр ка равардта дигорон ӕвзагӕн тӕрхонгӕнӕг ниллӕууни барӕ. Дигори сӕхе нӕ бауадзгӕй, тӕрхонгӕнӕгӕй син ниллӕугӕй, Тибили-фурт карзӕй дзоруй Мӕскуй 1927 анз мартъий мӕйи ци ахургӕндти ӕмбурд адтӕй, уони унаффи нихмӕ. Еци ӕмбурди (адтӕнцӕ си профессортӕ Жирков, Яковлев, Миллер, Гортлевский, Башкиров ӕма ӕндӕртӕ) ӕвзаги фӕлхӕнтӕбӕл дзоргӕй, ирон еумӕйаг литературон ӕвзаги туххӕй рахастонцӕ уӕхӕн тӕрхон:
1. Ӕвзаг декретӕй кӕнгӕ нӕ'й;
2. Не'нгъезуй ӕвзаг (нӕ ин ес гӕнӕн) туххӕй фесафун;
3. Ирон ӕма дигорон ӕвзаг цӕунцӕ фӕйнӕ фӕлхӕнебӕл, ӕма еуей не 'нгъезуй ӕрхӕссун нивонди инней туххӕй: гъӕуама си алкедӕр ӕхе надбӕл ирӕзгӕ цӕуа.
Уӕхӕн унаффӕ, ке зӕгъун ӕй гъӕуй, Тибилти Александри ӕмзӕрдиуонти кӕцӕй бандавтайдӕ, ӕма уӕд етӕ нӕ байаурстонцӕ цъифкалӕнтӕбӕл дӕр ӕмбурди архайгутӕбӕл ӕма ӕмбурди унаффӕ ниммухур кӕнгутӕбӕл. Ӕма уӕд Тибили-фурт хе ерхӕфсӕн хаццӕг кӕнуй, етӕ, дан, иронау нӕ зонунцӕ, зӕгъгӕ, ӕма уой туххӕй сӕ бон нæ 'й уруссаг ахургонд адӕмӕн не взаги туххӕй дзорун. Ӕма уӕд дигорон ӕвзаг нӕзонгутӕ ба дигорон ӕвзагӕн тӕрхонгӕнгутӕ цӕмӕн ислӕудтӕнцӕ?! Етӕ уруссӕгтӕ фӕууӕнтӕ, фал Дигори фиццаг рохситаугутӕ Гарданти Михал, Бердити Дудар, профессортӕ Кокити Геуӕрги ӕма Дзагурти Губади, финсӕг Бесати Тазе, революционер ӕма ӕхсӕнадон косӕг Тӕкъоти Симон ӕма иннетӕ дигорӕнттӕ адтӕнцӕ ӕма сӕмӕ цӕмӕннӕ не 'рцудӕй игъустгонд.
Арӕзт ӕрцудӕй еумӕйаг литературон ӕвзаги фарста ралух кӕнуни фӕдбӕл къамис. Еци къамисмӕ нӕ бахаудтӕй еунӕг дигорон дӕр.
Цалдӕр хатти: фиццаг 1927 анзи, уӕдта 1934 ӕма 1936 ӕнзти, дигорон адӕми нӕ бафӕрсгӕй, унаффӕ хаст ӕрцӕуидӕ дигорон ӕвзагбӕл ахур ӕма мухур кӕнуни фӕлхӕнтӕ бахъоди кӕнун. Еци унаффитӕ царди рауадзунӕн равгитӕ фӕззиндтӕй ӕртинӕймаг ӕнзти, репрессити Дигори интеллегенций хуӕздӕртӕ цӕгъдуни ку фӕцӕнцæ ӕма демагогтӕн агкаг нихкъуӕрд дӕттӕг ку нӕбал адтӕй, уӕд. Ка ма равзаридӕ дигорон ӕвзаги сӕрбӕл ести 'сдзорун, етӕ ба карз ӕфхуӕрд баййафиуонцӕ закъонӕрдӕгӕй, нимад ӕрцӕуиуонцӕ националисттӕбӕл. Уотӕ, Бесати Тазе ӕма Хъазбегти Казбек дигоронау ке финстонцӕ унаффити фӕсте, уой туххӕй ахӕст дӕр ма ӕрцудӕнцӕ. Ӕрмӕст ирон ӕвзагбӕл финсун райдайунбӕл исарази уни фӕсте ӕрцудӕнцӕ уӕгъдӕгонд. Карз ӕфхуӕрд баййафтонцӕ цардӕгас Хидирти Ехья ӕма Тобойти Цӕрӕг дӕр 1960-аг ӕнзти сӕ мадӕлон ӕвзаги сӕрбӕл равзаргӕй исдзорун.
