ЙЕУНӔГИ ТАУӔРÆХЪ
(вариант)
Йеу гъӕуи цардӕй мӕгур зӕронд лӕг. И лӕг рамардӕй 'ма йин баизадӕй лӕхъуӕн ӕма кизгӕ. Қизгӕ уайтагъд лӕгмӕ рандӕй. Лӕхъуӕн дӕр рацӕппо-лӕппо ӕй; хуӕрзигурд разиндтӕй ӕма 'й хуцау фонс кӕнунбӕл фӕккодта. Игурд фескъуӕнхтӕй 'ма ӕхе хъиамӕтӕй гъӕу исӕнтудта, ӕхуӕдӕг ба Ханти кизгӕ ракурдта.
Йеу ӕхсӕвӕ мӕгур йеунӕг иуазӕгдони куд хустӕй, уотӕ йимӕ бадзурдӕй:
- Сӕумӕ дин сехуар афони дӕ уосӕ хастӕуй, лӕги сӕр дӕ багъудӕй, йеунӕг!
Лӕхъуӕн фестадӕй, тургъӕмӕ рацудӕй, рагъӕуӕйттӕ кодта 'ма некӕми неци фӕйдта; бацудӕй фӕстӕмӕ ӕма ӕхе хуссӕни куд ӕруагъта, уотӕ ба йимӕ нӕуӕгӕй бадзурдӕй:
- Сехуар афони дӕ фиди марӕг ами уодзӕнӕй, йеунӕг! Ӕртиккаг хатт имӕ бадзурдӕй:
- Сехуар афони дӕ фиди лимӕн дӕр ами уодзӕнӕй!
Исхъурдохӕн ӕй мӕгур йеунӕг; ци 'рдӕмӕ цудайдӕ, кӕмӕн ци кодтайдӕ, уой нӕ бал зудта ӕма ӕ мадӕмӕ бацудӕй ӕма ӕ хабӕрттӕ уомӕн радзурдта. Ӕ мадӕ ба йин загъта:
- Дӕ фиди марӕги дӕр, дӕ фиди лимӕни дӕр, хуцауи ку фӕндӕуа, уӕд йесгӕми йердзӕнӕ. Уодесӕг ӕма уосесӕгӕй ба игъаугидӕр нӕ йес, дууӕ гъуддаги дӕр ӕмбес ӕнцӕ 'ма дӕ сӕри гъуддагмӕ цо!
Йеунӕг ӕ бӕхбӕл саргъ багӕлста 'ма талингитӕй Хантӕмӕ нихъхъӕрттӕй; къӕразгӕ бахуаста кизгӕмӕ, ӕма йимӕ йе дӕр ракастæй:
- Кизгай, дӕ арт цӕмӕн сайис, — зӕгъгӕ, йимӕ дзоруй йеунӕг. Кизгӕ ба йин загъта:
- Ӕз мӕ арт ку сайдтайнӕ, уӕд дӕмӕ лӕг нӕ рарвистайнӕ!
- Мадта ӕрахезӕ, ӕз ба дӕ хӕссон!
- Уотемӕй нӕ рахездзӕнӕн, фал дӕлӕ авд надей астӕумӕ ниццо; мӕн ка хӕссуй, йе дӕ фиди марӕг дӕр ӕй 'ма мӕ уомӕй байсӕ!
Йеунӕг ниццудӕй авд надей астӕумӕ 'ма уоми ӕ бӕх бафӕсахсӕн кодта.
Сехуар афони йибӕл хан, дууадӕс бӕхгиней хӕтдзӕ киндзӕ худта, уотемӕй ӕрбацудӕй. Мӕгур йеунӕг сӕ хӕтдзӕ ӕхе рацӕуӕг кодта; ханӕн ӕ бӕрзӕй ӕрсӕрфта ӕма и бӕхӕй ратулдӕй, ӕхуӕдӕг ба ралигъдӕй. Хани ӕмбӕлттӕ дӕр сӕ киндзӕ фӕснад йеу дорбӕл фӕууагътонцӕ ӕма йеунӕги фӕсте сӕхе рауахтонцӕ. Дзӕбӕх ку рарӕнгъӕнцӕ, уӕд ӕ бæх фездахта фӕстӕмӕ, сӕ рахес фӕрсти ӕрбагъаста 'ма син сӕ сӕртӕ къуӕрдтитӕ гӕнгӕ рацудӕй, ӕртиндӕсей дӕр бафснайдта, сӕ бӕхтӕбӕл син сӕ тонаутӕ бабаста, ӕ разӕй сӕ рамбурд кодта; хани кизгӕ дӕр ӕ фӕсабӕрцӕмӕ ӕрбайста ӕма уотемӕй æ хæдзарӕмӕ исцудӕй. Йеунӕгӕн йе 'сцудмӕ ӕ фиди лимӕн гъастӕй рандӕй. Йеунӕг уой ку базудта, уӕд ӕй сорунтӕ райдӕдта; баййафта ӕй; хатуй йимӕ, коруй ӕй, раздӕхӕ, зӕгъгæ, 'ма йимӕ нӕбал игъуста ӕ фиди лимӕн. Уӕдта йин загъта ӕ фиди лимӕнӕн:
- Кӕд дӕ фӕндуй, уӕд мӕ фиди мулк дууӕ ӕмбеси бакӕнӕн, кенӕ ба йеу бони фонсӕй ке иссердтон, уони райсӕ!
