ФӔСПОЛЯРИЙ БУРДӔНТИ
1905 анзи 9 январи Цӕгат Иристони, кӕддӕри Мӕхчески, нури Ирӕфи райони Фӕрӕскъæтти гъӕуи рӕстӕмбесцӕрӕг зӕнхкосӕг лӕг Худӕлти Налухъи фурт Алексейи хӕдзари сӕнтӕстӕй фиццаг сувӕллон. Ном ибӕл исивардтонцӕ - Харитъон.
Гъӕугувд искодтонцӕ Худӕлти устур бинонтӕ нӕуӕгигурди туххӕй - хӕдзарӕн косӕг, Фидибӕстӕн ба - гъӕуайгӕнӕг фӕззиндтӕй, зӕгъгӕ.
Сабийӕй райдӕдта Харитъон хӕдзари куститӕ кӕнун: фонсмӕ зелун, хуасӕ кӕрдун, хумӕ кӕнун. Уалдӕнмӕ бацудӕй Мӕхчески дини скъоламӕ ӕма'й бааргъудта, уой фӕсте бацудӕй райдайӕн уӕлдӕр училищемӕ ӕма си еу анз райахур кодта.
1924 анзи Харитони бинонтӕ хонхӕй ралигъдӕнцӕ Дур-Дури гъӕумӕ. Еци анз ӕй райстонцӕ фӕскомцӕдеси рӕнгъитӕмӕ, минкъий фӕстӕдӕр ба'й исӕвзурстонцӕ гъӕуи фӕскомцӕдеси кири сӕргълӕууӕгӕй.
Хъӕбӕр фӕндадтӕй биццеуи идарддӕр ахур кӕнун, рабфакмӕ бацӕун, фалӕ'й Сурх Ӕфсадмӕ службӕмӕ ӕрветунцӕ уой ку фегъуста, уӕд ӕхецӕн загъта: "Кӕд фӕскомцӕдес уӕхӕн унаффӕ рахаста, уӕд мӕнӕн ӕнхӕстгӕнгӕ'й еци гъуддаг".
Медтугъди цӕхӕртӕ Иристонмӕ ку схъӕрттӕнцӕ, уед Харитъон ӕнцад нӕ бадтӕй. Парти Кермени сӕргълӕугутӕй Дигоргоми ка архайдта, уонӕй еу - Худӕлти Иласи сосӕг фӕдзӕхститӕ ӕнхӕст кодта. Ӕ кӕнгӕ фидӕ худта Харитъон Иласи, ӕ алли унаффӕ дӕр уой хӕццӕ адтӕй, ӕ ниййергутӕй ку райдард ӕй, уӕд.
Харитон Сурх Ӕфсади рӕнгъитӕмӕ цӕуй, уой ку базудта Илас, уӕд си хъӕбӕр фӕббоз ӕй, ниххудтӕй ӕма'й бафарста:
- Инӕлар исун дӕ фӕндуй?
Ка 'й зонуй, ӕма исуон, ходӕзмолӕгӕнгӕ дзуапп равардта Харитон.
Иласи дзурдтӕ ӕцӕг разиндтӕнцӕ. Харитъон, ӕ служби даргъ нӕдтӕбӕл берӕ гъезӕмӕрттӕ фӕууингӕй, ӕфсӕддон скъолати ахурти, Фидибӕсти Устур тугъди дзамани карз тохти фӕсте иссӕй инӕлар. Фал уӕдмӕти берӕ цаутӕ ӕрцудӕй Харитъони царди.
1927 анзи уӕнгӕ фӕцӕй Харитъон Дзӕуӕгигъӕуи ирон бӕхгин ӕфсади полкъи, уӕдта, куд хуӕздӕр сурхӕфсӕддон, уотӕй рарвистонцӕ Краснодармӕ кавалерион училищемӕ, ӕма’й фӕцӕй 1930 анзи.