Еумӕйаг литературон ӕвзаг гъӕуй ӕви нӕ гъӕуй, уобӕл дзуапп дӕтгӕй, зӕгъдзӕнӕн Кокити Геуӕргий дзурдтӕй: "...бӕргӕ нӕ фӕндуй еу ӕвзагӕй дзорун, ирон адӕм ниууадзӕ, фал ӕгас дуйней адӕмти хӕццӕ дӕр. Ке нӕ фӕндуй мӕйӕмӕ, е бабӕй хормӕ фӕттӕхун. Ӕма ин исӕнхӕсти амал ес еци фӕндонӕн? Нӕййес.
Еу гъуддаг лæги фӕндон, иннӕ гъуддаг ба фӕндонӕн е'сӕнхӕсти амал. Рагӕй дӕр мах дигорон адæмæй уотӕ неке загъта, ӕма нӕ ирон адӕми хӕццӕ еумӕйаг литературон ӕвзаг нӕ фӕндуй, зæгъгæ. Мах уотӕ загъӕн, ӕма еумӕйаг ирон литературон ӕвзагӕн, ӕвзаги хӕтӕнтӕ еумӕ исӕмӕнтъери кӕнӕ, уотемӕй искӕнӕн нӕййес, фал ӕвзаги диалекти цард ӕхуӕдӕг гъуддаг амондзӕнӕй". ("Рӕстдзинад", 1927 а. 14 август).
Ка ‘й зонуй, ӕма ескӕд, еу къуар мин анзей фӕсте, еу ӕвзагбӕл исдзорӕн, фал дигорон ӕвзагӕй ирон ӕвзаг рауайӕн ке нӕййес, уомӕн ба нин рӕстӕг ӕвдесӕн. Канд Дигорӕ нӕ, фал ма туалтӕ, къудар ӕма чысан дӕр на рахизтӕнцӕ еумӕйаг литературон ӕвзагмӕ. Нӕ фал ӕма, ӕвдай анзей дӕргъци ирон диалектӕн ӕхе медӕге никки фӕффулдӕр ӕнцӕ нихаси здӕхтӕ. Тухарӕзт гъуддагӕн рӕстмӕ уӕн наййес. Ка ‘й зонуй, англисаг, уруссаг, кенӕ гурдзиаг ӕвзаги уавӕртӕ ку адтайдӕ ирон ӕвзагӕн дӕр, уӕд дигорӕ дӕр рахизтайуонцӕ еумӕйаг ӕвзагмӕ.
Ӕма абони, ӕвӕдзи, растдӕр уодзӕнӕй дзурд диалекттӕбӕл нӕ, фал мадӕлон ӕвзаг багъӕуай кӕнунбӕл ку цӕуидӕ, уӕд. Еци гъуддагӕн ба рараст гӕнӕн ес ӕрмӕст уӕд, ӕма дигорон дӕр ӕма ирон дӕр ӕмсӕрӕй ку ирӕзонцӕ, дигорон ӕма ирон кӕрӕдзей ку лӕдӕронцӕ дзоргӕй. Нӕ фал, дигорӕмӕ ниуурдуг унцӕ, ду дӕр ирон дӕ ӕма иронау дзорӕ. Гъо, ӕма, фиццагидӕр, кӕд иронӕн зин ӕй дигоронау исахур кӕнун, уӕд дигоронӕн ба цæмæй æнцондæр æй иронау исахур кӕнун?
