АДТÆЙ ЧИКОЛАЙ ӔВЗИГЪД БИЦЦЕУ
Ӕ цард, ӕ зунд ӕма ӕ еугур хъаурӕ дӕр ӕ уарзон адӕнæн нивондӕн ка 'рхӕссуй, ӕ адӕни кадӕ ӕма намус кӕмидӕриддӕр ӕма кӕддӕриддӕр бӕрзонддӕр исесунбӕл ка фӕййархайуй, уӕхӕнттӕ не 'мрӕнгъӕй ку фӕгъгъӕунцӕ, уæддæр сæ ном ба ӕностӕмӕ байзайуй фӕлтӕрти зӕрдити.
Еци адӕнти нимӕдзӕмӕ бахӕссӕн ес Хуадонти Исси дӕр. Е адтӕй ирон советон литератури фиццаг ауӕдзӕгӕнгутӕй еу.
«Ӕз ма фӕстагмӕ еу гъуди зӕгъунмӕ гъавун: цӕмӕннӕ бавналуй еске нӕ финсгутӕй, нӕ ахургонд косгутӕй зӕрдиуагӕй курдиадгун финсӕг, бӕгъатӕр тугъдон лӕг Хуадонти Иссӕ ци гъӕздуг литературон бунтӕ ниууагъта, уони лӕмбунӕг ӕрӕмбурд кӕнун ӕма сӕ киунугӕкӕсӕг дзиллитӕмӕ, уӕлдай ба фӕсевӕдмӕ рахъӕртун кӕнунмӕ. Йе, агъаззаг гъуддаг ку æй нæ литератури историй, уобӕл ба дузердуггӕнӕн еунӕг ӕрдигӕй дӕр нӕййес», — уӕхӕн загъдӕй фӕууй ӕ имисуйнӕгтӕ Хуадони - фурти туххӕй зундгонд ирон финсӕг Мамсурати Дӕбе.
Ке зӕгъун ӕй гъӕуй, Дӕбей дзубандитӕ Исси туххӕй ӕнӕбундорӕй загъд не 'рцудӕнцӕ.
Исси ка зудта, етӕ ӕмцъухӕй дзурдтонцӕ: «Дессаги лӕг адтӕй Иссӕ, цийфӕндуй адӕймаги хӕццӕ дӕр уайтагъд иссеридӕ еумӕйаг ӕвзаг, дӕсни адтӕй адӕни хӕццӕ цӕрунмӕ, игъӕлдзӕг ӕма дзурдарӕхст.
Кенӕ ци цардбӕллон ӕма циргъзунд адтӕй, е ба! Устур курдиади хецау цидӕр ӕнӕкӕрон тухӕ имӕ адтӕй алли рауӕн дар: «Е ма еу минкъий ку рацардайдӕ, уӕд ӕнӕмӕнгӕ, берӕ еститӕ исаразтайдӕ, ӕ цардӕй фулдӕр ке уарзта, еци адӕнӕн, æ райгурӕн бӕстӕн. Берӕ бафтудайдӕ ӕ къохи».
Хуадони фуртбӕл 1990 анзи гъӕуамӕ исӕнхӕст адтайдӕ 80 анзи. Фал...
Уӕддӕр цума ка адтай Хуадонти Иссӕ? Цӕмӕй фескъуӕлхтӕй, ци исаразта хуарзӕй, ӕ ном ин абони цӕмӕн имисӕн?
Хуадонти Басяти фурт Иссӕ райгурдӕй 1910 анзи Чиколай гъӕуи, зӕнхкосӕги хӕдзари. Сӕ бийнонтӕ адтӕнцӕ ӕвадуат ӕма мӕгур. Тухст уавӕрти гъомбӕл кодтонцӕ Иссӕ, ӕ хуӕртæ ӕма е 'нсувӕртӕ. Басят кӕд ӕнахургонд лӕг адтӕй, уӕддӕр хуарз лӕдӕрдтӕй ахури пайда ӕма архайдта, цæмæй æ цæуӕтӕй ескетӕ скъола каст фӕууонцӕ, уобӕл.
Иссӕн ӕхе дӕр хъӕбӕр фӕндӕ адтӕй ахур кӕнун. Граждайнаг тугъди рӕстӕги Дигори партизантӕн гъӕдӕмӕ хуӕруйнаг ку хаста, уӕд ӕй етӕ дӕр ахурмӕ цибӕл кодтонцӕ.
