НОГЪАЙИ ÆЛДАРИ ТАУÆРÆХЪ
Ногъайи æлдар Кæсæгбæл бадауæ кодта, мæ зæнхæбæл цæретæ, зæгъгæ, ’ма син загъта:
— Кенæ фестетæ мæ зæнхæй æма рандотæ, кенæ ба мин хъалон федетæ!
Æма Кæсæг хъалон федунбæл исарази æнцæ. Æ хъалон ба ауæхæн адтæй: сæ адæми син æрæмбурд кæнидæ еу туппури цормæ, бадгæ кæбæл кæнидæ йе ’фсæдти хæццæ, уордæмæ, æд устур, æд мæнкъи, уæдта син сæ фонс, цидæр сæмæ адтæй, уони ракæнун кæнидæ, адæмæй рартасидæ дæс лæхъуæни æма дæс кизги, фонсæй ба: бæхтæй — дæс, галтæй — дæс, фустæй — дæс, гъе, уотемæй сæмæ цудæй алли анз дæр æма си хъалон иста. Æнæгъæнæ мæйæ сæмæ æд æфсæдтæ фæббадидæ, æ хæццæ ба гоцъефтæ æрбахонидæ. Уони хæццæ Кæсæги лæхъуæнти хуæцун кодта æма сæ уæрагсæститæ, цонгсæститæ, фæрсксæститæ никкæниуонцæ, зæнхæбæл сæ фæххуайиуонцæ.
Алли анз дæр сæмæ цудæй еци æгъдауæй, æма Кæсæг батухстæнцæ, сæ бон хъалон федун нæбал адтæй.
Гъема уæдта Кæсæги æлдæрттæ баунаффæ кодтонцæ:
— Ести ин бакæнæн ногъайи æлдарæн, нур ма ку æрбацæуа, уæд, кенæба исæфæн. Кенæ æ хæццæ тохгæ искæнæн, кенæба ин ести мадзал бакæнæн, хъалон ин куд нæбал раттæн, уотæ.
Кæсæгæн сæ гузавæдзинадæ Дигорæй кадæр базудта æма син загъта:
— Тугъдæй дæр ин неци искæндзинайтæ, фал уотæ бакæнтæ, æма уæлæ Устур Дигори цæруй еу дигорон лæг, хуннуй Бетæрозти Бетæроз. Уой ку нæ рахонайтæ, уæд исæфетæ бунтон, е уæ ку нæ баергъæв кæна, уæд. Фæццотæ ймæ æма ’й рахонетæ, баинлигъстæ кæнтæ, æма кæд рацæуа, уæд æй исрæвдзæ кæнтæ алцæмæйдæр.
Кæсæги æлдæрттæ еци унаффæбæл исарази æнцæ, æма ма ногъайи æлдари æрбацудмæ еу мæйæ ку адтæй, уæд Бетæрозты Бетæрозмæ фæццудæнцæ кæсгон æлдæрттæ æртемæй. Устур Дигорæмæ ку исхæстæг æнцæ, уæд еу хумгæнæг лæг фæснад хумæ кодта дзубурæй. Раунаффæ кодтонцæ Кæсæги æрвист лæгтæ:
— Амæ бацæуæн æма ’й бафæрсæн, кæд нин æй баамонидæ, кæми цæруй, уой.
Бацудæнцæ ймæ æма ин «бон хуарз» загътонцæ, уæдта сæ æхуæдæг фæрсуй хумгæнæг, ци уæ гъæуй, зæгъгæ.
— Мах гъæуй ами еу лæг, Устур Дигори цæруй: кæми цæруй, æ хæдзарæ кæми ’й, уой ба ин нæ зонæн, æма нин æй баамонæ!
— Ка ’й, ке агоретæ, е ци хуннуй? — бафарста сæ.
Загътонцæ ин:
— Бетæрозти Бетæроз æй хонунцæ, æма ’й мах ба фæсмæргæ дæр нæ кæнæн.