Æригон къамандири службӕ кӕнунмӕ рарвистонцӕ Тифлисмӕ 66-аг бӕхгин ӕфсади полкъи ӕхсаргӕрдтӕй тохгути взводи разамонӕгӕй.
1932 анзи фӕззӕги Фӕскавкази Ӕфсӕддон Округи штаб Худӕли - фурти иснисан кодта Кавкази рагъбӕл Рокъи ӕфцӕги зин цӕуæн нӕдтӕ сгарӕг къуари хестӕрӕй. Гъӕугӕ хатдзӕгтӕ скӕнгӕй къуар е хӕс исӕнхӕст кодта.
Еци анз Сомехи зӕнхитӕбӕл цудӕнцӕ Фӕскавкази Округи æфсӕддон ахуртӕ. Архайдтонцӕ си фӕсарӕйнаг иуазгутӕ дӕр - немуцӕгтæ, англисӕгтӕ. Адтӕй се'хсӕн зундгонд иуазӕг фон Манштейн Фашистон вермахти федӕни фельдмаршал.
Хъӕбӕр аразиӕй байзадӕнцӕ иуазгутӕ ахуртӕ фӕууингӕй, уæлдай цӕмӕдесдӕрӕй ӕ цӕстӕ дардта немуцаг иуазӕг. Еци ахурти ӕ зонундзийнӕдтӕ гъуддаги равдиста ӕригон къамандир Худӕли - фурт. Хъӕбӕр ибӕл ӕнвӕрстӕй Фӕскавкази Æфсӕддон Округи къамандӕгӕнӕг Смолин И.И. Ӕ цӕстӕ ӕривардта Харитъони циргъзунд ӕма арӕхстдзийнадӕбӕл ӕма ӕ хæццӕ унаффитӕ кодта.
66-аг кавполкъ ӕййивд ӕрцудӕй Ленингради ӕфсӕддон округмӕ арӕнтӕ гъӕуай кӕнунмӕ. Худӕли-фурт ба байзадӕй Тифлиси 2-аг Кавбригади штаби ӕгустӕй. Фалӕ е адтӕй рӕстӕгмӕ. "Адӕми знаги" фуртбӕл радон хахуртӕ сӕ нисанбӕл не сӕмбалдӕнцӕ. Фӕскавкази ӕфсӕддон округи къамандӕгӕнӕг Смолин ахурти рӕстӕг базудта Харитъони хуарз минеугутӕ ӕма ин банхус кодта, цӕмӕй Худӕли-фурт ӕ полкъмӕ ӕрвист ӕрцӕуа Архангельскмӕ.
1938 анзи бӕхгин ӕфсади сӕйраг инспекций фӕндонмӕ гӕсгӕ Худӕли-фурт нисангонд ӕрцудӕй полкъи скъолай сӕргълӕууӕгӕй, Советон Цӕдеси федӕни маршал Рокоссов ский къамандӕ кӕмӕн кодта, еци 5-аг Кавкорпуси 25- аг Кавдивизий 14-аг Кавполкъи къамандири хуӕдӕййевӕгӕй.
1940 анзи Харитъони иснисан кодтонцӕ Манчегорски 14-аг армий 52-аг дивизий 62-аг ӕсгарӕг батальони къамандирӕй. Фидибӕсти Устур тугъд Худӕли-фурти ӕрӕййафта метбурдӕнтӕ, гъизт уазалтӕ ӕма даргъ зумӕгтӕ кӕми адтӕй, фӕсполярий еци рауӕн службӕгӕнгӕй.
