«Бæхфæлдесун» æй дуйней медæгæ тæккæ рагондæр æма дессагдæр æгъдæуттæй еу.
Туйгъанти Мухарбег финста: «Аци ’гъдау нæ дзиллæмæ байзадæй фиддæлти заманæй, киристон æма пусулмон дини разæй. Нæлгоймаг ку рамæлуй, уæд ин æ уæлмæрдмæ æрбаласунцæ байраг-бæх æд саргъ-ефтонгæй, уорс къохмæрзæн е ’фцæги, уотемæй. Бæхфæлдесæг марди уæлгъос æрлæууй, æ галеумæ бæхи идонæ райсуй, æ рахесмæ ниуазæн - бæгæний къос. Фæййаргъауй... Аргъуд ку фæууй - бæгæний къос бæхи сæфтæгбæл ниццæвуй ’ма ’й листæг мортæ никкæнуй. Уосгин лæг ку рамæлидæ, уæд ма уой къохи æвардтонцæ æрæги уæнгæ дæр æ уоси дзигготи кæрæнттæ лухгондæй. Куд фæстæмæ, аци аргъуд берæ некебал зонуй нæ зæронд лæгтæй дæр.»
ДИГОРИ БÆХФÆЛДЕСУНИ ДЗУБАНДИ
Хуарз лæг адтæй, рамардæй,
Æ ингæн рохс адтæй,
Æ мæрддзаг уорс адтæй,
Уомæн догъ адтæй,
Амæн дæр догъ уодзæнæй.
Терк-Торки бæхæргъауæй
Аци бæх рартастонцæ.
Аци адæнæй мæн рартастонцæ
Хуарз æнæтæрегъæд лæгæн.
Лæхъуæн райгурдæй,
Дзедзегин ин нæ лæудтæй,
Авдæнгин ин нæ лæудтæй.
Цæппо-лæппо рацæй,
Кæнтæ-дæлмагуртæ ’й енцег фæххастонцæ.
Уой фæсте и лæхъуæн рамардæй,
Рохсаг уæд.
Мæрдтæмæ цудæй,
Бæх ин н ’адтæй.
Терк-Торки бæхæргъау Хузæдзæгати хизтæнцæ.
Рахес фæрсти фæлгæсгæ иссудæй,
Галеу фæрсти фæлгæсгæ æрцудæй,
Æ аккаг бæх не ссирдта.
Уасгергий бæхæргъау Тарæкоми хизтæнцæ.
Рахес фæрсти фæлгæсгæ иссудæй,
Галеу фæрсти фæлгæсгæ æрцудæй,
Æ аккаг бæх не ’ссирдта.
Уасгергий æртæ æфсоргъи фескъуддзаг æнцæ,
Æхсири цадæ - сæ донниуазæн,
Æхсæри къотæр - сæ бонасадæн,
Мурдтун кæрдæг - сæ бонхезнæ,
Калакаг æрхи тæбæгъи
Дзæбодур сайæн рахесмæ бадаруй -
Раззæгутæй цæвуй,
Галеумæ ’й бадаруй -
Фæстæгтæй цæвуй.
Астæуккагмæ ’й бадаруй -
Сабур ин разиндтæй.
Денгизмæ ’й нилласта,
Айкæ вдулд æй искодта,
Сапойнæ вдулд æй искодта,
Æ дзиндзæ ’рдо ин исзиннун кодта,
Дзиндзæ барцæ,
Дзиндзæ думæг,
Æргъеу дæндаг,
Болат сæфтæг,
Цæпбозур билæ,
Мурау - æ гъос.
Æвзестæй цæфхæдтæ искодта,
Сугъзæрийнæй зæгæлтæ искодта,
Нийбæл сæ сагъта,
Дахран салæй авд царемæй саргъ искодта,
Есхъæди цъарæй - æ ласæнтæ,
Сибулдзи цъарæй - æ идонæ.
Рабадтæй. Цæунтæ байдæдта,
Дзæндзег ибæл иссудæй,
Дзæрæндзег ибæл иссудæй.
- Изæд æрцудæй, - загътонцæ,
- Идауæг æрцудæй, - загътонцæ.
- Изæд дæр нæ дæн,
Идауæг дæр нæ дæн.
Гъæулимæн адтæн,
Хæстæг хæссæг адтæн,
Знагсæттæг адтæн.
