Гарданти Михали цард æма исфæлдистадæ
Гарданти Хъайтухъи фурт Михал райгурдӕй 1870-аг анзи Киристонгъӕуи (нур г. Дигорæ) Терки области рӕстæмбес цӕрӕг бийнонти хӕдзари. Михалбӕл 4-5 анзи ку рацудӕй, уӕд ӕ фидӕ рамардӕй ӕма биццеу байзадӕй седзӕрӕй ӕ мади Скъоламӕ цӕун афонӕ ку иссӕй биццеуӕн, уæд æй æ мадӕ равардта Киристонгъӕуи райдайӕн скъоламӕ. Еци скъола зӕрдӕргъӕвд биццеу каст фӕцӕй ӕнтӕстгинӕй ӕма хӕдзари агъаз кӕнун байдӕдта ӕ мадӕ ӕма хестӕр ӕнсувӕр Цӕраййӕн. Цӕрай ба уӕд ахургӕнӕгӕй косун райдӕдта еци скъолай. Михал уӕгъдӕ рӕстӕги арӕх цудӕй е ‘нсувӕрмӕ, скъоламӕ.
1887 анзи Михал бацудӕй Ӕрӕдони дини семинармӕ ӕма æй хъӕбӕр хуарз бӕрӕггӕнӕнти хӕццӕ каст фӕцӕй 1893 анзи. Еци анзӕй ба 1943 анзи уӕнгӕ фӕккуста ахургӕнӕгӕй Гӕлиати, Гизӕли, Хумӕллӕги гъӕути. Ӕ райгурӕн гъӕуи дӕр берӕ ӕнзти адтӕй ахургӕнӕг ӕма скъолай сӕргълӕууӕг. Хуӕдхуӕцӕг паддзахи рӕстӕги Цӕгат Иристони кӕмидӕр куста, уоми адтӕй зӕрдиуаг косӕг. Кӕстӕр ирӕзгӕ фӕлтӕри аразта ӕма гъомбӕл кодта прогрессивон гъудитӕбӕл, игурун сӕмӕ кодта паддзах ӕма ӕ фӕсдзӕуинтӕ, медбунатон хецӕуттæмæ нӕуинон зунди рахаст.
Михалӕн ӕ еци куст, ке нихмӕ дзурдта, етӕ еске ӕвзагӕй ӕнӕ бафеппайгӕ нӕ фӕцӕнцӕ. Ӕма Михали еу скъолайӕй иннӕ скъоламӕ, еу гъӕуӕй иннӕ гъӕумӕ раййевӕ-баййевӕ кодтонцӕ. 1906-1908 ӕнзти ба ӕй ниййахӕстонцӕ ӕма ӕрвист ӕрцудӕй Иристонӕй, куд нӕ ин уа барӕ ӕ райгурӕн хуӕнхбӕстӕмӕ цӕуӕн, уотемӕй. Е адтӕй, Хумӕллӕги ма ку куста, уӕд. Сосӕг революцион куст ке кодта, уой туххӕй Михал уӕди рӕстӕги инӕлар — губернатор Колюбакини тӕрхонмӕ гӕсгӕ ӕрвист ӕрцудӕй г. Ростов-Донмӕ. Уоми дӕр ӕ революцион куст ке нæ уагъта, уой туххӕй бабӕй ӕй етӕ дӕр, тӕссаг адӕймаг æй, зæгъгæ, фӕстӕмӕ е 'рветгутӕмӕ ӕрбарвистонцӕ. Уӕд Колюбакин ратӕрхон кодта, Михалӕн е уӕнгтӕ райвазӕн кӕми нӕ уа, уӕхӕн хонхи цъасӕмӕ ӕй рарветун гъӕуй, зӕгъгӕ. Ӕма Михали бамедӕг кодтонцӕ Дигоргоми Гӕлиати гъӕуи. Уоми ин барӕ равардтонцӕ ахургӕнӕги куст кӕнун, ӕрмӕст жандармти цӕстдарди хӕццӕ. Уоми дӕр ӕй берӕ нӕ бауагътонцæ е «уӕнгтӕ райвазун», цалинмӕ бабӕй адӕмти хæццæ зонгӕ кодта, уӕдмӕ ӕй раййивтонцӕ Гизӕли гъӕумӕ ахургӕнӕгӕй, ӕ куст ӕма ин ӕ архайдмӕ кӕсгутӕ куд уа, уотемӕй. Михал Гизӕли дӕр ӕ сосӕг революцион кустбӕл не 'сустурзӕрдӕ ӕй. Фал ин ӕ кустаргъгӕнгутӕ ӕгӕр исарӕх ӕнцӕ. Михал бабӕй ахӕст ӕма ӕрвист ӕрцудӕй ӕ райгурӕн Иристонӕй Дони облӕстмӕ, кӕд уоми еске къохӕй ӕ мӕрдти сикъитбӕл исӕмбӕлидӕ, зӕгъгӕ. Ростови ин фӕййагъаз кодтонцӕ социал-демократтӕ. Фал Михали уоми ун сосӕгӕй нӕ байзадӕй. Ростови градоначальник (горӕти хецау) ӕй фӕстӕмӕ ӕрбарвиста Владикавказмӕ ӕма ӕй исӕмбӕлун кодтонцӕ Колюбакинбӕл. Уотӕ тох ӕма революцион куст кодта Гарданти Михал ӕ уодӕн тас уогӕй дӕр. Паддзах ӕ бунатӕй гӕлст ку'рцудæй 1917 анзи, уӕд мартъий райдайӕни Михалмӕ фӕдздзурдтонцӕ Хуӕнхти клубмӕ гор. Владикавкази революцион куст рапарахат кӕнунмӕ, цӕмӕй паддзах ӕма ӕ фӕсдзӕуинтти хецаудзийнадӕ бунтондӕр пурхгонд ӕрцӕуа Терки облӕсти ӕма исирӕза адӕмон - демократон хецаудзийнадӕ еугур горӕтти, гъӕути ӕма станицити дӕр.
1919 анзи Гардани фурт адтӕй реввоенсовети иуонг æма С. Орджоникидзей фӕндонмӕ гӕсгӕ ӕрвист ӕрцудӕй Киристонгъӕу ӕма Дигоргоммӕ Деникин ӕма Шкурой ӕфсӕдти нихмӕ тохмӕ. Фал уорсгвардионти тухтӕ адтӕнцӕ фулдӕр, æма керменисттӕ, уони хӕццӕ Михал дӕр, Гурдзистонмӕ ӕфцӕгбӕл бахизтӕнцӕ.
1920 анзи ӕнсури мӕйи Кавказаг крайи компартий унаффӕмӕ гӕсгӕ Михал ӕмбӕлтти хӕццӕ ӕрвист ӕрцудӕй г. Тбилисӕй Дигоргоммӕ. Уоми иннӕ коммунисттӕ - керменистти хæццӕ ӕрфедар кодтонцӕ Советон хецаудзийнадӕ.
Михал ӕ революцион кусти хӕццӕ ма активонӕй архайдта скъолати ахурдзийнади райарӕзти, цæмæй скъолати программитӕмӕ хаст ӕрцӕуа фӕллойнадон ахуртӕ.
1917-1932 анзти Гарданти Михал уидӕ еугур крайти: облæсти, округи ӕма районти съездти алкӕддӕр дзоргӕ ӕрцӕуидæ ирӕзгӕ фӕлтӕри ахур ӕма гъомбӕладон фарстатӕбӕл, адӕми ӕхсӕн ӕнахургонддзийнадӕ фесафунбӕл. Уой туххӕй кустонцӕ ликбезтӕ.
1920-22 ӕнзти ба реввоенсовети иуонг уогӕй ӕма Дигори косгӕй, гъӕути скъолати куст аразта советон скъолатӕ Гусови программити бундорбӕл.