Мӕнмӕ гӕсгӕ, дигорӕ ирон ӕвзаг куд ахур кӕнуй, ирӕнттӕ дӕр дигорон ӕвзаг уотӕ ку ахур кодтайуонцӕ, уӕд дигорӕй фӕстагдӕр нӕ байзадайонцӕ. Дуккагӕй ба, гъӕуама дигорон ӕхе ирон цӕмӕ хона, Дигорон ӕ дуйнебӕл дӕр ӕхе дигоронӕй зудта, ӕнкъардта. Дзурд "Дигорӕ" 6-аг ӕностӕй зундгонд ӕй. Ӕма сӕ уӕдӕй нури уӕнгӕ иннӕ адӕмтӕ дӕр хонунцӕ "дигор". Ирӕнтти ба ӕрӕги уӕнгӕ дӕр худтонцӕ фӕйнӕхузи номӕй: тӕгиатаг, туаллаг, ирон. Зӕгъӕн, 1844 анзи уруссаг ахургонд Шегрен А. ниффинста алайнаг (осетинская) грамматикӕ. Уоми Шегрен равзурста куд ирон, уотӕ дигорон ӕвзаг дӕр. Фал, дигорон е хонуй - дигорон, ирон ба - тӕгиатаг (тагаурский). Раст зæгъгæй, диалекти кой дӕр фиццаг Шегрен искодта. Кӕрӕдземӕ хӕстӕг ке лӕудтӕнцӕ, уомӕ гӕсгӕ сӕ исхудта еу ӕвзаги дууӕ диалекти. Ӕма уруссаг, украинаг, белоруссаг ӕвзӕгтӕ дӕр худтонцӕ еу ӕвзаги диалекттӕ, фал уой туххӕй ескӕци диалект си ӕрцудӕй хъодигонд? Адыгейӕгтӕ, черкестӕ ӕма кӕсгӕнттӕ сӕхе хонунцӕ адыгтӕ. Се'взӕгтӕ ба кӕрӕдземӕ ирон ӕма дигоронӕй хӕстӕгдӕр ӕнцӕ. Мӕхъӕл ӕма цӕцӕн сӕхе нимайунцӕ еу адӕмӕй - вайнахтӕй. Се 'взаг дӕр кӕрӕдземӕ хӕстӕгдӕр ӕй дигорон ӕма иронӕй. Фал еци гъуддаг уони нæ багъигӕ дардта, алке дӕр си ӕ мадӕлон ӕвзагбӕл ци 'здӕх нимадта, еци здӕхбӕл литературӕ исаразун, кӕд ӕма уонӕмӕ, дигорӕ ӕма ирӕй уӕлдай, финсуйнадӕ ӕрмӕст революций фӕсте фӕззиндтӕй.
Италиаг культурӕ ирӕзуй дууӕ диалектебӕл. Дугай диалекттӕбӕл ирӕзунцӕ мордоваг ӕма марийаг литературитӕ дӕр. Фал неке зӕрди ӕрӕфтуйдзӕнӕй диалекттӕмӕ гӕсгӕ рахецӕн кӕнун нӕдӕр еумӕйаг италиаг культурӕ, нӕдӕр еумӕйаг мордоваг, кенӕ марийаг культуритӕ.
