Исати Мæхæмæт
Профессор
ДИГОРОН ӔВЗАГИ ИСИРÆЗТ – НЕ'НККÆТЕЙ ИХÆС
Уӕлдӕр ци финсгути кой кодтон, уони ӕхсӕн еунӕг дигорон дæр барӕй нӕ бакодтон. Дигорон литературон ӕвзаги дзубанди хецӕн ӕй. Е бунтон уӕззау хабар ӕй.
Ке зӕгъун ӕй гъӕуй, нӕ наци еу æй. Не взагӕн дæр æ адӕмон бундор еу ӕй, фал берӕ дехтӕ кӕнуй. Сӕ устурдӕр хъуӕлтӕ уонӕн ирон ӕма дигорон диалекттӕ, кӕцитӕбӕл рагӕйдӕр адтӕй финсуйнади фӕлтӕрд.
Фал уӕдмӕ нӕ республики хецӕуттӕ аразун райдӕдтонце ӕрмӕст еунӕг литературон ӕвзаг. Ӕ бундорӕн ба ин райстонцӕ ирон диалект.
Куд ӕй зонӕн, уотемӕй еци рӕстӕг фулдӕр гъуддӕгтӕ конд цудæнцӕ, устур хецӕутти куд фӕндадтӕй, уотӕ.
Раст уӕнтӕ, ма уӕнтӕ, уони дзурд «закъон» адтӕй.
Нур нӕуӕг рӕстӕг разилдӕй ӕма нин нӕуӕг фадуӕттӕ фӕззиндтӕй. Дигорон диалектӕн ӕ хъурбӕл баст ка адтæй,
еци бӕндӕн райхалӕн! Уадзӕма уобӕл дӕр ӕмбарӕй ирӕзӕд литературон ӕвзаг.
Уӕхӕн цаутӕ берӕ ес. Зӕгъӕн, еу наци уогӕй мордвамӕ исирӕзтӕй дууӕ диалектебӕл дууӕ литерӕтурон ӕвзаги. Хуннунцӕ эрзя ӕма мокшӕ. Марийӕгтӕмӕ дӕр уотӕ: хуæнхаг- марийаг ӕма будуйрон-марийаг.
Дууӕ хъаурӕгин литературон ӕвзаги ку ирӕза, уӕд национ культурӕ дууӕ хатти хъаурӕгиндӕр уодзӕнӕй. Зӕгъӕн, дигорон зартӕ цӕмӕн тӕлмац кӕнӕн ирон диалектмӕ? Кенӕ ба дигорон косгутӕ ма зӕнхкосгутӕ цӕмӕннӕ финсонцӕ газеттӕмӕ, журналтӕмӕ сӕхе мадтӕлон ӕвзагбӕл? Уадзӕма ирӕнттӕ дӕр игъосонцӕ дигорон дзурдтӕ, ахур сӕбӕл кӕнонцӕ сӕхе. Етæ дӕр нӕхе адӕмон еумӕйаг ӕвзаги лексикӕй ӕнцæ. Дууӕ диалекти, дууӕ литературон ӕвзаги хузтӕ кӕрӕдзей гъӕздуг кӕнӕнтӕ.
Нурмӕдӕр ирон дзурдтӕ хизтӕнцӕ дигоронмӕ, дигорон дзурдтӕ ба ирон литературон ӕвзагмӕ. Ӕмбарӕ ку исонцӕ, уӕдта еци процесс фӕккарздӕр уодзӕнӕй. Дууӕ диалектемӕй, ци дууӕ литературон ӕвзаги исирӕзонцӕ, етӕ кӕрӕдзей гъӕздуг кӕндзӕнӕнцӕ. Кӕрӕдземӕ хӕстӕг кӕндзӕнӕнцӕ.
Мадта ирон литературон ӕвзаги ка фӕгъгъӕздугдӕр кӕна, уӕхӕн дзурдтӕ ба дигорӕнттӕмӕ берӕ минтӕ ӕнцӕ...
Еузагъдӕй, дигорон литературон ӕвзаг идарддӕр исирӕзуни нихмӕ неци бал рӕуонӕ ес. Мадта ин фадуӕттӕ дӕр куд нӕ уодзӕнӕй?!