1920 анзӕй ба 1937 анзи уӕнгӕ Михал еудадзугдӕр адтӕй Киристонгъӕуи совети, Дигори райӕнхӕсткоми, облӕсти ӕнхӕсткоми ӕмбурдти активон архайӕг, куд еци советон организацити пленумти ӕма советти иуонг.
Еци еу рӕстӕги ма Михал устур агъаз кодта, ӕнӕзӕнхӕ фӕллойнӕгӕнӕг адӕмӕн, цӕмӕй дзиуӕртти косгути ӕма гъӕздугути берӕ зӕнхитӕ уодгоймаги сӕрбӕл ӕмхузон иуӕрст цудайуонцӕ ӕгас Цӕгат Иристони гъуӕти дӕр.
Михали хъиамӕт хъӕбӕр берӕ адтӕй, цӕмӕй районти гъӕути исдзурдтайдӕ радио, цӕмӕй фӕллойнӕгӕнӕг дзиллити хӕдзӕрттӕ ниррохс кодтайдӕ электрон цирагъ.
Гарданти Михал ӕ фӕллӕдӕрунӕй фӕстӕмӕ ӕ рамӕлӕти уӕнгӕ дӕр ци берӕ къабазгун куститӕ бакодта, (адӕмон, советон, революцион ӕма ахурадон), уоми зингӕ бунат ахӕста 'сфӕлдистон куст. Арӕзта ӕма ниффинста дигорон ӕвзагбӕл ахургӕнӕн (грамматики ӕма кӕсуни) киунугутӕ. Уонӕй «Дигорон райдайӕн киунуги» 1 хай рацудӕй 1924 анзи мухури, ӕ дуккаг хай ба 1927 анзи. Уони фӕсте ба ниффинста наукон грамматикӕ дигорон ӕвзагбӕл. Айдагъ скъолай ахури ирӕзтбӕл н’адтӕй Михали куст, фал берӕ уадзимистӕ ниффинста ӕхсӕнадон, политикон, этнографион ӕма литературон фарстатӕбӕл дӕр. Куд финсӕг ӕма драматург куста дигорон аййевадон дзурди ирӕзтбӕл. Ниффинста дууӕ пьеси. Берӕ прозаикон ӕма поэтикон уадзимистӕ. Е’ргон устур ӕхцулӕй ӕздахта сувӕллӕнтти аккаг литератури ирӕзтмӕ дӕр.
Фал 1942-43 ӕнзти Фидибӕсти тугъди рӕстӕги ин немуцаг оккупанттӕ ӕ райгурӕн Киристонгъӕу ку байахӕстонцӕ, уӕд Михали финстити фулдӕр хай фесавдӕй. Зӕронд лӕг (уӕд Михалбӕл цудӕй 73 анзи) исбадтӕй е’стъоли уӕлгъос ӕма e‘сӕвд финститӕбӕл нӕуӕгӕй гъуди кӕнун ӕма сӕ финсун райдӕдта. Е’стур хъиамӕт адтӕй, кӕд ин берӕ цидӕртӕ фӕстæмӕ иснӕуӕг кӕнун бантӕстӕй, уӕддӕр ӕ наукон грамматикӕ ба мухури нӕбал фӕууидта. (Абони дӕр нӕма фӕззиндтӕй еци киунугӕ. Ӕвӕдзи имӕ гъӕуй ахургӕндтӕн сӕ гъос ӕрдарун.)