1941 анзи 29 июни Нигулӕн Лици райони, инӕлар Никитин зонгӕ кодта майор Худӕли-фурти тугъдон уавӕри хӕццӕ, сӕумӕй немуцаг фашистон ӕфсӕдтӕ советон арӕнтӕбӕл ӕрбампурстонцӕ Фӕсполяримӕ ӕма райдӕдтонцӕ ардигӕй сӕ ниббурститӕ. Æзнаг лӕборуй Мурманскмӕ. Нӕ батальони ихӕс ӕй, цӕмӕй бӕлвурдӕй исбӕрӕг кӕнӕн, цӕмӕн, циуавӕр тухтӕй ӕма кӕбӕлти ӕмпурсуй ӕзнаг. Нигки хъӕбӕрдӕр нӕ базонун гъӕуй, сӕйраг цӕф кумӕ арӕзт ӕй ӕма Фронти кӕци хӕййӕй тохунцӕ. Уой ку исбӕрӕг кӕнӕн, уӕд курмӕги ӕзнаги хӕццӕ нӕ тохдзинан, ку нӕй базонӕн, уӕдта берӕ тог никкалдзинан.
Худӕли-фурт, 112-аг топпӕйӕхсӕг полкъ ци тохӕн бунӕтти ӕвӕрд адтӕй, уоми сгарӕг батальони сгарӕг роти хӕццӕ бампурста 244,0 бӕрзӕндтӕмӕ, ӕма фиццагдӕр ӕрӕнцадӕй бӕрзӕнди цъонкбӕл 2 гитлеровони уацари райсгӕй. Уацайрӕгтӕ рахабар кодтонцӕ, 3 боней ӕмгъудмӕ советон ӕфсӕдтӕ дӕрӕнгонд ке ӕрцӕудзӕнцӕ, немуцаг корпус "Норвегия"-й къамандир фюрери уарзон инӕлар Дитл ке ӕй, 3 бонемӕ син сор къӕбӕр ке равардтонцӕ, уӕдта - Мурманск - уоми ба 3 бони уолӕфт ӕма игъӕлдзӕг цард.
Уотемӕй Худӕли - фурт исбӕрӕг кодта, ӕзнаг Мурманскмӕ надбӕл ке ӕривардта 2-аг хуӕнхаг дивизий 136 ӕма 137-аг хуӕнхаг топпӕйӕхсӕг полкъитӕ.
Чайри цадӕй хонсарӕрдӕмӕдӕр архайдтонцӕ немуцаг 3-аг хуӕнхаг топпӕйӕхсӕг дивизий полкъитӕ. Немуцаг егертӕ уӕлдӕфӕй уӕззау цӕфтӕ никкодтонцӕ дивизи ӕма ӕрхъола кодтонцӕ къамандӕгӕнӕн пункт ӕма 52-аг дивизий штаб.
Бастдзийнадӕ ма ке куста, уомӕ гӕсгӕ инӕлар Никитин Фегъосун кодта ӕсгарӕг батальони къамандир майор Худӕли-фуртӕн, немуцаг егертӕ 200-300 м бӕрцӕ ке ӕрбахӕстӕг æнцӕ, ӕма ин равардта бардзурд, цӕмӕй сӕмӕ ӕнхусмӕ фӕззинна. Харитъон раззӕгти ӕхсӕн уогӕй, кӕрӕнтти ба взводти къамандирти ӕривӕргӕй ӕсгарӕг роти рух разилдта ӕма ӕнӕнгъӕлти ниххӕрӕ кодта ӕзнагбӕл. Æфцӕг ракӕдзосӕй, дивизи ба фӕййервазтӕй. Еци бон ӕгасемӕй бӕгъатӕрдӕрӕй ӕхе равдиста 62-аг ӕсгарӕг батальони къамандир, майор Худӕлти Алексейи фурт Харитон. Уой сӕрӕн æма дӕсни архӕйдтити фӕрци дивизий къамандир иналар-майор Никитинӕн ӕ къохи бафтудӕй дивизий хӕйттӕ ӕрбам бурд кӕнун тугъдтити тӕккӕ къурцдзӕвӕни. Нигки ма Худӕли-фуртӕн бантӕстӕй ӕфцӕгбӕл ӕрфедар ун - е ба адтӕй Мурманскмӕ бацӕуӕни тӕккӕ ахсгиагдӕр бунат. 1941 анзи 13 июли майор Худӕли-фурти иснисан кодтонцӕ 52-аг топпӕйӕхсӕг батальони 58-аг полкъи къамандирӕй.