Астанздзудӕй ӕй ӕ ниййергутӕ скъоламӕ равардтонцӕ. Æ зунди ин куд ниффедар кодтонцӕ, уомӕ гӕсгӕ е 'стурдӕр бӕлдӕ адтӕй молло исун. Фал уӕдмӕ Чиколай фӕззиндтӕй ӕндӕр скъола ӕма Иссӕ ахури ӕртӕ анзей фӕсте хъурани амундбӕл æ къох ракъуӕрдта.
1924 анзи бацудӕй гъӕуи скъоламӕ.
1925 анзи Иссӕ бацудӕй фӕскомцӕдесмӕ. Ӕвзигъд биццеу ӕнӕзийнадӕй ӕнхӕст кодта алли ӕхсӕнадон ихӕс дӕр, зӕрдӕргъӕвд адтӕй алцӕмӕ дӕр. Ӕ еци хуарз уодигъӕди менеугутӕмӕ гӕсгӕ 'й фӕскомцӕдеси комитети иуӕнгтӕ 'сфӕндӕ кодтонцӕ ахурмӕ Владикавказмӕ рарветун. Фал ин ӕнзтӕ ке нӕма фагӕ кодтонцӕ, уомӕ гӕсгӕ ‘й нӕ райстонцӕ ӕма уӕд профтехахуради скъоламӕ бацудӕй.
Анзи фӕсте адӕмон ахуйради хайади унаффӕмӕгӕсгӕ ӕрвист ӕрцудӕй Ленинградмӕ технологон институтмӕ, фал ӕ зонундзийнӕдтӕ уойбӕрцӕбӕл федар нӕма адтӕнцӕ ӕма бал ӕй барвистонцӕ рабфакмӕ. Еци хабӕрттӕ Иссӕ фӕстӕдӕр хуарз ӕма бӕлвурдӕй равдиста ӕ киунугӕ «Хъурани исӕвди». Сӕрмагондӕй ба - рабфакмӕ бацӕунбӕл цитӕ бавзурста, уони.
Сӕрӕн биццеу уайтагъд ранигъулдӕй рабфаки ӕхсӕнадон кусти. Архайдта аллихузон спортивон къуӕртти, адтӕй фӕскомцӕдеси иуонг. Ӕ уӕгъдӕ рӕстӕги кастӕй уруссаг ӕма фӕсарӕйнаг классикти куститӕ. Е’ргон здахун райдӕдта финсӕги ‘нӕнцойнӕ кустмӕ, нӕ уагъта ӕ ахур дӕр.
1930 анзи каст фӕцӕй рабфак ӕма уӕд нифсгунӕй балӕвардта ӕ гӕгъӕдитӕ технологон институти электромеханикон факультетмӕ. Исахур си кодта цуппӕрӕймаг къурси уӕнгæ, фал уалинмӕ институти администраций бардзурдмӕ гӕсгӕ гъӕуама ӕртӕ сӕдӕ студенти ӕййивд ӕрцудайонцӕ Новочеркасскмӕ. Иссӕ не 'сарази ӕй уордӕмӕ цӕунбӕл, уомӕн ӕма еци рӕстӕги кодта литературон куст, ӕма ‘й еудадзугдӕр гъудӕй Ленингради финсгути цӕдеси консультацитӕ есун. Уойадӕбӕл фӕкъкъулумпи ӕй ӕ ахурӕй ӕма кусти ниллӕудтӕй Макс Гельци номбӕл заводи фрезеровщикӕй.
Иссӕ кӕддӕриддӕр ахурмӕ ӕ тӕлӕнтӕ ке хаста, уомӕ гӕсгӕ бабӕй ӕ гӕгъӕдитӕ балӕвардта Н. В. Крыленки номбӕл советон баради институтмӕ фӕсаууонмӕ ахури хайадӕмӕ. Уордӕмӕ цӕугӕй базонгӕ 'й Мамсурати Дӕбей хӕццӕ.
«1933 анзи еу цӕйбӕрцӕдӕр ахур кодтон Ленингради университети, - финста Дӕбе. Адтӕй си литературон къуар. Нæ тӕккӕ фарсмӕ ба - юридикон факультет — «Институт советского права». Уоми ахур кодта Иссӕ дӕр.
Иуазӕгуати нӕмӕ арӕхдӕр уионцæ на номдзуд финсгутӕ Николай Тихонов, Александр Прокофьев, Юрий Герман ӕма иннетӕ.
Еухатт нӕ къуарӕн ӕмбурд адтӕй. Ӕмбурд нӕма райдӕдта, уотемӕй мах цалдӕремӕй бакъупхӕ ан институти фиццаг уӕладзуги вестибюли ӕма дзубандитӕбӕл фӕцан. Еци рӕстӕг на размӕ ӕрбацудӕй нӕхе карӕн биццеу, бӕрзонд, хуӕрзконд, къӕбӕлдзугсӕр. Устур сау цӕститӕ калдтонцӕ игъӕлдзӕгдзийнади цӕхӕртӕ».
Иссӕ фӕсаууонмӕ ахур кӕнгӕй куста Ленингради Скӕсӕни адӕнихӕттитӕн рохсади хӕдзари дзиллон культури хайади сӕргълӕууӕгæй.
1935 анзи Хуадонти Иссӕ иссӕй Ленингради финсгути цӕдеси иуонг. Еци анз сӕрди каст фӕцӕй советон баради институт ӕма ӕрвист ӕрцудӕй ТАСС-и сӕрмагонд уацхӕссӕгӕй Туркменимӕ. Куста Туркмений республикон газзет «Туркменская искра»-й ӕма ТАСС-ӕн Туркмений ци хайадӕ ес, уоми. Иссӕ берӕ ӕрмӕг мухур кодта Туркмений районти газеттӕ «Большевик»-и, «Колхозелы»-йи «Ударник»-и ӕма ӕндӕрти.
Дууӕ анзей фӕсте исӕздахтӕй ӕ райгурӕн бӕстӕмӕ ӕма косун райдӕдта газет «Рӕстдзинад»-и редакций уацхӕссӕгӕй.
1938 анзи Исси ракодтонцӕ Сурх Ӕфсади рӕнгъитӕмӕ. Республики ӕфсӕддон комиссариади писӕри ихӕс ибӕл ниввардтонцӕ Елхотти гъӕуи.
Ӕ кусти, е стур ӕхсӕнадон архайди туххӕй ин лӕвӕрд ӕрцудӕнцӕ арфи гӕгъӕдитӕ ӕма номбӕлдаргӕ ӕвзестӕ тамакудонӕ.
Уоми 'й райстонцӕ Коммунистон партий рӕнгъитӕмӕ дӕр кандидатӕй. Цалдӕр мӕйей фӕсте 'й раййивтонцӕ Краснодари краймӕ, уордигӕй ба ӕрвист ӕрцудӕй Сталинградмӕ. Тугъди размӕ Иссӕ ахур кӕнунмӕ бацудӕй Мӕскуй Куйбышевы номбӕл ӕфсӕддон инженерон Академимӕ, фал ин ӕ ахур кӕронмӕ рахъӕртун кӕнун ба нӕ бантӕстӕй. Райдӕдта ӕнамонд тугъд. Хуадони фурт барвӕндонӕй рандӕ ‘й тугъди будурмӕ. Уоми адтӕй уӕлдӕфон-десантон полки штаби хецау.
1941 анзи октябри мӕйи Исси нӕ бӕстӕ гъӕуай кӕнуни Министради бардзурдмӕ гӕсгӕ Орджоникидземӕ исӕрвистонцæ ӕма ин фӕдзӕхст ӕрцудӕй уӕлдӕфон-десантон корпус исаразун, тугъдмӕ 'й бацӕттӕ кӕнун. Иссӕ еци бардзурд исӕнхӕст кодта ӕнтӕстгинӕй ӕма 1942 анзи маййи мӕйи корпуси фӕстаг къуари хӕццӕ ӕхуӕдӕг дӕр исмедӕг ӕй тугъди арти пеллони, Тамани ӕрдӕгсакъадахбӕл.
Лӕгигъӕдгун ӕма ӕхсаргинӕй равдиста ӕхе Иссӕ. Алли тохи дӕр цудӕй разӕй, разӕнгард кодта е 'фсӕддонти знаги дӕрӕн кӕнунмӕ. Еци бӕгъатӕрдзийнади туххӕй ин лӕвӕрд ӕрцудӕнцӕ еу Сурх Турусай орден, фӕстӕдӕр ба Сурх Стъалуй дууӕ ордени ӕма майдантӕ.
