КИЗГУТТИ ЗАР
/Киндзи цӕугӕй/
Киндзхонтӕ-еу ку ӕрбадионцӕ, уӕд кизгуттӕ сӕ кӕрӕдзей къохтӕбӕл ниххуӕционцӕ, сӕ сӕргъи ӕрлӕууиуонцӕ 'ма фиццаг хестӕрмӕ базарионцӕ, уӕдта уой дӕллӕй уомӕ, уотемӕй се 'гасемӕдӕр.
«Уӕй, зула, зула, зула!
Ӕртӕ кизги бадунцӕ,
Астӕуккаги ба фаунцӕ,
Раскъӕфуй æй, ке аккаг ӕй, йе.
«Зула» дин зӕгъӕн!
Хестӕрмӕ дзорунцӕ:
«Дӕ хай нин раттӕ, ӕнӕ фӕстӕмӕ фӕккӕсгӕй».
Йе дӕр син ӕ хай раттуй, куд ӕмбӕлуй, уотӕ. Уӕд иннӕ хестӕрмӕ низзарионцӕ:
«Зула» дин зӕгъдзинан,
Дӕ хунӕ нин радтӕ,
Кенӕ 'дта дин дӕ зӕгъуйнаг зӕгъдзинан».
Ӕ хунӕ син, куд ӕмбалдӕй, уотӕ нӕ равардта, 'ма имӕ нӕуӕгӕй бабӕй низзариуонцӕ:
«Дӕ закъӕ гудунмӕрзӕн,
Авд гъунемӕй дӕ комбос,
Еунӕг гъунӕй дӕ тарбос».
Фӕстагмӕ иуазӕгмӕ сӕхе бахатунцӕ:
«Зула» дин зӕгъӕн,
Нӕ мӕкъустӕг нӕхе гъӕуй,
Устурбӕл ӕй ку 'рбадарай,
Дӕ къох фӕрнӕй уӕд бадарай,
Минкъийбӕл ӕй ку 'рбадарай,
Уӕдтай дӕ къохи ӕрдӕгбӕл ӕрбадарай,
«Зула» дин ку загътан,
'Ма дӕ къох мӕнгӕйбӕл ку'рбадардтай».
'Ма уомæ дæр дзорунцӕ заргӕй:
«Дӕ закъӕ гудунмӕрзӕн,
Авд гъунемӕй дӕ комбос,
Еунӕг гъунӕй ба дӕ тарбос.
КИНДЗИ ЗАР
Уӕ, Едилӕ, Едилӕ киндзи ку цӕуй!
Фесгун, нивгун фӕууӕд!
Уомӕн ӕ къохбӕлхуӕцӕг Уасгерги ку ӕй!
Ӕ киндзӕ 'мбал /ӕндзиуаргин мадӕ/ Мадӕ Майрӕн ку ӕй!
Уомӕн ӕ киндзхонтӕ сӕумон идаугутӕ ӕма изӕйрон изæдтæ!
Уӕ, Едилӕ, Едилӕ киндзи ку цӕуй,
Ауӕхӕн киндзӕ некӕд фӕууиндӕй:
Ӕеу усхъӕбӕл - зурнӕ айдӕнтӕ,
Йе 'ннӕ усхъæбæл ба - зурнӕ авдӕнтӕ!
Фесгун, нивгун фӕууӕд!
См.: Памятники народного творчества осетин // Сост. Т. А. Хамицаева. - Владикавказ: Ир, 1992. Т. 1 Трудовая и обрядовая поэзия. 1992. 440 с.