- На-нӕ-уа ӕй ку нӕ бал уахта йеунӕг, уӕд ӕ фиди лимӕн раздахтӕй ма райста, йеу бони фонсикондӕй ке иссердта йеунӕг, уони. Йеунӕг уотемӕй йеци йеу бон ӕ фиди тог райста, ӕ фиди лимӕн устур хӕзнаау багъӕуай кодта, ӕнӕзӕрдӕхудтӕй ӕй рарвиста, ӕмӕ уосӕ дӕр ӕрхудта.
Ци рацудӕй, хуцау ӕхуӕдӕг зонуй, уӕдта йеунӕг фунтӕ фӕйдта: авд берӕгъи сӕгъӕ раскъафтонцӕ 'ма сӕ цума йе ба расурдта, авдей дӕр рамардта; ӕвдӕймаги куд ӕстъихта, уотӕ ба ӕ фарсӕй фӕтътъифстӕй; уӕдта цума ӕртӕ богъай сӕ кегъоги ӕмбухта, уотӕ; ӕртӕ ӕхсинӕги ба кӕрӕдзей тундтонцӕ.
Йеунӕг ӕ фунтӕ ӕ мадӕн радзурдта 'ма йин йе ба загъта:
- А гъӕуи кизгӕ раскъавдӕ уодзӕнӕй, ду ба фӕдесӕй рараздӕр уодзӕнӕ; авд рамардзӕнӕ; ӕвдӕймаг куд фест кӕнай, уотӕ ба бийде расхъеудзӕнӕй, дӕ фарсбӕл исӕмбӕлдзӕнӕй 'ма уомӕй дӕ адзал уодзӕнӕй. Ӕртӕ богъай ба ӕнцӕ де 'ртӕ ӕнгари. Йетӕ ба дӕбӕл богъ-богъӕй кӕудзӕнӕнцӕ. Ӕртӕ ӕхсинӕги ба ӕз, дӕ мадӕ, дӕ уосӕ ӕма дӕ йеунӕг хуӕрӕ — маха нӕхе тондзинан, ӕндӕра ци кӕндзинан?
Уотӕ рӕхги ба авд абӕреги гъӕумӕ фӕллӕбурдта. Абӕрегтӕ йеу кизгӕ раскъафтонцӕ. Гъӕуфӕдеси разӕй йеунӕг фӕцӕй; авдей дар рамардта; ӕхсӕзей тонаутӕ си рафснайдта; ӕвдӕймагмӕ куд бацудӕй ӕма ниллӕудтӕй, уотӕ ба ӕ фун ӕ зӕрди ӕрбафтудӕй ӕма ниллӕудтӕй, нӕ бал имӕ ӕндиудта. Кизгӕ ниххудтӕй ма дзоруй Йеунӕгмӕ:
- Се' гасӕй син ку нӕ фӕттарстӕ, уӕд мардӕй ба куд тӕрсис. Йеунӕг уӕд ӕхебӕл ӕрхудтӕй; кизги ӕфхуӕрд ӕ сӕрмӕ нӕбал ӕрхаста ӕма бацудӕй мардмӕ; ӕ къандзол ин исрӕдуфта; уордӕгӕй бийде фесхъиудтӕй ӕма йеунӕги фарсбӕл исӕмбалдӕй.
Уотемӕй йеунӕги ӕ фун ӕриййафта; ӕ хӕдзарӕмӕ ма уодӕгасӕй ӕрхъӕрттӕй, уӕдта ӕ дуйнейӕй рахецӕн ӕй.
Радзурдта ӕй Кертибити Кертиби, Мӕхческ. Ниффинста ӕй Гарданти Михал. «Памятники народного творчества осетин», вып. 11, ф. 87-88.