— Мадта уой 6а æз фæсмæрун, — загъта син. — Нуртæккæ мæ нæ евдæлуй уæ хæццæ фæццæунмæ, фал уин æ хæдзарæ баамондзæнæн, æма ин æ хæдзарæ ку иссерайтæ, уæдта изæрмæ макумæбал фæццотæ, сæхемæ, ка ’й зонуй, ку нæ уа, уæд.
Гъæу имæ дзæбæх зиндтæй, æма син йе ’нгулдзæй амонуй:
— Уалæ еци бæрзонд уинетæ? — зæгъгæ.
— Уинæн, — загътонцæ.
— Гъе уоми ’й Бетæрози хæдзарæ, гъæунгæ æррæстæ уордæмæ иссæудзæнæй, æма ку схъæртайтæ, уæдта рафæрсдзинайтæ: «Ами Бетæрозти Бетæрози хæдзарæ кæци æй?» — зæгъгæ. Хæдзарæ ку иссерайтæ, уæд тургъæмæ
бацæудзинайтæ æма ’й сæхемæ ку иссерайтæ, уæд хуарз,
кенæ ба ’й изæрмæ бахездзинайтæ, уоми æрфестæг уодзинайтæ, уотемæй.
Бацудæнцæ æма иссердтонцæ Бетæрози хæдзарæ; Бетæроз сæхемæ н’ адтæй, æма æрфестæг æнцæ тургъи, æма, син куд загъта, уотемæй æй хизтонтæ.
Изæрæй ба Бетæроз исхъæрттæй, æ дууæ гали æ разæй, уотемæй, æма тургъи фæммедæг æй, æма ’й рафæсмардтонцæ, а ба хумгæнæг лæг ку æй, зæгъгæ, æма йбæл ниццийнæ ’нцæ, æхе дæр син баамудта æма сæ исиуазæг кодта, хæдзарæмæ сæ бакодта. Хæдзари сæ бадгæ фæууагъта, нæма бадзубанди кодтонцæ, уотемæй, нуртæккæ фæззиндзæнæн, зæгъгæ.
Рацудæй Бетæроз, æхецæн къада куройнæ адтæй æма уордæмæ ниууадæй, æма, куройнæ сæумæй-изæрмæ ке бансадта, уой фиййагæй хуæргæ æма ’й бахуардта еугурæйдæр. Æхуæдæгга бабæй къутуй нæуæгæй нивгæдта æма иссудæй фæстæмæ æ хæдзарæмæ æма йе ’уазгутæн æхсæвæри гъуддагбæл зелæнтæ кæнуй, æ синхонтæмæ рауадæй æма син радзурдта, иуазгутæ мæмæ ес, зæгъгæ, æма мин ме ’уазгутæн ести рарæвдзæ кæнетæ.
Февналдтонцæ етæ дæр æма æхсæвæр рацæттæ кодтонцæ.
Æрбахастонцæ иуазгутæн æхсæвæр æма бахуардтонцæ.
Ку бахуардтонцæ, уæд сæ бафарста иуазгути:
— Æз мæхуæдæг Бетæрозти Бетæроз дæн, ку уин æй загътон, æма уæ мæнæй ци гъæуй, уой мин зæгъетæ, кæд уæ естæмæн гъæун, уæд.
Загътонцæ ин, Ногъай æлдар син цидæриддæр кæнуй, уони ин еугурæйдæр æрдзурдтонцæ.
— Мах Кæсæги æлдæрттæ ан, — зæгъгæ, ин загътонцæ, — ’ма нæбал фæразæн, нæ уод æрдойæй нарæгдæр иссæй, гъе уотæ нæ бакодта Ногъай æлдар, æма нин дæу баамундæуй, е æй ку нæ фæссора, зæгъгæ, æма уин ку нæ фæййагъаз кæна, уæд неке, æма нин Хуцау дæ хуарзæнхæ раттæд!