Тогагор адтæн,
Мæрдтæмæ цæун,
Гъæуаггин дæн,
Гъæуаггинæй мæ ма рауадзетæ.
- Гъай-гъай дæ нæ рауадздзинан.
Дзæндзег рафестæг æй,
Æма ин хуарз æфтаугитæ равардта,
Дзæрæндзег рафестæг æй,
Æма ин хуарз æлвасæнтæ равардта.
Басæфарста:
- Мæ фæндаг куд уодзæнæй?
- Цæугутæ дæбæл исæнбæлдзæнæй,
Уони бафæрсдзæнæ.
Райарфæ кодтонцæ кæрæдземæн.
Цæун байдæдта.
Хори фурт Мæхæмæт ибæл иссудæй,
Мæйи фурт Мæсæмæт ибæл иссудæй,
Гъæздуги фурт Хæмæтхъан ибæл иссудæй,
Фæрнуги фурт Сæмæтхъан ибæл иссудæй.
- Изæд æрцудæй, - загътонцæ.
- Идауæг æрцудæй, - загътонцæ.
Изæд дæр ку нæй,
Идауæг дæр ку нæй.
- Уасгергий æфсоргъ бæхæн ку ласун.
Изæд дæр нæ дæн,
Идауæг дæр нæ дæн.
Гъæулимæн адтæн,
Хæстæгхæссæг адтæн,
Знагсæттæг адтæн,
Тогагор адтæн,
Гъæуаггин дæн,
Гъæуаггинæй мæ ма рауадзетæ.
- Гъай-гъай дæ нæ рауадздзинан.
Хори фурт Мæхæмæт рафестæг æй,
Æма ин хуарз думетонг равардта,
Мæйи фурт Мæсæмæт рафестæг æй,
Æма ин хуарз сæргъбæттæн равардта,
Гъæздуги фурт Хæмæтхъан рафестæг æй,
Æма ин хуарз гъæст идойнæ равардта,
Фæрнуги фурт Сæмæтхъан рафестæг æй,
Æма ин хуарз зæлдагæ думæг æхсæ равардта,
Басæфарста:
- Мæ фæндаг куд уодзæнæй?
- Дæ фæндаг куд уодзæнæй?!
Еу уосæмæ бахъæртдзæнæ,
Конгъæдæ - æ содзийнæ,
Гъесинбæндæн - æ фæдзæл,
Уотемæй зæнхи скъудтæ хуйуй,
Кæрæдземæ ин нæ хæтдзæ кæнунцæ,
Хуцауи хъиамæттæ сæбæл кæнуй.
- Дессаг, е ба цæмæн уотæ ’й?
- Е ба уомæн уотæ ’й:
Æхе лæгæн æставд худта,
Еске лæгæн листæг худта.
Æ мæрдти над унгæг æй,
Фæндагсодзæг хузесæг æй,
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай,
Еу уосæмæ бахъæртдзæнæ,
Айкæ рæвæйнæй бæттуй,
Нæ ин ибæл хъæртуй,
Хуцауи хъиамæттæ йбæл кæнуй.
- Дессаг, е ба цæмæн уотæ ’й?
- Е ба уомæн уотæ ’й:
Синхони карк имæ ку низзаидæ,
Синхонæн æй нæ лæвардта,
Æхецæн æй уорæдта.
Æ мæрдти над унгæг æй,
Изолти си рацо,
Дæ фæндагæн дин рахилæ кæндзæнæй.
Уомæй уоддæр ку бацæуай -
Еу уосæмæ бахъæртдзæнæ,
Сæдæ татхай астæу бадуй,
Æ думæггæгтæбæл цъæх зæлдæ рауадæй.
Лæкъæрдæ къæпе - æ къохи,
Дууæ татхай бæркад ин си нæййес.
- Дессаг, е ба цæмæн уотæ ’й?
- Е ба уомæн уотæ ’й:
Æ бийнонти нæ хаста,
Синхонти нæ уарзта,
Хæстæги нæ азта.
Æ мæрдти над унгæг æй.
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай -
Еума уосæмæ бахъæртдзæнæ
Дууæ татхай астæу бадуй,
Сæдæ татхай берекет ин си ес.
- Дессаг, е ба цæмæн уотæ æй?