Михал устур ахсгиаг куст бакодта нӕ адӕмон сфӕлдистадӕ ӕрӕмбурд кӕнуни. Зилдӕй будури гъӕути ӕма хуӕнхаг зин цӕуӕнти ци дигорон гъӕутӕ ӕрӕнцадӕй, уоми. Фарста зӕронд лӕгти ӕма рацӕргӕ уостити, игъуста лӕгти зартӕмӕ ӕма нихӕси дзубандитӕмӕ. Ӕрӕмбурд кодта ӕма ниффинста аргъӕуттӕ, таурӕхътӕ, кадӕнгитӕ, зартӕ, гъарӕнгитӕ, ӕлгъиститӕ, дигорон ӕгъдӕуттӕ, ӕмбесӕндтӕ ӕма бацеу-бацеутӕ. Исаразта си хецӕн киунугӕ ӕма ӕй рауагъта мухури. Зӕгъун гъæуй уой, ӕма Михал, ӕ разӕй ци рохсадӕбӕл косгутӕ адтӕй, уонӕй иста зонундзийнӕдтӕ, нифс ӕма разамунд. Уой фӕдбӕл мӕ зӕгъун фӕндуй еу къуар дзурди.
19 ӕноси 30-50 ӕнзти ахуйради гъуддаг сӕхемӕ есун байдӕдтонцӕ дини косгутӕ. Сӕ куститӕ син тӕлмаци кодтонцæ: Ӕгъузати Иуане, Жукъати Петр, дзиуари косгутӕ Колити Аксо, Цорай - фурт ӕма ӕндӕртӕ фӕлтӕрӕнтӕ кодтонцӕ фиццаг ирон азбукӕ аразунбӕл литературон исфӕлдистӕй. Уруссаг ахургӕндтӕ А. Шегрен, И. Чепиговский ӕма ӕндӕрти агъазӕй ӕвардтонцӕ бундор ирон ӕвзаг ахур кӕнунӕн.
Цӕгат Иристони 70-80 ӕнзти ахургӕнӕндӕнтти хæццæ ирӕзтæй ирон, дигорон адӕмон интеллигенци дӕр.
Хетӕгкати Къоста ӕ разӕй кӕмӕн лӕудтӕй Цӕгат Иристони, еци демократион интеллигенций къуари федарӕй лӕууй Гарданти Хъайтухъи фурт Михали ӕнӕмӕлгӕ ном дӕр. Михал цардӕй ӕма куста ирон адӕми зундгонд фурттӕ Гасити Афанасий, Цӕголти Геуӕрги, Хъанухъти Инал, Уруймӕгти Харитъон, Дзасохти Гиго, Коцойти Арсен ӕма ӕндӕрти хӕццӕ.
Е'ригон ӕнзтӕй фӕстӕмӕ Михал уидта адӕми дууехдзийнадӕ ӕма тох кодта социалон ӕмбарӕбӕл. Гарданти Михал берӕ фӕццардӕй, ӕ фӕсте ба ниууагъта ӕ берӕ фӕллӕнттӕ науки дӕр ӕма аййевадон литератури дӕр. Гарданти Михал адтæй активон ӕнхусгӕнӕг академик В. Миллерӕн ӕ «Уруссаг - немуцаг - ирон дзурдуати» ӕма фиццаг уруссаг — ирон дзуардуати арӕзтӕдти.
Куд ахургонд ӕма финсӕг, уотӕ Михал тох кодта ӕфхуӕрд ӕма мӕгур адӕми сӕрбӕл. 1908 анзи горӕт Владикавкази Михалӕн ци устур куст («Социалон экономикон очеркти киунугӕ (нури Цӕгат Иристони») мухургонд ӕрцудӕй ӕма цензурӕй ба еуварсгонд ӕ фӕззинди, уоми тох кодта косӕг адӕми ӕфхуӕргути нихмӕ. Советон доги Гарданти Михал ниффинста ӕма геппи рауагъта историон-статистикон — экономикон ӕма революцион очерк «Киристонгъӕуи цард», 1926 анзи ба дигоронау «Абети ӕма кӕсуни» киунугутӕ I-II хаййемӕй. Михали финстӕй адӕмон сфӕлдистади ӕмбурдгонд «Иристони адӕмон сфӕлдистади циртдзӕвӕнтӕ» ке фӕззиндтӕй, гъе уой ӕрдӕги адтӕй ахсгиаг байвӕрӕн. Фал ин си беретӕ ба уруссаг ӕма дигорон ӕвзагбӕл къохфинстӕй байзадӕнцӕ:
1. Революци ӕма контрреволюци 1905—1920 ӕнзти Ц. И.