Тӕккӕ фиццаг бон полкъӕн къамандӕгӕнгӕй майор Худӕли-фуртӕн ӕ къохи бафтудӕй немуцаг егерти хӕрӕ æруорамун устур зиантӕ син искӕнгӕй ӕма сӕ батардтонцӕ сӕ раздӕри позицитӕмӕ.
Гъе фалӕ, дивизи гъӕуай кӕнунӕн устур ахадундзийнадӕ кӕмӕн адтӕй, еци бӕрзӕндӕ 314,9 изадӕй ӕзнаги къохи. Дивизий къамандир Худӕли-фуртӕн бардзурд равардта, цӕмӕй цийфӕндуй зинӕй дӕр бӕрзӕндӕ тагъддӕр ист ӕрцӕуа.
Бӕрзӕндӕн ӕ цӕхгӕр хонсар - хорискӕсӕнфарс цудӕй Дикойи цадӕрдӕмӕ. Цӕмӕдӕргӕсгӕ ӕзнаг еци фарс зинвадат æнгъӕл адтӕй ӕма'й уӕлӕнгӕйтти гъӕуай кодта, еу ефстагмӕ си игъустӕнцӕ топпи гӕрӕхтӕ. Гъе еци фарс исӕвзурста Худӕли-фурт ӕ хӕрӕй сӕйраг объектбӕл знагбӕл хинӕй рацӕугӕй. Пъланмӕ гӕсгӕ хӕрӕ цудӕй искӕсӕн ӕма хонсар-хорискӕсӕн цъонккитӕй еци-еу рӕстӕг. Дессаг е адтӕй, ӕма хӕрӕ гъӕуама райдӕдтайдӕ тӕккӕ цъонккӕй, ӕзнаг ӕнгъӕл кӕми нæ адтӕй, уоми.
1941 анзи 18 июли ӕхсӕви 4 сахаттебӕл райдӕдта хӕрӕ 314,9 бӕрзӕндӕ байсунбӕл. Худӕли-фурти полкъ фӕууӕлахез ӕй ӕма ӕрфедар ӕй бӕрзӕнди. Еци рауӕн фашисттӕй, фӕммард ӕй 300 салдати ӕма афицери. Мурманскмӕ дуккаг ниббурст фӕммӕнгӕй.
Худӕли-фурти еци ӕнтӕстдзийнади туххӕй газет "Красная звезда" финста уац "Хӕрӕ райдӕдта сӕударӕй", зӕгъгæ, уоми. 1942 анзи 3 мартъий мӕййи дӕлболкъон Худӕли-фурт нисангонд ӕрцудӕй 14-аг топпӕйæхсæг дивизий къамандирӕй. 1942 анзи 10 июли 14- аг армий къамандӕгӕнӕги бардзурдмӕ гӕсгӕ болкъон Худӕлти Харитъон ӕхемӕ райста 10-аг гвардий топпӕйӕхсӕг дивизий къамандӕкӕнунадӕ.
1942 анзи 27 ноябри ССРЦ Адӕмон къамиссаради цӕдеси унаффӕмӕ гӕсгӕ Худӕлти Алексейи фурт Харитонӕн лӕвӕрд ӕрцудӕй инӕлӕр-майори кадгин ном. 10-аг гвардийи топпӕйӕхсӕг дивизи Мурманск ке багъӕуай кодта ӕзнагӕй, уой, туххӕй ин лӕвӕрд ӕрцудӕй Сурх Турусай орден.