Уонæн сӕ сӕйрагдӕртӕ ӕнцӕ нӕ дигорон литератури бунтӕ. Заманай искурдиадгун финсгутӕ Блашка, Геуӕрги ӕма Созур сæ фӕлгонцтӕй ниввардтонцӕ федар бундор нӕ дигорон литературӕ ӕма литературон ӕвзагӕн.
Гурдзибети Блашкӕй мах дзиллӕ устур ихӕсгун ан. Е дессаги адӕймаг адтӕй берӕ гъуддӕгти. Уонӕбӕл дзоруни фадуат нин нур нӕййес. Зӕгъун гъӕуй ӕрмӕст уой, ӕма Блашка ке адтӕй фиццаг дигорон поэт. Уой рӕстӕги ирӕ ӕма дигорӕ сӕ еумӕйаг ном феронх кодтонцӕ. Блашка ба сӕ алли хузи дӕр кӕрӕдзебӕл баста, иссергӕй син сӕ рагон ном «оссаг»;
Оссаг! Раги райстай сӕребарӕ,
Исдӕ паддзахӕн йевгет...
Уотӕ финста йе 'ндзӕвгӕ «Сӕребари манифести». Хецӕнтӕй дӕр сӕмӕ ӕхе бахатуй дӕлдӕр еци ӕндзӕвги:
Уӕ, дигорон, уӕ, ирон,
Идзулетӕ уӕ бари...
Къостай е берӕ уарзта. Уой номӕй дӕр оссӕгти кӕрӕдзебӕл баста. (Къостамӕ):
Фӕсмӕрунцӕ 'й хонх, будури
Ирӕ ма Дигорӕ дӕ ном.
Блашкай ном берӕ рӕстӕги не 'гъустӕй куд ӕмбӕлуй, уотӕ. Уомӕн йе 'сфӕлдистади тӕфагӕ дигорон дзиллӕн ӕ пайдай хай нӕ равардта афойнадӕбӕл.
Мадта дзурдти гъӕздугдзинадӕй ба Блашкай уадзимистӕн аргъ нӕййес. Царди нур ке феронх ан, уӕхӕн лексикӕ финсӕгмӕ берӕ йес.
Блашкай къохӕй нӕ дигорон литератури туруса ӕрбахаудтæй дессаги поэтикон къохмӕ, Малити Геуӕргимӕ. Геуӕргий хузӕн поэттӕ берӕ нӕййес! Уой ӕрдзон искурдиадӕ, уой ӕндзӕвгитӕ ма поэмити зӕлланг ӕвзагӕн Абайти Васойӕй ӕндӕр фагӕ аргъ некема искодта. Уонӕбӕл Васо уотӕ финста:
«Раньше, чем доходит до сознания их смысл, они уже покоряют своим чарующим ритмом и звучанием. Когда читаешь такие стихи, невольно приходят на память слова Белинского, сказанные им о стихе Пушкина: «Что это за стих! Он нежен, сладостен, мягок, как рокот, волны, тягуч и густ, как смола, ярок, как молния, прозрачен и чист, как кристалл...»
Уомӕй хуӕздӕр ма куд ес исаргъ кӕнӕн ӕндзӕвгитӕн. Цӕмӕй ибӕл берӕ ма дзорон, уой туххӕй мӕн дӕр фӕндуй рабарун. Кӕд мӕмӕ нӕ оссаг литератури Къоста фӕккӕсуй Пушкини хузӕн, уӕд мин Геуӕрги ба нӕ литератури иссердта Лермонтови бунат...
Ӕма, ӕцӕгӕйдӕр, райсӕн Геуӕргий рӕнгъитӕ:
Сугъзӕринӕ сурх дзиккотӕ
Фӕлаунцӕ далӕ дони!..
кенæ:
Уой цӕхъалтӕ кӕрӕдземӕн
Десӕ-дзорӕ фӕккодтонцӕ...
Зӕрдӕбӕл куд не 'рлӕууонцӕ Лермонтови рӕнгъитӕ:
Волна на волну набегает
Волна нагоняет волну...
Цъаммар рӕстӕги лӕгмартӕ фемир кодтонцӕ нӕ дессаг болӕмӕргъи...
