ХЪАНУХЪТИ АЗАУ-ХАНИ ЗАР
Уай-уæрæйда, уа-уай, Хъанухътæ нæлистæгæй искунæг æнцæ.
Сæхебæл гузавæ кæнун ку байдæдтонцæ.
Уæд Азау-хан сæ киндзæ адтæй.
Бæрцæбæл адæймаг, лæг æнгадæ е ку адтæй.
Фал æ лæг ку рамардæй, уæд уодбарæй нæ байзадæй.
Уотемæй еу хатти фун ку фæййидта,
Æма уæдæй фæстæмæ фудхуз кæнун ку байдæдта.
Уобæл Хъанухъти лæгтæ хъурмæ ку кодтонцæ:
Нурмæ дзæбæх ку адтæй, уæд ибæл нур ци æрцудæй.
Азау-ханæн Бийи-фурт Хъайтухъ æ къохбæлхуæцæг ку адтæй.
Уотемæй Азау-хан хинст ку саразуй.
Хъанухъти зæрæндти е ку æринбурд кæнуй,
Æстæмæй-астмæ сæ е ку фæххинцуй,
Кæд сæ зæрди ести æрифтуидæ
'Ма мин мæ уоди гузавæ балæдæриуонцæ.
Хъанухъти зæрæндтæн сæ зæрди неци æфтудæй - нæ 'й лæдæрдтæнцæ.
Æрæгиау ба, Бийи-фурт Хъайтухъ уоми адтæй, ма имæ уой барветунцæ.
- Ци кæнис, нæ киндзæ, цæбæл фудхуз кæнис, зæгъгæ.
Къохбæлхуæцæг æнæ мадæй райгургæ 'нсувæр фæууй, Хуцауи дзурдæй,
Æма имæ ку бацæуй 'ма 'й ку бафæрсуй:
- Ци кæнис, мæ хуæрæ, цæбæл фудхуз кæнис? -
Уой бæрæг агорунцæ Хъанухъти зæрæндтæ.
- Мæ бæрæг син уæд зæгъинæ, 'ма мин мæ фун ку рартасиуонцæ.
- Мæнæн æй зæгъæ, æз ба син æй зæгъон, кæд æй рартасиуонцæ.
- Дæубæл мин банимæхсæн неци ее, - зæгъгæ, ин æй æрдзоруй:
- Мæ фунæй, цума мæ бунæй содзгæ æхседарф рацудæй уотæ, æма æгас Хъанухъти ниррохс кодта, уæдта будурмæ ратахтæй 'ма уоми ниххустæй. Гъема уобæл фудхуз кæнун, ци' й, уой нæ зонун 'ма, уой туххæй, æма сæ уобæл бафæрсæ!
Æма ма 'й уонæмæ ба ци хъæртун кæнис, æз дин æй мæхуæдæг ку зæгъдзæнæн, уæд. Дæ губуни æстуггин ее, 'ма дин лæхъуæн игурдзæнæй, е ба уæхæн, æмæ æ лæгигъæдæй æгас Хъанухътæ исбæрзонд уодзæнæнцæ Дигори æхсæн, уæдта уой фæсте ба будурмæ рафтуйдзæнæй 'ма уоми ба æ адзал райсдзæнæй. Е ба дин дæ фун, зæгъгæ, зæгъуй къохбæлхуæцæг.
- Мадта æз ба уой нæ лæдæрдтæн, - зæгъгæ, исдзоруй Азау-хан дæр.
Уой фæстæ ба Хъанухъти зæрæндтæ гъуддаг ку æрлæдæрдтæнцæ. Æма еци фæдбæл сæ хæдзæрттæмæ ку фæххæлеу æнцæ.
- Уæд игурд рантæстæй æцæгæй уæхæн, æмæ æгас Хъанухъти дæр бæрзонд ка искодта Дигори æхсæн.
Уой фæсте ба будурмæ рафтудæй æма æ цард зæнхæбæл бафтудæй.
Хъанухъти Азау-хан Есени мадæ адтæй.
Радзурдта æй Баликьоти Слангери.
Нийфинста Толасти Геуæрги, 18 декабрь, 1927 анз, Фæснæл.
ЦИГСÆИ-й архив, фольклор №17,9 папкæ, 86 ф.