1944 анзи октябри мӕйи Фӕсполярий райдӕдта Петеамо-Киркинесси ниббурст. Операций астӕумагъз адтӕй 14-аг армий, 10-аг гвардий топпӕйӕхсӕг дивизи ба адтӕй, сӕйраг цӕф ка никкӕндзӕнӕй ӕзнаги позицитӕн, е.
1944 анзи 8 октябри изӕрӕрдӕмӕ 10-аг дивизи е хӕс исӕнхӕст кодта: дивизий хӕйттӕ ӕрфедар ӕнцӕ хонх Малый Кариквайвишь, ниддӕрӕн кодтонцӕ 1372 хуӕнхаг топпӕйӕхсӕг полкъи дӕлхайӕдтӕ ӕма рацудӕнцӕ Титовкӕ - донмӕ.
12 октябри дивизи ӕзнагӕй байста Луостери горӕт, 15 октябри хонсарӕрдиги бабурстонцӕ Петсалой горӕтмӕ. 22 октябри Дивизи бахизтӕй Норвегий арӕнтӕй ӕма ӕхсӕви 3 сахаттебӕл бабурстонцӕ Киркинесси хонсарварсмӕ.
Норвегиӕгтӕ арфӕ кодтонцӕ нӕ салдӕттӕн. Гвардионтӕ норвегийӕгтӕй берети фӕййервӕзун кодтонцӕ мӕлӕтӕй. Горӕти мэр ӕ дзубандий зӕрдхъурмӕй загъта: "Мах норвегиӕгтӕ некӕддӕр ферох кӕндзинан сумах - нæ советон ӕнсувӕртӕ, нӕ ервӕзунгӕнгутӕ".
Еци бонти дивизий газет "За победу"-й фӕззиндтӕй зарӕг "Цӕгатаг гвардионтӕн" зӕгъгӕ. Ниффинста 'й поэт Л. Ошанин. Зарӕг уайтӕкки дӕр рапурх ӕй акъоппитӕбӕл, ӕма’й ӕфсӕддонтӕ зардтонцӕ.
Цӕгат Норвеги ку иссӕребарӕ’й, уӕд Худӕли-фурт идарддӕр тохуй дуккаг Белорусаг фронти 19-аг армий хӕйтти уӕвӕг 10-аг гвардион дивизий Искӕсӕн Помераний, Польшӕ ӕма Германи фашисттӕй иссӕребарӕ кӕнунбӕл.
19-аг армий сӕйраг тухтӕ ци'рдӕмӕ арӕзт адтӕнцӕ, еци'рдигӕй 10-аг гвардион дивизи барӕмугъта ӕзнаги федӕрттӕ ӕма фиццаг бон ӕ къохи бафтудӕй 12 км бӕрцӕ ӕзнаги позицитӕ байсун, изӕрӕрдӕмӕ ба 45 км бӕрцӕ ӕма рацудӕй горӕт Руммельсбургмӕ. "Помераний вал" ке худтонцӕ, уой федӕртти еци горӕт адтӕй сӕйраг ӕнцайӕн пункт /ӕзнаг ӕ зӕрдӕ кӕбӕл дардта, уӕхӕн/. Гъӕдтӕ, цадитӕ, ӕнцон цӕуӕн нӕдтӕ, рагацау цӕттӕгонд будуйрон федӕрттӕ ӕзнагӕн фадуат лӕвардтонцӕ бунати ӕрфедар унӕн ӕма советон ӕфсӕдти нихмӕ истохунӕн.
Горӕт багъӕуай кӕнунмӕ ӕрбампурстонцӕ "Полицай" ӕма СС-и сӕрмагонд хӕйттӕ, уой уӕлӕмхасӕн ӕрбакодтонцӕ фолькштурми 203, 549-аг дивизитӕ ӕма СС-и хӕйтти 41-аг танкити къуар. Ӕзнаг ӕхе цӕттӕ кодта карз тугъдтитӕмӕ.