- Е ба уомæн уотæ ’й:
Уæлæбæл æ бийнонтæ хаста,
Синхони уарзта,
Хæстæги азта,
- Æ мæрдти над урух æй,
Хæстæг имæ бацо,
Байфæрсæ,
Устур бæстæмæ цæудзæнæ,
Ке дин зæгъа -
Дæ гъосалгъи ’й бахæссæ,
Райзæгъæ.
Уомæй уоддæр ку бацæуай -
Еу уосæмæ бахъæртдзæнæ,
Дууæ гъоги доцуй,
Сæдæ гъоги берекет ин си ес.
- Дессаг, е ба цæмæн уотæ ’й?
- Е ба уомæн уотæ ’й.
Æмæ уæлæбæл æ бийнонтæ хаста,
Синхони уарзта,
Хæстæги азта,
Æ мæрдти над урух æй.
Хæстæг имæ бацо,
Байфæрсæ.
Ке дин зæгъа -
Дæ гъоси алгъи ’й бахæссæ,
Райзæгъæ.
Уомæй уоддæр ку бацæуай -
Еума уосæмæ бахъæртдзæнæ,
Сæдæ гъоги доцуй,
Дууæ гъогей берекет ин си нæййес.
Дессаг, е ба цæмæн уотæ ’й?
- Е ба уомæн уотæ ’й:
Уæлæбæл æ бийнонтæ
Нæ хаста,
Синхони нæ уарзта,
Æ мæрдти над унгæг æй.
Фæндаг содзæг, хузесæг æй.
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай -
Еума уосæмæ бахъæртдзæнæ,
Къумæли къустелæ - е ’рагъи,
Хæрдмæ ибæл имисуй,
Урдугмæ ибæл кæлуй.
- Дессаг, е ба цæмæн уотæ ’й?
- Е ба уомæн уотæ ’й:
Уæлæбæл, къумæл цæгъдгæй,
Къумæлгор бацæугæй,
Къумæл нæ лæвардта.
Æ мæрдти над унгæг æй,
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай –
Авд надемæ бахъæртдзæнæ,
Авд надей астæу
Гадздза дæргъæмæй хуссуй,
Æ хурфæй къæбистæ рæйунцæ.
- Дессаг, е ба цæмæн уотæ ’й?
- Е ба уотæ уомæн ’й:
Ардиги æндæмæ
Адæм сæ мадæ, сæ фиди коммæ
Нæбал кæсдзæнæнцæ,
Æнæгъолийæй дзордзæнæнцæ.
Æ мæрдти над унгæг æй,
Фæндаг содзæг, хузесæг æй.
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай -
Лæг æма уосæмæ бахъæртдзæнæ,
Галдзар - сæ буни,
Галдзар - сæ уæле, -
Къилдун фæлдæхтæй хуссунцæ,
Нæ сæбæл хæтдзæ кæнуй.
- Дессаг, е ба уотæ цæмæн уотæ ’й?
- Е ба уомæн уотæ æй,
Уæлæбæл кæрæдзей нæ уарзтонцæ,
Мæрдти дæр кæрæдзей нæ уарзунцæ,
Сæ мæрдти над унгæг æй,
Фæндаг содзæг, хузесæг æнцæ,
Изолти си рацо,
Дæ фæндагæн дин
Рахилæ кæндзæнæй.
Уомæй уоддæр ку бацæуай -
Лæг æма уосæмæ бахъæртдзæнæ,
Тæрхъосдзар - сæ буни,
Тæрхъосдзар - сæ уæле,
Дæлхъур-уæлхъурæй хуссунцæ.
- Дессаг, е ба уотæ цæмæн æй?
- Е ба уомæн уотæ ’й:
Уæлæбæл кæрæдзей берæ уарзтонцæ,
Мæрдти дæр кæрæдзей
Берæ уарзунцæ.
Сæ мæрдти над урух æй,
Хæстæг сæмæ бацо,
Басæфæрсæ.
Ке дин зæгъонцæ,
Дæ гъосалгъи ’й бахæссæ,
Райзæгъæ.
Уомæй уоддæр ку бацæуай -
Тæрхони бадæг лæгтæмæ бахъæртдзæнæ,
Фæруæ къелатæбæл бадунцæ,
Фæруæ лæдзгутæ - сæ къохи.
Цæрмин кæрцитæ - уæлæфтау,
Цæрмин ходтæ - скъел хатт,
Ниссæбæл систæ ’нцæ,
Ниссæбæл лискъæ ’нцæ.