- «Ӕз некӕд феронх кӕндзӕнӕн, еци бӕгъатӕр ӕма æхсаргин лӕг куд фӕммардӕй, уой», — имисуй бригади командир, болкъон Богданов. - Дууӕ-ӕртӕ хатти фулдӕр тухти хӕццӕ немуцӕгтӕ ӕма руминӕгтӕ еци бон фӕндзӕймаг хатт ӕрбампурстонцӕ на бригадӕбӕл. Нӕ нихмӕ тугъдӕй ӕнӕгъӕнӕ дивизи берӕ танкити хӕццӕ. Уавӕр фӕттӕссагдӕр ӕй, уой фӕууиннӕй Хуадони фурт командӕгӕнӕн пунктӕй фӕрраст ӕй тохи карзмӕ. Ӕз хуарз уидтон, тугъд куд цудӕй, уой. Иссӕ гранӕттæй фехалдта ӕзнаги дууӕ танки, фал иннетӕ уӕддӕр бурдӕнцæ на акъоппитӕмӕ. Сӕ фӕсте ба цудӕнцӕ немуцаг автоматчиктӕ. Иссӕ ӕ уӕрагбӕл ӕрбадтӕй ӕма автоматӕй знӕгти цагъта. Ӕхсгӕ-ӕхсун ӕхе 'рдигонау цидӕр зардта. Ӕ фарсмӕ тугъдонтӕй некебал байзадӕй. Уотемӕй имӕ фашисттӕ хӕстӕгдӕр кӕнун байдӕдтонцӕ. Цалинмӕ ма ӕ тохӕнгарзи фӕттӕ адтӕй, уӕдмӕ дӕрӕн кодта гитлеронти. Ӕхуӕдӕг дӕр фӕццӕф æй. Немуцӕгтӕ ибӕл ӕртумугъ ӕнцӕ ӕма уӕд Иссӕ ӕ фӕстаг гранатӕй исрӕмугъта ӕхе дӕр ӕма уони дӕр. Гъе адтӕй 1942 анзи октябри мӕйи дӕсӕймаг бони Туапсемӕ хӕстӕг станицӕ Куринскийи.
Гъе уӕхӕн адтӕй коммунист, бӕгъатӕр тугъдон лӕг, зингзӕрдӕ ӕхсӕнадон косӕг, курдиатгун финсӕг ӕма журналист Хуадонти Иссӕ.
Хуадони-фурт ирон советон литератури историй ахӕссуй зингӕ бунат, фал ин аккаг аргъгонд ба нӕма ӕрцудӕй нури уӕнгӕ. Е ӕ рӕстӕги бахаудтӕй устур хъаугъати, беретӕ ин æ идейон позицитӕ, куд финсӕг, уотӕ нимадтонцӕ лӕмӕгъбӕл, раст надбӕл нӕ лӕууй, зæгъгӕ. Ӕ фиццаг фӕлтӕрӕнӕн дӕр ин аккаг аргъ не скодтонцӕ. Фӕстӕдӕр еци цӕстӕнгас еу минкъий фендӕрхузи æй.
Сӕрмагондӕй Хуадони-фурти цард ӕма сфӕлдистади туххӕй ӕртасӕн куст нӕййес. Журнал «Мах дуг»-и фӕрстӕбӕл бакӕсӕн ес Мамсурати Дӕбей ӕма Бесати Тазей имисуйнӕгтӕ, газет «Рӕстдзинад»-и Гобати Геуӕрги ӕма Кертанти Тъӕхири очерк, Хъодзати Ӕхсари бацӕттӕгонд киунугӕ «Хорзӕй баззай, Ир»..., ирон финсгутӕй тугъди ка фӕммардӕй, уони туххӕй Калоти Риммӕ ӕма Джиккайти Дуняй арӕзт киунугӕ «Они сражались за Родину» ӕма «Писатели Северной Осетии», зæгъгæ, уоми Исси цард ӕма сфӕлдистадӕбӕл цубур ӕрмӕг дӕттуй Ардасенти Хадзибатӕр.