2. Ирон бийнонти фӕззинд ӕма ирӕзти истори.
3. Иристони ӕлдардзийнадӕ.
4. Нӕртон ӕма зӕронд дигорон дин.
5. Нартӕ ӕма Дигори фидтӕлти ӕгъдӕуттӕ.
6. Драмитӕ «Хъадамантӕ», «Фӕдес».
7. Сувӕллӕнттӕн аргъӕутти ӕмбурдгонд ӕма ӕндӕртӕ.
Нуртӕккӕ Гарданти Михали геппи куститӕ нӕ библиографий ӕнцӕ хъӕбӕр ӕстӕн. «Социалон-экономикон очерктӕ (нуриккон Цӕгат Иристони) ӕнцӕ еунӕг экземпляри, Ленини номбӕл библиотеки ӕстӕн киунугути хайади. Алкӕмӕн нӕ бантӕсдзӕнӕй бакӕсун Гардани фурти финститӕ «Ирон адӕми сфӕлдистади циртдзӕвӕнтӕ», «Киристонгъӕуи царди уавӕрти, - историон - экономикон ӕма революцион очерк» ӕма 'ндӕртӕ.
Революций агъоммӕ Михал нимад цудӕй зундгонд публицистбӕл. Хетӕгкати Къостай хӕццӕ куста газет «Цӕгат Кавказ»-и. Революцион — демократон здӕхт кӕми адтӕй, уӕхӕн статьятӕ мухур кодта «Казбек», «Терк», «Приазови край», «Кавкази азӕлд» ӕма иннӕ газетти. Михал куста Тбилиси газеттӕ «Социал-демократ», «Тох» ӕма «Косӕги».
Михали ном баст ӕй Цӕгат Иристони устурдӕр революцион ӕзмӕлди хӕццӕ. Активонӕй архайдта Иристони ахургӕнгути съездти, Туйгъанти ӕма хъазахаг гъӕздугути зӕнхитӕ байсуни.
Фиццаг уруссаг революций зӕрдиуагӕй ке архайдта, уой туххӕй къуар хатти ахӕст дӕр ӕма ӕрвист дӕр цудӕй Терки, облӕстӕй инӕлар-губернатор Калюбакини ахъилдӕй.
Еу рӕстӕги хуӕнхаг национ Совети иуонг ку адтӕй, уӕд карзӕй тох кодта, Цӕгат Кавказ ка гъавта Уӕрӕсейӕй ратонунмӕ, еци панисламистти, реакционерти ӕрдонгти нихмӕ.
Идарддӕр Гардани-фурт ӕвӕлмӕцгӕ тохгӕнӕгӕй ӕхе бавдиста большевикон партий разамундӕй Деникини оккупантти нихмӕ. Адтӕй партизанти рӕнгъити. Михал берӕ ӕнзти дӕргъи адтӕй активон архайӕг ӕхсӕнадон - партион кустити: 50 анземӕй фулдӕр фӕккуста ахурдзийнади къабӕзти. Гардани-фурт адтӕй хумӕтӕг ӕма фӕразон адӕймаг. Сувӕллӕнтти гъомбӕладон фарстатӕмӕ еудадзугдӕр ӕ цӕстингас дардта, хуарз ӕй ка зудта, етӕ уотӕ зӕгъунцӕ: «Михалмӕ десгӕнгӕй игъосианӕ, ку дзоридӕ, уӕд, — зӕгъуй зӕронд ахургӕнӕг Тауасити Фацбай. «Кӕд Хетӕгкати Къоста адтӕй адӕмон поэт, - зӕгъуй е, - кӕд Туйгъанти Махарбег ба - адӕмон хузӕгӕнӕг, уӕд Гарданти Михал ба адтæй адӕмон ахургӕнӕг».