1945 анзи 2-аг мартъий 19-аг армий къамандӕгӕнӕги хуӕдӕййевӕг Трубников К.П. инӕлар Худӕли-фуртӕн загъта, ӕзнаг ин ӕ дивизий нихмӕ ӕхе хъӕбӕр ке бацӕттӕ кодта, уой ӕма'й бафарста:
- Да дивизи абони цӕмӕннӕ байахӕста Руммельсбурги горӕт? - Уӕдта ма бафтудта. - Дӕ зӕрдӕбӕл дарӕ, тактикон ӕгъдаумӕ гӕсгӕ Руммельсбург ӕзнаги къохтӕй байсун ӕй устур ӕнтӕстдзийнадӕ.
Инӕлар Худӕли-фурт исфӕндӕ кодта е знагбӕл хинӕй рацӕун ӕма фиццаг истохун.
Æхсӕви фудрӕстӕг нецӕмӕ ӕрдаргӕй дивизи райдӕдта ӕхе ниббурстмӕ цӕттӕ кӕнун. Еци рӕстӕг штабмӕ ӕрбакодтонцӕ дууӕ немуцаг уацайраги ӕма син етӕ радзурдтонцӕ фашистти пълантӕ. Æсгаргутӕ донвӕдбӕл байервазтӕнцӕ горӕти центрмӕ, уой хуӕд фӕсте еумӕйаг нисанмӕ гӕсгӕ 10-аг топпӕйӕхсӕг дивизий гвардионтӕ исхӕрӕ кодтонцӕ горӕти аллирдигӕйти.
Ӕмбесӕхсӕви гвардионтӕ горӕт Руммельсбург ракӕдзос кодтонцӕ фашисттӕй. 1945 анзи 3 мартъий 9 сахаттебӕл Мӕску салют лӕвардта инӕлар-майор Худӕли-фурти гвардионти кадӕн, горӕттӕ Руммельсбург ӕма Пилянов ӕзнагӕй ке байстонцӕ, уой туххӕй. Уӕлдӕр Сӕйраг Къамандӕгӕнӕг дивизий хӕйттӕн устур арфӕ ракодта. Тактикон ӕгъдаумӕ гӕсгӕ еци горӕтти байст уавӕр фенцондӕр кодта.
1945 анзи 5 мартъий фронти галеу фланги ӕфсӕддонтӕ ӕзнаги искӕсӕн - померайнаг хӕйтти ӕфсӕдти дууӕ ӕмбеси фӕккодтонцӕ. Уой фӕсте карз тугъдтити фӕрци гвардионти къохи бафтудӕнцӕ горӕттӕ: Штольц, Лауенберг, Картузи, Тчев, Вейхерово, Пужук, Гдыней, Россе-Мокрац, Мизуров, Свинемонде.
ССРЦ Сӕйраг Совети Президиуми унаффӕмӕ гӕсгӕ 10-аг топпӕйӕхсӕг гвардий дивизийӕн лӕвӕрд ӕрцудӕй Сурх Æстъалуй орден, ӕма'й исхудтонцæ 10-аг гвардион дууӕ Сурх Турусай, Александр Невскийи, Сурх Ӕстъалуй орденгун печенскаг топпӕйӕхсӕг дивизи. Инӕлар-майор Худӕли-фурт кӕмӕн къамандӕ кодта, еци ӕфсӕддонтӕн Уӕлдӕр Сӕйраг Къамандӕгӕнӕг раарфӕ кодта 2 хатти.
Тугъд фӕцӕй, советон адӕм фӕууӕлахез ӕнцӕ фашистон Германбӕл ӕма бабӕй райдӕдтонцӕ сабур цард аразун. Худӕли-фурт идарддӕр службӕ кодта ӕфсӕддон хӕйтти.