Дигора ӕма Ирӕ кӕд уруссагау сӕхе хонунцӕ еумӕйаг номӕй осетин, Осетия, - уӕд хердигонау ба нин нӕййес еумӕйаг ном. Декретӕй еумӕйаг литературон ӕвзаги фарста куд ӕрцудӕй лухгонд, уотӕ декретӕй дигорӕбӕл ӕрцудӕй ирон номӕвӕрд. Мин анзей дӕргъи Дигорӕ ци бӕстӕ хундтӕй, е нур дӕр зундгонд ӕй ахургæндтӕн. Ӕвӕдзи, растдӕр адтайдӕ, ӕма кӕд дзурд "осетин, Осетия" нӕдӕр иронау, нӕдӕр дигоронау зӕгъӕн нӕййес, уӕд дигорӕн дӕр ӕма ирон дӕр еумӕйаг ци дзурд уа, уӕхӕн дзурдӕй исхонӕн нӕййес. Еци еумӕйаг дзурд ба ӕй "алан, алайнаг". Цӕмӕдӕр гӕсгӕ мӕмӕ "алан" аразгӕ, кӕнгӕ дзурд кӕсуй. Фал дзурд "алан, алайнаг" дзурдтӕ "осетин, осетинский" "ирон, Иристон"-ӕй аразгӕдӕр нӕ'нцӕ. "Алан" дзурд ци рӕстӕги игъустгонд адтӕй, еци еу рӕстӕги зудтонцӕ дзурд "осетин" (ас, яс, ос, овс) дӕр. Осетинтӕ нӕ худтонцӕ гурдзиӕгтӕ ӕма уруссӕгтӕ, алантӕ ба нӕ еци еу рӕстӕг худтонцӕ сомехӕгтӕ, грекъӕгтӕ, китайӕгтӕ, перстӕ, араббӕгтӕ ӕма иннетӕ. Ӕма нæ кӕд нур ӕнгъезуй "осетин" хонун, уӕд нӕ "алан" хонун ба цӕмӕннæ 'нгъезуй. Осетинтӕ куд ан, уотӕ алантӕ дӕр ан. Ӕма растдӕр уодзӕнӕй уруссагау "Осетия, осетин" ку хонӕн, дигоронау ӕма иронау ба - "алан, алайнаг", уæд.
Ӕркӕсуйнаг гъуддаг ӕй дигорон ӕвзаги ӕма культури уавӕрмӕ дӕр. Нуртӕккӕ ӕгас Дигори дӕр зин иссерӕн ӕй уӕхӕн адӕймаг, кӕдзос дигоронау ка радзора ӕнӕ уруссаг ӕвзаги ӕнхусӕй. Еци гъуддаг ес фӕррӕстмӕ гӕнӕн ӕрмӕст уӕд, ӕма дигорон ӕвзаг ирон ӕвзаги хӕццӕ ӕмсӕр ку уа:
1. Гъæуй Республики дигорон ӕвзаги статус ниффедар кӕнун закъони фӕткӕбӕл. Дигорон ӕвзаги статус федаргонд ку не'рцӕуа, уӕд дигорон ӕвзаги цирткъахгутӕ бабӕй сӕ сӕр ма'схъел кӕнонцӕ, уомӕн уӕн нӕййес. Адӕмӕн е'взаги тӕрхонгӕнгутӕ демагогтӕ ма уонца, фал адӕм ӕхуӕдӕг гъӕуама равзара ци 'взаг æй гъæуй, уой. Статус уой нӕ амонуй, ӕма дигорон ӕрмӕст дигорон ӕвзаг ахур кӕна. Цийфӕнди дигоронӕн дӕр ӕхе барӕ гъӕуама уа, ӕхе иронбӕл ӕви дигоронбӕл нимайа, иронау ӕви дигоронау ахур кӕна.
2. Дигорӕнттӕн гъӕуама лӕвӕрд уа фиццаг къласӕй еуӕндӕсӕймаг къласмӕ сӕ мадӕлон ӕвзаг ахур кӕнуни барӕ.
3. Республики гъӕуама цӕуа анз цуппар хатти нӕ, фал алли мӕйӕ дӕр дигоронау журнал.
4. Гъӕуама алли бон дӕр мухури цӕуа дигорон ӕвзагбӕл республикон газзет, паддзахадон бундорбӕл федаргонд уогӕй.
5. Алли бон дӕр гъӕуама арӕзт цӕуа дигорон ӕвзагбӕл радио-бакаститӕ дӕр ӕма телеуинунади дӕр равдиститӕ.