Гъе, фал аци ранимад ӕрмӕгутӕй алкӕми дӕр ес аллихузон ӕнӕбӕлвурддзийнӕдтӕ. Бафеппайун ӕмбӕлуй, хецӕн факттӕ исбӕлвурд кӕнун нур дӕр нӕ къохи ке нӕма бафтудӕй, уой.
Хуадонти Исси хӕццӕ киунугутӕкӕсгутӕ базонгӕ ӕнцӕ 1930 анзи. Ӕрмӕст беретӕ куд ӕнгъӕл ӕнцӕ, уотемӕй «Хъурани мӕлӕти» хӕццӕ баст нӕй финсӕги фӕззинд литератури, фал роман «Устур горӕти»-й хӕццӕ.
Роман «Устур горӕти»-й фиццаг хаййӕй сӕргӕндтӕ мухургонд ӕрцудӕнцӕ журнал «Литературон хъазуатон»-и дуккаг ӕма ӕртиккаг номерти 1933 анзи. Еци анз Ленингради Финсгути цӕдеси рауагъдади мухури рацудӕй ӕ дуккаг киунугӕ «Хъурани мӕлӕт» («Гибель корана») уруссаг ӕвзагбӕл. Еци киунугӕ рауадзунмӕ ин хъӕбӕр устур ӕнхус фӕккодта Къосирати Сӕрмӕт.
Уой фӕсте ма журнал «Мах дуг»-и ниммухур кодта Туркменти цардбӕл финст уадзимис «Джума». Фӕстӕдӕр еци радзурд мухури рацудӕй Бесати Тазе ӕма Токати Асӕхи исарӕзт «Ирон радзурдти» киунуги дӕр.
Иссӕн ӕхе финститӕй бӕрӕг ӕй, газеттӕ ӕма журналти ин дӕсгай радзурдтӕ ке рацудӕй. Хуӕрзӕрӕги ба рабӕрӕг ӕнцӕ архивти, мухури ка нӕма адтӕй, ӕ еци къохфинститӕ.
Иссӕ кӕд 32 анземӕй ӕндӕр нӕ рацардӕй, уӕддӕр ирон литератури ниууагъта зингӕ фӕд, ахсгиаг литературон бунтæ. Куд зонӕн, уотемӕй дӕс ӕма инсӕйӕймаг ӕнзти ӕрмӕст ирон литературӕ нӕ, фал Уӕрӕсей еугур адӕнти литературитæ дӕр федарӕй цудӕнцӕ, инсӕйӕймаг ӕнзти ци нӕуӕг фӕндагбӕл ӕрлӕудтӕнцӕ, уобӕл.
Еци ӕнзти фӕззиндтӕнцӕ ирон советон литератури дӕр фиццаг уацаутӕ, романтӕ, поэмитӕ.
Еци фиццӕгтӕй адтӕй Хуадонти Исси «Устур горӕти»-и дӕр. Ирон советон романи хъисмӕт кӕддӕриддӕр лухгонд цӕуй, алли рауӕн дӕр ин ӕ равзурд Фӕрниати Къостай номи хæццæ бӕттунцӕ. Ӕ хуӕд фӕсте ба ӕвӕрд цӕуй Боцити Барони роман «Саст рӕхыс», кӕци рацудӕй 1936 анзи.
Фал еци гъуди раст нӕй. Иронхуати байзадӕй Хуадонти Исси ном, кӕд ӕма уой байвӕрӕн ирон литератури къӕбеци устур ӕй, уӕддӕр. Уомӕн ба ӕвдесӕн ӕнцӕ Дӕбей зӕгъдтитӕ: «Устур горӕти» ӕй ирон литератури нӕуӕг ӕскъуӕлхтдзийнадӕ, дуккаг роман ирон ӕвзагбӕл «Уады уынӕр»-и фӕсте. Еци дууӕ романи ирон литератури дууӕ дзӕкъолони ӕнцӕ. Еци уадзимиси фиццаг киунугӕ æнӕгъӕнӕй мухури рацудӕй 1934 анзи. Редактор ин адтӕй Дзагурти Губади. Киунугӕкӕсгутӕ ма ӕнгъӕлмӕ кастӕнцæ дуккаг хаймӕ дӕр, фал е нӕбал фӕззиндтӕй, кӕд финст ӕрцудӕй, уӕддӕр.