50-аг ӕнзти бабӕй нӕуӕгӕй уӕлдӕр хецауади номбӕл финсун райдӕдтонцӕ хахуртӕ Худӕли-фуртбӕл сауӕнгӕ гъӕуайкӕнунади Адӕмон къамандӕгӕнӕг Ворошилови уӕнгӕ. Кӕрӕй-кӕронмӕ фӕдзурдта ӕ хабӕрттӕ Худӕли-фурт къамандӕгӕнӕгӕн, нӕ басос кодта, ӕ фидӕ 1937 анзи ахӕст ке адтӕй, уой дӕр. Къамандӕгӕнӕг фӕббоз ӕй Харитонӕй е'нӕхийнӕ радзурди туххӕй, ӕма Худӕли-фурт байзадӕй ӕфсӕддон кадрти косгӕ.
Ӕ бӕгъатӕрдзийнадӕ, нифс ӕма лӕгдзийнади туххӕй Советон хецауадӕ Худӕли-фуртӕн исаккаг кодта Ленини, цуппар хатти Сурх Турусай, Суворови номбӕл 2-аг къӕпхӕни, Сурх ӕстъалуй ордентӕ, Норвегий тӕккӕ уӕлдӕр орден "Святого Олафа степени Командорская звезда" ӕма 15 майдани.
Тугъди фӕсте дӕр Худӕли-фурт къамандӕ кодта 10-аг топпӕйӕхсӕг гвардий дивизийӕн, гъомбӕл кодта ӕфсӕддонти нӕуӕг фӕлтӕр.
1948 анзи Худӕли - фурт фӕцӕй Фрунзей номбӕл ӕфсӕддон академи ӕма ӕ дивизий хӕццӕ, службӕ кодта Брести горӕти. 1954 анзи ССРЦ Ӕфсӕддон тухти генералон штаби рази ци анзиккон курситӕ адтӕй, уоми ахуртӕмӕ байгъуста еу анз, уӕдда ӕрвист ӕрцудӕй горӕт Гродномӕ 9-аг топпӕйӕхсӕг гвардион корпусӕн къамандӕгӕнӕгӕй.
1955 анзи Худӕли-фуртӕн лӕвӕрд ӕрцудӕй ӕфсӕддон цин инӕлар - лейтенант ӕма 1956 анзи апрели мӕййи нисангонд ӕрцудӕй топпӕйӕхсӕг корпуси къамандӕгӕнӕгӕй Архангельскмӕ.
Тугъди фӕлтӕрддзийнадӕ, хиццаг зонундзийнӕдтӕ ӕфсӕддонти нӕуӕг фӕлтӕр ахур ӕма гъомбӕл кӕнуни гъуддаги еци минеугутӕ бахинцгӕй Худӕли-фурти иснисан кодтонцӕ Приволжски ӕфсӕддон округи къамандӕгӕнӕги хуӕдӕййевӕгӕй.
1961 анзӕй 1966 анзмӕ Худӕли-фурт адтӕй Мӕскуйаг ӕфсӕддон округи къамандӕгӕнæги хуӕдӕййевӕг. 1966 анзи декабри Худӕли-фурт, е'нӕнездзийнадӕмӕ гӕсгӕ рацудӕй запаси. Ниффинста ӕма рауагъта цалдӕр киунуги ӕма берӕ уацтӕ тугъдон хабӕртти туххӕй.
Запаси уогӕй активонӕй архайуй ӕхсӕнадон царди. Косуй нӕуӕг фӕлтӕр гъомбӕл кӕнуни гъуддагбӕл.
Нӕ бӕсти алли кӕрӕнттӕй тӕхунцӕ арфи финстӕгутӕ Худӕли-фуртмӕ ӕ тугъдон ӕмбӕлттӕй.
Худӕлти Алексейи фурт Харитъон ӕ ихӕс Фидибӕсти рази исӕнхӕст кодта кадӕ ӕма намуси хӕццӕ.
Худæлти Темирсолтан
См.: Ирæф №4, 1995 анз.