6. Гъӕуама арӕзт ӕрцӕуа дигорон театр, цидæриддӕр фӕрсаг цигъæуæгтæ ‘й гъæуй, уони хӕццӕ.
7. Цӕмӕй еци гъуддӕгтӕ арӕзт ӕрцӕуонцӕ, уой туххӕй ба гъæуй бацӕттӕ кӕнун кадртӕ дигорон авзагбӕл. Педучилищей ӕма университети дигорӕнттӕ ирон ӕвзаги бӕсти гъӕуама ахур кӕнонцӕ дигорон ӕвзаг.
Еци гъӕуддӕгтӕ арӕзт ку не'рцӕуонцӕ, уӕд е уодзӕнӕй дигорон ӕвзаг дӕлгенӕгмӕ фенсонӕгау. Е 'сӕфт ба хуӕрзӕрдӕмӕ некӕбӕл фӕббеддзӕнӕй, нӕдӕр ирӕнттӕн, нӕдӕр иннетӕн фӕууодзӕнӕй пайда. Ӕрмӕст нӕ еумӕйаг культури сауӕдӕнттӕй еуей донуат бахускъӕ уодзӕнӕй ӕма кӕд устур цӕугӕдон уомӕй ӕ уиндӕй нӕ факъкъаддӕр уа, уӕддӕр ӕ фарнӕ, бӕркадӕй ба фӕгъгъӕуаггин уодзӕнӕй.
Зин уавӕри ӕй дигорӕн ӕрмӕст е'взаг нӕ, фал е гас культурӕ дӕр. Фулдӕр адӕм нӕ зонунцӕ Дигори гъӕздуг ӕма аййев адӕмон исфӕлдистадӕ. Нӕ зонӕн Гурдзибети Бласкай, Малити Геуӕргий, Багъӕрати Созури, Ӕбати Самели ӕма иннети ӕнӕмӕлгӕ уадзимистӕ. Ӕртинӕймаг ӕнзти ма арӕзт ӕрцӕуидӕ дигорон къентӕй гъазти еристӕ. Нури рӕстӕги нӕбал зонӕн къентӕ ци 'нцӕ, уой дӕр. Ка ма ракафдзӕнӕй дигорон сандӕрахъ?! Ка ма низзардзӕнӕй Дигори зар?! Ка байергъӕв кӕндзӕнӕй Дигори адӕми музей - Дигоргом?! Исӕфунцӕ Дигоризӕди лӕгӕт, Задӕлески Нанай моргӕ, Седанати мӕсуг, Хъанухъти Есей мӕсуг, Нарти Сослани уобай, Нарти Ӕртӕ нихаси ӕма берӕ ӕндӕр уӕхӕн циртдзӕвӕнтӕ. Етӕ ӕрмӕст мӕсугтӕ, циртдзӕвӕнтӕ, уобӕйттӕ нæ 'нцæ. Етæ 'нцæ нӕ истори, нӕ монон цард, рагдзаман ӕма нури догӕ кӕрӕдзебӕл ка бӕттуй. Еци мӕсугтӕ ӕма циртдзӕвӕнтӕй исирӕзтӕй нӕ уодигъӕдӕ, нӕ кадӕ, нӕ намус. Ӕма уонӕбӕл нӕ къох рарӕуегъгӕй, мах уонӕн нӕ, фал, нӕхецӕн тӕрхон кӕнӕн. Ӕ культурӕ ци адӕм нӕ багъӕуай кодта, еци адӕмӕн федӕн нӕййес. Дигорӕмӕ алкӕддӕр сувӕллон ци адӕймагӕн нӕ фӕууидӕ, ӕнӕбундар ци адӕймаг рамӕлидӕ, е федиссаг, ӕлгъистаг ӕма мӕгурдӕйрагбӕл нимад цудӕй ӕма цӕуй нур дӕр. Гъӕуама, нимадтонцӕ нӕ фиддӕлтӕ, алли адӕймаг дӕр ӕ фӕсте фӕд ниууадза. Мах ба, нӕ фиддӕлтӕй нӕмӕ ци гъӕздуг бунтӕ ӕрхъӕрттӕй, уони билӕй гӕлдзӕн. Циуавӕр фӕд, бунтӕ ниууадза Дигори адӕм ӕ байзӕдтӕгтӕн, уобӕл абони сагъӕс кӕнун гъӕуй. Дигорӕн е'взаг, ӕ культурӕ дигорӕй ӕндӕр неке бон ӕй багъæуай кӕнун. Ӕма ни е иронх макӕд гъӕуама уа. Еци гъудтаг ба нин уӕд бантӕсдзӕнӕй, ӕма ку исарази уӕн дигорон ӕвзаг, культурӕ ке адтæй, æй æма уодзæнæй хуӕдгъон, хуӕдбарӕ. Афонӕ'й дуӕрттӕ байтиндзун ӕма, кӕдимайди, нӕ къӕсӕрбӕл уацӕг гъуди 'рбахеза, цалинмӕ дӕлгенӕги билӕмӕ нӕма бахъӕрттан, уӕдмӕ.
