ЗАР ГИБИСТИ ДЕБОЛА, ГОСТИТИ ӔНДИРЕ ӔМА КЪЕССАТИ КОЛКӔБӔЛ
Ой, Дебола Ӕндиремӕ ку бадзоруй:
- Ӕвӕццӕгӕн, Къессати Колкӕ тохун райдӕдта
Уӕртӕ хеди билӕбӕл, уой!
Кӕд, зӕгъуй, гиаур сау хъазах Ӕрбатудтонцӕ уӕртӕ Дзӕуӕгигъӕумӕ.
Ӕртӕ бони, зӕгъуй, Дзӕуӕгигъӕуи гъӕуунгти
Тоги къанӕуттӕ ку ивулдӕй, уой тох!
Ой, зӕгъуй, уӕд Гибисти Дебола Гостити Ӕндиремӕ ку нигъгъӕр кӕнуй:
- Ой, Ӕндире, цӕуӕн, зӕгъуй, цӕуӕн,
Уартӕ нин Къессати Колкӕ гиаур ӕзнӕгти нихмӕ тохгӕй
Циуан хеди билӕбӕл ӕ тог ку калуй.
Уӕд сӕмӕ Къессати Колкӕ ку нигъгъӕр кӕнуй:
- Мӕнӕй уин нецибал пайда ес, фалӕ, мӕ хортӕ,
Уӕхе бафӕсвӕд канетӕ Дзӕрӕхи коммӕ
Ӕма ма 'ринцайетӕ, цалдӕн тогцъиртӕй
Нӕ хуӕнхбӕсти маст ма сесайтӕ!
- Нӕ дин феронх кӕндзинан дӕ фӕдзӕхст,
Тох кӕндзинан, ӕнӕхатир тох.
Нӕ гъуддаг дӕр уодзӕнӕй уӕлахез,
Махӕн нӕ раздзӕуӕг ӕмбал Киров ку ӕй!
Ой, Дебола ӕма, зӕгъуй, Ӕндире
Дзӕрӕхи коммӕ ку ниффардӕг унцӕ,
Уоми сӕбӕл гиаур саугин ку рамбӕлуй,
Е сӕбӕл хинӕй ку рацӕуй,
Иуазӕггади рӕуаги сӕ федармӕ ку басайуй.
Ӕхсӕвӕ сӕмӕ ӕзнӕгтӕ ку бампурстонцӕ
Ӕма сӕбӕл ӕнӕхатирӕй ку никкалдтонцӕ.
Дебола сӕмӕ ку фӕццурд ӕй
Ӕма ма си ӕ уоди бӕстӕбӕл
Дууӕ ку рамардта, уой, уӕй, тох!
Дзӕрӕхи коми хургунтӕй
Дебола Ӕндиремӕ ку нидздзоруй:
Махӕн нӕ мӕрдтӕ рахӕсдзӕнӕнцӕ
Нӕ ниййергутӕмӕ хурдзинтӕй!
Ой, рохсаг ӕрбауайтӕ, рохсаг!
Нӕ сӕребари сӕрбӕл ӕ цард ка равардта,
Ой, рохсаг ӕрбауайтӕ, рохсаг,
Уӕ ном ӕности цӕрдзӕнӕй.
Радзурдта ӕй Тогъойти Геуӕрги, 1934 анз, Киристонгъæу.
«Ирон адӕмон сфӕлдыстад», Дзӕуджыхъӕу, 1949, ф, 483-484.