Загъта Бетæроз:
— Магъа, — зæгъгæ, загъта. — Кæсæг, еугурон хъаурæгун н’ айтæ æма мæ ку нæ бафсадайтæ, ку нæ мæмæ фæккæсайтæ хуæруйнагæй, мæ хъаурæбæл гъæуама бафтуйа никкидæр!
Басæфарста:
— Е ’рбацæунмæ ма цæйбæрцæ ес? — зæгъгæ.
— Раздæр дæмæ уой туххæй иссудан, мæйæ гъæуама
нæхемæ фæууай, æма дæ исрæвдзæ кæндзинан.
— Мадта уотемæй ба цæун, — зæгъгæ, загъта Бетæроз.
Æхсæвæ уоми ниххустæнцæ Бетæрози хæдзари, сæумæ ба фестадæнцæ. Бæх ин исластонцæ æд саргъ, æд идонæ æма ’й уобæл рабадун кодтонцæ æма уотемæй ранæхстæр æнцæ Кæсæги минæвæрттæ æма æлдари бадæн гъæумæ — Аргуданмæ ниццудæнцæ. Кæсæг хъæбæр ниццийнæ ’нцæ, ку ймæ æркастæнцæ Бетæрозмæ, естæмæн нин исбæздзæнæй, зæгъгæ. Исрæвдзæ ’й кодтонцæ дарæсæй, алцæмæй; бонæ ин косарт кодтонцæ, уотемæй æй мæйæ хæссун байдæдтонцæ.
Мæйæ ку ’рхъæрттæй, уæдта Бетæрозæн Кæсæги æлдæрттæ загътонцæ:
— Нур нæмæ Ногъай æлдар исон æрбацæудзæнæй.
— Хуарз, — зæгъгæ, загъта Бетæроз дæр. — Гъе, мадта ймæ сæумæ цæудзинан.
Цæуни размæ ба ’й бафарстонцæ Бетæрози:
— Нæ фонс дæр тæрæн, нæ адæм дæр хонæн, æви ци кæнæн? — зæгъгæ.
— Фонс ма ’змæлун кæнтæ, кæми ’нцæ, уоми сæ уагътæ, адæми ба, силæй дæр, нæлæй дæр ке фæндуй, е рацæуæд!
Уалдæнги ба Ногъай æлдар æрбарвиста Кæсæгмæ, рацотæ, зæгъгæ.
Сехуар ма искодтонцæ, æма сæ разæй ранæхстæр æй Бетæроз, æ къобосгин æ къохбæл баст, уой лæдзæгæн хаста; Кæсæги æлдæрттæ ’й се ’хсæн искодтонцæ æма уотемæй бацудæнцæ еугурæйдæр.
Адæм ка ’дтæй, уони æлдæрттæ рæнгъитæ ралæуун кодтонцæ; уæдта иссудæнцæ сæхуæдтæ ба, Бетæроз дæр сæ хæццæ, уотемæй туппурмæ Ногъай æлдарæн «æгасцæуай» зæгъунмæ.
Загътонцæ ин:
— Æгас цæуай, æлдар!
Кæсæги æлдæрттæ Ногъай æлдарæн æ къох райстонцæ, уæдта Бетæрозæн загътонцæ:
— Ду дæр æлдарæн «æгасцæуай» зæгъæ!
Ногъай æлдар адæммæ кæсуй æма бадуй, æ дууæ фарсемæ ба æ дууæ гоцъефи, лолæ думуй, æ лолæ ба хъалаци асæ, хъæбæр тамакуйæй идзаг.
Гъема уæдта Бетæроз дæр бацудæй Ногъай æлдармæ, загъта ин «æгасцæуай». Æлдар æнгъæл адтæй, æ къох ин есуй Бетæроз, е ба æ галеу къохæй æлдарæн æ сæрæй æ ходæ фелваста, æ рахес къохæй ба æлдари лолæмæ фæллæбурдта æма уомæй æлдарæн æ сæр æрхуаста, фæддæлгоммæ ’й кодта, уотемæй, æма æлдар ниддæлæлæй кодта.