Хуадони фуртӕн бантӕстӕй дигорон ӕвзагбӕл фиццаг роман Ниффинсун ӕма си дигорон ӕвзаги сосӕгдзийнӕдтӕй, гъӕздугдзийнӕдтӕй, ӕ аллихузон фӕззелӕнтӕй арӕхстгинӕй испайда кӕнун. Уой банкъарӕн ес, киунугӕ дӕ къохмӕ ку райсай ӕма ин ӕ фиццаг рӕнгъитӕмӕ ку, ӕркӕсай, уӕддӕр.
Лигъз ӕма фӕлмӕн ӕвзаг, уайтагъддӕр киунугӕкӕсӕг рартасуй, автор тухфинст ке нӕ кодта. Устур арӕхстгинӕй пайда кодта автор диалогтӕй дӕр.
«Нельзя не отметить тут же и замечательного дигорского языка романа, умения автора вести читателя шаг за шагом за собой, приковывая его внимание к личности Иласа. Нельзя не отметить и того, что Илас в осетинской советской литературе первый тип из учащейся молодежи, да из такого в прошлом отсталого фанатичного села как Чикола - крепости ислама Осетин» - финста Дзагурти Губади.
Финсӕг ӕвзаг хуарз ке зудта, уомӕн адӕмон ӕмбесӕндта дӕр, дзубандитӕ дӕр хуарз ӕвдесӕн ӕнцӕ. Хъӕбӕр берӕ си ес аллихузӕн зӕрдӕмӕдзӕугӕ рабарӕнтӕ ӕма метафоритӕ.
Гъӕздуг ӕма бӕркадгун ӕй эпитеттӕй, гиперболитӕй. Уӕлдай фулдӕр хегъӕдондзийнадӕ ба разиндтӕй Иссӕмӕ ӕрдзи нивтӕ ӕвдесгӕй. Е иссердта циуавӕрдӕр дессаги лирикон хуарӕнтӕ ӕрдзи афӕнттӕ равдесунӕн.
«Хор хуӕнхти фӕсте ӕхе рауагъта. Куд арфдӕр лӕсгӕ цудӕй, уотӕ ӕ хузӕ сурхдӕрӕрдӕмӕ ӕййивта. Кӕдзос арв фиццаг рауæнæй-рауӕнти, уӕдта еугурӕй дӕр тогӕй хурсти хузӕн ниирухс ӕй. Хор нӕбал зиндтӕй, гъӕдтӕ тар кодтонцӕ. Дзӕхӕрадӕнтти бӕлӕсти бунтӕ нитталингӕ 'нцӕ. Айдагъ арв ма сурх ӕрттивта. Куйти гъӕр бӕрӕг игъусун райдӕдта. Гъоцитӕ 'ма уӕситӕ сӕ кӕрӕдземӕ уастонцӕ.
Ӕрӕхсӕва ‘й. Арв кӕдзос ӕнӕбӕрцӕ берӕ ирд цӕститӕй кастӕй Иласмӕ. Мӕйӕ ‘й къохдарӕни ӕрдӕги хузӕн гъӕуай кодта. Адӕн ниххустӕнцӕ». (12-аг фарс, роман «Устур горæти»).
Егур еци ранимад фӕрӕзнити фӕрци ирӕзуй уадзимиси идейон гъуди, зиннуй нӕуӕг адӕймаги райгурд.
Хъӕбӕр раст бафеппайдта Дзагурти Губади Хуадонти Исси романӕн хатдзӕгтӕ кӕнгӕй: «Жизнь показана реально, роман носит реалистический характер, но с заметным налетом натурализма, что объясняется молодостью писателя, делавшего первые, но довольно смелые шаги на литературном поприще... несмотря на наличие в нем замеченных недостатков, роман имеет большое художественно-познавательное значение».
Еу загъдӕй Хуадонти Исси роман «Устур горӕти» банимайӕн ес ирон литератури устур ӕнтӕстбӕл. Иссӕ, ӕ уарзон адӕнӕн ӕ уоди артӕй цӕхӕртӕ ниууагъта ӕма ‘й мах дӕр нӕ зӕрдити дардзинан рӕсугъдӕй.
Тменати Дзерассӕ.
Цӕгат Иристони наукон-ертасӕн
институти наукон косӕг.
Cм.: Ирæф №1, 1991 анз.