...Геуӕргий ном дӕр нӕ дигорон дзиллӕ, куд ӕмбӕлуй, уотӕ бӕрзонд нӕ даруй. Ӕнгъӕл кастӕн ӕма ин ӕ 100 анзей юбилеи уӕддӕр циртдзӕвӕн сагъд ӕрцӕудзӕнӕй Владикавказ, Дигора, кенӕ ба Чиколай. Фал нӕ устур хецӕутти уӕхӕн «минкъий» гъуддӕгутӕмӕ нӕ евдӕлуй. Нӕ интеллигенций дзурд дӕр фагӕ гъӕрӕй нӕ райгъустӕй...
Цӕй ӕма исаразӕн еци гъуддаг. Берӕ ӕхца дӕр ӕй нӕ багъӕудзӕнӕй. Ӕрӕнбурд сӕ кӕнӕн адӕймаггай. Скульптурӕ- цирт ба рӕвдзӕй. Исӕйаразта нæ заманай скульптор Гадати Лазӕр. Ӕ ӕрмадзи ин ӕй мӕхуӕдӕг фӕууидтон. Мӕ зӕрдӕмӕ фӕццудӕй хъӕбӕр.
Багъӕрати Созур дӕр берӕ байархайдта, цӕмӕй нӕ дигорон литератури зинг ма ниххусса нӕуарзонти фӕндӕуагӕ. Фал е дӕр раги рандӕй цардӕй. Ие 'сфӕлдистадӕн ба еци хузи аргъгонд нӕма ес нерӕнгӕ.
Еуӕй-еуетӕ Созури исфӕлдистадӕн устур аргъ кӕнунцӕ (Цомахъ, Нафи, Таймураз Тетцойти). Иннетӕ ба ин фагӕ аргъ нӕ кӕнунцӕ. Таймурази загъдау, Созури исфӕлдистади аргъгӕнгутӕй кадӕртӕ ӕууӕндун кӕнунцӕ киунугӕкӕсгути, ома, дан, Созур ӕнахургонд адтӕй, ӕма, дан, имӕ берӕ рӕдудтитӕ иссерӕн ес. Фал си еунӕг дӕр Созури еци «рӕдудтитӕбӕл» лӕугӕ дӕр не 'ркодта, ӕвзаргӕ дӕр сӕ неке ракодта. Созури сугъзӕрийнӕ исфӕлдистадӕ нимбарзтонцӕ дзурд «ӕнахургондӕй», арвбӕл хор мегътӕй нимбӕрзӕгау...
30-50-аг ӕнзти дигоронау ка финста, уонӕй зингӕдӕр бунат ахӕстонцӕ Хъазбегти Хъазбег ӕма Бесати Тазе.
Хъазбег финста фулдӕр ӕндзӕвгитӕ, Тазе ба фулдӕр прозӕ. Уӕдта иронау дӕр ӕвзурста. Куд ӕй лӕдӕрун, уотемӕй ӕ «мӕгурбонӕй» райдӕдта иронау финсун. Дигорон уадзимистӕ ниммухур кӕнунбӕл берӕ гъезӕмарӕ кӕнун гъудӕй аллихатт дӕр.
Хъазбеги финститӕй мӕн зӕрдӕмӕ фулдӕр бацудӕнцӕ ӕ тугъдон ӕмдзӕвгитӕ. Етӕ 1947 анзи уагъд ӕрцудӕнцӕ ӕмбурдгонд «Тохи бонти». Кӕд тугъди кой кодта, уæддæр ӕ ирон-дигорондзийнадӕ нӕ иронх кодта поэт. Зӕгъӕн, Днепри донмӕ е дзоруй:
Рӕхсбетуг дон игъуст дӕ кадӕ,
Дӕ ном ӕности кадгин ӕй.
Дӕ мин, мӕ хор, рагӕй ӕрвадӕ -
Дӕ нифс дадзиндти ӕвӕрд ӕй.
Кӕддӕр ирон, йефтонг, ӕд арцӕ,
Хаста дæ цори цӕугӕ-цард.
Ду ин йе 'фсоргъӕн сонт ӕ барцӕ
Думдтай дӕ усми ӕвӕллад.
