ДУУӔ КЪУРМАЙ
Еу къурмамӕ адтӕй дӕс сӕгъи ӕма сӕ дзӕгъӕл рауагъта хезунмӕ. Ку ӕризӕр ӕй, уӕдта сӕмӕ рандӕй агорунмӕ. Е уони берӕ фӕййагурдта, фал сӕ нӕ ирдта. Уӕдта еу хумгӕнӕг лӕгмӕ бахъӕрттӕй ӕма имӕ дзоруй:
- Байрайай, хуарз лӕг! - фал Хуцау уой дӕр къурма разиннун кодта ӕма имӕ дзоруй:
- Аци галтӕ дӕр, лӕхъуӕн дӕр мӕхе ӕнцӕ.
Е бабӕй имӕ дзоруй:
- Абӕлти сӕгътӕ рацӕугӕ некӕми фӕууидтай?
Е ба дзоруй:
- Аци кӕндтитӕ сугурӕй дӕр, уӕдта ма уӕртӕ ӕнӕкӕндтитӕ дӕр ма уӕртӕ уой уалӕнгӕ мӕн ӕнцӕ, - зӕгъгӕ, ин ӕ къохӕй рамудта. Е уотӕ бангъалдта, ма кӕд ин ӕ сӕгъти уоми фӕууидта, ӕма ин е кумӕти байамудта, уордӕмӕ уайун байдӕдта. Хуцау сӕгътӕ уоми разиннун кодта, ӕма сӕ иссирдта, еу сӕгъӕ ба си къулух разиндтӕй, уотемӕй. Къурма цӕмӕн нӕ бацийнӕ кодтайдӕ ӕ сӕгъти ирдбӕл ӕма разагъта: «Ӕндзерӕггагӕн мин еци лӕгӕн аци къулух сӕгъӕн ӕнӕ раттун нӕййес». – Ӕма сӕгътӕ, хуймон к ‘адтӕй, еци лӕгмӕ тӕрунти фӕцӕй. Ку имӕ ӕрбахъӕрттӕй, уӕдта имӕ дзоруй:
- Хуцау дин райарфӕ кӕнӕд, мӕнӕн мӕ сӕгътӕ ка байамудта; нур ба дин ӕндзерӕггагӕн мӕнӕ аци къулух сӕгъӕ дӕттун, - зӕгъгæ, æ къохӕй байамудта къулух сӕгъӕмӕ. Е дӕр имӕ дзоруй:
- Хуцаукуд, ӕй ӕз нӕ басастон, уӕдта дин ӕй уингӕ дӕр нӕ фӕккодтон ӕма дин къапек дӕр нӕ бафеддзӕнӕн.
- Хуцаукуд дин ӕй ӕнӕ райсун нӕййес ӕндзерӕггагӕн, уомӕй бабӕй кӕмӕй боз дӕ уæд? - зæгъгæ, бабӕй имӕ дзоруй, сӕгъӕ ке адтӕй, еци къурма лӕг. Уотемӕй ӕй е дӕтгӕ кодта, иннӕ ба ӕй, кӕд мин ӕй федун кӕнуй, зæгъгæ, конгӕ нӕ кодта, ӕма сӕ кӕрӕдзей нӕмун байдӕдтонцӕ. Уӕдта бабӕй имӕ, сӕгъӕ ке адтӕй, е дзоруй:
- Мадта нур а Хуцауи дессаг нӕй? Нур дин ӕз сӕгъӕ ку дӕттун, мӕ сӕгътӕ мин ке байамудтай уой туххӕй, уӕд ӕй цӕмӕннӕ есис?
Иннӕ дӕр хъогъанцӕ фелваста ӕма сӕгъи сунтӕн еу цӕф фӕккодта:
- Ӕз дин къапек дӕр нӕ бафеддзӕнӕн, уой туххӕн ӕма ин ӕ къах ӕз нӕ басастон. Нур ба дӕхуӕдӕг дӕр мӕ разӕй рандӕ уо, кенӕ ба дӕуӕн дӕр мӕнӕ хъогъанцæй дӕ сунтӕ нимморӕ кӕндзӕнӕн, ӕма уотемӕй рандӕ уодзӕнӕ уӕдта, - ӕма бабӕй кӕрӕдзебӕл ралӕудтӕнцӕ ӕма, хуарз ку фӕннадтонцӕ сӕ кӕрӕдзей, уӕдта, сӕгъӕ ке адтӕй, е рацудӕй ӕма имӕ дзоруй:
- Кӕд мӕ нӕнгӕ фӕккодтай, уӕддӕр дин ӕй уадзгӕ кӕнун ӕндзерӕггагӕн. Хуцаукуд, берӕгътӕ дин ӕй ку бахуӕронцӕ, уӕддӕр дин неци бафеддзӕнӕн, зӕгъгӕ ма имӕ радзурдта е дӕр.
Нийфинста Гарданти Константин Соломони фурт, Киристонгъӕу. Ӕ радзорӕг бӕрӕг нӕй.
«Дигорские сказания, по записям дигорцев И.Т. Собиева, К.С. Гарданова и С.А. Туккаева с переводом и примечаниями Всев. Миллера. Труды по востоковедению, издаваемые лазаревским институтом Восточных языков, выпуск XI, Москва, 1902», 39-40 ф.