Иристони историй туххӕй ци зингӕ уадзимистӕ финст ӕрцудæй, уоми Михали кой дӕр ӕрцӕуй. Профессор Тотойти Михал ӕ историон куститӕ: «Цӕгат Иристони культурӕ ӕма ӕхсӕнадон гъудий историй очеркти реформи рӕстӕгути» (г. Орджоникидзе, 1957 анз). «ХХ ӕноси райдайӕни ӕхсӕнадон гъуди ӕма культури историй очерктӕ (г. Орджоникидзе, 1968 анз); «Адӕмон ахуйрадӕ ӕма педагогон гъуди Цӕгат Иристони революций агъоммӕ», гор. Орджоникидзе, 1962 анз). Æма Дзидзойти М. У. ӕ киунугӕ «Æхсӕнадон-политикон паддзахадон барадон гъуди Цӕгат Иристони»-й хуарз аргъ искодтонцӕ Гарданти Михали паддзахадон-барадон цӕстингасӕн (гор. Орджоникидзе, 1979 анз.)
Ке зӕгъун ӕй гъӕуй, еци цубур очеркти не 'нгъизтӕй Михали берӕкъабазон архайд ӕнхӕстӕй равдесун. Уотӕ Тотойти М. С. Михали ахургӕнӕги кустӕй ӕрхаста еугай факттӕ.
Иннӕ автор Дзидзойти М. У. уӕлӕнгай ӕркастӕй Гардани фурти очерк «Кавкази революций агъоммӕ ӕхсӕнадон-политикон ӕма барадон гъуди»-мӕ. Уой туххӕй испайда кодта ӕрмӕстдӕр зундгонд рохситауӕги хъиамӕттӕй «Ӕлдайрадӕ Иристони».
Тотой фурт ӕма Дзидзой фурт исбӕрӕг кодтонцӕ, кӕд Гарданти Михали кустити ӕма гъудити адтӕй еугай рӕдудтитӕ, уӕддӕр е ке адтӕй прогрессивон ӕма адӕмӕн берӕ пайдайаг фӕллӕнттӕ ке ниууагъта, уой.
Фал комкоммӕ ба зӕгъун ӕнгъезуй, абони дӕр ма фагӕ ӕргомгонд нӕма ӕрцудӕнцӕ Гарданти Михали берӕкъабазон исфӕлдистадӕ, ӕ берӕ мухургонд фӕллӕнттӕ æма къохфинститӕ, уруссаг культури ӕ бастдзийнадӕ, ӕ педагогон цӕстингас, е 'хсӕнадон куст еумӕ райсгӕй.
Еу загъдӕй, Гарданти Хъайтухъи фурт Михал ци 92 кадгин анзи фӕццардӕй, уонӕй еунӕг бон дӕр дзӕгъӕли нӕ фесавдӕй.
Ӕ мӕлӕти бони уӕнгӕ дӕр, ӕ устур зунд ӕма ӕ кустуарзондзийнадӕ дӕр нӕ байехсудӕнцӕ.
Михал адтӕй ӕ адӕми цома, ӕ ихуӕрст, ӕхе уод ка нӕ хестӕр кодта адӕми цигъӕуӕгтӕй. Михал ци фӕллӕнттӕ ниууагъта ӕ фӕсмӕрдӕ, уонӕн нӕ адӕми хӕзнадони ес устур аргъ.
Михали кади ном цӕруй ӕма цӕрдзӕнӕй куд финсӕг ӕма драматург, куд пиблицист ӕма этнограф, куд адӕмон ахургӕнӕг ӕма ӕхсӕнадон косӕг.
Михали ӕвӕлмӕцгӕ зӕрдӕ ӕ косунӕй банцадӕй 1962 анзи ноябри мӕйи.
Лолати Батраз
См.: Ирæф №1, 1991 анз.