Еци рӕстӕги дигорон поэттӕй ӕвӕдзи Тазей ӕндзӕвгити
фулдӕр разиндтӕй Геуӕргий мелодикӕ. Райсӕн ауӕхӕн строфа:
Тӕходуй, ӕма мӕ зӕрдӕ
Ку нӕ уайдӕ фурӕнцад;
Ку райвазидӕ ӕ тӕнтӕ,
Ку кӕнидӕ нӕуӕг цагъд!
Аци рӕнгъитӕ имисун кӕнунцӕ Геуӕргий ӕндзӕвгӕ «Гурусхӕ», кенӕ «Тӕходуй».
Прози дӕр Тазе идарддӕр рахаста Геуӕргий фарнӕ. Ӕ берӕ уадзимистӕй мӕн зӕрдӕмӕ фулдӕр бацудӕнцӕ «Фӕндаги» (1940) ӕмбурдгонди ка 'рцудӕй, уонæй сæ фулдӕр.
Мадта Хъазбег ӕма Тазей фӕсте дӕр нӕмӕ куд нӕййес искурдиатгун финсгутӕ. Кӕддӕр ма сӕбӕл цийни финст кодтон. Ӕвӕдзи, уонæй хъиамӕтгундӕр ӕй Тетцойти Таймураз. Е 'взаг ӕнӕуагӕ гъӕздуг ӕй. Уомӕн рацудӕй берӕ киунугутӕ 'ма нур дӕр карзӕй кӕнуй ӕ поэтикон куст.
Мӕ хуарз ӕнгӕрттӕ, мӕ боц кӕстӕртӕ!
Цӕй, ма байауӕрдӕн нӕхебӕл, ӕма нӕ мади взагбӕл байархайӕн карзӕй. Гъӕуама уой балӕдӕрӕн, ӕма мах фӕлтӕри архайдӕй берӕ цидӕртӕ аразгӕ ке 'й. Кенӕ нӕ къохи ести бафтуйдзӕнӕй, ӕма нӕ дигорон литературон ӕвзаг иситинг уодзæнæй нæуӕгӕй, Геуӕргий фарнӕ нӕ фесӕфдзӕнӕй. Кенӕ ба ӕрмӕст дзубандитӕбӕл басабур уодзинан, ӕма иннӕ фӕлтӕртӕмӕ, нур мах ке 'рӕййафтан скифтӕ 'ма алантӕй, еци сугъзӕрийнӕ дзурдтӕ нӕбал рахъӕртдзӕнӕнцӕ. Дон змеси куд фесӕфуй, уой исӕфт фӕккӕндзӕнӕнцӕ...
Нӕ мадтӕлон 'взаг багъӕуай кӕнӕн! Гъе не 'нккӕтемӕн дӕр не хӕс æй.
Еци ихӕс мах уаргъ ӕй, куд дигорӕнттӕ, уотӕ. Еци ихӕс мах ӕй, куд оссӕгтӕ, уотӕ. Уой гъӕуама лӕдӕрӕн, ӕма нӕ оссаг дууӕ диалекти, нӕ оссаг дууӕ литературон ӕвзаги дони дууӕ сугау кӕрӕдзей федардӕр кӕнунцӕ. Сӕ дууӕ дӕр устур цӕгиндзитӕ ӕнцӕ нӕ йеумӕйаг оссаг культурӕн; сӕ дууӕ дӕр федар бундор ӕма устур фӕрӕзнӕ ӕнцӕ нӕ йеумӕйаг оссаг культурӕн; сӕ дууӕ дӕр федар бундор ӕма устур фӕрӕзнӕ ӕнцӕ нӕ йеумӕйаг оссаг (ирон-дигорон) ӕгъдӕуттӕн дӕр! Мах еугурӕй дӕр еу ан. Не 'взаг дӕр куд национ, уотӕ еу ӕй! Гъæуай æй гъӕуй алли хузи дӕр.
Ӕнӕ 'взагӕй нӕ Хуцау гоби ма 'скӕнӕд!
Ӕнӕ национ культурӕй нӕ Хуцау мизихъагӕй ма ниууадзӕд!!!
Ӕнӕ нӕхе ӕгъдауӕй нӕ Устур Хуцау иннӕ адӕмти рази ма ниууадзӕд ходуйнагӕн!!!
Журнал «Ирæф» 2001 (№2)