- Дессаг, е ба уотæ цæмæн æй?
- Е ба уомæн уотæ ’й,
Æма - растæн - хæран тæрхон,
Хæранæн - раст тæрхон
Етæ кодтонцæ.
Сæ мæрдти над унгæг æй,
Фæндаг содзæг, хузесæг æнцæ.
Изолти сæ рацо,
Дæ фæндагæн дин
Рахилæ кæндзæнæнцæ.
Уомæй уоддæр ку бацæуай,
Тæрхони бадæг лæгтæмæ бахъæртдзæнæ.
Сугъзæрийнæ къелатæбæл бадунцæ,
Сугъзæрийнæ лæдзгутæ - сæ къохи,
Лисхъин кæрцитæ - уæлæфтау,
Салходтæ - скъелхатт.
- Дессаг, е ба цæмæн уотæ ’й?
- Е ба уомæн уотæ ’й:
Уæлæбæл растæн - раст тæрхон,
Хæрамæн - хæрам тæрхон.
Сæ мæрдти над урух æй.
Хæстæг сæмæ бацо,
Басæфæрсæ.
Ке дин зæгъонцæ,
Устур бæстæмæ цæудзæнæ, -
Дæ гъосалгъи ’й бахæссæ, -
Райзæгъæ.
Уомæй уоддæр ку бацæуай -
Æртæ надемæ бахъæртдзæнæ,
Дæллаг над - фæндагсодзæг,
Уæллаг над - хузесæг,
Астæуккагбæл бацæудзæнæ,
Байраг бæх - æзнæмагæ,
Битдзеу бадæг - æстъæлфагæ,
Фадхъæдæ ’ма фæдæрхъез,
Сибулдзæ ’ма тасæуес.
Анæй дæр ма фæттæрсæ,
Дзенети бакæсæн туппурмæ
Бахъæртдзæнæ.
Битдзеутæ дæмæ пæрпæргæнгæ
Рауайдзæнæнцæ.
Нана æрцудæй зæгъдзæнæнцæ,
Баба æрцудæй зæгъдзæнæнцæ.
Дæ дзиппæй дууемæн фæткъу исласæ,
Басиниуарæ, басæрæвдауæ,
Етæ дин бамондзæнæнцæ дзенети дуар...
Се ’нккæтебæл дæр бацæуй,
Дзенети бакæсæн туппурмæ бахъæртуй,
Битдзеутæ имæ пæрпæргæнгæ рауадæнцæ,
- Нана æрцудæй, - загътонцæ,
- Баба æрцудæй, - загътонцæ.
- Нана дæр уин æрцæудзæнæй,
Баба дæр уин æрцæудзæнæй.
Æ дзиппæй дууемæн фæткъу исласта.
Басиниурста, басæрæвдудта,
Басæфарста:
- Дзенети дуар мин байгон кæнтæ.
- Дзенети дуар мах гъуддаги нæй.
Нæ астæу сугъзæрийнæ æстуггин
Лæхъуæн бадуй.
Дзенети дуар
Уой гъуддаг æй.
Пæрпæргæнгæ битдзеутæ
Æ разæй бацудæнцæ.
Хæрхæргæнгæ ин дуар байгон кодтонцæ,
Гургургæнгæ ин адæн исистадæнцæ.
- Ци дæ, циуавæр дæ, -
Зæгъгæ ’й бафарстонцæ.
- Ци дæн, циуавæр дæн!
Арзимайхуæ
Зимайхи фурт адтæн.
Æхсæвæ райгурдтæн,
Бонæ Сослани æфсади фæццудтæн.
Гори федар басастон.
Æнагъомæй еци ном ке ракодтон,
Уой туххæй мин
Ай уалæнгæ бунат рацудæй.
- Уæлæмæ ’й искæнтæ.
Хæмици хæтдзæ æнбадинæ,
Урузмæги хæтдзæ æнхуæринæ,
Сослани хæтдзæ æнхæтинæ.
Уæлæмæ ’й искодтонцæ.
Нур дзенети Барастури рахес фарсæй бадуй.
Еци марди уоди бæстæ аци марди дæр уæд.
Нийфинста Темирати Данел. Æ радзорæг бæрæг нæй.
ЦИГСÆИ-й архив, фольк. № 14-33, 7 п., 261-275 ф.