Бетæроз имæ дзоруй, æ ходæ йбæл фæстæмæ æркодта, уотемæй:
— Ма хъурмæ кæнæ, неци дин уодзæнæй!
Нур имæ æлдари пелеуантæ дæр кæсунцæ Бетæрозмæ, «æгасцæуай» нин куд нæ зæгъуй, зæгъгæ.
Бетæроз дæр сæ еуемæ бацудæй, æма ймæ æ къох куд радаргъ кодта, уотемæй ин ибæл æ къохæй фæххуæстæй æма ин æй рабуройнæ кодта, йе ’ннæ къохæй ба пелеуанæн æ усхъæбæл фæххуæстæй æма ин æй фæббуройнæ кодта, æма дууемæн дæр сæ бунæттæй фестун сæ бон нæбал иссæй.
Гъе уæдта Бетæроз Ногъай æлдари фæрсуй:
— Кæми адтæ, ци дæ гъæуй? — зæгъгæ.
Æма æлдар дзурдгъон дæр нæбал адтæй, æ сæр басугъдæй æма. Ку нæбал адтæй Ногъай æлдар дзурдгъон, уæдта Бетæроз дзоруй Кæсæги æлдæрттæмæ:
— Йе ’фсæдтæн дæр ин ести кæнон æви куд?
Нур Ногъай æлдари æфсæдтæ ба адæмбæл зилдæгæй лæуунцæ.
Дзорунцæ Кæсæги æлдæрттæ Бетæрозмæ:
— Куд дæ фæндуй, уотæ син кæнæ!
Гъема сæмæ фæстæмæ е ба дзоруй:
— Мадта сæ уæддæр тæрсуни цъæрæмухститæ ракæнон, — зæгъгæ.
Æхе сæмæ фæззилдта Бетæроз, æ къобосгин низзилдтитæ кодта æма сæбæл æй рауагъта, æма Ногъай æлдари æфсæдтæн се ’рдæги бæрцæ цагъд фæцæй, иннетæ ба ледзæг фæцæнцæ.
Уæдта Бетæроз Ногъай æлдари сæргъи нæуæгæй ниллæудтæй ’ма ин зæгъуй:
— Маргæ дæ нæ кæнун, нуртæккæ дæ рамаринæ, фал цо æма дуккаг хатт мабал æрбацо еци æгъдауæй, муггаг ди нæбал ниууадздзинан, ку ма æрбацæуай æндæр хатт, уæд! Нуртæккæ дæхе райсæ, рандæ уо ардигги!
Æлдари рахастонцæ æма ’й æ гоцъефти хæццæ, ци уæрдуни иссудæй, уоми ’й ниввардтонцæ. Гъема рандæ ’й сæхемæ Ногъай æлдар, æма еци бонæй аци бонмæ æ кой нæбал рацудæй Кæсæги.
Примечание:
1). Что стало с Бетрозом дальше, Дзабол не знает, говорит, что кабардинские алдары его якобы одарили и доставили домой.
2). «Зар нæ ’й, тауæрæхъ æй, — зæгъуй Дзабол.
Фегъустон æй раги Тайсаути Даукуййæй, цардæй Азнаурти, нæ сиахс адтæй. Тауæрæхъ ку фегъустон, уæд Даукуйбæл цудайдæ еу 50 анзи.
Тайсаутæ æма Бетæрозтæ æрвадтæлтæ ’нцæ.
Уæдæй ардæмæ Кæсæг Дигорæмæ хуæздæр цæстæй кæсун байдæдтонцæ. Тауæрæхъ Кæсæги дæр зонунцæ. Байфарстон: «Кæд адтайдæ е цума уæддæр?» — «Ногъай рæстæги, ами ку цардæнцæ, уомæй раздæр».
См.: Дедегкати Дз. Ирон адæмон исфæлдистадæ — Дзæуæгигъæу: Ир, 2008.