Редакциæй.
Аци ӕрмӕг редакцимӕ лӕвӕрд ӕрцудӕй еу ӕртӕ анзей размӕ. Авторӕн зӕрдӕ ӕвардтан, ке ӕй ниммухур кӕндзинан, уой туххӕй, фал фӕстеуатгӕнгӕ цудӕй ӕма нур кӕд байрӕги ӕй, уӕддӕр ӕй уадзӕн журнали фӕрстӕбӕл. Тахъазти Федар ци фарстатӕбӕл дзоруй, етӕ абони ӕнхӕстгонд цӕунцӕ. Тӕккӕ ахсгиагдӕр уонæй æй дигорон ӕвзаги статус. Е ӕрцудӕй нӕ республики конституций закъонӕй федаргонд, паддзахадон ӕвзаги бартӕ ин лӕвӕрд ӕрцудӕй, ирон ӕвзаги хæццæ цӕрдзӕнӕнцӕ ӕмсӕр, ӕмбарӕ ӕма уарзонӕй, хегъӕди ирӕзгӕй, сӕ кӕрӕдземӕн уодзӕнӕнцӕ устур нифс ӕнӕсайд фӕххуӕцӕг. Нӕ еугур алайнаг адӕми кӕрӕдзебӕл ӕнгондӕр бӕтдзӕнӕнцӕ, уомӕн ӕма ирон-дигоронау, дигорон ба - иронау, никки хуӕздӕр лӕдӕрун байдайдзӕнӕнцӕ.
Дигорон ӕвзагӕн цӕруни бартӕ лӕвӕрд ке ӕрцудӕй закъонмӕ гӕсгӕ, е ӕнӕбӕрцӕ дессаг хуарз гъудтаг ӕй, фарста лухгонд ӕрцудӕй ӕма ардигӕй фӕстӕмӕ ауӕхӕнхузи уацтӕ мухургонд нӕбал ӕрцӕудзӕнӕнцӕ журнал "Ирӕфи". Цӕмӕй не'взаг ӕма нӕ культури берӕ хъортӕ ӕнхӕст кӕнӕн, уой туххӕн ба нӕ еугурей дӕр гъæуй фулдӕр косун, ке бон кӕмий, уоми. Дзубандитӕй неци пайда ес, нӕхуӕдтӕ ку нӕ аразӕн нӕ гъудтӕгтӕ, уӕд нӕмӕ ӕндӕр ескуцӕй ба неке ӕрбацӕудзӕнӕй.
Зӕгъун ма нӕ фӕндуй, Тибилти Александрӕн, Коцойти Арсенӕн уӕдта иннетӕн дӕр сӕ зӕрди барӕй лӕгъуз искӕнун нӕ адтӕй, е адтӕй тоталитарон режими фуд, етӕ ба ӕнхӕст кодтонцӕ ци рӕстаги цардӕнцӕ, уой домӕнтӕ.
Ирæф (№1) 1995
