ЦÆСТИАРФӔ
1. Сувӕллонбӕл цӕстиарфӕ
Сувӕллон ку фӕццӕстуд уй, уӕд цӕстиарфӕгӕнӕг уотӕ радзоруй сосӕгкӕй:
Мадӕ, фиди цӕстӕ,
Ӕрвадӕ, хуӕри цӕстӕ,
Ностӕ, теуи цӕстӕ,
Синхон, хӕстӕги цӕстӕ...
Хуфийнӕй дон хастон,
Ӕзмесӕй бӕхснуг бийун.
Уони цацӕг мӕнгӕдтӕ зӕгъун,
Уацӕг дӕ незтӕй ӕрбадзӕбӕх уо!
Ӕма сувӕллонбӕл батутӕ кӕнуй, цӕнхи къӕртт ба арти ракӕнуй ӕма е ку никъкъӕрццитӕ кӕна, уӕдта гъӕрӕй исдзоруй:
- Цӕстӕгӕнӕги цӕстӕ
Уоййау фӕтътъӕпп уӕд!
2. Сувӕллонбӕл цӕстиарфӕ
Саги цӕстӕ, саги гъос,
Мадӕ, фиди цӕстӕ, ӕсги гъос.
Иуазӕги, фусуни цӕстӕ,
Синхони, дзилли цӕстӕ!
Майрӕни буни авд кизги бадуй:
Сугъзæрийнӕй къӕлӕттӕ амонунцӕ,
Царвӕй фезонӕг кӕнунцӕ.
И рун, и незӕй уотӕ сугъдӕг уо!
Цӕстӕгӕнӕги цӕстӕ арти басодзӕд!
Цӕстиарфӕгӕнӕг еци дзурдтӕ дзоруй сувӕллони гъоси сосӕгкӕй, фӕлмӕн фуфугӕнгӕй ма фӕлмӕн тутӕгӕнгӕй. Фӕстаг дзурдти хӕццӕ ба цӕнхи къӕртт арти баниуӕрдуй ‘ма е ку никъкъӕрцц кӕна, уӕдта гъӕрӕй исдзоруй:
- Дӕ цӕстӕгӕнӕги цӕстӕ
Уотӕ фӕтътъӕпп уӕд!
Уой фӕсте ба цӕстиарфӕгӕнӕг сувӕллон ӕ дзедзебӕл бафтауй ‘ма ин заруй хъахъатӕ, уотемӕй сувӕллони бафунӕй кӕнуй.
Сувӕллон ӕхе мадӕ ӕма фиди цӕстӕ дӕр, кенӕ ба хуӕрӕ ӕма е ‘нсувӕри цӕстӕ дӕр райсуй ӕма уомӕ гӕсгӕ ба и хецонтӕ сӕ уарзон сувӕллонбӕл ку бацийнӕ кӕнонцӕ, уӕд гъӕуама зӕгъонцӕ аци дзурдтӕ:
- Мадӕ, фиди цӕстӕ,
Ӕрвадӕ, хуӕри цӕстӕ,
Синхон, иуазӕги цӕстӕ
Ма байсӕ, хӕрӕги къӕлӕу,
Кудзи къӕбула! –
ӕма и сувӕллонбӕл батутӕ кӕнӕд ӕма исдзорӕд: «Ис-аллах!»
3. Сувӕллонбӕл цӕстиарфӕ
Цӕстиарфӕгӕнӕг райдайуй:
Сафа, уӕларв Сафа!
Аци сувӕллон де ‘уазӕг!
Мади цӕстӕ, фиди цӕстӕ,
Синхони цӕстӕ салдар ӕй!
Аци сувӕллонмӕ фуд цӕстӕ,
Фуд зӕрдӕ ка бадара,
Е фӕххӕтӕд коко синдзӕбӕл
бӕгъӕмбадӕй!
Сискъи, хъӕсхъӕр ӕ хуӕруйнаг,
Уӕлкъӕйсӕрбӕл ӕ хунгӕндӕ,
Уӕлундугбӕл ӕ хуасгӕрцӕ!
Уонӕмӕ дон хуфийнӕй фӕххӕссӕд,
Фӕрӕти комбӕл сӕ фӕссодзӕд!
Еци дзурдти фӕсте ба цӕнхи къӕртт рӕхиси цӕгти ӕртӕ хатти раласӕд дзоргай: «Сафа, уӕларв Сафа! Аци сувӕллон де ‘уазӕг», - ӕма и цӕнхи къӕртт цӕхӕри багӕлдзӕд ӕма зӕгъӕд:
- Цӕстӕгӕнӕгӕн ӕ цӕстӕ
Уотӕ фӕтътъӕпп уӕд!
Гарданти Михали къохфинститӕй.
«Гарданти Михал. Уадзимистӕ.», Дзӕуӕгигъæу, Ир, 2007 анз, 240 – 242 ф.
